Hebreos 8 - Wounaan Meu

Ẽwandamau ich Chaai pʉibarmuata iek iiur deetarr

¹ Mua pãrag ajapcha khap apim khõsi chirʉmʉn mʉgau: Chadcha Cristo thumaam khʉʉn khãaijã ʉ̃rpainaa maach kõit iekhaajemta ʉ̃gthar Ẽwandam dʉi ãba chi Porkha i juachaar gar jup sim.

² Mʉig eegar phadnaan porou Aai i jeeujem deg aajerrjo, ichta ʉ̃gthar Ẽwandamag jeeujem eejã chi Porkhanaa maach thumaam khʉʉn kõit iekhaajemkha sim. Mag ʉ̃gtharm Aai i jeeujem di chan mʉig eegarmjo sĩi õrau eutarr khaba, ich Ẽwandam juau.

³ Ich jãg phadnaan poroujã Ẽwandamag nem inagdam deenaa nemchaain khechnaa õor kõit Ẽwandamag jeeumkhĩirta jʉr aaujeewai, Jesucristooujã ĩchab am denjo Ẽwandamag nem inag deeju aai sĩejim, mag phadkhanaa maach kõit iekhaajem khaag. Maagjerr aawai iruajã chadcha deejim; mamʉ irua ichpaita nem inagdamjo deejim.

⁴ Í agtha maach ee mʉig eegarta sim akhiin, mag phadjã khaba sĩekham. ¿Jãgwi? Moiseeu ley deetarr gaai jaau simjo ya Ẽwandamag nem inagdam deenaa nemchaainjã khechnaa irig jeeujem phadnaan khapan thʉnaawaima.

⁵ Ẽwandamau Moiseeg mʉig eegarmua ichig jeeumkhĩir di eupi jaauwaijã irig, “Ajapha oonaa Sinaí durrsĩ gaai mʉchdeu pʉchig ʉ̃gtharm di oopitarrjoota eubá” ajim anʉm. Magtarr aawai mag phadnaanau mʉig eegarmua õor kõit nem wau durrumjã sĩi ich Jesuu ʉ̃gthar Ẽwandamag jeeujem degcha wau simjo ajuuta ẽkha durrum, mamʉ pod agjocha wauba nʉm.

⁶ Magua, Jesuuta ʉ̃gtharmua maach kõit iekhaajeewai irua nem wau simta mʉig eegarm phadnaanau õor kõit nem wau nʉm khãaijã ajapcha sim. Maguata ĩchab mag ichdeu maach kõit nem wau sim gaaimua ʉu ĩsin ich Ẽwandam aarcha barju aai api sim. Ajapcharan ich Jesús gaaimua Ẽwandamau õor dʉi iek deetarrta nawe Moisés dʉi iekhawi ley deetarr khãaijã ajapcha sim, mag gaaimuata ʉu Ẽwandamau maach peerdʉ aaujeewai.

⁷ Mag nacha Ẽwandamau maach jooin dʉi iek deewi ley deetarrta ajapcha amuan, ewag pawiajã tag irua ich garmua deeu õor dʉi iek deebakham.

⁸ Mamʉ ichdeu oowai õrau pod amach iekhatarrjo mag ley ʉʉrkha auba ni chi leíujã ichdeu khõsimjo õor ajaug paa auba sĩerr aawai, ich Ẽwandamaupai magjim anʉm: “Jãg sĩi awi mua ũwaai mʉch garmua deeu Israel durr nʉm khʉʉn dʉi iek deewi Judá durr nʉm khʉʉn dʉijã iek deejugui” ajim anʉm; “ajapcharan israelnaan amach thumaam khʉʉn atheema.

⁹ Mag mua deeu am dʉi iek deebarm chan Egiptomua mʉchdeu am wai obertarr khur maach iekhatarrjo khaba aphobaadeewai mʉchdeu am isegtarrjo tag am isegbamgui” ajim anʉm ich Ẽwandamau.

¹⁰ “Deeu mua israelnaan dʉi iek deebarmʉn mʉgta ajugui” ajim anʉm: “Mʉchdeu am dʉi iek deebarmʉn mua warre am thãar ee phã sĩubarmjota ajugui” ajim anʉm “mʉch ipierraa am khõsi ipierraa amkhĩir. Mʉchta am Ẽwandamkha chirsiewai amach jũrr mʉ õorkha nʉisiju.

¹¹ Magbarmʉn thum chaain bʉ̃rʉʉmdamaupa mʉ khakhapdo thʉnʉisiju aawai tag dich do ãbam eem khʉʉnagjã jaauba, ni dich khodnaanagjã mʉ iek jajaau abaju, tag magju igba aphobaadeju aawai.

¹² Am mag nʉisim aig ĩchab amau mʉ dau na nem khaigbam waaujerrjã mʉchdeu chugpaapʉiju. Mag chugpaabapʉim chan mua tag magʉm iekjã igba, warre ich mag khĩir okhoopʉiju” ajim aajem ich Ẽwandamau. (Jr. 31:31-34)

¹³ Mag Ẽwandamau iek iiur deeju a iekha sĩerr aiguin, ya chi nacharam tag serbiiba aadeewai jũrr iek iiurta sĩuju jaau sim ajim. Maadeu khaphʉ nʉm, nem inagta ya jooiraanaa serbiiba aademʉn sĩi barpʉijupaita sim. Ich agjota abajieb Moiseeg ley deetarrjã.