Hebreos 7 - Wounaan Meu

Melquisedec phadkha sĩerrarrjo Jesuuta ich mag Phadkha sĩerrʉm

¹ Mag maach Por Jesucristo Melquisedecjo sim a chirʉmʉn mʉgau: Maach jooin Abrán khararr agtha ʉu pʉʉrba khitʉm jaar, Melquisedecta phobor Salem anʉm eem rey anaa ĩchab phadkha sĩejim aajem, ich Ẽwandam cha ʉ̃gthaa phuu nʉmua phadkhapitarr. Mag jaar biek ãb jooi Abrán reinaan dʉi werbʉwi ich garmua reinaan podpʉiwi urum ee, chi Melquisedec i khĩirphee mawi ãba thẽubaimam aig, i bendiciemamua irig, “Ĩsmua atag ʉu pʉ Ẽwandamau eeg oo wai chitaju” ajim anaabá chi Abranag.

² Magbaawai Abranau mag reinaan dʉi werbʉwi ichdeu am podpʉiwi, am juagam nem phe urarr eem chi décima parte deejim aajem chi rey Melquisedeeg. Mag rey thʉ̃r Melquisedec aawai, “thumaam khʉʉn dʉi agcha nem waaujem rey” aawaiu. Mag chi phobor thʉ̃r Salem aawai, maach meúan “khõinaa” a simʉu. Mag “khõinaa” anʉm phobor eeta reikha sĩerr aawai chi Melquisedec igwia õrau “õor khõinaa phe wai sĩejem rey” aajeejim.

³ Ẽwandam iek phã sim gaai bʉ̃ʉrjã jaauba sim, khai ajĩ i aai wa khai ajĩ i ãd, bʉ̃ʉrjã am jooinjã jaauba sim. Agjo bʉ̃ʉrjã i thaabatarrjã jaauba, ni i meetarrjã jaauba sim. Ajapcharan mag phaden peer Ẽwandam Iewaa Cristo dʉi agjoota sim; maguata ichjã Cristojo ich magta phadkha sĩerrajim.

⁴ Pãade ũrbat jãga sĩejĩ Melquisedec: Í chan sĩi parhoobam phad khabajim. Mag nʉm dʉi ĩchab chi Melquisedecta jooi Abrán khãaijã ʉ̃rpai sĩerr aawai chi Abranau, ichjã chi thethem arr ãba, mag reinaan dʉi werbʉwi ichdeu gan aumarr eemjã irig chi décima parte deeb khaba deejim aajem.

⁵ Pãrau khaphʉ nʉm, Moiseeu ley phã pʉarr gaai jaauwai, Levinaanta phadnaankha nʉm khʉʉnaun, tagam khʉʉn amach khapeen israelnaan thum jooi Abrán chaain ewagam khʉʉnkha nʉm gaaimua wir aig amach khodnaan ãba, ichiita amau nem wai nʉm eem chi décima parte amag jeeub khaba jeeuju aai naajim aajem.

⁶ Mamʉ chi Melquisedec Levinaan thʉ̃r eem khaba arr aawai chadcha Moiseeu jaautarrjo ich paatem chi décima parte jeeuju khaba sĩejim jooi Abranag. Mag phadkha sĩerrjã Levinaan khaba sĩejieb mamʉ, ichiita Abranag jeeubaawai jooirau deejim aajem ich den eem chi décima parte. Mag Melquisedeeu i bendiciewai, ya Ẽwandamau ag nawe ich bendicietarr ãba, Abranau ʉdʉraa deeu ich bendiciepijim anaabá.

⁷ Maadeu khaphʉ nʉm, chi ich garmua warm bendicii simta chi bendición au sim khãaijã ʉ̃rpai sim. Am mag narr aig, ¿khaíu mag Melquisedecta Abrán khãaijã jua eegpai sĩejim abarju?

⁸ Chadcha mʉig eegar chi décima parte jeeujem khʉʉnan ĩchab maachjo dajẽkhu deetarr khʉʉnau; mamʉ Ẽwandam iek chi phãm gaai Melquisedec jaau simʉn, chi iwamta jaau sim, bʉ̃ʉrjã meejimjã aba.

⁹ Mag Abranau Melquisedeeg chi décima parte phaagwai ewag pawi Levinaan khaju khʉʉn agtha thaababa naajieb mamʉ, ya warre am kõitpata phagbapʉimjo ajim. Magua ĩs ewag pawi oowaijã amach paarmua chi décima parte jeeuju khʉʉnaupata warre Melquisedeeg phagjierram aju aai nʉm, am tathooyau am kõit phagtarr aawai.

¹⁰ Chadcha mag Melquisedeeu Abrán khĩirphee mawi i bendiciewai chan agtha chi Levinaan ãbjã chukhu ajieb mamʉ, ichí ich gaaimuata ewag pawiajã makhʉʉn Levinaan paarpaju ajim. Magta, ich Melquisedecta chi Abrán khãaijã ʉ̃rpai sĩerr aawai ichta ĩchab Levinaan khãaijã ʉ̃rpai ober sim.

¹¹ Ya ag khur ewag nassi pawi Ẽwandamau Moiseeg ley deewiata chi Levinaanjã phadnaankha nʉisijim. Chi Levinaan eem phadkha narr khʉʉn, nacharam phad Aarón khararr ag chaain ewagam khʉʉn ajim. Mamʉ makhʉʉn phadnaanau mag ley gaai jaau sim ʉʉrkha nʉm khʉʉn ajaug paajerr akhiin, Ẽwandamau deeum phad ich Iewaa makhʉʉn khãaijã ajapcharam pʉibakham. Mag irua pʉitarr chan Aaronjo khaba, ag khãaijã ajapcha Melquisedecjomta pʉijim; ma ich Jesucristo ajim.

^12-13 Mamʉ Ẽwandam iek phã sim gaai jaauwai, mag phad iiur, Cristo, Levinaan khod khaba Judanaan eemta oberju atarr aawai, chadcha ich magta ajim, mag Judanaan eem chan phad ãbjã oberba aajerrta. Mag Cristo phadkhabaadeewai Levinaan eem phadnaan tag serbiiba aphobaadejim. Magbaadem dʉi ĩchab Cristoou iek iiur jaaubaadeewai mag ley warrgarm phadnaanau ʉʉrkhapiejerrjã tag maadeu nem igba aadejim.

¹⁴ Mag phadnaan khapiewaijã, mag Judá chaain ewagam khʉʉnag chan phadnaan khaju aai nʉmjã aba arr aawai, maadeu khaphʉ nʉm, ãba maach Por Jesucristo ich appaita Judanaan eem phadkha oberjim.

^15-16 Mag phad iiur Ẽwandamau maach athee pʉitarrjã sĩi mag ley nachgarm gaai jaau sĩerrjo khaba, Melquisedecjo Levinaan khod khaba simta beetarr aawai, merag chukhu sim, chadcha magbarm aig mag ich pierrumua warre chi phadnaanau waaujerr phidagjã ya tag wauju khaba aadem dʉi chi leijã tag sĩi warramjo khaba sĩsim. Irua chadcha cambieju aai sĩejim, í mag makhʉʉnjo khũchpai phadkhawi meeg athee khaba ich mag meejã meeba phadkha sĩerraagta beetarr aawai.

¹⁷ Í mag ichta ich mag phadkha sĩerraju igwi, Ẽwandamau irig, “Pʉʉn ich jãg Melquisedec phadkha sĩerrarrjo, ich mag phadkha chitʉm iekhau” ajim. (Sal. 110:4)

¹⁸ Chadcha magta Moiseeu ley deetarr gaai phadnaan khapiju jaau sim leijã warre Ẽwandamau chaaur ausĩubarmjo ajim, õor peerdʉ awaagjã serbiiba sĩerr aawai.

¹⁹ Mag leíu pod õor ãbjã Ẽwandam na ajaug paa auba aajeejim. Mamʉ ya ĩs Cristo maach kõit iekhaajem chaar wai nʉm gaaimua maadeu khaphʉ nʉm, ya ĩs chan tag warramjo khaba sim; ĩsin Ẽwandamau maach ich aar oberju ayaa apinaa maach dakhata sĩejem.

²⁰ Mag Moiseeu ley phã pʉarr gaai jaau simjo Levinaan phad khapiewai chan Ẽwandamau bʉ̃ʉrjã juraa iekhaba, sĩi am aaijã phadnaan arr aawaita ich mag phad khapiejeejim.

²¹ Mamʉ Ẽwandamau maach Por Cristoog phad khapiewai chan magba, ichdeuchata ich tho iekhamamua Cristo igwi, “Pʉʉn ich jãg phadkha chitʉm iekhau” ajim. “Mʉchdeuta mag juraanaa iekha chiraawai naspawiajã mʉ mag iekhabajim abam” ajim Ẽwandamau. (Sal. 110:4)

²² Mag Jesuuta ich mag maach kõit iekhaajem phadkha sĩsierr aigmua, ichdeuta chadcha khap apiejem, ĩs Ẽwandamau maach dʉi iek dee simta nacharam ley Moiseeg deetarr khãaijã ajapcha sim, mʉg iek iiuriuta Ẽwandam dau na maach ajaug paapäaijeewai.

²³ Mag agtha Jesús beeba aawain phadnaan khapanta iigjeejim, ãb meebaadem jũrr deeumua ag phidag aumaag.

²⁴ Mamʉ mag phad iiur Jesús chan meejã meeba ich mag sĩerraawai, mag i meebaawai ãbmuajã i phidag auwi jũrr maach kõit jeeujujã abam.

²⁵ Maguata ich gaaimua Ẽwandam jʉr nʉm khʉʉnan, irua peerdʉ aub khaba peerdʉ auwi ich mag ich denkha wai sĩsiejem. Mag ichjã ich mag iiu sĩerraawai ich iek ʉkha nʉm khʉʉn kõitjã ich mag ichdeuta Ẽwandamag jeeu nʉrraju.

²⁶ Magua ichta chadcha maachdeu ig narr phad khabahab, maach kõit iekhaajem chaar. Ich chan nacharam khʉʉnjo khaba aawai bʉ̃ʉrjã pekau chukhu khitʉm; khaibagjã chukhu, ni bʉ̃ʉrjã chikham khaigba ajojoopaijã khaba, maachjo pekau pomkham khʉʉn eemjã khaba sim. Mag sĩewai ichta nem thum ʉ̃gtharm magwe thʉnʉm khãaijã ʉ̃rpai apijim Ẽwandamau, ich dʉi ãba.

²⁷ Magba aawai i beeju na phadnaan thʉnarr khʉʉnaun ed eepierr nemchaain khechnaa nacha amach pekau kõit jeeuwiata jũrr õor pekau kõitjã jeeujeejim. Mamʉ Jesuu chan amjo khaba aawai, nemchaainjã khekhech aba, ichta biek ãbpai ʉdʉraa õor pekau kõit ich thõopijim. Mag biek ãbpai ichta thõopitarrau ya tag õor pekau kõit nemchaain thõoju khaba aadejim.

²⁸ Warran Moiseeu ley phã pʉarr gaai jaau simjo phadnaan khapieg jʉr aauwaijã maachjo pekau pom khithee arr khʉʉnta jʉr aaujeejim. Mamʉ mag ley jooi deetarr khur nassi pawi Ẽwandamau ichdeupai ich gaai juraanaa ich Iewaa bʉ̃ʉrjã pekau chukhu khitʉmta thumaam khʉʉn Porkhapinaa maach kõit iekhaajem khapitarran, mʉg atag pawiajã ichta phad chi ajapcharamkha sĩerrʉmua dajẽgjã dajẽgba ich mag maach kõit iekhamkhĩir ajim.