Hebreos 6 - Wounaan Meu

¹ Keena, maguata maachin warag naagta wet ahaug maju, warag i iek khaugmamua ag gaaita jooinpaag. Mamʉ magaag chan Cristo iek jaau nʉm ũurwai nacha maachdeu khaugtarrpaita khaphʉ wenʉrraju abam. Jãg sĩi: dichdeu nem khaigbam waaujerr isegwi Ẽwandamag chugpaapi jeeu nʉmpai khaba, dichdeu Ẽwandamau maach peerdʉajem iek ʉkha nʉmpaijã khaba,

² dich por choopi jaau nʉmpaijã khaba, dich khapeen por ʉ̃r jua ausĩunaa Ẽwandamag jeeu nʉmpaijã khaba, mʉg atag maach iiu phiidʉtkhaju jaau nʉmpaijã khaba, maimua Ẽwandamau maach i agkhaju jaau nʉmpaijã ʉkha wenʉrraju abam.

³ Magʉm thum ʉuma chadcha. Mamʉ magʉm iekpaita dich iphithur phʉʉrba jajaau aju khãai, tagam nem agjo ich Ẽwandamau maachig khaugpim khõsi simta pãrag jaaum ig chirʉm. Magʉm iek ʉkhaag pãragjã ich Ẽwandamau khĩirjug deekhiin ʉu akham. Maiguin chad warag i iek khaugmamua ag gaaita jooinpagkhaju.

⁴ Mamʉ ar maach peerdʉajem iek ũrwi, Ẽwandamau ich Iewaa maach peerdʉajem khamkhĩir pʉitarrjã khaugwi, Ẽwandam Akharau õrag nem ajapha waupi sim aig ich paarmua dʉi wauwi,

⁵ maimua mʉg Ẽwandam iek jaau nʉmjã ich jʉ̃gʉucha ũrnaa ich daúacha ich Ẽwandam Akharau nem khĩir pogkhe waupi sim ootarrta,

⁶ ũwaai ewag mawi warre Ẽwandam iseg simʉg chan parta deeu Ẽwandam iek ʉkhapi awaag ẽkhaju. Mag sim aig ʉkhaba khabahab, magʉm gaaimua pakuls gaai i meerphetarr khʉʉn denjo ichdeujã ich paarmua Ẽwandam Iewaata thumaam khʉʉnag isegpi jaaunaa parhoobam khʉʉnjo i wau iekhapi simjo sĩewai.

^7-8 Magʉm wounaanan jẽb khaigbamjota nʉm. Nemjĩir ajapha obermkhĩir par Ẽwandamau ag ʉ̃r noseg pom chepipikhamjã ag gaai nem jĩirwai sĩi phũak appaita oberbaadephʉm; ich jãgta nʉm ar Ẽwandam iek ũrtarrjã ʉkhabam khʉʉnjã. Jãgʉm khʉʉnan, jãg phũakjã sĩi ãbamʉg päardʉnaa orpäaijemjo, ya sĩi Ẽwandam jua machag ãwatjupaita nʉm. Mamʉ magba ar Ẽwandam iek ũrwi thãraucha ʉkha nʉm khʉʉnan jẽb ajaphamjota nʉm. Magʉm khʉʉn dʉi Ẽwandamaujã ʉu aajem.

Khan khĩirju nʉm gaaimua maach Ẽwandam dʉi ubʉ nʉ

⁹ Hermanonaan, mua mag chadcha õrau Ẽwandam iek ũr nʉm ãba i iseg nʉm a chirab mamʉ, mua khaphʉ chirʉm, pãar chan magba nʉm. Pãar ya peerdʉwi nem ajaphamta waaujeewai mag jẽb ajaphamjota nʉm.

¹⁰ Ẽwandamau thumaam khʉʉn dʉi nem agchata waaujeewai pãrau Ẽwandam khõsi nʉm gaaimua pãach hermanonaan juag oojemjã irua par sĩi ich jãg okhoopibam.

¹¹ Muan ich jãgta pãrag pãach hermanonaan pãach denjo ʉkha nʉm khʉʉndam daupii wenʉrrapim khõsi chirʉm, ich jãg pãachdeu am dʉi nʉmjo, mag wenʉrrʉm gaaimua pãach i dʉi naaimaawai Ẽwandamau pãachig deeju khĩirju nʉmjã ich ag ee chadcha pãachdeu khĩirju nʉmjo obermkhĩir.

¹² Nem ajapha wawaag chan oob khuseukhamiet. Magju khãai maach jooin otarr khʉʉnau aajerrjo warag ʉkhanaat a chirʉm. Amau ogdʉba ʉkha durruu aajerr jũrr Ẽwandamau warrgarwe amachig deeju aajerrjã ya amach jua ee wai nʉm, ya ich dʉichata wenʉrraawai.

¹³ Ẽwandamau jooi Abrán khararrag chaai paarpapiju jaauwai, ich iekhabarmjã seukhaba ni tag ich khãai ʉ̃rpaimjã chukhu sĩerraawai, ichdeupai ich thonaa,

¹⁴ “Mʉ cha iekha chirʉm iekhau mua pʉ dʉrrcha eeg oowi mʉg atag paawai pʉ chaain ewagam khʉʉnjã khapaana apijugui” ajim aajem irig.

¹⁵ Magbaawai chadcha Ẽwandamau ichig jaautarrjo aju khap, jooi Abranau nʉ khitʉm ee Ẽwandamau irig ichdeu jaautarrjo ʉu chaaidam i ʉʉirag oodeepiwi ag gaaimua chadcha jooi chaain ewagam khʉʉn khapaana thʉnʉisijim, i meetarr khur.

¹⁶ Maach mʉig eegarm khʉʉnau juraawain maach khãaijã ʉ̃rpai sim igwiata juraajem, ajapcharan Ẽwandam igwiama. Mag juraanaata nem magju abarm chan tag sĩi dich iphithur ijẽjẽb nʉʉjã aba, chadcha dich iekhatarrjota aajem.

¹⁷ Magta Ẽwandamaujã i iekhatarran chadcharau a khap apieg, mag juraamamuata Abranagjã iekhajim aajem, maagwai ich chaain ewagam khʉʉnaujã chadcha Ẽwandamau amach dʉi magju khap amkhĩir. Mag sim aig irua ich iekha simjã chadcha ich mag aju a sim ajim anaabá.

¹⁸ Magta Ẽwandamau juraanaa õor dʉi iek deejem ũrwi, chadcha i seu chukhu sĩerrʉm khaphʉ nʉm gaaimuata ĩs ewagjã maach peerdʉ aumkhĩir Ẽwandam jʉr nʉm khʉʉnaun khaphʉ aajem, chadcha irua maach peerdʉ auju. Mag gaaimua i aar naaimaju khĩirjugta wai nʉm, ichdeu maach phe auju jaau simjo aju khaphʉ naawai.

^19-20 Mag ãba Ẽwandam aar naaimaju khĩirjugta wai nʉmʉn, magan ich jãg barco ich anclaau ũrrpiba wai wejom aig phũasaujã bãyeu arrba aajemjo, maach akhaarjã Ẽwandam gaaichata pʉr wejomjo sim. Mag Ẽwandam dʉi maach mag nʉmʉn maach Por Jesús gaaimuau, ichta ich jãg phadnaan porou Aai i jeeujem ee put parrg eu wejorr eugar añopierr biek ãbpai duubjerrjo maach na ʉ̃gthar mawi sim aawai. Mammuata maach kõit ich Aai dʉi iekhaag ich mag Phadkha sĩerrʉm, ich jãg warr Melquisedec phadkha sĩerrarrjo.