Hebreos 5 - Wounaan Meu

¹ Pãrau khaphʉ nʉm, maach judionaan ee phadnaan porkhapiegjã õor eemta jʉr auwi chi porkhapiejem, maguata õor kõit Ẽwandamag nem inagdam ofrendakha deenaa nemchaainjã thõonaa phaamamua irig jeeumkhĩir, mag jeeubaawai Ẽwandamag am chig am ugua.

² Mamʉ mag phadjã ĩchab maachjo pekau pom khitaawai, pekau ee buburrsom khʉʉnjã dau aug khaug paraa aju aai sim.

³ Mag ichjã ĩchab maachjopai sĩewai, ich jãg õor kõit nemchaain khechnaa Ẽwandamag am chig am ugua am kõit jeeujemjo, ich kõitjã jeeuju aai sim.

⁴ Pãrau khaphʉ nʉm, ãbmuajã pod ichdeupai, “Mʉʉta chi porkhaju” awi ichta phadnaan por khaba aajem. Phadnaan poron ich Ẽwandamauta jʉr aaujem, ich jãg ichdeuta nacharam phad Aarón aajerr jʉr autarrjo.

⁵ Ich jãgta ajim Cristojã: Irua ichdeuta, “Mʉʉta phadnaan porkhaju” abajim. Magju khãai ich Ẽwandamauta irig, “Pʉ mʉ Iewaa aawai pʉchta thumaam khʉʉn Porkha sĩsim thumaam khʉʉnag khap api chirʉm” ajim. (Sal. 2:7)

⁶ Maimua mag warre ichta chi Porkhapibarm igwiajã, ich Ẽwandamaupai ich iek phã sim gaai agjo, “Pʉʉn ich jãg Melquisedec phadkha sĩerrarrjo ich mag Phadkha chitʉm iekhau” ajim. (Sal. 110:4)

⁷ Cristo agtha mʉig eegar kheraawai ʉu ich meem iekcha meepiba aag jua theeg simʉg jeeu simua nem theeg ijẽjẽbkham dʉi bĩe jochkherʉmuata jeeu kherajim aajem; ajapcharan ich Ayag jeeu kherʉmuama. Mamʉ mag ich Ayau khõsimjo i ipierraa am khõchgauta ichig jeeutarr aawai ʉu Jooirau i iek ʉkhajim, deeu i phiriu athamua.

⁸ Mag Cristo Ẽwandam Iewaa ãba, chadcha aphʉʉ meebarmuata warag ich Aai ipierraa aa khaugjim.

⁹ Mamʉ agjo mag meebarmua ichta ĩchab thumaam khʉʉn Porkhanaa am kõit iekhaju aai sĩsiewaita ĩchab thum ich ipierraa nʉm khʉʉnjã ʉu ʉ̃gthar oberpiejemkha sĩsijim.

¹⁰ Magta chadcha Ẽwandamau, warr Melquisedec phadkha sĩerrjo, ich Iewaata Phad chaar khapijim ʉ̃gthar, thumaam khʉʉn kõit iekhaajem.

Ẽwandam iek ʉkha nʉm anarrta i iseg nʉm khʉʉn

¹¹ Cha mʉchdeu jaau chirʉm iekhan pãrag jaauju pooma agtha wai chirʉm; mamʉ pãrau khaugmaphamjo naawai mʉʉgwaiweran jaauju phithur sim.

¹² Pãrau nawe Cristo iek ũurjem khʉʉn aawai ya mʉʉgwai jũrr pãach khapeenagta jaau khaauga aju aai nʉm. Mamʉ magba jãg Ẽwandam iek athee agtha dau meraamjo naawai pãragan deeu chaainagamjo merag chukhumdamta nacha jaauju aai chirʉm. Pãrau khaphʉm, chaainagjã nacha jũdchodam appai dee nʉʉ awi ewag paawaita jooin dʉi ãba nem parhooba khoo khaugpiejem. Ich agjota sim ĩchab Ẽwandam iek jaau nʉmjã.

¹³ Magua mag maach chi jooi chirʉmta chaainag jaaujempai khaphʉ chirʉmʉn, magan agtha chaai jũdcho ikhõrroo khitʉmjota sim, nem khaigbamjã khaugba ni ʉuumjã khaugba sĩewai.

¹⁴ Mamʉ magarrau jãg chi jooin nem parhooba khoojem khʉʉnjo, khani ʉu sĩ wa khani ʉu khaba sĩ a khaphʉ simuan chad Ẽwandam iek phithurm ichig jaauwaijã ʉu ajapha khaphʉ aju, ag nawejã ichig jaautarr ee nʉrrʉmuata magʉmjã khaug aumaajeewai.