Hebreos 4 - Wounaan Meu

¹ Keena, ĩs ewag pawiajã, ich Ẽwandamauchata jaautarr aawai, agtha i aar barju aai nʉm. Maguata maachjã khĩir khaphʉ wenʉrraju aai nʉm, eeu amjo ãb khãijã mag irua maach khĩir meeupiju a sim aar pod barba adukham.

² Amag jaautarrjo maachigjã maach peerdʉajem iek jaauwi nʉm. Mamʉ amaun mag amachig jaautarrjã sĩi par jʉ̃gʉupai ũrtarr aawai am athee chan bʉ̃ʉrjã serbiibajim aajem, ʉu chi ʉkha narr khʉʉn dʉi warag khĩirjug ãba am denjo i ipierraa aba arr aawai.

³ Maach chi ʉkha nʉm khʉʉnan, mag Ẽwandamau maach ich aar phe auwi ich dʉi khĩir meeupiju a sim aar barju. Mamʉ i ichaaur nʉm khʉʉn chan ichdeu am khĩir meeupiju a jaautarr durrjã barbamgui ajim. (Sal. 95:11) Mag amau i ichaaur abamuan, amjã dubkham, ya Ẽwandamau mʉg durr ompaawaiwe mag õor khĩir meeupiju durrjã sĩi wai sĩerr aawai.

⁴ Mag khĩir meeu nʉisiewai jua ʉ̃iju igwi, ĩchab ich Ẽwandam jua ʉ̃itarrjã jaauwi, “Ẽwandamau nem thʉnʉm thum seis días nʉm ee wau aaipapʉiwi ag noram siete diam gaai ichjã jua ʉ̃ijim” a sim, “ichdeu nem ig sĩerr thum waubapäaiwai.” (Gn. 2:2)

⁵ Mag israelnaan khʉd jãrrpai khechtarr khʉʉn igwiajã, ich Ẽwandamaucha, i ichaaur nʉm khʉʉn chan ich sim aig ich dʉi jua ʉ̃imkhĩir dubpibaju ajim ĩchab ich ag iek gaaipai. (Sal. 95:11)

⁶ Magta nacha i iek ũrtarr khʉʉn amach jʉ̃g theeg gaaimua dubbajierram aajem. Mamʉ agtha ewagam khʉʉn dubju waaur nʉm, i ipierraa nʉm khʉʉn.

⁷ Mag i ipierraa nʉm khʉʉn dubju aai nʉm igwi, Moisés meetarr khur nassi pawijã David khararrau Ẽwandam iek phãawai, “Ĩs pãachdeu Ẽwandam iek jaau nʉm ũurwai oob thãar theeg amiet” a phãjim. (Sal. 95:7-8) Magua ichdeu jaau pʉatarrjo, ĩsweta ʉkhaju aai nʉm, agtha ʉkhaju aai nʉwe.

⁸ Mamʉ mag irua iekhaju nawe, chi Moisés meetarr khur Josueu israelnaan Canaan durr wai duubwaijã warre ich Ẽwandamau maach khĩir meeupiju a sim aarchata wai dubtarr amuan, Ẽwandamau ĩs ewagam khʉʉnagjã ich aar wetju ayaa amkhĩir “Ĩsweta ʉkhaju aai nʉm agtha ʉkhaju aai nʉwe” abakham.

⁹ Magua maadeu khaphʉ nʉm, mag Ẽwandamau maach khĩir meeupiju a sim chan mʉig eegarpai khaba, ya mʉg atag ich aarcha maach phe athaawai ich jãg ichjã mʉg durr thum waupʉiwi jua ʉ̃itarrjo jua ʉ̃i wenʉrrajuuta jaau sim.

¹⁰ Chi mam Ẽwandam sim aarta ʉu barbaimam wounan, chadcha tag phithurgjã auba, ich jãg mʉg durr ompaawi ich Ẽwandamjã jua ʉ̃itarrjo, ich mag i jua ʉ̃i chitaju.

¹¹ Maguata maachin Ẽwandam iek jaau nʉm maachdeu ũrtarrta warag ogdʉba ʉkha nʉmua mag i dʉicha naaimajuuta ẽkhaju aai nʉm, ni ãbmuajã israelnaanau Ẽwandam iek ʉkhaba arrjo aba.

¹² Mʉg Ẽwandam iekhan ich mag chugpaa khaugba sĩerranaa nem jua theeg sĩerrʉm, ich Ẽwandam iek aawai. Maguata thuthui phõpá garm magwe dee sim khãaijã nem degcha sĩewai maach pa akhaar oonaa maach o akhaarjã khaug aaujem. Maach khĩirjugjã khogreu jʉrnaa dichdeu nem wauju dich thãar eepai wai sĩsidʉmjã khaug aumaajem.

¹³ Mʉg thʉnʉm aig chan pod iwiir ãbmuajã Ẽwandam dau merpʉiju khaba sim. Irigan nem thʉnʉm thum ich dau aig aunaata oo nʉmjo dawaa thʉnʉm. Ẽwandam mag maadeu nem wau nʉmjã thumaa oojem khĩirpheeta maachin dʉnʉnʉid aimaju, maachdeu nem waaujerr thumaa irig meerba jawaag.

Ich Jesuuta maach kõit iekhaajem chaarkha sĩsijim

¹⁴ Mamʉ ich jãg warrgar phadnaan porou õor kõit Ẽwandamag jeeujerrjo, ĩsjã agjo maach kõit iekhaajem chaar wai nʉm; ajapcharan ich Ẽwandam Iewaama. Ichta mawi ʉ̃gthar sĩejem, mammua maach kõit iekhaag. Maguata maachin maachdeu i iek ʉkha nʉmta warag ogdʉba ʉkhanaa ag gaaita ubʉ wenʉrraju aai nʉm.

¹⁵ Mag ʉ̃gtharmua maach kõit iekhaajemuan chadcha maach dau aug khaaugjem. Ẽwandamta maach wounkha sĩerr aawai ichdeujã khaphʉ sim, jãga aajẽ maach pekau ee burrjojoo aadephʉm aig. Meperau maach pekau ee burrpiju ẽkhaajemjo aju ẽkhaajeejim i dʉijã agjo; mamʉ maagjerrta ich chan bʉ̃ʉrjã pekau ee burrba khitajim.

¹⁶ Maach kõit iekhaajemua mag maach dau aug khaaugjem khaphʉ naawai bʉ̃ʉrjã ogkhaba warag Ẽwandam thumaam khʉʉn Porkhanaa thumaam khʉʉn dʉi ajapha khitʉmta jʉrju aai nʉm irig jeeu nʉmua, pekau ee burrjojoo aadephʉm aig i iigwaijã ʉu irua maach dau aug khaugwi maach khaigpermkhĩir.