Hebreos 3 - Wounaan Meu

Jesuuta Moisés khãai ʉ̃rpai sim

¹ Magua hermanonaan, pãar ar Ẽwandam dʉipai wenʉrrʉm khʉʉn, ar maachta ich aar phe awaag ich chaainkha autarr khʉʉn, pãade mʉ iek ũrbat: Jesucristota chadcha ich Ẽwandamaucha ich iek jaaumkhĩir jʉr auwi pʉitarrau. Ichta ĩchab ĩsin warrgar phadnaan por aajerrjo maach kõit Ẽwandam dʉicha iekhaajemʉu. Ʉu i gaaimua maadeu chadcharam iekta ʉkha nʉm.

² Ich jãg Moiseeujã Ẽwandamau ichig jajaaukham thum israelnaan dʉi aajerrjo, Jesuujã Ẽwandamau mag ichig ich iek jaaupinaa ich iek ʉkhaajem khʉʉn kõit iekhaajem khapibaawaijã chadcha irua thumaa ichig jaautarrjo ajim.

³ Mamʉ agdaujo mag amachig nem jaautarr thum waujierrab mamʉ, ichí Jesuuta Moisés khãaijã ʉ̃rpai sim. ¿Jãgwi mag chirʉ́? Pãrau khaphʉ nʉm, ãbmua di eeuwai chi eutarr wounta chi di khãaijã ʉ̃rcha ig iyʉʉ aajem. Ich jãgta nʉm ĩchab Jesujã Moisés dʉi: Moisés sĩi maachjopai mʉig eegarm aawai iin sĩi Ẽwandam juau. Mamʉ magba Jesuun i nawe ich mag sĩerraawai ichiita i khãai ʉ̃rpai sim.

⁴ Pãrau khaphʉ nʉm, ãbmua di eubam aig chan bʉ̃ʉrjã di chukhum. Ich agjo sim ĩchab nem thum mʉg thʉnʉmjã; ich Ẽwandamauta nem thum waubajieb, maach wounaanjã thum, Moisepa.

⁵ Magua Moisejã sĩi ich Ẽwandam chog arr aawai ichig jajaaukhamjota aajeejim i õor dʉi. Ajapcharan i phidagan, Ẽwandamau mag ich õorkha thʉnʉm khʉʉn dʉi ajuuta jũrr õrag jajaau aajeejim. Ma ajim i phidag.

⁶ Mamʉ Cristo Jesús chan magba, Jesuun ich Iewaa chaar ichdeu pʉitarrau. Magtarr aawai ichdeuta maach ich Aai õorkhaju khʉʉn thum peerdʉ auwi ichdeuta khap sim, ichig jaautarrjo. Maata i phidag aawai i gaaimuata maach mʉg Ẽwandam denkha nʉm. Majã chadcha mag i õorkha naawai parta i iek ʉkhaba nʉm khaphʉnaa onee irua maach ich aar phe auju khĩirjugta ogdʉba wenʉrrʉmʉn mamʉ.

Ẽwandamau ich õorkha nʉm khʉʉn khĩir meeupiju

⁷ Magua oob thãar theeg amiet, eeu pãach dʉijã Ẽwandamau israelnaan dʉi arrjo adukham. Magju khãai Ẽwandam iek phã sim gaai ich Ẽwandam Akharaucha jaau simjo, “Ĩs pãachdeu Ẽwandam iek jaau nʉm ũurwai

⁸ oob israelnaanjo thãar theeg amiet. Õor chukag ee phʉʉr wenʉrraawai amau warag Ẽwandam dʉita serereu nʉʉ awi i meeukhapi pʉijierram.

⁹ Cuarenta años mag õor chukag ee wenʉrraajeewai, pãar jooinau nem ooba aajempa amach khaigperm khõchgau irua ich jua theeg oopiejerrjã, amau warag i jũramjo aajeejim.

¹⁰ Maguata chadcha am dʉi meeukhawi, irua magjim amag: ‘Pãran sĩi parhooba pãachdeu ampierr am khõchgau okhoota wenʉrrʉm; mamʉ mag nʉm mua nem jaau chirʉm chan waumapha nʉmgui’ a iekhajim.

¹¹ Magta chadcha khĩir machgau irua chi ich ichaaur nʉm khʉʉn chan ich aar obeerpibamgui a iekhajim ich Ẽwandamau.” (Sal. 95:7-11)

¹² Hermanonaan, maguata muan pãragan, “Ẽwandam ich iekhabarmjã chadcha nem wau sĩerrʉm iek ʉkhaba nʉm gaaimuapai chan oob thãar khaigba nʉrrjee amiet” a chirʉm, pãach mag nʉm gaaimua warag Ẽwandamta isegam ugua.

¹³ Magju khãai Ẽwandam iek phã sim gaai jaau simjo, ʉu agtha dich khapeendam wawiju aai nʉwe ed eepierr agdaujo pãach khapeen wawibat, pãach pekau ee nem khaigbam wau nʉmuapai pãach khũgurwi warag thãar theeg am ugua.

¹⁴ Pari mag Cristo dʉita khapeerkhanaa ichdeu jaautarrjo chadcha maach dʉi ʉu apim khõsi nʉm khai, magan warrcha i iek ũurwai chadcharam awi ʉkha nʉisierrta ich mag dich thõm aar ogdʉba ʉkha wenʉrraju, warrcha ʉkhatarrjo.

¹⁵ Pari magaagan, Ẽwandam iek gaai phã sim chaig jaau chirarrjo, “Ĩs pãachdeu Ẽwandam iek jaau nʉm ũurwai oob thãar theeg amiet; oob ar israelnaanau warag Ẽwandam dʉita serereu nʉʉ awi i meeukhapipʉitarrjo amiet” a chirʉm. (Sal. 95:7-8)

¹⁶ ¿Pãrau khaphʉ nʉ, Ẽwandamau ich iek jaaupi sim ũr nʉm ãba, chijã khʉʉnauta warag mag i meeukhapijierrá? ¿Maach jooin Egiptomua Moiseeu chawag phe arrtarr khʉʉn amach thum khabajĩ?

¹⁷ ¿Chijã khʉʉn dʉita Ẽwandam cuarenta años mag meeukha sĩejĩ? Ich ichaaur arr khʉʉn dʉima, amach pekau wautarr gaaimua. Mag gaaimuata mag õor chukag eepai phʉʉr wenʉrrʉmua thum khechjierram anaabá, amach barju arr aarjã barba.

¹⁸ Maimua ĩchab ¿ich makhʉʉnag khabajĩ, amach khõchagpierr am khõchgau bʉ̃ʉrjã ich iek asekasba arr jũrr ich Ẽwandamaucha, “Cha mʉ iekha chirʉm iekhau pãar chan mʉchdeu pãach khĩir meeupiju a chirʉm durrjã mua dubpibamgui” a iekhatarr?

¹⁹ Ajapcharan mag pod barba arran, amachig Ẽwandamau jaautarrjã ajappai ʉkhaba narr gaaimuata mag pod barba khʉd jãrrpai khechjierram anaabá.