Hebreos 13 - Wounaan Meu

Khani Ẽwandamau maachig waupi sĩ

¹ Mua pãar wawí chirʉm ũrbat keena: Pãach khapeen thum khod ãbam khʉʉn appai thʉnʉmjo daupii abat.

² Pãach aig õor beewaijã amag di ĩgkhaba warag pãach aig jẽerpim khõsita jẽerpibat; kharin õrau amach o ajaugau ich Ẽwandamaucha angelnaan pʉitarr khʉʉnpa amach aig jẽerpiejeejim, mamʉ sĩi parhoobam khʉʉnpii awi mag Ẽwandam chognaanjã khaugbata amach aig jẽerpiejeejim.

³ Pãachta preso nʉmjo pãach khapeen preso durrum khʉʉnjã khĩir eyaa abat. Ar pãach denjo ʉkha durrum gaaimua õrau am dʉi amachdeu am aig am gaai dee nʉm gaaimua dau aphʉʉ durrum khʉʉnjã ĩchab khĩir eyaanaa, pãachta mag dau aphʉʉ nʉmjo amau nemdam ig nʉmjã amag au deebat, chikham jua machgau pãach dau aphʉʉ aawai pãach dʉijã magta apim khõsimjo.

⁴ Ar dich õor khabam dʉi khapes aajem khʉʉn gaai chan Ẽwandamau sĩi ich jãg oobamjo sĩubaju aawai emkhooin ʉʉinpan wa ʉʉin khãijã jaainpan agdaujo pãach õor respetaabat, oob bʉ̃ʉrjã deeum dʉi amiet.

⁵ Ich Ẽwandamaucha jaauwai, irua chan bʉ̃ʉrjã maach kha ogdʉba ni sĩi parhoobajã maach khaugba barpʉabaju a sĩewai, pãach dau aphʉʉ durrum awi oob phatkhonag wʉrppa amiet; Ẽwandamau pãachig dee sim dʉipai onee abat.

⁶ Mag nʉm aig ĩchab maadeu bʉ̃ʉrjã khĩirjuba, sĩi warag ich Ẽwandam iek phã sim gaai jaau simjo “Maach Por Ẽwandamauta mʉʉn khaigpeerjeewai õrau mʉ dʉi khaigba awiajã khani mua ogkhabarju” abat. (Sal. 56:3-4,9-11; 118:6)

⁷ Pãade ar warrcha pãachig Ẽwandam iek jaaunaa mag amachdeu jaau nʉmjo wenʉrrapi jaautarr khʉʉnta khĩirjubat, jãga mag phitthur durrarr ãba amach meewaijã agtha ogdʉba ich mag ʉkha nʉmua ubʉ durrumta khechjierrá; magʉmta pãrau khĩir eyaanaa amau ʉkhaajerrjo ʉkhabat.

⁸ Pãade ũrbat: Jesucristoon warrgar ich sĩerrarrjo mʉg atag pawiajã cambieba ich mag sĩerraju. Í mag cambieba sĩerraawai i iekjã agjo cambieba sĩerrʉm.

⁹ Magua pãachig i iek awi jũrr deeum iek pãachdeu nacha khaugtarr chaaur nem parhooba khãijã khopiba jaauwai oob ʉdʉʉr pãach khũrgurpimiet. Mag nem parhoobam khopiba jaau nʉmta chadamjo ʉkhaju khãai, Ẽwandamau mag Jesucristo pʉibarmua chadcha ich garmua nacha maach khõchkhatarr khaphʉ nʉmuata ubʉ naaju aai nʉm. Jãg sĩi nem parhoob khopiba jaau nʉm ipierr nʉmuapai chan bʉ̃ʉrjã Ẽwandamag maach aupijojoopaijã khaba sim.

¹⁰ Magarrau Cristo iekta ʉkha nʉmuan chad Ẽwandamau maach auju, ich Cristota maach kõit ʉdʉraa ich thõopitarr aawai. Mamʉ jãg Aai i jeeujem degam phadnaanau par nemchaain khech nʉmuata amach aupiju ẽkha nʉm khʉʉn chan pod irua aubam, sĩi maach jooin i gaai jaau sim ʉʉrkha nʉmuata peerdʉju ẽkha naawai.

¹¹ Pãrau khaphʉ nʉm, añopierr biek ãbpai phadnaan porou nemchaai thõonaa chi bag Aai i jeeujem deg arrjem, Ẽwandamag õor pekau kõit ofrendakha deeg. Mamʉ chi nemchaain modon warag warp phobor igaau arrnaa sĩi phaapäaijem, bʉ̃ʉrjã khopiba.

¹² Ich mag ajim ĩchab Jesuu mag maach kõit nemchaaijo ich thõopiewaijã: Warag phobor igaau arrnaata i thõopʉijierram, mag ich bag ãrbarmuata Ẽwandam dau na õor ajapha naaju ayaa apäaig. Ichdeu magtarraupaita maach Ẽwandam dau na ajaug paajeewai, khanthee maadeu mag nem inag khoju aai nʉ wa khoju khaba khãijã sĩ a jaau nʉmta ipierraa aju aai nʉ.

¹³ Mag i thõon arrwaijã i waunaa i iseg nʉm iekhau warag phobor igaauta i arrwi thõotarr aawai, magan maach jooin i pʉaba ʉkha nʉm gaaimuata dich peerdʉju ẽkhaju khãai, Jesuuta jʉrju aai nʉm, i gaaimuata chikhamnau maach dʉita jũrr ich dʉi arrjo wau iekhajujã igba.

¹⁴ ¿Khan jãgwi mag Jesús gaaimua dich wau iekhajujã igba warag sĩi ãwatju aai nʉm a chirʉ́? Sĩi ich mʉig eegarpai wenʉrram iek khaba, maach durr chaar ʉ̃gthar ich Jesús sim aarta wetju khĩirju naawaima.

¹⁵ Mag khĩirju naawaita ãba Jesucristo gaaimuata Ẽwandamag ʉu ajim aju aai nʉm, i gaaimuata ʉu mag Ẽwandam aarcha naaimaju khaphʉ naawai. Mag irig dich iiucha pʉaba i tho iekha nʉmta warrgar nemchaain thõonaa phaa nʉmua irig jeeujerrjo jeeu nʉmʉu.

¹⁶ Mamʉ mag appai khaba, dich khapeen dʉi o ajapha aju chan oob khĩir okhoomiet. Pãachdeu nem wai nʉm eem jũrr chukhum khʉʉn dʉi jig aupetat. ¿Khan jãgwi pãrag mag chirʉ́? Mag agdaujo nemdam jig au nʉmta warrgar mag nemchaain thõonaa ofrendakha ichig deejerrjo Ẽwandamau i dawagaa oojeewaita mag chirʉm.

¹⁷ Keena, iglesia ee pãach pornaanau pãachig nem mag aawai am ipierraa abat, pãachta jũrr am khãai ʉ̃rpai aju ẽkhaba. Pãar gaaimua Ẽwandamau amachig iek jeeuju khaphʉ naawai amauta jua ʉ̃yaajã khaugba pãar thʉajem khʉʉnau. Pari mag pãach ajapha thʉamkhĩran, pãachdeujã am ipierraata abat, wajapha amaujã amach phidag onee waumkhĩir. Pãrau magbam chan pãar gaaimua am okhĩirjuu aphobaademua amach phidagjã waumaphamta wauphobaadeewai pãachpata eeg paaukhamaju.

¹⁸ Keena, mʉ kõit Ẽwandamag jeeubat. Mag mʉch kõit jeeupi chirʉm chan khaigba chiraawai khabam; mua khaphʉ chirʉm, mʉch Ẽwandam dʉi ʉu chirʉm. Mamʉ warag mʉg atagjã thum mʉchdeu nem wau chirʉm gaaimua ich mag i dʉi ajapha chiram khõsi chiraawaita mag pãrag mʉch kõit jeeupi chirʉm.

¹⁹ Mag pãachdeu mʉ kõit Ẽwandamag jeeuwai ʉu deeu ũwaai mʉigmua jopcha pãach aar mʉ barpita jeeubat; mʉ pãar dʉi chiram khõsi chirʉm.

Ãbmiecharam salud

²⁰ Muan mʉchdeujã Ẽwandam maach khõinaa phe wai sĩejemʉgta pãar kõit jeeu chirʉm; ajapcharan ar maach Por Jesús, maach Pastor chi ajapcharam, ar chi meem arrta deeu phiriu autarr ag Ẽwandamagma. Ich mag Jesuu khabahab, Ẽwandamau õor dʉi iek deewai jaautarrjo, chadcha ich bagauta õor pekau chugpaawi ʉu peerdʉju ayaa apiejem.

²¹ Mag Ẽwandamagta muan pãar kõit jeeu chirʉm, ichdeuta ichjo warag pãar ajaug paamaawai ichdeu khõsimjo pãachdeu nem wau nʉmjã thumaa ajapha obeber amkhĩir. Magnaa ĩchab Jesucristoog ʉdʉraa maach Porkhapi nʉm gaaimuata Ẽwandamau maach dʉi ichdeu am aig amkhĩir irigta jeeu chirʉm. Mag nʉm dʉi ĩchab thumaam khʉʉnag maach Por Cristota mʉg atag pawiajã ich mag tho iekhapim khõsi chirʉm.

²² Maimua ãbmiecha paawai ũrbat keena: Mʉg carta iek duurjã khaba bʉthʉ khitʉm pãach jua ee pabaimaawai ag gaai mua pãach wawí chirʉm ajapha ũrm khõsi ũrbat; pãach khĩir onee amkhĩirta mua mʉg phã deepʉi chirʉm.

²³ Pãrau agtha khaugba nʉm khai, Cristo gaaimua maach khodam Timoteo ya cárcel degmua oberjim aajem. Magua mʉ maju nawe mʉig barchemʉn, mʉchdeu pãar oon maawai mua í mʉch dʉi arrju.

²⁴ Keena, pastornaan thumaam khʉʉnag maimua tagam khʉʉndam maachjo ʉkha durrum khʉʉnagjã thumaam khʉʉnag mʉ salud deebat. Cristo gaaimua maach khodamnaan Italiapienaujã ĩchab pãrag salud aajem.

²⁵ Chaig jaau chirarrjo deeu pʉaba pãrag jaau chirʉm: Mʉʉn ãba Ẽwandamagta pãar kõit jeeu chiraajem, ichta pãar dʉi ogdʉba ich mag pãar thʉa wai nʉrramkhĩir. Ayoo keena. Mʉgdampai ajim pãrag jaaum ig chirarr.