Hebreos 12 - Wounaan Meu

Ãba Jesús gaaita dich khĩirjug sĩuju aai nʉm

¹ Mag warrgarm khʉʉn jooin khapan Ẽwandamau nem jaau sim chadcha aju ʉkha narr gaaimua amau nem waumatarr khaphʉ naawai maachin sĩi khaphig wetumjo warag naagta wetju, pekau waujujã khĩirjuba ni bʉ̃ʉr abarm gaaimua Ẽwandamau maachig waupi jaau simjã waubam aba. Magju khãai dichdeu nem waum khõsimpai wauju khĩirju nʉm gaaimua pod Ẽwandamau waupi simta wauba khãijã am ugua, magʉm khĩirjugta warre thum isegju aai nʉm. Magba akhiin magʉmua maach bʉ gaai pʉʉrbaadephʉmjo aawai pod Ẽwandamau khõsimjo abaju. Khajee amkhĩirjo maach na nem inag pom thʉnaawiajã magʉmʉgjã ooba,

² ãba Jesús gaaita dich khĩirjug sĩuju aai nʉm. Ichdeuta warrjã ʉu maachig Ẽwandam iekjã ʉkhapiwi mʉg atagjã parta ʉkha naajim apibaju, ich Ẽwandamau maach dʉi wauju jaautarr thum chadcha oopiju aawai. Ich Jesuuta chi khaigbacharam khʉʉnjo pakuls gaai ʉdʉraa ich thõopibajieb, chigagjã igba, mag ich thõopibarmua õor peerdʉ athaawai ichpa onee ich mag sĩerraju khaphʉ sĩerr aawai. Ichta ĩchab ich Aai jup sim khu juupjem gaai dʉi i juachaar garcha ãba jupimawi ich mag sĩerrʉm.

³ Magua, khar pãach kha theeg chukhunaa kha oneg chukhu nʉm aig khĩirjubat, jãga Jesuujã õor khaibagkham khʉʉn jua machag khĩu ãwatjĩ. Ichdeujã maach kõit magtarr aawai pãach phithurg aawaijã magʉm gaaimua oob “Jãg chan mua tag podbam” amiet.

⁴ Pãar dʉi chan agtha mag maach Por Jesús dʉi arrjocha khaba naawai ajués nem khaigbam waupi nʉm waubam paarjã agtha õrau pãar khechba nʉm.

^5-6 Mamʉ mag i dau aug wautarrjocha khaba nʉmta, Ẽwandamau ich iek gaai maach wawí simjã ya pãrau khĩir akhoo wai nʉm. Pãade ũrbat ichdeucha ich iek gaai maach wawimamua iekhatarr iek. Mag sim: “Iewaa, muan mʉchdeu khõsim khʉʉnan nem khaigba aawaijã ajaphata wawiejem; maimua mʉch chaainkhabaadem khʉʉn gaaijã mas deejem, mʉch dakhĩir khaigba aawai. Maagjeewai iewaa, mua pʉch gaai mas deewai, wa sĩi pʉchig nem agcha khãijã jawaag pʉch dau aug waupiewai, oob iseg chitam; pʉch khaigba abarm paar mua pʉchig meeukha iekhaawaijã oob warag, ‘Mag pʉchdeu jaau simjo chan mua podbam’ a iekham” a sim Ẽwandamau maachig ich iek phã sim gaai. (Job 5:17; Pr. 3:11-12)

⁷ Maguata muan pãragan Ẽwandamau pãach gaai mas deewaijã sĩi khĩu jʉmbat a chirʉm; maach ich chaain aawai irua maach dʉi magju aai sim. ¿Pãrau oowai chaainau nem ãrbarm paar chi dennaanau wʉba aajẽ?

⁸ Mamʉ pãrau oowai pãachdeu nem khaigba wau nʉm paarjã Ẽwandamau bʉ̃ʉrjã pãar chig aba ni wawijã wawiba sim khai, magan pãar chan ich chaain chaar khaba aawaita mag irua sĩi pãrag oobamjoo sim.

⁹ Pãrau khaphʉ nʉm, warr maach daii aawai, maach dennaanau maach wʉawai wa wawí khãijã wawiewai, maadeu chadcha am okho aajeejim. Maagjerrta ¿jãgwi maach Aai ʉ̃gthar simua maach dʉi maagwai maadeu ogkhabaju aai nʉ? ¿Ichdeuta maach ich aarcha oberju ayaa apinaa ich mag iiu wenʉrrapiejem khabá?

¹⁰ Maach dennaanau maach daii aawai mag maach wawiejerran, sĩi khũchpai mʉg jẽb gaai nʉm ora dich ajapha amkhĩirpaita maach wawiejeejim, amachdeu oowaijã magta chadcha ʉu sĩewai. Mamʉ Ẽwandamauta maach gaai mas waunaa maach wawí khãijã wawí simʉn, mʉg atag pawiajã dich ajapha amkhĩrau; ajapcharan ichjã ajapha khitaawai maachjã ichjota ajapha apim khõsi sim.

¹¹ Iin chadcha dich iekhaa ũrbag gaaimua maach wʉawai chan ʉu khaba sĩejem; maach gaai masi sĩejeeb mamʉ, magʉm gaaimua ʉu iekhaa ũur khaaugwain dich chitʉmpierr chitʉmjã ʉu maach khõinaa chitaajem.

Ẽwandamau nem jaau sim sĩi par jʉ̃gʉupai ũrju khaba nʉm

¹² Jãg pãach phithurg au nʉm gaaimua tag podbajujo sĩi kha thũu piu ũhũraamjonaa sĩi warag bʉ duuijujo thʉnʉmjã, deeu ũwaai khĩir ubʉnaa bʉpajã ubʉ thierrkha nʉmjo kha onee abat, mag phithurg au nʉmjã ʉu ãwataag.

¹³ Magnaa ĩchab kha thũumjo durrum khʉʉn daarjã ich Ẽwandamau khõsimjo ajaphata nʉrrjee abat, bigaaum khʉʉnaujã pãach oowi agjo amkhĩir. Pãrau magta amʉn, Ẽwandam dʉi ajap khaba nʉm gaaimua mag kha thũumjonaa bʉ ãkhãraamjo nʉm khʉʉnjã pãach oowi deeu monaau nʉisimjo amjã ĩchab pãachjo Jooi dau na khajapha wenʉrraju.

¹⁴ Thumaam khʉʉn dʉi khõinaa wenʉrrajuuta khĩirjunaa maach pekau paarpapijojoom nem thum warre isegbapʉit. Magʉm nem thum isegwi ich Ẽwandamau khõsimjo i atheepai khaba nʉm khʉʉnau chan pod i aar oberwi i khĩir oobam.

¹⁵ Magam ugua Ẽwandamau pãach dʉi ich garmua nem ajapha am ig sim chan oob ʉdʉʉr okhoopimiet; ni ãbamʉgjã oob pãach ee sĩi pakher khaigbamjo oberpimiet. Ʉdʉraa magta apimʉn, mag oowi deeum khʉʉnaujã i denjo aadeewai, bigaaum khʉʉn gaaipata warag ben ãkhãraamjo dʉrbabaadeewai, õor pom Ẽwandam dʉi ʉu narr khãijã khaigba aju.

¹⁶ Pãach ee iwiir ãbmuajã oob dich õor khabam dʉi chan khapes amiet; oob Ẽwandamau waupim khõsimʉgta sĩi oobamjo am khõchgau warr jooingar Esaú arrjo amiet. Esaú ichta chi naam arr aawai ichdeuta ich aai nem thum jʉ̃akham; mamʉ mag jʉ̃aju arrta sĩi jãsogau thach thep ãbpaim dʉi jũrr ich eeumʉgta ichdeu nem jʉ̃aju arr thum thʉsĩepʉijim anʉm.

¹⁷ Maimua pãrau khaphʉ nʉm, jãgajĩ agtarr khur ya ich aai meegpaawai deeu ũwaai khĩirju auwi. Ich aai juagam nem jʉ̃ag irig ich bendiciepiewaijã jooirau irig ich bendición deebajim anʉm, ag nawe mag lenteja thep ãbam paar isegtarr aawai. Parii dauhi pomjã ãrjieb mamʉ, pod ich aai juagam nem jʉ̃aju khaba ich mag sĩsijim anaabá. Magua pãraujã oob Esauu ich bendición okhoopitarrjo nem bʉ̃rʉʉm gaaimua Ẽwandamau pãachig nem deeju arr okhoopimiet.

¹⁸ Keena, pãade ũrbat, mua pãrag jaaukhim: Ĩs mʉg Cristo gaaimua Ẽwandamau maach ich denkha awaag maach dʉi iek deebarm chan warr maach jooin dʉi iek deetarrjo khaba sim; ĩsimʉn iek iiuriu. Warrcha Ẽwandamau maach jooin dʉi iek deewain sĩi durrsĩ Sinaí anʉm bʉkhʉrrta wetpi jaaujim aajem, maigpaimuata ich iekha sim ũrmkhĩir. Amau amachdeuchata maigmua oo naajim anaabá chi durrsĩ sĩi uurdʉ wejomjo thʉnʉmta sĩi edjã khĩssu thʉnʉm; mag nʉm dʉi ed khõorga sĩi phũ theeg we thʉnʉm dʉi maach nem okho pagthʉm daujo phʉrjẽer ahaukhamjã oo naajim anaabá.

¹⁹ Amau maach khãai amach jʉ̃gʉucha chi trompeta iekjã ũrnaa ich Ẽwandamcha iekha simjã ũr narr aawaita warre amach thãar eyaa jaaumam ũrwi tag i iekcha ũrmaaugau irig, “Aay Ẽwandam, marau pod pʉ iekha sim ãwatbam” ajierram anaabá.

²⁰ Khani amau ũurwai warre am thãar eyaata “Chijãg pãach nʉm aigpai naaba mʉg durrsĩ gaai bʉ thʉg sim wounan ichiita thõob khaba warre thõopʉiju aai sim nemchaai awiajã, mokou bar wai nʉmua wa thutkhereu khãijã” a ũrbaawaita mag jãphierr naajim anaabá.

²¹ Mag chadcha sĩi maach nem okho thʉnarr aawaita ich Moiseeujã ĩchab, “Mʉchjã jãphierr ajaugau kha duui chirʉmgui” ajim anʉm.

²² Mamʉ ĩs ewag Ẽwandamau maach dʉi iek deewai chan amagamjo sĩi mag warp durr bʉkhʉrrpaimuata ich iek ũrpi jaaubajim. Maachin ya mʉig eegarwe Sión phoborpienau; ajapcharan ʉ̃gthar wetju khʉʉnma, Ẽwandam phobor Jerusalén ee ich dʉicha naaimaju khʉʉn. Maman Ẽwandam chognaan pooma amach khapangau sĩi maadeu chi beerjujã khaugba thʉnʉm khʉʉnauta Ẽwandamag jeeupho thʉnʉm.

²³ Mam ʉ̃gtharta ĩchab mag iek iiur deetarr gaaimua maach denjo Cristo iek ʉkhawi ich chaainkha thʉnʉm khʉʉn thʉ̃rjã Ẽwandamau phãkha wai sim. Ich mamta sim ich Ẽwandamjã, maach thumaam khʉʉnau mʉig eegar aawai dichdeu aajerrpierr agjo maach dʉi nem ajapha aju Jooi. Ichdeuta ĩchab ag nawe jooin ich iek ʉkha durrum otarr khʉʉn akhaarjã ichjo ajaug paakhapʉiwi ich dʉi phe wai sim.

²⁴ Mam ʉ̃gthar ich Jesujã dʉi sim aarta maach thʉ̃r sim, ar mag iek iiur deewai ich Jooirau jaautarrjo chadcha apieg ich bag ãrpitarr woun aar. Maadeu khaphʉ nʉm, mag i bag ãrtarr chan warr jooingar Abel thõowai bag ãrtarrjo khaba arr aawai, maach pekau chugpaawi Ẽwandam dʉi maach khõinaa apieg ajim. Mamʉ chi Abel bagau chan magba, warag ich naamta iekkhõr ee pʉajim Ẽwandam dʉi.

²⁵ Magua keena, ĩs Ẽwandamau maachig jaau simjã oob asekasba amiet. Mag ĩs ichdeu maach dʉi iek dee simta warr maach jooin dʉi iek deetarr khãaijã ajapcha sim. Magua pãade ũrbat: Sĩi Moisés maachjo mʉig eegarmkha sĩerrau Ẽwandam iek jaau khitʉm ũrba arr paarjã chi asekasba arr khʉʉn Ẽwandamau sĩi par daúapai ooba am gaai jua khʉaba deejerr khai, ĩs mʉg ʉ̃gtharmua ichdeucha maachig iekha sim asekasba aawaijã oob pãrau mag maachta i jua eemua peerdʉju amiet.

²⁶ Ich mag Ẽwandam Sinaí durrsĩ gaai Moisés dʉi iekha sim jaar ich iekha simua chadcha jẽbpata duuipijim anaabá. Mamʉ Ẽwandamau ich iek gaai jaauwai, “Deeu mua biek ãbpai mʉg jẽb duuipiju, mamʉ mag duuibarm chan mʉg jẽbpai khaba edjã eem magweta duuipiju” a sim. (Ag. 2:6)

²⁷ Mag irua deeu biekdam ãbpai duuipiju a simʉn, sĩi khajapham ʉʉur chaar khaba aawai, magbarmua warre mʉg durr oorpʉiwi edaujãjã chukhu apʉijuuta jaau sim, mag maach i agkhaju igwi. Mamʉ pãade ũrbat: Ichdeu nem wautarr thum ʉʉrppʉiwiajã mag maach wetju aar ichta chi Porkha sim durr chan bʉ̃ʉrjã chugpaba ich mag sĩerrʉm iekhau.

^28-29 Pãade khĩirjubat keen: Mag Ẽwandam iek iruan maach khaibagjã sĩi õt ee phaabapʉimjo warre chukhu apäaijem anaawai, mag nʉm dʉi ĩchab iruata durr jʉ̃a chirʉm chan bʉ̃ʉrjã chugpaa khaugba ich mag sĩerraju anʉm durrta maach phe auju anʉpí, irigta ʉu ajim anaa warag thãar onee jeeuju keena, ichdeu ichig jeeupiejemjo, i dau na nem khaigba waujujã okho.