Hebreos 11 - Wounaan Meu

Jooin Ẽwandamau ichdeu jaaubarmjo aju khaphʉ arr khʉʉn

¹ Mag Ẽwandam iek ʉkha nʉmʉn, ichdeu maach dʉi ajapha aju a simjã chadcha ich mag aju khaphʉ nʉmʉu, ichdeu jaau simjã agtha ooba nʉmta chadcha aju khaphʉ.

² Ẽwandamau maach jooin warrgarm khʉʉn ʉu ajapha eeg oojeejim, ichdeu am dʉi nem magju aawaijã chadcha ich magta aju awi amachdeu i iek ʉkhaajerr aawai.

³ Maguata ĩs maachdeujã agjo ʉkha nʉm gaaimua maadeu khaphʉ nʉm, Ẽwandamauta mʉg durr, edaujã, phĩdag maimua tagam nem thum thʉnʉmjã chadcha ompaajim; ich iek gaai mag jaau sĩewai chadcharau. Ajapcharan bʉ̃ʉrjã nem chukhu arrta sĩi ichdeu ompaapi jaaubarmuapaita nem thum ompaajim anaabá.

⁴ Pãade khĩir eyaa abat, jãga warrgar maach jooinaujã chadcha Ẽwandam iek ʉkhaajeejĩ: Magua Abelau Ẽwandam iek ʉkha sĩerr aawai Jooirau ichig jaautarrjo i athee nemchaai thõonaa irig jeeujim. Magtarr Ẽwandamau oowai, Caín den khãai ajapcha oberjim aajem. Magbaa Ẽwandamau, “Pua mʉ athee nemchaai thõonaa mʉrʉg jeeubarmʉn nem ajaug kherʉm; pʉʉn chadcha woun ajaphamʉu. Muan jãgta khõsi chirʉmgui” ajim anaabá Abelag. Chadcha Abel nachgarwe meejieb mamʉ, ĩs ewag pawi oowai Ẽwandam iek ʉkhanaa magtarr gaaimua maachigjã ich denjo ʉkhamkhĩirta magjim.

⁵ Enocjã ĩchab chadcha Ẽwandam iek ʉkhaajerr gaaimua Ẽwandamau i meepiba sĩi maach enter ich mʉg ich aar aujim anaabá. Magtarr aawai par jʉr nʉmjã baaubajierram aajem. Ich Ẽwandam iek phã sim gaai jaauwai, mag i arrju nawejã Ẽwandamau oowai i dau na ajapha khitaajeejim aajem.

⁶ Mamʉ maachta wajapha Ẽwandam iek ʉkhaba nʉm chan pod i dau na ajapha khaba nʉm. Ẽwandamta dich dʉi sĩepim khõsi chirʉmʉn, khaphʉ aju aai sim, í chadcha iiu sĩejeewai chadcha mag ich jʉr nʉm khʉʉnagjã irua ich khaugpinaa am dʉi ajapha aajem.

⁷ Jooi Noeeujã ĩchab Ẽwandamau ichig mʉg durr gayam khʉʉn dohãdau opʉiju jaaubaawai ʉkhawi, maagwai chan agtha noseg khĩirjã khaugba aajerr ãba, chadcha ichig jaautarrjo barco pom waubaadejim aajem, ag ee ich chaain dʉi peerdʉag. Tagam khʉʉn amach thãar theegau thum pekau ee thʉnʉm daar, mag ich appai ʉkhatarr gaaimuata, tagam khʉʉn thum odubtarrjã, ichin ʉu Ẽwandamau peerdʉ auwi ich aar auju ayaa apʉijim.

⁸ Abranaujã ĩchab Ẽwandam iek ʉkhaajerr aawai khãaim ãb ich thʉ̃rchewi ichig mapi jaaubaawai, chadcha i ipierr petajim aajem. Mamʉ maagwaiwe chan agtha irig durrkhapiju durrjã jaauba nʉwe arr aawai, sĩi ich barjujã khaugbata petajim aajem, sĩi Ẽwandam iek ʉkhawi i ipierr.

⁹ Mag Ẽwandamau ichig jajaaukhamjo chadcha aju khĩirjunaata nʉrrarr aawai, ichig durr deeju atarr aar pawiajã nawe barimatarrta sĩi eeu bar simjo chi durr khʉʉn ee sĩi di khõmarii eunaa magreu ahau aajem eepai sĩejeejim aajem. Ich magta i iewaa Isájã i yẽto Jacob dʉi naajeejim anaabá, bʉ̃ʉrjã amach di chaar eu auba, amagjã ich agjo Ẽwandamau durr jʉ̃apiju jaautarrtá.

¹⁰ Pãrau khĩirjuawai, ¿jãgwi mag di chaarjã chukhu nʉmta warag Ẽwandam iekta ʉkha naajĩ? Mʉig eegarm di khãaijã phobor ajapcharam ee di thʉnʉm ee joobaanta Ẽwandamau amach arrju khaphʉ narr aawaima; ajapcharan ʉ̃gtharma. Mamaam phoboron ich Ẽwandamauchata wauju aadewi ichdeucha eutarrau.

¹¹ Chi Abrán ʉʉi Sara khahʉrrarraujã ĩchab at aba Ẽwandam iek ʉkha sĩerr aawai, ich daupeer garjã pod chaai ooba arrta, ya ũanaa khitʉm eeta Abranag chaai oo deejim aajem, ʉu ichdeujã Ẽwandamau chaai deeju atarr ʉkhatarr aawai.

¹² Magta chadcha jooi Abrán ya jooiraa khitʉm eeta chaaidam dau ãb paarpajim anaabá. Mag chaairau chaain ĩiubaademuata jooi chaain khapaana thʉnʉisijim anʉm, ewag pawi. Jooi chaain khapanan sĩi phũas igawam mosdau khapanagjonaa edjã ee phĩdag phuphup aadeejemjota thʉnʉisijim anʉm, amach khapangau chi beerjujã khaugba.

¹³ Mag Ẽwandam iek ʉkhaajerr khʉʉn cha maadeu jaau nʉm khʉʉnan chadcha thum khechjierram, mag Ẽwandamau amachig nem deeju jaautarrjã agtha auba durruwe. Mamʉ mag Ẽwandamau jaautarrjo chadcha aju ʉkha narr aawai amau khaphʉ naajim, ya ʉ̃gthar paaukhabaimaawaita mʉig eegar deeju arr khãaijã atcha Ẽwandamau amachig deeju. Mag khĩirju phobaadeewaita mʉig eegarwejã warag onee nʉm iekhau, “Mʉiguin maachin sĩi chikham durr gaaita wenʉrrʉm” aajeejim anʉm.

¹⁴ Amau mag iekhaajerran deeum durr gaaita durrkhaa chaar durrkhaimaju khĩirju narr aawaita maagjeejim; ajapcharan ʉ̃gtharchata naaimaju khĩirjuwiama.

¹⁵ Amau warrcha amach naajerr durrta khĩirjuajerr amuan, deeu Egiptoogta wetkham, warrjã mammuata beetarr khʉʉn aawai.

¹⁶ Mamʉ amau ig narran, mʉig eegarm khãaijã durr ajapcharamta ig naajim; ajapcharan ich Ẽwandam sim aram durrma, ʉ̃gthar. Maguata ich Ẽwandamaujã chigag chukhu amag, “Mʉʉta pãar Ẽwandamau; mʉch dʉi joobamkhĩir durr ajaphamta mua pãar athee khĩir khaug wai chirʉmgui” ajim anaabá.

^17-18 Jooi Abranau khaphʉ sĩejim, Ẽwandamau ichig jaautarrjo chadcha ich chaai ãbpai khitʉm gaaimuata ewag pawiajã jũrr õor pooma thʉnʉisiju, i chaain ewagam khʉʉn. Mag ichig jaautarrjo aju khaphʉ sĩerr aawaita chadcha ich ipierraa aju khap aag awi Ẽwandamau ichig, “Pʉch chaai ãbpai khitʉmta thõonaa phaamamua mʉrʉg ofrendakha deebá” abaawaijã, magʉm aba chadcha i ipierr peer ich chaai thõojim anaabá.

¹⁹ Mag sim aig Abranau khaphʉ sĩejim, Ẽwandam chadcha chi jua thierr aawai irua ich chaai thõopʉitarr akhiinjã deeu phiriu awaag nem jua theeg sim. Maguata chadcha Ẽwandamau ichig jaautarrjo aagpajim anʉm, ich chaai dʉi. Mamʉ mag ya irua thõogpam ee, Ẽwandamau oowai Abranau chadcha ich ipierraa sim oobaawai, ʉu ʉdʉʉr chaai thõopibajim aajem. Maigta Abranau oowai i chaai chi thõm arrta ʉu deeu monakha diig athaademjo ajim anʉm, mag ya thõopäaigpam eeta deeu ich Ẽwandamau jaaubaawai jua khʉapʉitarr aawai.

²⁰ Isaaujã Ẽwandamau ich ayag jaautarr chadcha ʉkha sĩerr aawai ich chaain Jacob Esaú dʉi paarpaawaijã am bendiciemamua chadcha Ẽwandamau am dʉijã ʉu aju a jaaujim aajem amag.

²¹ Maimua Jacooujã Ẽwandamau ichig jaautarrjo aju ʉkha sĩerr aawai, ya jooi ich meegpamua ich bordón gaai mobʉ oo kherʉmua Ẽwandamag jeeumamua ich yẽtonaanjã ajapha bendicie pʉajim anaabá, am gaaimuata chadcha Ẽwandamau ichig jaautarrjo õor pooma chi thethemnaanjã obermaju khap amkhĩir. Mag irua bendicietarr José chaain ajim aajem.

²² Maagwai chi Joseeujã agjo Ẽwandamau ich tathooinag, “Pãar mua phe arrwi deeum durrta durrkhapiju” a jaautarr khaphʉ sĩerr aawai, chadcha Ẽwandamau ich magta aju khĩirjuwi ya ich meegpamua, “Ẽwandamau pãach mʉig Egiptomua phe arrwai mʉ pa thum wa auwi pãach dʉi athaadet” a jaaujim anʉm tagam khʉʉn israelnaan ich khodnaanag.

²³ Moisés dennaanaujã amach jooinag Ẽwandamau mag jaautarr chadcha ʉkha narr aawai, reíu israelnaanau chaain oomam thum khechpi jaau sĩerr ãba, ya chi Moisedam thaaba khersiewai amach chaai khõigwi, “Mʉg chaai jooipa khersiewai mʉgʉgta Ẽwandamau Egiptopien jua eemua deeum durr maach phe arrpiju” awi, ʉdʉʉr i thõopiba sĩi warag ed thãrjup ich mag meer wai nʉisijim anaabá, mag chaai gaaimua amachta khaigba ajujã ogkhaba.

²⁴ Mag nawe Ẽwandamau ichdeu jaautarrjo aju ich chi Moiseeujã khaphʉ sĩerr aawai, iin chadcha Egiptoom rey khaauta bʉ̃rʉʉwe bãaupʉijieb mamʉ, í chan mag rey kha ag iewaa khabam ajim anʉm.

²⁵ Rey dʉi ãbam deg joobam khõchgau warag ich meeunta isegamjo abaawai Ẽwandam na khaigba aju khĩirjuwi, warag ichta ich meeun Ẽwandam õorkha thʉnʉm khʉʉn dʉi ãba sĩi ich dau aphʉʉ apijuuta khĩirjubaadejim anaabá. Ichdeu khaphʉ sĩejim, mag rey dʉi mʉig eegar khũchpai nem ajapham thum paarpawiajã sĩi ich meebaadee deeu chukhu aju.

²⁶ Irua khĩirjuawai Ẽwandamau maach meeun judionaan eemuata õor peerdʉ aumkhĩir pʉiju arr aawai, chadcha ich mag amkhĩir ichpa dau aug wau nʉmta nem thum paarpa nʉm khãaijã ajapcha sĩejim, ich mag sim paarjã Ẽwandamau mʉg atag jũrr ich dʉi ajapcha aju khaphʉ sĩerr aawai.

²⁷ Mag, Moiseeu ichigta Egiptomua Ẽwandamau õor wai obeerpiju khaphʉ sĩejim. Magua ichdeu ooba sĩejieb mamʉ, Ẽwandam ich dʉi sim khap, reíu ich dʉi meeukhajujã khĩirjuba, warag ichta Egiptomua majim aajem, Ẽwandamau chadcha ich õor phe arrpi nʉm ora.

²⁸ Maimua ag khur nassi pawiata Moiseeu Ẽwandamau ichig jaautarr ʉkhawi, deeu Egipto beewi ichdeu ich meeun phe arrju noram ovejadam thõonaa, ag bagau puertdi i gaai maach meeun dipierr bʉchkhun phuurkhapi jaaujim anaabá, mag edaar ich Ẽwandamau ich chog dipierr chaain chi nacharam khʉʉn khechamkhĩir pʉibaawaijã mag phuur sĩsidʉm aiguim khʉʉn chig am ugua.

²⁹ Mag chadcha Egiptopien jua eemua oberdʉtkhatarr edjã Ẽwandamau ʉu amach peerdʉ auju khaphʉ narr aawai phũas Chi Phur anʉm eejã maach jooin sĩi durr jʉsarg eemjo thoom igar dʉrba dichjierram anʉm. Mag oowi chi Egiptopien am ẽudee ẽkha wedurarr khʉʉnaujã agjo aju ẽkhajierrab mamʉ, deeu chi phũas ãbamʉg thẽrrdʉbaadee thumaa ojierram anaabá do ee.

³⁰ Ẽwandamau chadcha ichdeu jaaubarmjo aajem ʉkhawi maach jooinau amachig jaautarrjo, Canaan durr barwi, phobor Jericó aajerr igaau siete días phʉʉrdʉpi jaautarrjo phʉʉrdʉbaawai, ya ãbmiecharam gaai paawai chi phobor igaau ʉ̃gthaa thuur phʉʉrdʉ sĩerr sĩi jẽkhʉt aphegkha warre khʉiphobaadejim aajem.

³¹ Mag phobor ee sĩejim aajem ĩchab ʉʉi ãb chi durpathierrmie arr Rahab a thʉ̃r sim. Mag ʉʉirau maach Ẽwandam igwi maach Ẽwandamta thumaam khʉʉn khãaijã chadcha chi jua thierriu a khaphʉnaa i iekjã ʉkha sĩejim aajem. Magua maach jooin eem khʉʉn Josueu pʉiwi mag chi phobor khʉiju na oothurtarr khʉʉnjã ʉu ich di aig barpiwi am peerdʉ aujim aajem. Mag am peerdʉ autarr aawaita tagam khʉʉnau Ẽwandam jua theeg simjã ʉkhaba arr gaaimua thum khechpʉitarr ee, chi Rahab chan thõoba ʉu Ẽwandamau peerdʉ aujim aajem.

³² ¿Mag tag khaita mua pãrag jaaubarkhiin? Agtha jaauju pooma thʉnʉm: Gedeón, Barac, Sansón, Jefté, David, Samuel maimua tagam khʉʉn ijo Ẽwandam i õrag jaaujerr khʉʉn pooma thʉnʉm, jãga amaujã Ẽwandam iek ʉkha nʉmua nem waaujeejĩ; mamʉ makhʉʉn thum jaaukhiin da jaaupʉibaju.

³³ Amau chadcha Ẽwandam gaai ʉkhaajerr aawai deeum durram khʉʉn dʉi werbʉawaijã amachdeuta poodjeejim aajem; amachdeu durr jʉ̃a nʉm ee õor dʉi nem agchata aajeejim; mag amachdeu ʉkhaajerr gaaimua Ẽwandamau amachig deeju arrjã chadcha aujierram; león phãarkha thʉnʉm ee barkhʉʉinaa

³⁴ orno uu wejom ee phãartarrjã bʉ̃ʉrjã chig aba ʉu oberjierram aajem; chikhamnau thuthuíu khechpʉiju arr khʉʉnjã ʉu peerdʉwi, ĩchab ya podba warm khʉʉn jua eegar pajojoo narrjã deeu ʉu jua theeg auwi, jũrr amachta emkhooin khaajeejim anʉm; mag nʉmua amach dʉi werbʉ nʉm khʉʉnaujã am ogkhawi warag amachta weetjeejim anaabá.

³⁵ Ʉʉinaujã ĩchab amachdeu Ẽwandam iek ʉkha narr gaaimua amach chaain chadcha mee narrjã deeu ũwaai amach daúa iiu phiidʉ nʉm oojierram aajem. Mamʉ ãaur khʉʉn chan magba, ãaur khʉʉnan jũrr thethemnaanau wau thõomamuata khechjierram anaabá. Par amachig “Pãrau Ẽwandam iek tag ʉkhaba pʉamʉn pãar marau khechba sĩi pʉapʉiju” abaawaijã, peerdʉm khõchgau awi “Magan tag marau Ẽwandam iek ʉkhabamjã” aba, warag ʉdʉraa amach khechpijierram aajem, amach iiu phiidʉwi jũrr ʉ̃gtharchata Ẽwandamau amach athaawai ʉucha naaimaju khaphʉ narr aawai.

³⁶ Ãaur khʉʉn sĩi am khĩirpaijã wau iekhanaa wʉjã wʉmaajeejim anʉm; ãaur khʉʉn cadenau jʉ̃naa caden paraajã cárcel deg ookhekhed aajeejim anʉm.

³⁷ Ãaur khʉʉn mokou bar wai nʉmuajã thõopʉimaajeejim anaabá; khar chará sĩi serruchoujã maach jãrrcha thʉʉmamua thõopäaijeejim anʉm; wa magbaju khai sĩi thuthuíu khãijã su khechmaajeejim anaabá. Maimua ãaur khʉʉn amach khapeenjo mag am jua ee dau aphʉʉ amaaugau parhooba wenʉrraajeejim anʉm, amach ẽudee ẽkhaawai; khajũadam jũaju chukhu aadeewai oveja eu wa chĩb eu khãijã jũajeejim anʉm, dau aphʉʉ; mag nʉm dʉi gaai machagjã aajeejim anʉm, mag amach dʉi khaigba aawai mag parhooba wenʉrrʉmua.

³⁸ Mag durrarr khʉʉnan, õor wäjäaun arr aawai, mʉg durr ãkhãrag sim gaai bʉ thʉgbaju aai narrta mag parhooba amach barjujã khaugba wenʉrraajeejim anʉm, õor chukag ee pabʉ eem magwe. Maguata jẽbdegjã naajeejim anaabá, dʉʉrwai.

³⁹ Mag Ẽwandamau ichdeu warrgarwe jaautarrjo chadcha aju khaphʉ narr gaaimua ich iek ogdʉba ʉkha nʉmjã ich Ẽwandamau oowai ʉu sĩejim anaabá. Mag ichdeucha oowaijã ʉu sĩejieb mamʉ, mʉig eegar wenʉrrʉwe chan mag Ẽwandamau maach jooin dʉi wauju jaautarr thumaa pod amach daúacha ooba durrajim.

⁴⁰ Mag amau ooba arran, Ẽwandamau Cristo pʉibarm gaaimuata ĩs mʉg maach ewagam khʉʉnpa ãba ajapcha paapʉiwi ãba ich aar naaimaju ayaa apiju khĩirju wai sĩerr aawai ajim.