Hebreos 10 - Wounaan Meu

¹ Ẽwandamau Moiseeg ley deetarr gaai nem waupi jaau sĩerrjo nem wau narran, sĩi okhar ewag paawai ichdeu maach dʉi nem ajapcha wauju den chi khũgurpai arr aawai, ich agjocha khaba sĩejim. Maguata chi leíu chan chi ley ʉʉrkhanaa añopierr nemchaain khechnaa Ẽwandamag jejeeukhamjã pod õor ajaug paa auba aajeejim.

² Chadcha ley gaai jaau sim ipierr nemchaain khechnaa Ẽwandamag jeeubarmuapai õor pekau chugpaanaa thãarjã ajaug paajerr akhiin, ya kulp chukhu naawai amau biek ãbpai mag wauwi tag nemchaaindam khechba aajeekham.

^3-4 Mamʉ par mag jejeeukhamjã mag phak bagau chan ni chĩb bagaujã pod pekau chugpaa auba aajeejim. Magju khãai sĩi mag nemchaain añopierr khechnaa jeeupi jaau sĩewai warag mag leíuta amag amach pekau khĩir eepapi simjo aajeejim.

⁵ Maguata Cristoou mʉg jẽb gaai beewai ich jãg David khararrau ich Cristoouchata Ẽwandamag iekhaju igwi phãtarrjo, “Tata” ajim anʉm, “jãg sĩi nemchaain khechnaa ofrendakha pʉchig deewai pua khõchkhabapai aajeewai, pua mʉʉta chadcha pʉibarmgui” ajim anʉm, “wounag pawia mʉchchata õor kõit thõopimkhĩir.

⁶ Jãg pekau chugpaag awi nem inagdam deenaa nemchaainta pʉch athee khech nʉm pua khõchkhaba aajem, jãgʉmua chadcha pekau chugpaa auba aajeewai.

⁷ Magua mʉʉta cha chirʉmgui” ajim anʉm “Ẽwandam, pʉch iek phã sim gaai mʉch igwi jaau simjo ich agpierr pʉchdeu khõsimjo aag.” (Sal. 40:6-8)

⁸ Chi ley gayan chadcha mag nemchaain khechnaa ofrendakha deepi jaau sĩeb mamʉ, ich Cristooucha jaauwaijã Ẽwandam iek irig chan jãg pekau chugpaag awi mag nem wau nʉmjã ʉu khaba sim aajem.

⁹ Magnaa ĩchab ich Cristoou mag “Mʉʉta cha chirʉm Ẽwandam, pʉchdeu khõsimjo aag” a sim aigjã, mag nemchaain khechnaa jeeujerrjã warre isegpʉiwi jũrr ich gaaimuata ĩsin õor pekau chugpaa thʉnʉm a simʉu.

¹⁰ Mag ichta Ẽwandamau khõsi sĩerrjo meebarmuata maachin Ẽwandamau ich atheepai nem wau wenʉrramkhĩir ich denkha wai sim. Mag ichta warrgar nemchaain kheechjerrjo ʉdʉraa maach kõit ich thõopitarran, mag biek ãbpai meebarmua tag meeba aag ajim.

¹¹ Mamʉ magʉm ãba, maach judionaan een agtha phadnaanau nemchaain khechnaa edau ãspapakhampierr jejeeu aajeeb mamʉ, jãgʉmua chan bʉ̃ʉrjã pekau chugpaa aubam.

¹² Magarrau Jesuuwan chad biek ãbpai meetarrau tag meeba ich mag warag ʉ̃gthar mawi ich Aai juachaar gar oo sĩsijim, ich Ayau ichig õor kõit waupitarr thum waupʉiwia. Magbarm aigmua warre ĩchab pekau chugpaag awi tag nemchaainjã khechju aai khaba apʉijim.

¹³ Mammua Ẽwandamau ich oomapham khʉʉn thum ich jua ee phedeeta oo sim,

¹⁴ ichdeu ichta mag biek ãbpai mag meebarmua sĩi ofrendakha ich Ayag ich deetarrau ich denkha aumam khʉʉnjã warre ajaug paapʉimaajeewai.

¹⁵ Mag irua õor ajaug paapʉimaajemʉn chadcharau a khap apieg, Ẽwandam Akharaujã nawe ich Ẽwandamaucha iekhatarr igwi,

¹⁶ “Nacha mʉchdeu israelnaan dʉi iek deetarrjã amau mʉ ipierraa khabajierrab mamʉ, mua ũwaai am dʉi iek deejugui” ajim anʉm. “Ma mʉgaugui” ajim anʉm ich Ẽwandamau: “Mua am dʉi deeu iek deebarmʉn, warre am khĩirjug eeta sĩuwi am thãar eejã phã sĩubarmjota ajugui” ajim anʉm, “mʉch ipierraa am khõsi amkhĩir.” (Jr. 31:33)

¹⁷ Magnaa ĩchab, “Amau mʉch dau na nem khaigbam waaujerrjã mua chugpaapʉiwi, tag magʉm iekjã igba ich mag khĩir okhoopʉijugui” ajim anʉm Ẽwandamau, ichdeu õor ajaug paapäaijem igwia. (Jr. 31:34)

¹⁸ Magtarr aawai ya tag dich pekau kõit agtha magʉm nemchaainta khech wenʉrraju khaba nʉm, ichdeu jaau simjo chadcha ichdeuta warre maach khaibag chugpaapʉiwi khĩir okhoobapäaiwai.

Ẽwandamta jʉrju aai nʉm

¹⁹ Magau keena. Mʉig eegarin chadcha phadnaan por appaita mag Lugar Santísimo ee duubjem. Mamʉ ĩs chan magba, mag Jesucristoou maach kõit ich bag ãrpitarr gaaimua ĩsin maach thum chi ʉkha nʉm khʉʉnta ʉu warre ich Ẽwandam sim aarcha oberju aai nʉm.

²⁰ Mamʉ mag ʉu i aarcha wetju aai nʉmʉn, mag Lugar Santísimo gar dicham ugua put parrg eu wejorrau thuur sĩerrjã ich Jesucristoouta ich meebarmua warre thorreubapʉimua khʉd wau deebaawaiu.

²¹ Magwia ichta Ẽwandam aarcha maach thum i chaainkha thʉnʉm khʉʉn Porkhanaa maach kõit iekhaajemkha sim.

²² Mag chadcha Cristoou ich bagauta maach ajaug paabarm dʉi phadnaanau chi ʉ̃rʉmpai ʉpʉiwi Ẽwandamag jewaag ajaug paajerrjo ich Ẽwandam Akharauchata maach thãar ajaug paawi dooujã ajap ʉtarrjo naawai, warag thãraucha Ẽwandam jʉrtarrau keena, bʉ̃ʉrjã irua maach isegjujã khĩirjuba.

²³ Irua chadcha ich iekhatarrjo aajeewai, dich ipeerdʉ iekhajujã khĩirjuba, ĩsin warreta maachin ya peerdʉwi nʉm aju aai nʉm, ichdeu jaautarrjo maach ich aar phe auju khĩirjugjã ogdʉba.

²⁴ Mag khĩirjunaa ĩchab warag agdaujo dich khapeen juag oonaa am daupii ajuuta ẽkhaju keena.

²⁵ Magʉm ĩs mʉg maach Por Cristo beejujã warag dakpapa khaawai chará, khar maach khapeen aajemjo, culto ee maba sĩi degpai naaju khaba nʉm. Magju khãai agdaujo chikham wawí nʉmua warag dich khapeen onee apijuuta ẽkhaju.

²⁶ Mamʉ magba maadeuta mʉg Ẽwandamau maach peerdʉ aaujem iek wajapha khaphʉ narrta, juau ogthom i iseg nʉm iekhau parhooba nem wau nʉm gaaimua ũwaai warr i khaugba aawai naajerrjo ich mag parhooba wenʉrrʉm chan, magan Cristoou parta maach gaaimua ich thõopibarmjo ajim, maadeu irig maach peerdʉ aupiba naawai.

²⁷ Magta amʉn, tag maach peerdʉ auju chukhu aawai, magan Ẽwandamau maach i agkham ed maach seúa maach gaaita ich khĩir machag meeunaa tagam khʉʉn ich khõchkhaba aajerr khʉʉn dʉi ãba sĩi õtdau ee jẽerjupaita nʉm.

²⁸ Pãrau khaphʉ nʉm, warr Moiseeu ley pʉatarrta õrau serbiibag phemjo amach khõchag aig nem waauwai, chi ootarr khʉʉnau, numiim khʉʉnau wa thãrjupam khʉʉnau khãijã thethemnaanag jaaubaawai, makhʉʉn bʉ̃ʉrjã dau aug khaugba, warre khechpi jaaujeejim, chi ley gaai jaau simjo.

²⁹ Pãade khĩirjubat: Maagjerr khʉʉn dʉi magta aajerr khai, ¿jãgaju khai Ẽwandamau oowai ich Chaaita õrau khõchkhabam iekhau sĩi maadeu nem igmaphamjo amach kõit i bag ãrtarrjã warag isegnaa, ich Ẽwandam Akharau ʉu amach Ẽwandam denkha aaujem igwiajã sĩi wau iekhaajem khʉʉn dʉi? Amau mag iseg naab mamʉ, ¿mag i Chaai bagau khabajĩ, Ẽwandamau ich garmua õor dʉi iek deewai jaautarrjo chadcha õor pekau chugpaawi peerdʉ auju aai apitarr?

³⁰ Mamʉ maadeu khaphʉ nʉm, chi mag nʉm khʉʉnag chan Ẽwandamau sĩi par daúa oo nʉʉ abaju. Magua chi mag nʉm khʉʉn igwi, ich Ẽwandamau iekhatarrjã ich iek phã sim gaai, “Muata õor dʉi amachdeu nem khaigba waaujerrpierr am gaai mas ab khaba mas deeju” a sim. (Dt. 32:35) Magnaa ĩchab ichdeupai, “Muata õor thumaam khʉʉn dʉi amachdeu nem waaujerrpierr ich agjo aju” a sim “am dʉi.” (Dt. 32:36)

³¹ ¡Aay apkhiitʉ, maach Ẽwandam cha maach wai dʉnʉmʉgta mag ich gaai mas api sim woun!

³² Mamʉ pãar ʉu magba nʉm. Magba naab mamʉ, khĩir eyaa abat: Warrcha pãachdeu Cristo iek chadcharam ʉkhatarr khuriipai aawai pãach wajappha phithurg au durrumjã pãrau magʉmjã aba ʉu at aba chadcha pãrau ãwaatjeejim. Ich jãgta penaat warag.

³³ Chadcha pãar ee ãaur khʉʉn nʉm; makhʉʉnan õor pom wejom dakhĩirjã sĩi wau wai nʉʉ awi am dʉi amachdeu ampierr aajeejim. Maagwai pãrau am dau aug khaaugwai pãachpata kharin dʉi mas waunaa sĩi õrau kha iseejã aajeejim am gaaimua.

³⁴ Mag durrum gaaimua pãach khapeen cárcel deg durrum khʉʉnjã pãrau ʉu dau aug khaaugjeejim. Mamʉ magpaijã khaba, mʉig eegar pãachdeu nemdam wai nʉm khãaijã ajapchanaa bʉ̃ʉrjã ãrba aajemta paarpajujã khaphʉ naawai, pãach nemdampa khechthʉg aumam kõitjã iekhaba, gaai mas khabamjo warag onee magʉmjã pãrau khĩu ãwaatjeejim.

³⁵ Khodamnaan, jãg pãachdeu ʉkha nʉmjota warag ogdʉba ʉkhanaat, ĩsin par khãijã maadeu ʉkha nʉm a khĩirjuba. Pãach jãg durrum paar deegan, Jooirau nem ajapham pooma wai sim.

³⁶ Mamʉ mag ich Ẽwandamau khõsimjo nem wawaagan, dau aug wau wenʉrrʉmjã magʉm aba, ichiita warag ãwat wenʉrraju aai nʉm. Mag nʉmʉn chadau ichdeu jaau simjo pãar dʉi ajaphanaa ich dʉi ich mag wenʉrrapiju.

³⁷ Mag phithurg au wenʉrrʉmjã, Cristo deeu beeju khap sĩi ãwatju aai nʉm igwi, ich Ẽwandamau iekhatarr ich iek phã sim gaai, “Nʉnaat, pãrau nʉ nʉm woun beeju chan pom waaurba sim” a jaau sim.

³⁸ “Pãar ar mʉrʉgta pãach pekau chugpaapitarr khʉʉnaun mʉ pãach dʉi chirʉmjã khaphʉ wenʉrraju; mamʉ chi mʉ iek ʉkha narr khʉʉnta deeu ewag wet nʉm khʉʉnau chan, oob mʉ amach dʉi chitaju amiet; mʉchdeujã tag amag oohbam” a sim. (Ab. 2:3-4)

³⁹ Mamʉ maachig chan mag irua oobam abaju, eem khʉʉnjo ewag wetwi okhooju khʉʉn khaba naawai. Okhooju khãai, maachdeun chad thãrauchata i iek ʉkha naawai maachin peerdʉwi ich dʉicha wenʉrraju khʉʉnau. Ich jãgta ʉkhanaat keena.