Hebreos 1 - Wounaan Meu

Ẽwandamau ich Chaai pʉibarmua maachig ich khaugpitarr

¹ Warr jooingar Ẽwandamau biek khapan ichdeucha õor jʉr auwi makhʉʉnagta ichdeu nem jaaum ig sim jaaujeejim aajem. Khar khãaipi au nʉmua, ich chognaan pʉi nʉmua, wa magbaju khai ichdeuchata amag jaaujeejim aajem, makhʉʉnau jaau nʉm ũr nʉm gaaimua õrau ich khapcha pamamkhĩir. Mag, chadcha makhʉʉnauta jũrr maach jooinag ich agjoo jaaujeejim aajem.

² Mamʉ ĩs ewag pawi Ẽwandamau jũrr ich Chaai pʉibarm gaaimuata maachig ʉu ich khaugpibarm. I gaaimuata ĩchab nem thʉnʉmjã thumaa ompaawi ichigta Ẽwandam chi Ayau makhʉʉn nem thumaa ich dʉi jʉ̃apijim.

³ Ichdeuta ĩchab mag ich Aai dʉimua nem thumaa ompaatarrjã sĩi ich iiu aawai ichdeuta wai dʉnʉm. Ichta ich Aai khĩir thegnaa beetarr aawai i gaaimuata ĩchab Ẽwandam ajaugjã khaphʉ aajem. Ichta maach kõit ʉdʉraa ich thõopiwi, ichdeuta ich bagau maach khaibag thumaa chugpaawi, ʉ̃gthar mawi, Ẽwandam juachaar gar jupimajim, ichta ich mag maach thumaam khʉʉn Porkha sĩerraag.

Ẽwandam Iewaata angelnaan khãaijã ʉ̃rpai sĩerrʉm

⁴ Mag gaaimua ich Ẽwandam Iewaata ĩchab angelnaan ʉ̃gthar thʉnʉm khãaijã ʉ̃rpai sĩsijim, am khãai irigpaita ich Jooiraujã Iewaa ichenaa warm khʉʉnag sĩi ich chognaan aajeewai.

⁵ Mag ichta thumaam khʉʉn khãai ʉ̃rpai sĩewai Ẽwandamau bʉ̃ʉrjã ich chognaanag chan ich Iewaag iekhatarrjo iwiir ãbamʉgjã, “Pʉ mʉ Iewaa aawai ĩs mua thumaam khʉʉnag mag khap api chirʉm” abajim. (Sal. 2:7) Ni bʉ̃ʉrjã ich chog iwiir ãbam igwiajã, “Mʉʉta i aaikha chitaju, maagwai ich jũrr mʉ chaaikhajujã” abajim. (2 S. 7:14; 1 Cr. 17:13)

⁶ Pari magju khãai, warag mag ich Chaai ãbpai khitʉm mʉig eegar päaiwai warag angelnaan ich chogkha thʉnʉm khʉʉnagta, “Pãach thumaam khʉʉnau irigta jeeubathʉ̃” ajim. (Dt. 32:43)

⁷ Ich mag warag Ẽwandamau ich chognaan ich dʉi thʉnʉm igmamua jaauwai, Angelnaanan irua phũjo nem khaphí apinaa, sĩi õt uu jẽjẽerkhamjo ichdeu nem jajaaukhampierr khodpepet apiejem aajem. (Sal. 104:4)

⁸ Mamʉ ich Chaai igwia chan sĩi ich angelnaanagamjo iekhaba, warag ich paarmua, “Ẽwandam, pʉchta nem thum thʉnʉm Porou” a iekhajim chi Ayau ich Chaairag. “Mʉg atag pawiajã pʉchta ich mag chi Porkha chitaju. Puan nem agcha waunaa khajaphata waaujem.

⁹ Puan nem wajaphamta khõsinaa nem khaigbam oomapha aajem. Maguata Ẽwandamau pʉrʉgta ʉ̃gtharjã chi Porkhapijim; ajapcharan mʉchdeuma, mʉchdeuta pʉrʉg chi Porkhapijim. Mʉchdeuta ĩchab thumaam khʉʉn khãaijã pʉ oneecha apijim” a iekhajim Ẽwandamau ich Chaairag. (Sal. 45:6-7)

¹⁰ Maimua ĩchab ich Ẽwandam iek phã sim gaai ãbmua phãmamua chi Iewaa igwia, “Señor, pʉchdeuta chadcha warrgarwe mʉg durrjã ompaawi edaujãjã pʉchdeuta waujim” ajim.

¹¹ “Chi chugpaan chadcha pua mag nem ompaatarr thum deeu chukhu aju, mamʉ pʉch chan thõojã khaugba ich mag chitʉm iekhau. Tagam nemen thum sĩi khajapham khajũajo jẽeudubju.

¹² Magbaawai ich jãg khajũa jooi chi iiur dʉi theg jũajemjo, pua mʉg durr jooi isegpʉiwi chi iiurig paapʉiju. Pari pʉch chan bʉ̃ʉrjã khĩir khĩethuupaijã khaba, pʉʉn ich mag chitʉm iekhau” a phãjim. (Sal. 102:25-27)

¹³ Mag ich Iewaata thumaam khʉʉn khãai ʉ̃rpai sĩewai sĩi ich chognaanagpai chan ni ãbamʉgjã Ẽwandamau ich Iewaag iekhatarrjo, “Mʉch iek theeg chirʉmjo aag pʉʉta mʉ dʉi ãba mʉ juachaar gar jupbá” abajim, “pʉch oomapha aajem khʉʉn thum mua pʉch jua ee pʉrkha dee nʉm ora.” (Sal. 110:1)

¹⁴ Mamʉ angelnaan thum sĩi Ẽwandamau nem jajaaukham ipierraa aagta thʉnaawai amag chan irua mag iekhabajim. Jãkhʉʉnan, sĩi ich Ẽwandamau ich dʉi ich mag wenʉrraag maach ich aar phe auju khʉʉn juag oomkhĩir pʉitarr khʉʉnau.