Gálatas 6 - Wounaan Meu

Agdaujo dich khapeen juag ooju aai nʉm

¹ Hermanonaan, pãachdeu oowai ãb khãijã Cristo gaaimua maach khodkha kherʉm pekau ee buudimam oobaawai, ar chi Ẽwandam Akharau pãachig nem jajaaukhampierr aajem khʉʉnau i khaigperbat. Mag deeu i khaibag eemua obeer auju ẽkha nʉm aigjã ithũu wawimamuata i wawipetat, deeu ajaug ee sĩsimkhĩir. Mamʉ mag pekau ee burr nʉm khʉʉn wawiewaijã khĩir khaphʉ abat, eeu pãachpata dʉi agjo adukham.

² Pãach ee ãb khãijã problema paarpaawai, warag pekau ee burrm ugua, oob irig oobamjo amiet. Pãrau chadcha at aba magta am khaigperju ẽkha durrumʉn, Cristoou dich khapeen kha khõsi apitarr aawai chadcha magta nʉm.

³ Ãb khãijã sĩi atcharagaupai ichta warm khʉʉn khãaijã ʉ̃rʉʉcha sim a sim wounan, ichdeupaita ich khũgur sim, ich mag iekha sim gaaimuapai serbiiba simta mag iekha sim merag chukhu sĩewai.

⁴ Magju khãai chikhamnau nem khaigba wau nʉmta eerpanaa jaauju khãai, pʉchpaita khĩirjubá, chadcha Ẽwandamau khõsimjota wau sĩ a khap aag. Mag irua khõsimjota nem wau simʉn chad onee aju awiajã magʉm gaaimuata onee aju aai sim.

⁵ Mua mag dichdeu nem wau nʉmta ʉu sĩ wa ʉu khaba sĩ a khap aju aai nʉm a chirʉmʉn, Ẽwandam khĩirphee dʉnʉʉutkhabaimam edjã chikhamnau nem wautarrta irua maachig jeeuba dichdeu nem wautarrta jeeumaju aawaita mag chirʉm.

⁶ Mʉg maach peerdʉajem iekta ben do nʉmjo khaug nʉm khʉʉnaun amachdeu nem wai nʉm eemjã mag amachig jaau nʉm khʉʉnag deeb khaba dedee aju aai nʉm.

⁷ Pãachta Ẽwandam dau na chi ajapcharam khʉʉn awi oob wir aig pãachdeupai pãach khũgurmiet. Mʉig maach agdaujom khʉʉn appain pãrau õor khũgurwiajã Ẽwandam chan pod ãbmuajã khũgur aubam. Pãrau khaphʉ nʉm, maadeu nem jĩirwain deeum nemjĩir oberba, dichdeu nemjĩirtarr khĩirta obeerjem.

⁸ Ich agjota sĩebahab mʉig eegar aawaijã: Maadeuta dichdeu khõchagpierr parhooba nem waaujerr khai, mag dichdeu nem khaigbam waaujerraupaita Ẽwandamag maach aupibaju. Pari magba Ẽwandam Akharau khõsimjota agpierr nem waaujerr khai, ich ag Ẽwandam Akharaupaita ĩchab ich mag maach ich dʉicha ʉ̃gthar wenʉrrapiju.

⁹ Maguata maach chan mʉg nʉm aig khuseukha phobaadem awi nem ajapha wauju aai nʉmjã wauba ich mag sĩuju aai khaba nʉm. ¿Jãgwi? Chokhõgba magta nem ajapham apha wau wenʉrrʉmʉn, Ẽwandamau oowai ichdeu magju ayaa am ed mag nem waum khõsi waaujerr jũrr maach dʉi agjo ʉu aju aawaima.

¹⁰ Keena, maguata muan pãragan, ʉuta dich khapeen juag ooju aai nʉm aiguin thumaam khʉʉn dʉita ajapha aju aai nʉm a chirʉm. Pari mag nʉm aigjã Cristo gaaimua maach khodkha thʉnʉm khʉʉn dʉita maadeu ʉ̃rcha ajapha aju aai nʉm.

Pabloou ãbmiecha õor wawimamua salud deepʉitarr

¹¹ Keena, pãade oobat: Ya opʉyaagpaawai mʉch juadamaucha pãrag mʉg ẽsap nem dau dapag phã deepʉi chirʉm.

¹² Ar jãg ajués pãrag amach denjo dich khakhua dauchachpi jaau nʉm khʉʉnaun, sĩi amach meeun dʉi iekkhõr aumaaugauta jãg nʉm, mag amach jooin iita pʉapi jaauba naawai Cristo pakuls gaai meerphe thõotarr gaaimua amachdeu mʉ dʉi nʉmjo amach ẽudee ẽkham ugua.

¹³ Pari mag nʉm chan mag dich khakhua dauchachpi jaau nʉm khʉʉnaujã amachdeu ley jaau nʉm gayam thumjã ʉʉrkha auba nʉmta mag nʉm. Mag nʉmta amach garmuan chad pãrag ichiita amau jaau nʉmjo aju aai nʉm anʉm, mag amach ipierr abaawai amachdeu jaauwiata pãraujã jãg pãach mor dauchach wai nʉm a iekhaag.

¹⁴ Pari mua chan mag am denjo mʉch thoba, maach Por Jesucristo chi pakuls gaai dau aphʉʉ arrta tho iekhaajem. ¿Khanthee mua mʉchdeupai mʉch thobaadeju? Mag mʉch kõit pakuls gaai Cristo thõtarr aawaita ĩs chan warr mʉchdeu nem waaujerrjã tag khĩirjuba, magʉm nem waumaaugau warag chi meemjota chirʉm; ajapcharan magʉm nem chan mʉ athee chukhumjota thʉnʉm, ya jũrr Cristo dʉita chiraawai.

¹⁵ Mʉ naan par amach khakhua dauchachpi jaau thʉnaaju. Mag naab pari maachin dauchach chukhu thʉnʉm khʉʉn dʉi agdaujopai nʉm Ẽwandam dau na. Magarrau mʉch paarmuajã dʉi balee sim a chirʉmʉn, Cristo iek ʉkha nʉm gaaimua deeu thaabatarrjo i denkha nʉmʉn chad chadcha balee sim a chirʉm.

¹⁶ Pãar thum mag Cristo denkhanaa ichdeu jaaumam ipierraa wenʉrrʉm khʉʉn kõitta muan jeeu chirʉm, khõinaa ich jãg pãach eeg oopaar amkhĩir. Maimua ĩchab thum tagam khʉʉnjã chadcha Ẽwandam chaainkha thʉnʉm kõitjã mua jeeu chiraajem.

¹⁷ Keena, mʉ ajim mua pãrag jaaum ig chirarr. Mʉigmua atag chan ni ãbmuajã tag mʉchig mag dich khakhua dauchachpi jaau nʉm iek igpimapha chirʉm. Magʉm dauchachta igju khãai, Cristo iek jaau chitʉm gaaimua õrau mʉ pʉrnaa wʉ wai nʉmua pedphemarrta mʉch mor gaai chadcha dauchachjo wai chitʉm. Jãgʉm oo nʉm gaaimuata õrau khaphʉ aju aai nʉm, mʉ chadcha i chogkha chitʉm.

¹⁸ Hermanonaan, magdampai ajim mua pãrag jaaum ig chirarr. Muan pãar kõit jeeu khitaajem, maach Por Jesucristoouta ich jãg pãach ʉu wai nʉrramkhĩir. Ayoo keena, Pablo