Gálatas 5 - Wounaan Meu

Dich jooin iig tag ee apiba jaautarr

¹ Keena, ya ĩsin Cristoou pãar pãach jooin i eemua ʉu obeer athaawai oob tag warramjo agʉmʉgta ee amiet. Mag pãach jooin i eemua ich mag peerdʉ wenʉrramkhĩirta Cristoou pãar obeer autarr aawai jãg pãachdeu i iek ʉkhatarr gaaita ich mag ubʉ wenʉrrathʉ̃. Oob maar meeun judionaan iigta pãach ich chogkhapimiet.

² Pari magaagan ajapha mʉ iek ũrbat keena: Mʉ Pabloouta pãrag mag chirʉm. Pãrauta Ẽwandam dau na pãach ajapha kulp chukhu paapʉyaag awi ley gaai jaau sim ipierraa pãach meheujã phʉʉrbichpi nʉm khai, magan Cristoou maach kõit ich thõopitarraupai pod warre pãach peerdʉ aubam awiata mag nʉm.

³ Pãade ũrbat, deeu pãrag phʉʉrba jaau chirʉm: Ãbmua khãijã mag meheu phʉʉrbich nʉmuata Ẽwandamag ich aupim ig sim khai, magan tagam nem Moiseeu ley phã pʉarr gaai jaau sĩsidʉmjã ichiita thumaa ajapha ʉʉrkhaju aai sim; mag thum ʉʉrkha aubam chan oob Ẽwandamau pãach auju amiet.

⁴ Pãar jãg ley ʉʉrkha nʉmuata Ẽwandam dau na kulp chukhu aju ẽkha nʉm khʉʉnan, warag pãach garmuata Cristo kha isegwi i bʉ ogdʉnaa Ẽwandamau pãach khõsi wai sĩerrjã pãach garmuata i barpʉa nʉm.

⁵ Pari pãar mag nʉm daumich, maraun chad Ẽwandam Akhaar gaaimua maimua chadcha Cristo maach kõit meetarr ʉkha nʉm gaaimuata Ẽwandam dau najã maach kulp chukhu naaju khaphʉ nʉm.

⁶ ¿Jãgwi mua mag chirʉ́? Mua mag chirʉmʉn Ẽwandamau oowai Cristo iekta ʉkha nʉm khʉʉnan meheu phʉʉrbichba naawiajã thum agdaujopai oojeewaita mag chirʉm. Iruan magʉm nemta wauju khãai, ãba ich iekpai ʉkha nʉm dʉi ichjã khõsinaa dich khapeenjã kha khõsita apiejem.

⁷ Pãachdeu nacha ʉkhatarr iek gaai pãar nem ajaug wetmarrta ¿jãga jãg maach peerdʉajem iek chaarta isegwi parhooba nem jaau nʉmta ʉkham ig nʉma?

⁸ Warrcha Ẽwandamau pãrag ich iek ʉkhapi aauwaijã tag pãach jooin iig ee apimaaugauta Cristo gaaimua pãrag ich iek ʉkhapi autarr aawai, pãar jãg nʉm chan ich Ẽwandamau khabam.

⁹ ¿Pãrau ũrba aajẽ, “Levadura bʉ̃rʉʉ pʉitarrjã arin ee thum aaidʉajem” aajem? Ich jãgta naabahab pãar ee jãg chad khabam iek jaau wenʉrrʉm khʉʉnjã. Am khapan khaba naab mamʉ, amachdeu jãg jaau wenʉrrʉmua pãach thumaam khʉʉnagta maach peerdʉajem iek isegpiju ẽkha naabahab.

¹⁰ Amau jãg naab mamʉ, pãraujã mʉ denjo ʉkha naawai mua khaphʉ chirʉm pãrau maach Por Cristo iek isegbaju. Pari jãg pãar ideu khajap sĩuba wenʉrrʉm khʉʉnan ichiita Ẽwandamau am gaai mas deeb khaba mas deeju.

¹¹ Jãg mʉch meeun judionaanaupaijã mʉ eugar seukha jaau nʉmjo chadcha warramjo agtha mua mʉch paarmua meheujã phʉʉrbichpi jaau chitakhiin, amach ipierr warag Cristo iekjã ʉkhanaa meheujã phʉʉrbichpi jaauwai, amau mʉ khaibag wauju ẽkhaju khãai warag ajaphata mʉ ig iyʉʉ aajeekham. Mag akhiin Cristo pakuls gaai thõotarr iek jaauwaijã am gaai mas khaba aajeekham.

¹² Maestronaan anʉm khʉʉnta khaugab jãg parhoob nem jaaunaa meheujã phʉʉrbichpi jaau nʉm gaaimua ideu pãar khajap sĩuba nʉm khʉʉnan, mag bʉchkhunpai phʉʉrbichpi jaauju khãai amach phãrrta wir aig amachdeupai warre japʉinaa tag pãar molestaaba akhiin ʉucha akham.

¹³ Hermanonaan, Ẽwandamau pãrag ich iek ʉkhapi aauwaijã tag magʉm pãach jooin i ʉʉrkhapieg khaba, ich ipierraa amkhĩirta pãar ichig thʉ̃rkha aujim. Magtarr aawai irua khõsim nemen chad pãachdeu waum aig wauju aai nʉm. Mamʉ mag pãachdeu waum aig nem wauju aai nʉm awi oob sĩi parhoobam khõchag pãach khĩirjug ee beewai agpierr amiet. Magju khãai pãach khapeenjã agdaujo kha khõsinaa am dʉi ajapha ajuuta ẽkhabat.

¹⁴ ¿Khan jãgwi mua mag chirʉ́? Moiseeu ley phã pʉatarr thum sĩi “Pʉch khapeenjã daupii abá ich jãg wir aig pʉchdeupai pʉch chig apimapha aajemjo” a sim gaaimuata thumaa jaau ober sĩewaita mag chirʉm.

¹⁵ Pari pãrau mag Ẽwandamau Moiseeg jaautarrjo khaba warag pãrau pãach wir aigpaijã chikham oomapnaa sĩi khoojem nemjota aadep akhiin, pom wenʉrraba pãachdeupaita pãach khaibag wauju, Cristo gaaimua ʉu wenʉrraju arrta sĩi parhoobam khʉʉnjo naawai.

Parhoob aju khãai Ẽwandam Akhaar ipierrta aju aai nʉm

¹⁶ Keena, magua mua pãar wawí chirʉm, mʉ iek ũrbat: Pãach o khõchagpierr nem khaigbamta waum khõchkhakha aju khãai, Ẽwandam Akhaarta pãach gaai phẽsnaa ichdeu pãachig nem jajaaukhamta agpierr abat.

¹⁷ Nem khaigbam wauju khĩirjug maach gaai simʉn Ẽwandam Akhaar maach ee sim dʉi werbʉa gaai nʉmjota aajem, ãbmua nem waum khõsim jũrr ãbkhaíu waumapha aadep aawai. Makhʉʉn numí mag ihãba khaba aajem khʉʉn aawai makhʉʉn numiim khʉʉnauta maach chi ʉ̃rʉm khʉʉnagjã amachdeu khõsimjota waupiju ẽkhaajem.

¹⁸ Mamʉ Ẽwandam Akharagta ʉdʉraa pãachig ichdeu nem waupim khõsimta jaaupinaa i ipierraa nʉm chan ya tag mag leijã igba nʉm, ich Ẽwandam Akharauta ichdeu khap nem waumkhĩir jajaau aju aawai.

¹⁹ Pãade mʉ seu awi oobat. Merag chukhu sĩejem ar sĩi amach khõchagpierr nem waaujem khʉʉn; magʉm khʉʉnau mʉgta aajem: Amach õor khabam dʉijã khapes aajem; mag khapes aawaijã athuuchata aajem, pod amach khõchagjã ãwat auba ya ich magta waau khaug thʉnaawai.

²⁰ Nem parhoobam nem juau wautarrta ẽwandam awi agʉmʉgpa jeeunaa beneujã õor ʉʉrthʉnaa khʉʉgjem. Chikham khĩirjã oomapnaa chikham dʉi khĩir bʉ̃ʉnaa amach khapeendam ajapha nʉm oowai magjã khõchkhaba sĩerrjeem. Bʉ̃ʉr abarm gaaimua nem khõrgnaa nem inagjom wawaag aawaijã amachta garpapa aajem, chikhamnag inpimaaugau. Amach idʉii aajem khʉʉnpai khõsinaa jũrr agjo deeum khʉʉn igar nʉm khʉʉn dʉijã amachta ʉ̃rpai aju khĩirju sĩerrjeem.

²¹ Jãgʉm khʉʉnaun chikham nemdamjã amach den apim khõssita aajem. Magnaa nag pom waupʉinaa sĩi khech thʉnʉisipnaa thach bipomjã kho sĩerrjeem. Maimua mag tag amau nem waumaajem jaaumakhiin, nem khĩir khapaana thʉnʉm. Na mʉchdeu pãrag jaau chirarrjo ũwaai pʉaba deeu mag chirʉm: Cha mua jaau dichdimam nem waaujem khʉʉn chan Ẽwandam durr wetbam.

²² Mag khãai Ẽwandam Akharagta ichdeu khõsi simjo ʉdʉraa pãachig nem jaaupi nʉmʉn chad warag pãar ee agdaujo pãach khapeen kha khõsinaa, onee, khõinaata wenʉrraju. Mag nʉm dʉi ĩchab chikhamnau khãijã dich meeukhapiju ẽkhaawaijã sĩi ãwatpʉpʉi aa khaphʉnaa, ich odeg bigaaum khʉʉndamjã ʉuta wenʉrrapim khõsi, õor dʉi o ajaphanaa, dich khapeenag nem magju abarmjã chadcha dich iekhatarrjo nem wau wenʉrraju.

²³ Magnaa ĩchab dichta warm khʉʉn khãai ʉ̃rpai ajujã khĩirjuba, daumaanaa sĩi pãachdeu nem waum khõsimʉgta ʉdʉʉr pãach ʉ̃rpapibaju. Mag ajaphata nem wau nʉm khʉʉn chan leíujã agʉm paar khaibag waupi jaaubam, mag Ẽwandam Akharau jajaaukham ipierr nʉm aig ley gaaijã dich khapeen dʉi api simjota naawai.

²⁴ Cristo denkha nʉm khʉʉnan warr i thõo naawaiwe amach o khõchagpierr nem wauju khĩirjugpata warre i dʉi pakuls gaai meerppʉitarrjota nʉm, tag magʉm nem khaigbam wau nʉmua pekau wauba aag.

²⁵ Keena, mag Ẽwandam Akharauta Cristo gaaimua ʉu maach Ẽwandam denkhapi wai sĩewai ichdeu khõsimta ideu warag maachig jajaau apitarrau.

²⁶ Oob iwiir ãbmuajã ichta warm khʉʉn khãai ʉ̃rpai sim a khĩirjumiet. Chikham nemjã dich den apim khõsi khaba, ni magʉm gaaimuajã oob dich khapeen dʉita khĩir bʉ̃ʉ dʉrdʉr amiet.