Gálatas 4 - Wounaan Meu

¹ Mua pãrag jaaum ig chirʉmʉn mʉgta sim: Khanim nemjo woun rikkha simua chaai bʉ̃rʉʉ khitʉm ãbpai wai sim; mag sim meebaadee magdamauta i juagam nem jʉ̃aju. Mag ichdeuta thum jʉ̃ajup mamʉ, agtha bʉ̃rʉʉ khitʉm aiguin, ich ag degam chogjopai chi jooinau ichig nemdam jajaaukhampierrta wau khitʉm.

² Sĩi chi jooinauta bãau arrmam dʉi irua jʉ̃aju nemjã thumaa amach denjo ajapha wai nʉm. Maimua ya chi ayau ich meeju nawe ẽsap gaai jaau pʉatarr ag año wai sĩsiewaita ya ichig thʉsĩebapäaiwai ichdeucha khap sĩsiju; ajapcharan ajap ich jooipa sĩsiewaima.

³ Maach mʉg Cristo iek ʉkha nʉm khʉʉnjã ich agjota naajim. Warrcha Cristo khaugju naweran sĩi parhoobam nem maach jooin iita ʉ̃rcha khĩir pogkhe ʉʉrkhaajeejim, jooinau chaainag nem jajaaukhampierr aajemjo, mʉgʉmuata chadcha dich peerdʉ aujupii awi. Pari mag ʉʉrkha nʉmuata ich ipierraa aawai warag ichta wounjo maach khãai ʉ̃rpai sĩejim.

⁴ Mamʉ mag wenʉrrʉʉ awi ya Ẽwandamau ich Iewaa pʉiju ed aadeewai pʉiwi, Ẽwandamkha sĩerrta maach thumaam khʉʉn thaabatarrjo chadcha maar meeun ʉʉirau oowi, bʉ̃rʉʉ bãaumamua tagam khʉʉnjo mag Moiseeu ley deetarr ʉʉrkha khitʉmua jooipajim.

⁵ Pari Ẽwandamau mag i pʉitarran, mag leita wounjo jua theeg sĩerr eemua maach ich iek ʉkha nʉm khʉʉn peerdʉ aumkhĩir ajim; mag ʉu peerdʉ athaawai ich Ẽwandamaujã ʉu maach ich chaainkha wai sĩsimkhĩir.

⁶ Mamʉ mag ich chaainkha nʉisimjã maachig khap amkhĩir, ich Ẽwandamau jũrr ich Chaai Akhaarta pʉijim maach thãar ee sĩemkhĩir. Mag i Akhaar maach thãar ee simuata maachigjã Ẽwandamag Aai ichepiewai chadcha maadeu Ẽwandam maach Aai aajem.

⁷ Magua ĩs pãar ya tag mag leita ʉʉrkhaag khaba nʉm; pãran ĩsin Ẽwandam chaainau. Mag i chaain aawai mʉg atag pawiajã Ẽwandamau pãar athee nem wai sim jʉ̃apib khaba jʉ̃apiju.

Judionaan ley ʉʉrkhapimaaugau Pabloou chi ʉkha nʉm khʉʉn wawitarr

⁸ Chadcha warr pãrau Ẽwandam khaugba aawain parhoobam nemta ẽwandam awi agʉmʉgta ee aajeejim.

⁹ Mamʉ ĩs ya pãrau Ẽwandam chaarta ajapha khaphʉnaa ich garmuajã pãar khaphʉ simta, ¿jãgwi warr pãach narrjo deeu ũwaai magʉm nem maadeu igba sĩi jua theegjã chukhu sĩsidʉmʉgta ee aju ẽkhaajẽ?

¹⁰ Maimua ¿khan jãgwi deeu ũwaai warrgarmjo phiesta edjã ʉʉrkhanaa, edau wahee nʉm edjã jãgnaa, maimua tagam phiesta año gaai waaujerrjã deeu wauju khĩirju nʉ?

¹¹ Jãg oowaita chadcha pãar ee Ẽwandam iek jaauwai jãg mʉch phithur chitarrjã sĩi par ajim aju okho chiraajem.

¹² Hermanonaan, mʉʉn chadcha Judioou; mag chirab mamʉ ya mʉʉn pãar meeunjota chirʉm, tag mʉch jooin leijã ʉʉrkhaba. Magua muan pãragjã mʉchjota abat a chirʉm. Oob maar jooin ley ʉʉrkhamiet. Mua khaphʉ chirʉm pãrau mʉ iek ũrm khõsi ũrju.

¹³ Pãrau pãachdeujã khaphʉ nʉm, pãar ee nacha mʉchdeu maach peerdʉajem iek jaauwimaawai, mor machpawi warag pãar ee chirsierr gaaimuata ʉu pãragjã jaauwi pãrau ũrjierram.

¹⁴ Muan jãg mʉch mor machpawi aphʉʉ chirʉmuata Ẽwandam iek jaau chitʉm oowi, pãrau warag mʉch isegwi pãach eemua mʉch jʉrpʉiju khãijã khĩirju chirajim. Pari magjã magba, magju khãai angelnaan ich Jooiraucha pʉitarrjo wa ich Jesucristota pãach ee barbaimamjo ajierram pãrau mʉ dʉi.

¹⁵ ¿Chadcha maagwain pãar onee naabajĩ? ¿Magtarrta jãga nʉ ĩs? Mua khaphʉ chirʉm, jãagwai maach peerdʉajem iek mua jaauwi ʉu pãachdeu ũrtarr paar, onegau pãrau pãach dau jẽu deebaawai ʉu mʉ khĩirdam inaapai khãijã aju khap amuan, magʉmjã aba pãrau chadcha pãach dau khãijã mʉrʉg jẽu deekham.

¹⁶ ¿Mag narrta ĩs jãga pãar jãg nʉ? Pãachdeu jãg deeum khʉʉn iekta ʉkhaag ẽkha nʉmjã ideu ʉkhapiba mua pãach khĩircha mʉg ẽsap gaai ikhʉaba mag iekha chirʉm awi, ¿pãach oomapha aawaita mag chirʉm anʉ́? Magjã khabam.

¹⁷ Jãg pãrag deeum iekpa jaau wenʉrrʉm khʉʉnan chadcha pãar athee wʉrpa thʉnʉm, mamʉ mag nʉmʉn am odiin jũrr khĩetta khĩirju sĩsidʉm. Am khĩirjugan amach iekta pãrau ʉkha phobaadeewai tag mʉrʉgjã ooba jũrr amachigta ee apim khõsi nʉm.

¹⁸ Mua mag chirʉm chan mag pãrag am dʉi khapeerkhapimapha aawaijã khabam. Chadcha pãar dʉi ajapha aagta jãg naakhiin ʉuma; pari mag pãar dʉi ajapha akhiinjã mʉ chukag meerjã ich magta ajupma, jãg sĩi mʉ pãar dʉi chirʉm dakhĩirpai khaba.

¹⁹ Chaaina, chaain chukhu chitaawai mʉrʉgan pãarta mʉ chaainau. Magua pãar atheyan mʉʉn ʉʉi chaai machkha thʉnʉmjo gaai machaaga chiraajem; pãrauta Cristo ʉdʉraa pãach gaai thierrpapibam aiguin, mʉʉn ich mʉg pãar khĩirjuau gaai machag chitaju.

²⁰ Pãar dʉita ãba jooba chirʉm akhiin ʉucha akham, khĩircha aawai ajapcha jaaupʉpʉig maag; mamʉ maach mʉg warp naawai khĩirju chirʉm jãga aju khai. Mua pod khaugbam pãrau khani khĩirju nʉm khai, ich jãg warr pãach wenʉrrarrjo wenʉrraag.

Pabloou Agar Sara dʉi ĩgkhamamua jaautarr

²¹ Pãar ar Moiseeu ley werpʉarr gaai nem jaau sim wau nʉmuata pãach peerdʉju awi agpierr wau wenʉrram khõsi nʉm khʉʉn: ¿Pãrau chi ley gaai jaau sim ajapha khaphʉ nʉmʉ́ agá mag leígta ee aag?

²² Mag leita ãba ʉʉrkhaju khĩirjuju am ugua pãrag jaaukhim: Makhʉʉn libro gaai jaauwai, jooi Abrán chaain numí wai sĩejim aajem: ãb daupeer Agar aajerr ich chogkha wai sĩerr dʉím maimua ãb ich chog khaba ich ʉʉi chaar Sara dʉím.

²³ Mag ich chog dʉi ootarr chaairan sĩi ich jãg bʉ̃ʉr abarm gaaimua ʉʉin bi ee paajemjo bi ee pawi ootarr ajim aajem. Pari ich ʉʉi chaar dʉi ootarr chan magba, chi Sara ich daupeer gurjã pod chaai ooba arrta ag nawe ich Ẽwandamaucha amag chaai oopiju jaautarr aawai ich iekhatarr chadcha amkhĩirta oopijim anaabá.

²⁴ Mag ʉʉin numí chaain ootarran, ich jãg ʉʉinau chaain numí ootarrjo, Ẽwandamaujã biek numí õor dʉi iek deetarrta jaau sim. Magua mag chi ʉʉi nacha chaai ootarrau, ajapcharan Agarrauma, Sinaí durrsĩ gaai Ẽwandamau Moiseeg ley deetarrta jaau sim. Chi Agarrjã sĩi jooi Abrán chog arr aawai ag chaain ewagam khʉʉnjã ich magta chikham chogkha nʉisijim. Maguata ich agjo ĩchab mag ley gar thaaba nʉm khʉʉnjã, sĩi chikham chogkha nʉmjo, mag ley ʉʉrkhaagpaita thaaba nʉm.

²⁵ Mag leíuta õor sĩi ich chognaankha wai sĩewai, chi ley deetarr durrjã Sinaí anaa Agar aju aai nʉm, chi Agarrta mag ley ʉʉrkha nʉmua ag chognaankha nʉm khʉʉn ãd aawai. Mamʉ ĩs ewagjã judionaanta mag ley ʉʉrkha nʉmua i chognaankha naawai mag Agar anʉm chan Sinaí durrsĩpai jaauba, Jerusalén phoborpata jaau sim, jãata judionaan phobor aawai.

²⁶ Pari Sara sĩi Abrán chog khaba i ʉʉi chaar arr aawai jãgua jũrr ʉ̃gtharm Jerusalenta jaau sim; ajapcharan maach thum Cristo iek ʉkha nʉm gaaimua ʉ̃gthar wetju khʉʉn ãdkhata ober sim. Magua ich jãg Sarajã Abrán chog khaba arrjo, maachjã mag ley ʉʉrkhaba nʉm gaaimua ag chog khaba nʉm.

²⁷ Mag Sara maach mʉg ʉkha wejom khʉʉn ãdkhaju igwi Ẽwandamau ich iek gaai phãpiewai, “Pʉʉn chadcha chaai ooba ʉrraawai bʉ̃ʉrjã chaai khierr machag khaugba ʉrrab mamʉ, ichiita onee abá” ajim. “Chikhamnau jaai khecheu auwi pʉch appai ʉrrab mamʉ, jãg pʉch chogkha simta pʉch jaai dʉi sim khãaijã, pʉʉta ʉ̃rcha chaain khapaana ʉrraju” a phãpijim. (Is. 54:1)

²⁸ Hermanonaan, magtarr aawaita Sara iewaa chaar Isá ag nawe ich Ẽwandamau deeju jaautarrjo, pãarjã ag nawe ich iiu aawai ich chaainkha auju jaautarr khʉʉn khabahab.

²⁹ Pãrau khaphʉ nʉm, mag jaar jooi Abranau mag ich chog Agar anarr dʉi amach khĩrau chaai ootarr Ismael aajerrau Sara iewaa Isá ich Ẽwandam Akharau oopitarr dʉi khõinaa khaba aajeejim. Magua ĩs ewagjã ich agjota sim ĩchab: judionaan ley ʉʉrkhaajem khʉʉnau maach ich Cristo iek chaar ʉkha nʉm khʉʉnagjã amach denjo ʉʉrkhapiju ẽkhaajem.

³⁰ Pari judionaan awiajã chi mag nʉm khʉʉn chan Ẽwandamau aubaju khap amkhĩir ¿khan a sĩ Ẽwandam iek phã sim gaai Saraau iekhatarr igwi? Mag sim: “Abrán, jãg chaai ich ãd dʉi warre maach aigmua jʉrbapʉi” ajim chi Saraau. “Jã sĩi maach chogkha sim dʉím chaai aawai jãgua pod maach chaai dʉi ãba pʉ juagam nem jʉ̃aju khaba sim. Mʉ pʉ ʉʉi chaarkha ʉm dʉím chaairauta pʉ juagam nem jʉ̃aju aai simgui” ajim. (Gn. 21:10)

³¹ Hermanonaan, maguata maach Cristo iekta ʉkha nʉm khʉʉn chan sĩi mag ley ʉʉrkha nʉmua ag chogkha wenʉrramkhĩirta Ẽwandamau auba arr aawai, mag sĩi Agar Abrán chogkha sĩerr chaainjo khaba nʉm; maachin i chaain ich ʉʉi chaar dʉím khʉʉnjota nʉm.