Gálatas 3 - Wounaan Meu

Khan gaaimuata Ẽwandam Akhaar aaujẽ

¹ Galaciapien, pãarta chadcha khĩirjugjã chukhuta nʉmá. Pãrag khabá warre marau Cristo maach kõit pakuls gaai meetarrjã dawaa pãach daúachata oo nʉmjo jaaumajima. Magtarrta ¿jãgwi ʉdʉraata parhoobam khʉʉnag pãach khũgurpijierrá?

² Mua pãrag jeeu ookhim, pari jũrran mʉ iek ʉkhabat keen: Pãrau Ẽwandam Akhaar jua theeg pãach gaai aauwai, ¿Moiseeu ley phã pʉatarr ʉʉrkha nʉm gaaimuata aujierrá, wa maach peerdʉajem iek marau pãachig jaautarr ũrwiata aujierráwa?

³ Chadcha pãar khĩirjug wai naakhiin, ¿warrcha ʉkha phobaadeewaijã ich Ẽwandam Akharauta pãrag Cristo iek ʉkhapibajĩ? Magtarrta ¿jãgwi ĩs mag Akhaar isegamjo pãach juapaaupai sĩi mag ley ʉʉrkha nʉmuata pãach ajaug paaju ẽkha nʉ?

⁴ Magan warr pãachdeu ʉkhaawaijã, ¿parta maach peerdʉajem iek ʉkhanaa Ẽwandam Akhaarjã aujierrab? ¡Ʉ̃khabam!

⁵ Magan jãg Ẽwandamau ich juapá deetarrau pãach ee mor masim khʉʉnpa dau daau monaaupʉpʉi aawaijã, ¿pãragan jãgʉmʉn mag ley ʉʉrkha nʉm gaaimuapá? ¿Khan gaaimuajoo sĩ pãrau khĩirjuawai? Jãg nʉm chan magʉm ley ʉʉrkha naawai khaba, warr pãachdeu maach peerdʉajem iek ũrwia ʉkhatarr gaaimuata jãg nʉm.

⁶ Pãrau mag ʉkhamapha nʉm khai ũrbat, jãgajĩ warrjã Ẽwandamau jooi Abrán khararr dʉi. Ẽwandamau ichig ich dʉi magta aju abaawai Abranau chadcha ʉkhajim aajem. Mag ʉkhabaawai ʉu Ẽwandamau i khaibag isegpʉiwi warre kulp chukhu apʉijim anaabá.

⁷ Magtarr aawai pãade khĩirjubat: Ĩs ewag pawiajã ar chadcha Abrán chaain anʉm khʉʉnan, ich jooi khitarrjo Ẽwandam iek ʉkham khõsi ʉkha nʉm khʉʉnta i chaainau.

⁸ Ẽwandam iek phã sim gaai ĩs ewagam khʉʉn igwiajã pãarjo judionaan khabam khʉʉnpa maach peerdʉajem iek ʉkhabaawai Ẽwandamau amjã auju a sim. Mag maach ich aar auju igwi jooi Abranag, “Mʉg jẽb gaai durrpierram khʉʉnta pʉ gaaimua ʉu wenʉrrajugui” ajim ich Ẽwandamau.

⁹ Magtarr aawaita ĩs ewagjã chadcha ʉkha nʉm khʉʉnan Ẽwandamau ich jãg Abrán dʉijã ajapha arrjo am dʉijã ich agjo aju, irua ʉkhatarrjo ʉkha naawai.

¹⁰ Pari magba ar Moiseeu ley phã pʉatarr ʉʉrkha nʉmuata amach peerdʉju awi ãba aata ig nʉm khʉʉnan, ya Ẽwandamau khaibag waujuuta nʉm, mag leíu jaau sim thum pod ʉʉrkha auba nʉmta ãba aata ig naawai. Ẽwandamau ichdeu ley deetarr gaai jaauwai, mag leita ʉʉrkhaju khai warre thumaata ʉʉrkhapi sim; magbamʉn ichiita i jua ãwatab khaba ãwatju a phã sim.

¹¹ Ichdeucha mag jaau sĩewai merag chukhuta sim, sĩi mag ley ʉʉrkha nʉmuapai chan ni ãbjã Ẽwandam dau na kulp chukhu khaba sim, Ẽwandamau ich iek gaai jaauwai “Ãba ich iek ʉkha nʉm khʉʉnpaita ajaug paapʉiwi ich aar aaujem” a jaau sĩewai.

¹² Pari Moiseeg ley deetarr gaai chan magba, sĩita warag Ẽwandamag ich aar dich aupiegan mag ley gaai jaau sim thumaa ajaphata ʉʉrkhaju aai nʉm a sim. Pari chadcha mag ajapha ley ʉʉrkha nʉmuapaita Ẽwandam aar ober wenʉrraju akhiin, ni ãbjã i aar oberba aajeekham, ãbmuajã pod thum ʉʉrkha auba aajeewai.

¹³ Mag ley gaaimua maach thumaam khʉʉnta Ẽwandamau khaibag wauju khʉʉnkha thʉnarrta, Cristoou jũrr maach khaigper auwi maach kõit ʉdʉraa pakuls gaai ich meerppijim. Magtarr aawai Ẽwandam iek gaai jaau simjo, “Ar thõonaa pa gaaita jiirjop nʉm khʉʉnan ich Ẽwandamaucha dau ãaukhawi juau õrag oomkhĩirta mag jiirjoppibarm” a phã sĩewai, maadeu khaphʉ aju aai nʉm, maachta Ẽwandam dʉi iekkhõr paar narrta maach pekau thum jũrr Cristoou ich gaaita paa aujim, magbarmua maach kõit ich gaaita Ẽwandamag jua khʉaba deemkhĩir.

¹⁴ Mag Cristoou ʉu maach khaigper autarran, ich Ẽwandamau maach jooin Abranag jaautarrjo, mag Cristo maach kõit ich dau aphʉʉ apitarr iekta ʉkhabaawai judionaan khabam khʉʉnagpa Ẽwandamau ich Akhaar deeju atarrjã chadcha aumkhĩir ajim.

¿Khanthee ley serbii sĩ?

¹⁵ Cristo gaaimua khodamnaan, pãrag khapcha amkhĩir ejemplo deekhim: Mʉig eegar awiajã dich khapeen dʉi iek deewi dich nem wauju ẽsap gaai ajapha phãnaa dich thʉ̃rjã firmaa sĩubarm chan nassi pawiajã pod ãbmuajã ich appai deeum iek ag gaai phãju khaba, ni bʉchkhunjã borraaju khaba, chadcha ich ag gaai jaau simjota aajem.

¹⁶ Ẽwandamau ich garmua Abranag iek deewaijã ich magta ajim. Ẽwandamau ich iek phã sim gaai Abrán chaain ewagam khʉʉn gaaimuata nem ajapha aju ajim. Mamʉ mag i chaain gaaimua atarran ajapcharan Cristo igwiata mag sĩejim.

¹⁷ Mua pãrag jaaum ig chirʉmʉn mʉgau: Mag Ẽwandam Abrán dʉi iek deewain magta phãnaa ag gaai amach numiim khʉʉnauta firmaa sĩubarmjo ajim. Magtarr aawaita ag khur nassi cuatrocientos treinta años pawi ley Moiseeg deewaijã mag leíu nachgarwe Abrán dʉi iekhatarr pod serbiiba apʉibajim. Irua Abranag ewagam khʉʉn dʉijã mag ajapha aju jaautarr iek chan khĩir okhooba agthata balee sim.

¹⁸ Moiseeg ley phãkha deetarr gaaimuata Ẽwandamau maach peerdʉ aaujeekhiin, magan nacha Abrán dʉi iek deetarrta jũrr serbiiba sĩsikham. Pari magba ich meukhuucha Abranag ich iek ʉkha nʉm gaaimuata peerdʉ auju atarr aawai chadcha agtha ich magta aajem.

¹⁹ Mua khaphʉ chirʉm, magbaawai ãbmua khãijã, magan “¿Khantheeta mag Moisés ley serbii simma?” aju. Ajapcharan jãg ley serbii simʉn, õrau amachdeu Ẽwandamau nem jaau sim chaaur nem wau nʉm gaaimua amach pekau ee nʉm khap amkhĩirta serbii sim. Pari mag ley ag nawe Ẽwandamau Abranag Cristo pʉiju jaautarr pʉi nʉm orapaita serbiiju ajim. Mag lein Ẽwandamau ich chognaanagta Moiseeg deepibaawai Moiseeu jũrr phobor ee thumaam khʉʉn athee aibeejim.

²⁰ Pari Abrán dʉi iekhaawai chan Moisés dʉi atarrjo sĩi ich chognaan gaauta jaaupʉiba, warre ichdeuchata jaaujim.

²¹ Pari magbaawai ãbmua khãijã ĩchab, “¿Magan mag Moisés leíu jũrr Ẽwandamau mag ewagam khʉʉn dʉijã ajapha aju a jaautarr chaaur khĩetta jaau sĩeb?” aju. Magjã khabam. Mag anaa mag leíuta chadcha Ẽwandamag maach aupiejem akhiin, magan sĩi mag ley gaai nem jaau sim wau nʉmuapaita Ẽwandam dau na maach kulp chukhu nʉisip aajeekham.

²² Pari Ẽwandamau magta maachig ich iek gaai jaauba sim. Magta jaauju khãai maachin thumaam khʉʉnta dich pekau gaaimua Ẽwandam dʉi iekkhõr wai nʉm a sim, ichdeu jaautarrjo ich aar auju awiajã Jesucristo iek ʉkha nʉm khʉʉnta mag auju aai nʉm a khap amkhĩir.

²³ Agtha Cristo beeba aawain mag leíuta Ẽwandam dʉi iekkhõr wai nʉmjã khaphʉ apiejeejim, i dʉi khõinaa ajujã khaugba. Mag narr aawai ãba i beejuuta nʉ naajim, mag maach peerdʉ aujucha pierrwai i iek ʉkhaag.

²⁴ Ajapcharan maach jooinag ley deetarrauta Cristoou maach peerdʉjujã khap apijim, chadcha mag Cristo pierrwai thãraucha i iek ʉkha nʉm gaaimua Ẽwandam dau na kulp chukhu nʉisimkhĩir.

²⁵ Pari mag narrta ĩs ya ich Cristocha barchewi i iekcha ʉkha nʉisiewai ya tag mag ley igba nʉm.

²⁶ Ya ĩsin mag ich Jesucristo iekta thãraucha ʉkha nʉm gaaimua maachin thumta Ẽwandam chaainau.

²⁷ Mag i chaainkha nʉm dʉi por choo nʉmua Cristo dʉijã khodkhanaa i khĩir theg nʉm, ich Cristo mʉig eegar aawai nʉrraajerrjo wenʉrraag.

²⁸ Mag naawai ya ĩs chan ãbmuajã, “Mʉʉn judioou” wa “Mʉ chan judío khabam” ajujã khaba, ni chikham chog wa chikham chog khabamjã aba, ni “Mʉʉn emkhooi aawai ʉʉi khãaijã mʉchta ʉ̃rpai chirʉm” ajujã khabam. Pãran thum Cristo denkha naawai õor ãbpaimjota nʉm.

²⁹ Mag chadcha pãar Cristo denkha nʉm khai, magan chadchata Abrán chaainau. Mag i chaain aawai, ich Ẽwandamau irig i chaain ewagam khʉʉn dʉita ajapha aju arr aawai, pãar dʉita chadcha Ẽwandamau ʉu aju.