Gálatas 2 - Wounaan Meu

Tagam apostolnaanaujã Pablo iek jʉ̃gaagaa ũrtarr

¹ Maimua magtarr khur catorce añonaata deeu ũwaai Jerusalenag majim Bernabé dʉi; mag mʉch mam dʉi Tito arrjim.

² Mag mʉ marran, ich Ẽwandamau mʉrʉg maju aai chirʉm abaawaita majim. Maimua ya Jerusalén barwi iglesia ee chi pornaan dʉi maach appai biirdʉ nʉm aigta mua jũrr amag jaaubaadejim judionaan khabam khʉʉnag maach peerdʉajem iek mʉchdeu jaaujem. Mua amag jaaujim, mʉchdeu nem jaau chitʉm khap amkhĩir, magba akhiin mua nem jaau chitʉm khaugbam gaaimua mʉch igar khaba khãijã abaawai mʉchdeu nawe jaautarr maimua ewag jaaubarmjã isegju awi.

³ Pari Jerusalenpie jooin chi pornaanau ũurwai mua nem jaau chirʉm chadcha ag eyaa sĩerr aawai, Tito judío khaba sim mʉ dʉi nʉrrarrjã maach meeunau aajemjo meheu thʉʉpʉiju aai simjã abajierram.

⁴ Mua amag jaaujim, jãga ãaur khʉʉn hermanonaan anʉmjã sĩi seukha nʉrrjeemta amach khaugbajupii awi maach aig beejĩ, jũrr amachdeuta mʉ ichaaur pãarjo judionaan khabam khʉʉnaujã Cristo iek ʉkha nʉm dʉi maar jooin iita ʉ̃rcha ʉʉrkhaju aai nʉm a jawaag. Mamʉ mua oowai mag maar jooin iita ʉdʉraa mag ʉʉrkhapi jaautarr amuan, warag pãach chi ʉkha durrum khʉʉnta mag maar jooin iiu presonaanjo wai sĩsikham a chirajim, pod chi oberaajã khaugba.

⁵ Magua mua chi pornaanag jaau chirajim mag meheu thʉabichpi nʉmua wa tagam ley maar jooin den ʉʉrkha nʉmua chan maach peerdʉba aajem. Magua maach peerdʉajem iekta pãrag ich mag pãach ee wai naapim khõsi narr aawai, magta mag seukha nʉrrjee arr khʉʉnau mamagkhamjã bʉ̃ʉrjã maadeu amag maach ʉdʉʉr deeba, jũrr chikham ipeer ahaujii awi, maach garmuata podpʉijim a chirajim.

⁶ Mamʉ mua mag jaautarr ũrwi mag Jerusalenpien chi ʉkha nʉm khʉʉn ee jooin amach porkha wai nʉm khʉʉnaujã bʉ̃ʉrjã mʉrʉg, “Pua magta aju aai simjã” abajierram, mua jaautarr thum ʉu amach jʉ̃gaagaata jaautarr aawai. (Pari Ẽwandam dau naan maachin thum agdaujopai thʉnʉm aawai amach Cristo dʉicha wenʉrrajim awi chi pornaankha naawiajã mʉ gaai mas khaba sim.)

⁷ Amach garmuata mʉrʉg nem jaauju khãai, warag amach paarmua, ich Ẽwandamauta judionaan khabam khʉʉnagjã ichdeu maach peerdʉ aaujem iek jaaumkhĩir mʉrʉg jaau wai sim anaajim, ich jãg Pedroogjã ichdeuta judionaanag ich iek jaaumkhĩir jaau wai simjo.

⁸ Mag Pedroog ich iek jaaumkhĩir pʉiwi judionaan pom ich iek ʉkhapi autarr ag Ẽwandamaupaita mʉjã ĩchab judionaan khabam khʉʉn ee ich i jaaujemkha pʉibajieb, am eejã agjo õor pom ich iek ʉkhapi awaag.

⁹ Mag ich Ẽwandamauta mʉ dʉi mag sĩewaita Pedroou Santiago dʉimua Juanaupa amachta chi ʉkha durrum khʉʉn ee chadcha chi porkha nʉm khʉʉnaujã chadcha ich Ẽwandamauta ʉu mʉrʉgjã magamkhĩir ich jua theeg deejim anaajim warag. Magnaa chadcha ãbam phidag phidkha nʉm gaaimua ãba khapeenkha nʉm anʉmua mʉ dʉi jua joothʉwi Bernabé dʉijã jua joothʉnaa warag maar khĩir onee iekhamajierram, judionaan khabam khʉʉn ee ich mag jaaumkhĩir. Maagwai amaujã ich agjo warag judionaanag jaau nʉisiju ajierram.

¹⁰ Ãba marag khĩir okhoopiba jaaumjo jaautarran, hermanonaan ee dau aphʉʉm khʉʉndamau nem ig nʉmjã sĩi amag oobamjo apibata jaaujim. Mamʉ amau mag jaauba arr akhiinjã, jãgʉm aiguin mʉʉn ichiita ich magta chitʉm.

Pabloou ichdeu Pedroog iekhatarr jaautarr

¹¹ Pari magtarrta ich Pedro Antioquía phobor ee barimaawai, irua nem wau sim ʉu khábata sĩejim; magua chadcha mua warre ichig khĩircha iekhajim.

¹² Khani mua oowai warran, hermanonaan judionaan khabam khʉʉn dʉijã ʉu ãba thach khoojeejim; pari mamagkharrta õor Santiago igar narr khʉʉn Jerusalenmua bardʉtkhabaimaawai, am kha ogdʉwi tag am dʉijã thach khoba aadejim, mag amachdeuta amach jooin i ajapcha ʉʉrkhaajem anarr khʉʉnau ich jaauju khĩirjuwi.

¹³ Pedro magbaadem oowi aig agjo judionaan chi ʉkha durrarr khʉʉnaujã ich agjota aphobaadejim amach khapeen judionaan khabam khʉʉn dʉi, Cristo igar nʉisiewai tag amach jooin ley gaai jaau simjo abaju khaphʉ narrta. Mamʉ makhʉʉnpai khaba, ajapcharan ich Bernabépata dʉi ag ee burrjim, warm khʉʉn oowi.

¹⁴ Mag mʉchdeu oowai maach peerdʉajem iek gaai wenʉrrapi jaau simjo khaba aadem oobaawaita chadcha õor khapanag dakhĩir iekhamamua mua Pedroog mag chirajim: “Pʉ, judiokha simta dʉrrʉʉ pua maach jooin ijã ʉʉrkhaba sim. Pʉchjã mag simta, ¿jãgwi magan ĩsta deeu pua warramjo magʉm ley ʉʉrkha sĩ?” a chirajim. Magnaa mua irig, “¿Pua chan khaugba sĩeb” a chirajim, “pʉchdeu jãg simua warm khʉʉn judionaan khabam khʉʉnagjã maach meeun denjota magʉm ley ʉʉrkhapi jaau sim?”

Judionaan awiajã ãba Cristo iek ʉkha nʉm gaaimuata peerdʉ nʉm

¹⁵ Maran chadcha bi eewe judionaankha naawai ich Ẽwandamau ley deetarrjã wai nʉm. Magua maar chan chadcha sĩi Ẽwandam khaugbam khʉʉnjo parhoob nem waaujem khʉʉn khabam.

¹⁶ Mag naab mamʉ ĩsin ya marau khaphʉ nʉm ĩchab, mag sĩi Moiseeu ley phã pʉatarr ʉʉrkha nʉm gaaimuapai chan pod ãbjã kulp chukhu sim aju khabam. Ãba Cristo iek thãraucha ʉkha nʉm gaaimuata chadcha kulp chukhu aajem. Maguata maachdeujã ĩchab Jesucristo iekta ʉkha nʉm, mag nʉm gaaimuata mag kulp chukhu nʉisieg.

¹⁷ Mamʉ ãba Cristo iekpai ʉkhawi maach jooin iita isegkhiin, sĩi ley chukhu aawai parhooba nem waaujem khʉʉn dʉi ãba nʉisiju, bʉ̃ʉrjã Ẽwandam chaain aju khaba. Chadcha am denjo khaigba nem wawaag khabam mamʉ mag akhiin, ¿ãbmua khãijã Cristoou ich iekpaita ʉkhapi simua maachig pekauta waupi sim abaju khai, Ẽwandamau maach jooinag ley deetarrta isegpi sĩewai? Mag aju aai sĩeb mamʉ mag khabam. Ichiita mag ley gaai jaau simjo Ẽwandam dau na ajapha wenʉrraju aai nʉm. Magua mag Cristoog dich peerdʉ aupim khõchgauta mag ley dich jooin i isegkhiinjã, khaigba khaba sim.

¹⁸ Magju khãai, mua õrag mʉch paarmua maach judionaan ley ʉʉrkhapiba jaaujerrta ewag pawi deeu ũwaai jãg ley ʉʉrkha nʉmuata maachin ʉu peerdʉajem awi ag gaai jaau simjo thumaa ʉʉrkhakhiin, magan mʉchdeuta mag ley khaigba jaaubarm, chadcha maach peerdʉ awaag chan serbiiba simta mag jaau chiraawai.

¹⁹ ¿Khan jãgwi mua mag chirʉ́? Warran chadcha jãg ley ajapha ʉʉrkha chitʉmuata ʉu peerdʉju awi parta thumaa ajapha ʉʉrkhaju ẽkhaajerr aawaima. Mamʉ magʉm gaaimua chan Ẽwandamau mʉch aubaju khaug autarr aigmua warre tag magʉm leijã ʉʉrkhaba, ãba Cristo iekpaita ʉkha chirsijim, chadcha ich Ẽwandamau khõsimjota nem wau chitaag.

²⁰ Maguata nem khaigbam wawaagan mʉʉn nawe Cristo thõo naawai i dʉi ãba pakuls gaai thõrrjota chirʉm, magʉm ley ʉʉrkha nʉmuata tag mʉch peerdʉjujã khĩirjuba. Pari tag warramjo mag khĩirjuba chirʉmʉn mʉch khĩraupai khaba, Cristo mʉ thãar ee sim ag juapaauta mʉrʉg magpi sim. Maguata Ẽwandamau khõsimjo wawaag ich Iewaa Cristoou mʉchig juapá deeju khĩirju chirʉmuata nem wau chitʉm, chadcha ichdeuta ich garmua mʉ khõsi awi mʉ kõitjã ichta thõopitarr aawai.

²¹ Mʉ chan ar ley ʉʉrkha nʉmta ajapcha sim awi Cristoon parta meejim a iekhaajem khʉʉn khaba chirʉm. Chadcha maach jooin judionaan ley ʉʉrkha nʉmuata Ẽwandam dau na tag maach kulp chukhu apiejem akhiin, khanthee Cristo maach kõit meekhamma.