Gálatas 1 - Wounaan Meu

Salud

¹ ¿Jãgpai nʉ keena? Mʉʉn Pabloou õrau jʉr autarrjã khaba ich Jesucristoouchata ich phiriu autarr Jooi dʉimua jʉr autarr, ajapcharan ich Aai dʉimua jʉr autarr wounma.

² Muata hermanonaan mʉiguim khʉʉn dʉimua pãrag mʉg ẽsap phã deepʉi chirʉm, Galacia durr iglesia nʉnʉidʉm eem khʉʉnag.

³ Pãar kõit Ẽwandamag jeeu chiraajem, ichdeuta maach Por Jesucristo dʉimua ʉu dʉrrcha pãar eeg oowi pãar khõinaa phe wai naamkhĩir.

⁴ Pãrau khaphʉ nʉm, Jesucristo khurau khabamuan maachin agtha maach pekau eeta wenʉrraajeekham. Mamʉ magba maach Ẽwandam anaa maach Ayau ichdeu khĩirju wai sĩerrjo Jesucristoouta ʉu ʉdʉraa ich thõopijim maach kõit, magbarmua pekau jua eemua maach peerdʉ awaag.

⁵ Ẽwandamau mag Cristo pʉiwi ʉu peerdʉju ayaa nʉm paar ʉu ajim anaa thumaam khʉʉnagta ich mag i ajaug tho iekhapim khõsi chirʉm.

Deeum iek maach peerdʉajem chan tag chukhum

⁶ Keena, mʉ gaai masi chirʉm chadcha, Cristooujã pãar khõsi arr gaaimua Ẽwandamau ich iek ʉkhamkhĩir thʉ̃rkha autarrta, agtha pomcha khaba nʉm ee deeu pãach garmuata i isegamjo jũrr marau pãachig jaautarr ichaaur jaau nʉmta maach peerdʉajem iek awi ag igarta theerbagkhaag ẽkha nʉm anʉm ũr chiraawai. Pãrau jãgbajupii chirajim.

⁷ Mamʉ mʉ iek ũrbat: deeum iek maach peerdʉajem chan tag chukhum; pãrag jãg nem jaau wenʉrrʉm khʉʉnaun sĩi warag pãrau ʉkhajujã khaugba apijuuta ẽkha wenʉrrʉm khabahab, magʉm gaaimua Cristoou chadcha maach peerdʉ aaujem iekta jũrr ag eyaajã khaba parhoob amachdeu jaaum aig jawaag.

⁸ Ya magbaadem chan nem ajap khábata aadeju. Mamʉ ãbmua khãijã pãrag maach peerdʉajem iek jaau sim anʉmta nacha mʉig maachdeu pãrag jaauchetarrjo khaba khĩetta jaau sim wounan, magan ichiita Ẽwandam jua machag ãwatab khaba ãwatju. Mʉchdeu wa Ẽwandam chog ãb ʉ̃gtharmua beewia khãijã mag ag iek chaar khabamta jaaumʉn, magan Ẽwandamau ichiita am gaai mas ab khaba mas aju.

⁹ Cha mʉchdeu jaau chirʉmjo pʉaba mua deeu mag chirʉm: Ãbmua khãijã maach peerdʉajem iek jaau sim anʉmta mʉig nacha maachdeu pãrag ũrpitarr chaaurta jaauju atheen, jerrba Ẽwandam jua machag ãwatab khaba ãwatju.

¹⁰ Mua mag chirʉm aig chan õragta mʉch eugar ajapha ig iyʉʉ amkhĩir khaba, Ẽwandamagta mʉchdeu nem wau chirʉm igwia chadcha ʉu sim apiju ẽkhaajem; sĩi õrag mʉch ajapha oomkhĩirpaita mʉ mag chitʉm akhiin, ya Cristo chogjã khaba chirakham.

Pabloou Ẽwandamau ich jʉr autarr jaautarr

¹¹ Hermanonaan, chadcha khaphʉ abat cha mua pãachig jaau chirʉm: Mʉg maach peerdʉajem iek cha mua jaau chitʉm chan sĩi mʉig eegar maachjopaim khʉʉn khĩirjug khabam.

¹² Mʉg iek chan õrau mʉrʉg jaautarrjã khaba wa mʉch garmua khãijã deeum khʉʉn dʉi khaugtarrjã khabam. Mʉg iekhan ich Jesucristoou mʉchigcha jaautarrau.

¹³ Pãrag khap amkhĩir jaaukhim; tale pãrau ũurjeejim warrgar mua nem waaujerr: Warrgar sĩi maach jooin judionaan iigta ee chitaawai mʉg Cristo iek ʉkha durrum khʉʉn dau augjã khaugba chadcha mua am ẽudee ẽkhaajeejim.

¹⁴ Ar maach por agdaujo bãautarr khʉʉn appain mʉchdeuta am khãaijã ʉ̃rcha maach jooin i khapcha chirajim, mʉchdeuta am khãaijã ajapcha ʉʉrkhaajerr aawai.

¹⁵ Mamʉ agtha thaabajã thaababa chirʉwe Ẽwandamau ich athee mʉ jʉr auju khĩirju wai sĩerr aawai, mag chitarr ãba, ʉu ich garmua mʉ eeg oowi

¹⁶ khãai ãb mʉrʉg ich Iewaa khaugpijim, judionaan khabam khʉʉn eem magwe ichdeu õor peerdʉ aaujem iekta jaau phʉʉrdʉ chitamkhĩir. Mag mʉchig jaaupibaawaijã mua iwiir ãbamʉgjã jeeuba,

¹⁷ ni Jerusalenag mawia mʉ nawe ich Jesuucha agjo ich i jaaumkhĩir jʉr auwi ich dʉicha wenʉrraajerr khʉʉnagjã mua jãga jaauju aai chirʉ́ a jewaanjã mabajim. Magju khãai maigpai chiraba, warag Arabiaag mawia, mam chirʉʉ awiata deeu Damascoog majim.

¹⁸ Mag Ẽwandamau mʉrʉg ich Iewaa khaugpitarr khur año thãrjup naata Jerusalenag majim Pedro dʉi oog; maig mʉ seman numpai chirajim i dʉi.

¹⁹ Ich maagwai maach Por Jesús eeum Santiago appaita mua oojim; pari tagam khʉʉn agjo ich Jesuucha ich i jaaumkhĩir jʉr autarr khʉʉn chan mua ãbjã oobajim. Magtarr aawai mua chan deeum khʉʉnau mʉchig jaautarrta khaugwi jaauba, ich Ẽwandamaucha khaugpitarrta jaau chirʉm.

²⁰ Cha mua pãrag mʉg ẽsap gaai jaau chirʉmʉn chadchata mua jaau chirʉm Ẽwandam dakhĩir; ichdeujã khaphʉ sim mʉ seukhaba chirʉm.

²¹ Mag Jerusalén udthurtarr khurta deeu mʉch durr Ciliciaag mawi Siria durrjã udthurjim.

²² Pari maagwai chan Judea durr iglesia nʉnʉidʉm eem hermanonaanau chan agtha khĩircha chan bʉ̃ʉrjã mʉ khaugba naajim, am eejã maba chirarr aawai.

²³ Sĩi amau ũurwai am khaibag wawaag mʉchdeujã am ẽudee ẽkhaajerrta ĩsin warag mʉchdeupata maach peerdʉajem iek jaau chitʉm anʉm ũurjeejim aajem, mʉchdeujã magʉm iek warre õrag isegpi jaauba aajerrjo.

²⁴ Pari amachdeu mag ũr nʉm gaaimua warag Ẽwandamagta ʉu ajim aajeejim aajem.