Filipenses 4 - Wounaan Meu

Cristo iek ʉkha naawai oneeta wenʉrraju aai nʉm

¹ Khodamnaan, mua pãar jãsenenaa pãar khõsi chitaawai pãar oon mam khõchaaga chiraajem. Ajapcharan pãar gaaimuata mʉʉn onee chiraajem. Mua khaphʉ chirʉm, pãrau chadcha maach peerdʉajem iek ʉkhatarr aawai par mʉ phidkhabajim. Jãg pãarta mua khajapham nemjo Cristo athee gan autarr gaaimua mʉ onee chirʉm. Maagwai ich mʉg ẽsap gaai thum mʉchdeu pãrag jaau chirʉmjo ich jãg ubʉ nʉisit, ʉdʉraa maach Por Jesucristoogta pãach juag oopi nʉmua.

² Mʉch ʉ̃phʉʉin khʉ ãbam khʉʉnagamjo mua mag chirʉm, Evodiaag, maimua Sintiqueegjã agjo: Chadcha maach Por Jesucristo kharannaanjo khõinaa nʉisit, ichdeu api simjo.

³ Maimua pʉjã, mʉch khapeer ajapham, ĩchab maach peerdʉajem iek eemua bʉ̃ʉrjã ogdʉba nʉrraajeewai pʉrʉgjã jãkhʉʉn ʉʉin wawibá a chirʉm, tag ich jãg wenʉrram ugua. Mua õor ee maach peerdʉajem iek jaau chitaawai jãkhʉʉn ʉʉinauta Clemente dʉimua tagam khʉʉn agjo mʉ dʉi ãba wenʉrrarr khʉʉnpa mʉ bʉ ogdʉba dʉi mʉ ipierr jaau durraajeejim. Mag mʉ dʉi wenʉrrarr khʉʉn thʉ̃r ya ʉ̃gthar Ẽwandamau ichdeu peerdʉ aumam khʉʉn thʉ̃r phãkhamaajem ẽsap gaai ĩchab phãkha thʉnʉm.

⁴ Maach Por Jesucristo pãach dʉi sĩejem khĩirjuwia onee abat. Ũmaai pʉaba pãrag jaau chirʉm: ¡Onee abat!

⁵ Maach Por Cristo ya beeimʉʉ sim khaphʉ, õor dakhĩir agpierraata wenʉrrathʉ̃; pãach khapeenjã chig aba, sĩi warag chikham dau aug khaug paraata abat.

⁶ Pãach phithurg waauwai oob okhĩirjuu amiet. Mag khãyau warag mag pãach phithurg au wenʉrrʉm thum Ẽwandamagta jaaubapʉit, irig jeeumamua. Mamʉ mag jeeumamua ĩchab pãach iek ũurjem paarjã irig ʉu ajim abat.

⁷ Pãrau cha mua jaau chirʉmjota amʉn, magan Ẽwandamau pãar okhĩirjug meeupiju. Pãar Jesucristo dʉi naawai phithurg auwiajã ĩchab ichdeuta pãar khõinaa wenʉrrapiju. Mag pãar khõinaa wenʉrrʉm chi ʉkhaba nʉm khʉʉnau pod khaugba aajem, jãgata pãar mag nʉisip nʉ.

Õrau oowai ʉu ajojoom nemta wauju aai nʉm

⁸ Khodamnaan, ãbmiecha paawai mua pãrag magkhim: Õrau ajapha pãach eugar ig iyʉʉ amkhĩir, thumaam khʉʉn dakhĩir bʉ̃ʉrjã seu chukhu ãba chadam iekpai iekhajuuta khĩirjubat. Ĩchab jãgata Ẽwandam dau najã nem ajapha waujuuta ãba khĩirjubat, pekau wauju khĩirjugjã chukhu. Magnaa khĩirjug paraa aajeethʉ̃ ĩchab, jãga abarm gaaimuata õrag pãach daupii apiju nʉ, bʉ̃ʉrjã pãach eugar ĩgkhaju khʉʉn chukhu aag. Mua thum pãrag mag chirʉmʉn mʉgau: Pãachdeu nem wau nʉm oowia õrau amach odegpai khãijã, jãgan chadcha ʉu kherʉm ajojoom nemta ãba wauju khĩirjubat.

⁹ Pãrau pãachdeujã khaphʉ nʉm mua pãar ee maach Ẽwandam iek jaaubaimaawai pãachdeu ʉkhatarr. Thumaam khʉʉnau mʉ iekha chitʉm ũrwia mʉ oojierram, jãga mʉ pãar ee chitajĩ. Ich jãg mʉ pãar ee phʉʉrdʉ chitʉmua nem wau chitʉm oojerr thumaa pãachdeujã mʉ denjo abat. Pãar mag wenʉrrʉmʉn, magan ich Ẽwandam maach khõinaa apiejemchata pãar dʉi nʉrraju.

Ichig phatkhon deepʉitarr paar Pabloou ʉu ajim atarr

¹⁰ Maach Por Jesucristoog ʉu ajim a chirʉm, deeu pãrau mʉg mʉch dau ee aug khaugbarm paar. Chadcha pãrau agtha ʉu mʉch khĩirju durrum khaphʉ chiraawai mʉ onee chirʉm. Mag chirʉm aig chan mag pãrau ya tag mʉ igba naajim aba chirʉm. Mua khaphʉ chirʉm, pãrau mʉ juag oom khõsi durrumta, sĩi wir aiguimjo khaba aawai, pod nawe mʉ juag ooba naajim.

¹¹ Mag chirʉm aig chan mag sĩi mʉch dau aphʉʉ chiraawai pãrau mʉchig nem dedee amkhĩirjã khábata mag iekha chirʉm. Mʉʉn mʉg chitʉmʉn, parhooba nemdam bʉ̃rʉʉm dʉi awiajã magʉm aba chitʉm.

¹² Mʉʉn ya parhoobata khaugwi chitʉm. Bʉ̃ʉrjã mʉchdeu nem ig chirʉm chukhu chirʉm aigjã nem khĩir thum paraamjo chiraajem. Jãsoo chirʉm aigjã biwaa chirʉm dʉi ãba chitʉm. Khar mʉchdeu nem ig chirʉm atcha sob wai chiraajem; wa khar magbaju, jũrr bʉ̃ʉrjã chukhu chirʉm awiajã okhĩirjuu oo chiraa khaugba chitʉm.

¹³ Mua chan mʉch dau aphʉʉ chitajujã khĩirjuba chitʉm, magʉm ãwat chitaagjã ich Cristoouta mʉrʉg juapá deejeewai.

¹⁴ Mag ab mamʉ, pãrau mʉ juag ooju aai khaba naajimjã aba chirʉm. Ante ʉuta pãrau mʉ juag oob khaba oojierram.

¹⁵ Filipopien, pãrau pãachdeujã khaphʉ nʉm, ar mʉ pãar ee Macedonia durr Ẽwandam iek jaau phʉʉrdʉ chitawia jũrr deeum durr jaau chiraimaawaijã, maach khodnaan tagam khʉʉnau deepʉiba nʉm ee, ãba pãraupaita pãachdeu Ẽwandam iek ʉu khaugtarr paar awi mʉrʉg phatkhonjã deepʉijierram.

¹⁶ Ag najã agtha Tesalónica chiraawai, pãachdeuta kharii ʉu mʉrʉg phatkhondam mʉch nemdam ig chirʉm athee deepʉi nʉm mua aaujeejim.

¹⁷ Ãba sĩi pãar jua eem nem aum khõchgaupaijã khábata mʉ mag iekha chirʉm. Mua ʉ̃rcha khõsi chirʉmʉn, ĩchab pãrau mʉrʉg nem dee nʉm paarjã jũrr ich Ẽwandamauta pãrag ag khãyau nem ajapcharamta deepim khõsi chirʉm.

¹⁸ Ʉu ajim keena. Ar pãrau mʉ athee Epafrodito gaau phatkhon deepʉitarr thum ʉu agcha kherajim. Ajapcharan mʉchdeu ig chirarr khãyaujã ʉ̃rʉʉchata pãrau deepʉijierram. Jãg pãrau mʉrʉg phatkhondam deepʉitarran Ẽwandamau oowaijã ʉu kherʉm, ichigchata deebarmjo aawai.

¹⁹ Jãg nʉm jũrran, pãachdeu nem ig nʉmpierr maach Ẽwandamau pãrag ichdeu nem thum jʉ̃a sim eem bʉ̃ʉrjã ĩgkhaba, deeb khaba deeju, pãar Jesucristo denkhanaa i iek ʉkha naawai.

²⁰ Ichpaita maach Aai anaa maach Ẽwandamau. Ijom khʉʉn chan tag chukhum. Maagwai irigpaita thumaam khʉʉnau mʉg atag pawiajã ich mag ʉu ajim aju aai nʉm.

Pabloou amach saluddam deepi jaautarr

²¹ Jesucristo gaaimua thum Ẽwandam chaainkha thʉnʉm khʉʉnag mua salud deepʉi chirʉm abat. Ĩchab maach khodnaan mʉig cárcel deg ʉ̃iba mʉ oo khʉrrkhaajem khʉʉnaujã pãrag salud deepʉi nʉm.

²² Maimua tagam khʉʉn thum mʉig agjo Ẽwandam iek ʉkha durrum khʉʉnaujã amach thumaam khʉʉnau pãrag salud aajem. Mamʉ ʉ̃rcha pãrag salud deepʉi nʉmʉn, Jesucristo gaaimua maach khodnaan mʉg Roma durram rey deg phidkhaajem khʉʉnauta pãrag salud deepʉi nʉm.

²³ Mʉgdampai ajim keena, mʉg ẽsap gaai pãrag jaaupʉim ig chirarr. Pãar kõit maach Por Jesucristoog jeeu chirʉm, ichdeuta pãar dʉi ogdʉba ich mag pãar ʉuu wai nʉrramkhĩir. Ayoo keena, Pablo