Filipenses 3 - Wounaan Meu

¹ Jesucristo gaaimua khodamnaan, pãar maach Por Jesucristo dʉi naawai deeu pʉaba onee abat a chirʉm. Cha mua phã deepäaigpam iekhan nawe mʉchdeu pãrag phã deepʉitarr iekpaiu. Mamʉ mʉchigpain ʉu kherʉm, mag ich ãbam iekpai awiajã. Ichiita pãar athee nem ajaug sim, chikhamnag ʉdʉʉr pãach khũgurpimaaugau.

Nem wau nʉm gaaimuapai chan pod dich peerdʉ aubam

² Mag mua jaaupʉyaagpamʉn mʉgau: Khĩir khaphʉ abat, ar ichkhumjo nem seunem nem khaigbamta jaau sĩerrjeem khʉʉn dʉi. Jãkhʉʉnan sĩi amach mor ãrmienau. Amag chan ar dich wir aigpai am denjo dich khakhua dauchachba nʉm khʉʉn chan Ẽwandam chaain khabam aajem.

³ Mamʉ par amach iphithur mag wenʉrrawiajã oob am ipierraa amiet. Maach mor ʉ̃rpain ideu sĩi dauchach paar sĩsid awiajã, maach thãarta khaigba sim chan parta i chaainau aju. Mag khãai maachin chad i chaain chaarpama, chadcha ich Ẽwandam Akharau jaau simjo thãraucha irig jeeujeewai. Mag jeeu wenʉrrʉmuata maach onee naajem, Jesucristo maach kõit meebarm gaaimua Ẽwandamau maach ich chaainkha wai sĩewai.

⁴ Mamʉ ãaur khʉʉnau chan magba nʉmta sĩi aman chadau õor ajapham khʉʉnau a jaau nʉrrjee aajem. Amagan sĩi dich mor dauchachnaa nem ajapham wau nʉmuata Ẽwandamau maach ich aar aaujem aajem. Mamʉ chadcha magʉm gaaimuata maach ʉ̃gthar obeerjeekhiin, magan mʉʉta am khãaijã entercha oberju.

⁵ ¿Khan jãgwia magkhajĩ? Ũrbat, pãrag jaaukhim: Mʉ dennaanan amach numwe judionaan chaar ajierram, warrgar maach jooin Benjamín khararr ag chaain ewagam khʉʉn den. Bʉ̃ʉrjã amach jooin i pʉaba wenʉrrarr aawai, mʉjã ich mag bãaupʉijierram. Bʉ̃rʉʉwe autarr agtha ocho diaspai chirʉm ee, warr jooinau jaaujerrjo mʉ meheudam phʉʉrbichpʉijierram. Maagwai mʉjã agtha mʉch thʉ̃r okhooba, judío charau. Mʉʉn ĩchab fariseo ajim, Ẽwandamau Moiseeg ich iek phãpitarr iek ajapcha ʉʉrkhaajem khʉʉn eem.

⁶ Mag Moiseeu phã pʉatarr iek mʉchdeuta mʉch khapeen khãaijã ajapcha ʉʉrkhaajerr aawaita jũrr Cristo iek ʉkha nʉm khʉʉn ẽudeejã mua ẽkhaajeejim, am khaibag wawaag. Mag Moisés iek mʉchdeu ajapha ʉʉrkha chitarr gaaimua, ni ãbmuajã mʉ igwia mʉ eugar khaigba nem ĩgkhaba aajeejim.

⁷ Ich mag jaar mʉchdeu khĩirjuawai magʉm thum ajaphamjo khaphʉ chitarr chan ĩs jũrr bʉ̃ʉrjã maadeu nem igbata sĩsidʉm.

⁸ Warran mʉʉn chadcha magʉmʉg ee chitajim. Mamʉ maagjerr ĩsin jũrr mʉʉn Jesucristo deneu. Iita mʉ Porou. Tag ijo nem ajapham chan chukhum. Ʉ̃gthar oberaag awi warrgar mʉchdeu nem wau chitarr, ĩs mʉgnaa oowai chan bʉ̃ʉrjã maadeu nem igbata sĩsidʉm. Ajapcharan sĩi mag mʉch khõchagpierr nem wau chitarr thum mua isegjim, jũrr Cristo denkham khõchgau.

⁹ Mʉʉn ĩsin Cristo dʉita chirʉm. Mua mag chirʉm chan, mag sĩi mʉchta ajaug chirʉm awia khaba, ni Ẽwandamau ich iek Moiseeg phãpitarr iek mʉchdeuta ajapcha ʉʉrkha chitʉm awiajã khabam. Mua mag chirʉmʉn, Cristo iek thãraucha ʉkhabarm gaaimua Ẽwandamau mua nem khaigba wautarr thum chugpaabapäaiwaita mag chirʉm. Dichdeu nem wajapha wau nʉm gaaimuapai chan pod dich peerdʉ aubam. Magju khãai Cristo jua eeta ich akhaardam joothʉ sĩubarm wounan chadau thãar ajapha chirsim aajem Ẽwandamau.

¹⁰ Muan Ẽwandamagta warag mʉchig ajapcha Cristo khaphʉ apim khõsinaa ĩchab Cristo iiupi autarr ag jua theegta mʉchig deepim khõsi chirʉm; magbaawai mua i denjo gaai machag ãwatju aainaa ĩchab ijo thõju akhiinjã, warag thãar phĩiuwia khĩirjuba thõog.

¹¹ Mua khaphʉ chirʉm, mʉ mag aphʉʉ akhiinjã, ichiita Ẽwandamau mʉ akhaardam mag jẽbdeg sĩepiba ich aar auju.

Cristoou ichjo ajapha amkhĩirta maachig jaau sim

¹² Mua mag chirʉm chan, mag ya mʉchdeu thum jaau dichdimamjo mʉchta ajapcha chirʉm aba chirʉm. Mʉg chirʉm aiguin mʉʉn agtha ajapha aju pooma waaur chirʉm. Mag chirab mamʉ ajapha ajuuta ẽkha chirʉm. Cristoou ichjo amkhĩirta ichdeuta nacha mʉ jʉr autarr aawai agjo ãba ag khĩirjugta ogdʉba wai chitʉmua jũrr ich simjo ajapha ajuuta ẽkha chirʉm.

¹³ Keena, Cristo gaaimua khodamnaan, mua chan pãrag, “Ya mʉʉn ĩsin chadau mʉchdeu ig chirarrjo ajapha chirsim” aba chirʉm, agtha thum Cristoou jaau simjo khaba chiraawai. Mag agtha ajapcha khaba chirab mamʉ, ya warrgar mʉchdeu nem waaujerr chan tag khĩirjuba chitʉm. Magju khãai mʉ khĩirjugan, ãba khanta mua Cristo athee waubaawai i dawagaa abarju khai anaa irua nem khõsimpaita wauju khĩirju chitʉm.

¹⁴ Maagwai mʉg atag ya ich sim aarcha barbaimaawai mʉchdeu mag ich dawagaa nem wau chitarr jũrr Ẽwandamau mʉ dʉi ajaphanaa ich dʉi ich mag mʉ wai nʉrraju. Mamʉ mag maach ʉ̃gthar oberju ayaa amkhĩir Jesucristo meebamua chan ãbjã Ẽwandamau auba aajeekham.

¹⁵ Maguata pãarjã ar mʉ denjo Ẽwandam iek ajapha khaphʉ nʉm khʉʉnan magta khĩirjuju aai nʉm. Mamʉ ãbmua khãijã pãar ee ich ajaug phewia ya iin thum ajapha chiraawai ich ajaug paapäaig chan tag nem ajapham wauju igba chirʉm amʉn, ich Ẽwandamau ĩchab irig mʉg jẽb gaaiwe chan agtha i thum ajapcha khaba sim a khap apiju.

¹⁶ Mamʉ mua mag chirʉm: Maadeu dichdeu nem khaugtarrpierr khĩirjunaata nem wauju awijã jaauju aai nʉm, bʉ̃ʉrjã khaugbam khʉʉn denjo nem parhoob wauba.

¹⁷ Khodamnaan, pãrau mʉ jua eerpanaa mʉ denjota abat. Magnaa ĩchab pãar ee maach wenʉrraajerrjo wenʉrraajem khʉʉn oonaa agjo ajaphata nʉrrjee abat.

¹⁸ Mʉchdeu nawe pãachig jaaujem iekpai ĩsjã deeu pãrag jaaukhim: Õor khapan ar maach ee ʉkha nʉm ʉkha nʉm aajem khʉʉn thum chan chadcha chi ʉkhaajem khʉʉn chaar khabam. Jãkhʉʉnan jãg amach parhoob wenʉrrʉm gaaimua sĩi dau theeg chukhumjota thʉnʉm. Amagan sĩi parta Cristo pakuls gaai thõtarrjo aajem. Ar mag khĩirju nʉm khʉʉn oowaita thãar eepain bĩe chiraajem.

¹⁹ Jãgʉm khʉʉnaun sĩi parhooba amach o khõchagpierr nem wau nʉmta, ajaug ʉ̃rpai sĩsidʉm aajem. Mag nem khaigba wau nʉm awia chigaa ajojoopaijã khaba, warag amachta tho iyʉʉ aajerram. Amau ãba mʉg jẽb gayam nempaita khĩirju nʉm. Mamʉ magʉm paar Ẽwandamau khĩmie durrta am barkhʉʉipʉiju, ich mag dau aphʉʉ wenʉrramkhĩir.

²⁰ Mamʉ maachta ʉ̃gtharmpeen khaju khʉʉn aawai maach durran ʉ̃gthariu. Maagwai pod warm khʉʉnjo mʉg jẽb gaaim nempaita khĩirjuju aju khaba nʉm. Maachin ãba maach Por Jesucristo maach peerdʉ autarr ʉ̃gtharmua beeta oo nʉm.

²¹ Mag ich pierrum edta ichdeucha ich iiu aawai maach mor mʉg maadeu nem igmap simjã ich denjo ajaug paapʉiju. Nem thum thʉnʉmjã ichdeuta ichdeu ampierr aju aai sĩerraawai ich ag juapaaupai irua chadcha sĩi maach eu meebpʉimjo aju.