Filipenses 2 - Wounaan Meu

Jãga aju aai nʉ maachjo Cristo iek ʉkha nʉm khʉʉn dʉi

¹ Chadcha pãar gaaimua mʉ onee chirʉm, Cristoouta pãar khĩir onee api sĩewai. Ʉu iruata pãar khõsinaa pãar khĩir jãsenkhaajem. Pãach thumaam khʉʉnau ãbam Ẽwandam Akhaarpai wai wenʉrrʉm gaaimua khod ãbamjo naawai ʉu pãar chikham daupiinaa dau aug khaug paraajã aajem. Magua mʉ onee chirʉm.

² Mamʉ pãrau mʉ oneecha apim khõsi nʉm khai, thumaa o ãbata abat, jũrr chikham ichaaurjã aba, agdaujo chikham kha khõsi, nem wawaagjã chipar chipar khaba, ãbam khĩirjugpai paraa.

³ Pãachdeupaijã pãach thonaa bigaaum khʉʉnagjã sĩi pãach eugar ajapha ig iyʉʉ amkhĩirpai chan oob warag nem waumiet. Mag khãyau warag chikhamnaan igwiata, “Jãkhʉʉnan chad maar khãaijã ʉ̃rpai naabma” abat.

⁴ Nemdam waauwaijã oob pãrau pãach atheepaita nem thumaa khĩirjumiet. Magju khãai ĩchab dich khapeen dʉijã o ajapha ajuuta khĩirjubat.

⁵ Muan pãragjã, “Khĩirjug ajaphata paraa abat” a chirʉm, Cristoou khĩirjuajerrjo.

⁶ Í ĩchab Ẽwandam aawai ich Aai dʉi ãba sĩejim, iwiir ãbjã ʉ̃rʉʉ khaba. Mag sĩejieb mamʉ, ich mag ich Aai dʉi ãba sĩerram khõchgau irua ich khãidu ogdʉ pʉamaphajã khabajim.

⁷ Mag khãyau mag Ẽwandamkha sĩerrta, ich ajaugjã igba mʉg jẽb gaai beewia, parhoobam chaaidamjo thaabachewia, jũrr wounkha sĩeichejim. Mag, sĩi ich Ayag ich ʉdʉraa phẽethʉgpinaa õor ee Ẽwandam chogkhaan beejim.

⁸ Mag wounag pawia, wounaan ee sĩeichewia, sĩi chikhamnaanagta ʉdʉraa ich dʉi amachdeu ampierr apijim. Mag Ẽwandam ipierraa am khõchgau sĩi õor thõomie arrjo ʉdʉraa pakuls gaai ich meerphe thõopijim.

⁹ Mamʉ magtarr jũrr Ẽwandamau irig ichta thumaam khʉʉn khãai ʉ̃rpai apiwia ichta tagam khʉʉn khãaijã ajapcharam gaai thʉ̃rjim.

¹⁰ Maagwai thumaam khʉʉnau Jesús khĩirpheeta jĩeporou phõbkhakha aju: otarr khʉʉnaupa ʉ̃gtharm magwe mʉg jẽb gaaim khʉʉnaujã agjo.

¹¹ Mag nʉmua thumaam khʉʉnau i khaphʉ amach meukhĩraucha irig, “Jesucristo, pʉchta chadcha thumaam khʉʉn Porou; pʉchdeuta nem thum khap chirʉm” a iekhamam gaaimua, ĩchab ich Ẽwandam chi Aaipata mag tho iekhaju.

Jãga wenʉrraju aai nʉ Ẽwandam iek ʉkhabam khʉʉn ee

¹² Cristo gaaimua khodamnaan, mua pãar daupii chitʉm. Mua khĩircha pãachig Ẽwandam iek jaau chitaawai pãachdeu mʉ ipierraa narrjo, magan mʉ mau warp chirʉmjã igba warag ich jãg ʉkhanaat. Maach Ẽwandam na nem khaigba wauju okho sĩi maach peerdʉajem iekta warag pãach ee ʉ̃rpai apiju ẽkhabat, mag wenʉrrʉmua ubʉ paaukhamaag.

¹³ Magaag athee ich Ẽwandamauta ich khõchagpierr pãrag mag nem waupim khõsi api sĩewai ichdeuta pãar juagjã oojem.

¹⁴ Mag pãachig nem waupi sim waauwaijã, warag onee pãach wir aig chipar chiparjã aba, khĩuta waubat,

¹⁵ daumaa ãbmuajã pãachig iekhapiju chukhu, mʉg õor khaibag thʉnʉm ee khaibagjã chukhu Ẽwandam chaainkha wenʉrramkhĩir. Pãar magta wenʉrrʉmʉn, magan mʉg durr ich pekau pomgau edau khĩejo sim eejã pãar edjã ee phĩdag phuphup thʉnʉmjota wenʉrraju am ee,

¹⁶ jãga Ẽwandamau maach thãar chi iiurig paapäaijẽ a jaau wenʉrrʉm gaaimua. Maagwai Cristo beem edjã mʉchpa pãar gaaimua onee chiraju, mʉch par phidkhaba abarm khaphʉ chiraawai.

¹⁷ Mua pãrag Ẽwandam iek jaautarr gaaimua, ʉu pãrau ãba irua nem khõsimta wau wenʉrrʉm. Maagwai ich ag iek gaaimuapai amau mʉ thõoju akhiinjã, bʉ̃ʉrjã machagjã igba ʉdʉraa mua mʉch thõopiju. Magbarmua muajã pãrau nem wau nʉmjo, ichdeu khõsim nemta mʉchdeujã wau chirʉm khaphʉ chiraawai, mag mʉ thõokhiinjã mʉrʉgan ʉu kherʉm.

¹⁸ Maagwai mʉ mag thõkhiinjã mʉʉn mʉchin onee chirʉm. Oob okhĩirjuu amiet. Mag khãyau eeu degolp mʉ magwiajã pãachta warag oneeta abat.

Timoteo Epafrodito dʉi

¹⁹ Maach Por Jesuu khõs amʉn, mʉigmua jopcha mua pãar aar Timoteo pʉiju, pãar oon mamkhĩir, mag pãar oothurwia pãar jãga nʉ a jaaubaicheewai mʉchjã onee chiraag.

²⁰ Mʉchdeu pãar khĩirju chirʉm dʉi tag i denjo pãar khĩirju nʉm khʉʉn chukhu aawai, Timoteota mua pãar aar pʉiju. Jãgdamauta chadcha pãar ʉu wenʉrramkhĩirjã ich khod ãbam khʉʉn atheemjo aajem.

²¹ Tagam khʉʉnan sĩi amach wir aigpaita khĩirjuajerram. Mamʉ mag sĩsidʉm Jesucristo athee nem wauju khĩirjug chan bʉ̃ʉrjã khĩirjubamjota aajerram.

²² Mamʉ pãrau khaphʉ nʉm, í warm khʉʉnjo khaba khitʉm. Maar ãba phidkha wenʉrraajeewaijã, iruata chadcha ich aaijo bʉ̃ʉrjã mʉ bʉ ogdʉba ich mag ãba maar maach peerdʉajem iek jaau wenʉrraajeejim.

²³ Magua, ya amau mʉch sĩi obeerpʉiju wa thõopʉiju a ajapcha khaphʉ aadeewai iita mua pʉiju a chirʉm, pãar oon mamkhĩir.

²⁴ Mamʉ maach Por Cristoou mʉigmua mʉch ʉu obeerpʉiwia mʉchdeujã jophee pãar oon maju khaphʉ chiraawai mʉch chan mua ajappai khĩirjuba chirʉm.

²⁵ Mamʉ ichiita mʉʉgwaiwe mua deeu pãar aar maach khod Epafrodito pʉiju. Pãrau mʉ juag oomkhĩirta i pʉitarr aawai chadcha irua ʉu mʉ ipierr maach Por Cristo iekjã jaau wai khitanaa woun atheemjo ag kõitjã warag khaigper iekha khitaajem.

²⁶ I iek ya irua pãar thumaa oom khõchag chirʉm aajem. Ichdeu maumua ũurwai, mag i mor machpatarr pãachdeu ũrtarr gaaimua pãrau i khĩirju nʉm anaawai, ichdeujã ĩchab pãar khĩirju sim.

²⁷ Chi mor mas aan iin chadcha mor machpawia peer meejim. Mamʉ Ẽwandamau ʉu i eeg oowia monaaupʉijim. Maata Ẽwandamau mag i eeg ooba ʉdʉraa meepimuan, mʉʉn okhĩirjug pooma chirsikham. Mamʉ ʉu i monaau atham gaaimua Jooirau mʉchpata eeg oojim, mag i bʉ ʉʉakharr oowia gaai machag chirarr warag atcha okhĩirjug pom apimaaugau.

²⁸ Mag i mor mas sĩerr gaaimua pãrau i khĩirju nʉm mʉchdeujã khaphʉ chiraawai, jopkhaa pãar aar i pʉim khõchag chirʉm, í deeu monakha barbaimam oobaawai deeu pãachjã thumaa onee amkhĩir. Ya mag í ʉu barbaimaawai mʉchjã tag okhĩirjug chukhu chirsiju ĩchab.

²⁹ Mua i pʉibaawai, chadcha maach Por Jesucristo gaaimua maach dʉi khod ãbamjo naawai, onee pãach ee i baarpi athat. Maimua jãgjom khʉʉn wounaan pãach ee baarwai ĩchab wajapha i dʉi nʉmjo abat mag dʉijã.

³⁰ Chadcha ichdeupaita peer ich khĩrau ich thõopijim, Cristoou nem waupi jaau sim ipierraa am khõchgau. Maimua ĩchab pãrau pãachdeucha mʉ juag oom khõsi durrumta warp nʉm gaaimua pod ooba aawai, jũrr ichdeuta garpapa am khõchgau peer meebarm mʉ gaaimua. Maguata muan pãrag onee pãach ee i baarpi athat a chirʉm.