Filipenses 1 - Wounaan Meu

Salud

¹ Hermanonaan, pastornaan, pastornaan juag oojem khʉʉn, maimua thum Filipopien Jesucristo iek ʉkha nʉm gaaimua maach thum ãbam bi eemjo khodkha nʉm khʉʉn: Mʉʉn Pabloou. Muata pãar thumaam khʉʉn athee mʉg ẽsap phã chirʉm. Timoteota mʉ daumaai sim, mʉ dʉita ãba Jesucristo chogkhanaa i athee phidkha sĩewai. Maagwai maach numiim khʉʉnauta pãach thumaam khʉʉnag saludaanaa ʉu naapim khõsi nʉm.

² Mag gaaimua maach Aai Ẽwandamag jeeunaa maach Por Jesucristoogjã jeeu nʉm, pãar ʉuu wai nʉm dʉi ĩchab khõinaa wai wenʉrramkhĩir.

Pabloou chi ʉkha durrum khʉʉn kõit Ẽwandamag jeeujerr

³ Mʉchdeu pãar khĩirju ahaukhampierr Ẽwandamag ʉu ajim a chiraajem pãar kõit.

⁴ Mag Ẽwandamag jeeuwai pãar gaaimuata warag mʉ thãar onee aadeejem,

⁵ maach peerdʉajem iek jawaag maach thum ãbam phidag gaaipai naawai. Mag warrcha pãachdeu i iek ʉkhatarr aigmua pãraujã mag phidkha phobaaderr, ĩs ewag pawiajã ich mag maadeu ogdʉba wenʉrrʉm.

⁶ Mua khaphʉ chirʉm, ichdeu jãg pãar thãar chi iiurig paapʉitarrjo ichdeuta warag pãar khĩirjugjã bãaupiju, Jesucristo bee nʉm ora ich phidag waumkhĩir.

⁷ Mʉrʉgan pãarta mʉ thãrau. Maagwai pãar gaaimuata Ẽwandamagjã ich mag onee ʉu ajim aju aai chirʉm. Pãarta mʉig mʉ dʉi cárcel deg ãba nʉmjo nʉm. Mua thethemnaan na maach peerdʉajem iek kõit iekhaawaijã pãrauta mʉ ipierr dʉi ag kõit iekha nʉmjo nʉm, jammua pãachdeu Ẽwandamag jeeu durrum gaaimua. Pãran warp nʉm, mamʉ Ẽwandamau mʉrʉg phidag deetarr pãrau sĩi mʉchig appai deeba, ʉu pãrau dʉi mʉ juag oo nʉm, irig jeeu nʉmua.

⁸ Jesucristoou pãar khõsi simjo muajã pãar kha khõsi chitʉm. Mua mag chirʉm aig Ẽwandamau khaphʉ sim mʉ seukhaba chirʉm.

⁹ Maguata mua warag pãar kõit Ẽwandamag jeeujem, pãach wir aigjã warag ʉ̃rcha agdaujo chikham kha khõsi amkhĩir; maagwai khĩirjug paraanaa Ẽwandam dau najã jãga wenʉrraju aai nʉ a khaugphomam dʉi

¹⁰ nem aai khabamjã isegnaa nem ajaphampaita waumkhĩir. Mag amʉn magan Cristo beem edjã pod ãbmuajã “Pãar khaigba naajim” abaju.

¹¹ Mag amʉn magan ĩchab ich Jesucristoouta pãrag nem ajapham pom waau khaugpiju. Õrau pãar mag oobaawai amaujã ĩchab Ẽwandamag jeeumamua, “Ʉuta pua am jãg phe wai chirʉm; pʉjom chan chukhum” a iekhaju.

Pabloou cárcel deg simua ich onee chiraajerr jaaupʉitarr

¹² Khodamnaan, mua pãrag khap amkhĩir jaaukhim: Mʉg amau mʉ cárcel deg pʉibapäaiwai õraun tag mua Ẽwandam iek jaauba ich jãg chirsijupii ajierram. Mamʉ mag khabajim. Ante magtarr aigmuata maach peerdʉajem iekhan warag aaidʉa khaphii aadem.

¹³ Mag gaaimua mʉig soldaaun pom thʉnʉm dʉimua bithurgam khʉʉnaupa thum khakhapdo thʉnʉm, Cristo iek jaau chitʉm gaaimuata mʉ mʉg preso wai nʉm.

¹⁴ Mamʉ hermanonaanau oo nʉm, mʉ cárcel deg chirʉmjã Ẽwandamau mʉ chig apiba wai sim. Mag gaaimuata ʉ̃rcha i iek ʉkha nʉm khʉʉnaujã warag khuphĩiuwia ogkhaba, dʉi i iek jaau nʉm. Amau khaphʉ nʉm, maach Por Cristo amach dʉi sĩewai irua ʉdʉʉr am amach appai deebaju.

¹⁵ Mag Cristo iek jaau wenʉrrʉm ee, ãaur khʉʉnaun mʉ mʉg chirʉm oowia, mʉ khãyau amachdeuta ajapcha jaau nʉm awia jãg wenʉrrʉm, chikham dʉi khujʉrpaim iekhau. Magarrau ãaur khʉʉnaun chad magjã khĩirjuba, amachdeu Cristo khõsi nʉm gaaimuata jãg jaau durrum.

^16-17 Ar mag Cristo khõsinaa mʉjã dau aug khaug paraa nʉm gaaimua jaau wenʉrrʉm khʉʉnau khaphʉ nʉm, Ẽwandamauta mʉ mʉig wai sim maach peerdʉajem iek jaaumkhĩir. Mamʉ ãaur khʉʉnau chan chadcha jaaum khõsi khabamta juau ogthompaita Cristo iek jaau nʉm, sĩi õrag amachta chi ajapcharam khʉʉnau amkhĩirpai, magʉm gaaimua mʉg mʉ cárcel deg chirʉm awia warag kha oneg chukhu amkhĩir.

¹⁸ Mamʉ mʉ gaai mas khaba sim jãga amau jaau nʉ. Mʉrʉgan thum ich agjopai sim; jaaumapha jaauwiajã ichiita amau Cristo iekta jaau nʉm. Mag gaaimua mʉchpa onee chirʉm. Mamʉ warag mʉ oneecha aju,

¹⁹ pãrau jãg mʉ kõit jeeu durrum dʉi Ẽwandam Akhaar maach Por Jesús khaigper autarrauta mʉchjã ĩchab eeg oo sim khaphʉ chiraawai. Mag pãrau jeeu nʉm dʉi Ẽwandam Akharau mʉ eeg oo sĩewai mʉigmuajã mʉ ʉu oberju.

²⁰ Mamʉ degolp mʉ pod oberba ich mʉg cárcel degpai thõowiajã mʉ gaai mas khaba sim. Sĩi mua ʉ̃rcha khõsi chirʉmʉn mʉgau: Cristo dʉita ag na mʉch chiraajemjo ubʉ chitam khõsi chirʉm, thethemnaan na i kõit iekhaawaijã inag chukhu iekhaag, mʉch mag chirʉm oowia õrau warag Cristota tho iyʉʉ amkhĩir. Amau chadcha Cristota mag tho iekhamʉn, amau mʉ thõopʉiwiajã, monakha ober nʉm dʉi ãba chirʉm.

²¹ Ʉu monakha oberkhiinjã, ãba Cristo iek jaau nʉm gaaipaita pʉʉrba chitaju; mʉ thõobpʉikhiin chará ajapcha sim, warre ich Cristo dʉichata chiraimaju aawai.

²² Mamʉ ʉu chig aba obernaa mʉg jẽb gaai maach Por Cristoou warag ich iek ʉkhapimkhĩir i athee õor jʉrju aai chirʉm amʉn, mag chan mua jaauju khaugba chirʉm khan ata jaauju khai irig.

²³ Khar jãguata warag thoophem numijã am khõsi aadeejem: thoophem ãb Cristo aar chiranaa, thoophem ãbmua warag i iek jaau chitaag. Mua khĩirjuawai Cristoou ich aarta mʉ aukhiin chadcha mʉ ajapcha akham.

²⁴ Mamʉ mua khaphʉ chirʉm ĩchab, pãar gaaimua ideu mʉ ich jãg mʉg jẽb gaai chitaju aai chirʉm.

²⁵ Mag pãrau mʉch ig nʉm khaphʉ chiraawai mʉʉgwaiwe chan Ẽwandamau ʉdʉʉr amag mʉch thõopibajujã khaphʉ chirʉm. Mʉʉn pãar ee maach Ẽwandam iek jaau chitaju, warag pãar ubʉ paaukhamam dʉi oneecha wenʉrramkhĩir.

²⁶ Mag Cristoou mʉ pãach aar monakha baarpibarm oobaawai pãrau onee nʉm iekhau, “Cristo, ʉuta pua jãg deeu i waibeewia maar ee pʉ iekdam jaau kheraichem” aju.

Maadeu jãga aju aai nʉ Cristo igar khaba nʉm khʉʉn dʉi

²⁷ Mʉʉn mau pãar warp chirab mamʉ, muan pãragan sĩita Cristoou maachig wenʉrrapi jaau simjota thum i ipierraa wenʉrrapim khõsi chirʉm. Maagwai pod mʉch pãar aar barba awiajã, warppaimua khãijã agtha pãach thumwe Cristo dʉi ubʉnaa maach peerdʉajem iek jawaagjã o ãba nʉm anʉmta mua ũrm khõsi chirʉm.

²⁸ Ar maach igar khaba nʉm khʉʉnau pãach dʉi amachdeu ampierr awiajã oob ogkhamiet. Pãrau magmʉn magan magʉm oowiata jũrr ewag khĩirjuwia amau ãsie, “Mʉkhʉʉnaun chadcha nem jaau nʉm paarta maadeu am dʉi jãg nʉm, jãgan Ẽwandamau jãkhʉʉnta peerdʉ auwia maachta isegju” a khĩirjuju. Mamʉ mag awiajã, ich Ẽwandamauta ʉdʉraa magpi sĩewai

²⁹ oob ogkhamiet. Maadeun Cristo iek gaai ʉkha nʉisiewaita irig ʉu ajim aajem; mamʉ agjo i iek jaau wenʉrrʉm gaaimua chikhamnau maach khaibag waauwaijã ĩchab irig ʉu ajim aju aai nʉm.

³⁰ Pãrau khaphʉ nʉm, mʉg maach peerdʉajem iek jaau wenʉrrʉm gaaimua õrau maach igar khaba nʉm. Pãrau pãach daúa oojeejim, jãga aajeejĩ mʉ jam pãar dʉi chiraawai; ĩsjã pãrau ũr nʉm, jam pãar dʉi nʉmjota mau mʉ dʉijã thʉnʉm.