Filemón 1 - Wounaan Meu

Salud

¹ Filemón, ¿jãgpai chirʉ́? Mʉʉn Pabloou. Maach Por Jesucristo iek jaau chirʉm gaaimua preso chirʉm. Mag preso chirʉmuata pʉrʉg mʉg ẽsap phã deepʉi chirʉm. Pʉjã maar dʉi maach Por Jesucristo iek jaau nʉm gaai ogdʉba khitaawai, maach hermano Timoteo dʉimua muata pʉrʉg saludaa chirʉm.

² Mʉg ẽsap gaai mam ĩchab salud: maach ʉ̃phʉi Apia athee; Arquipo, maach ipierr dʉi ogdʉba maach Ẽwandam iek jaau khitaajem athee; maimua ĩchab chi ʉkha durrum khʉʉn thum pʉ di aig ãba biirdʉwia Ẽwandamag jeeujem khʉʉn atheejã agjo salud deepʉi chirʉm.

³ Maach Aai Ẽwandamag jeeunaa ĩchab maach Por Jesucristoogjã jeeu chirʉm pãar kõit, pãar ogdʉba thʉa wai wenʉrrʉm dʉi ĩchab pãar khõinaa wai wenʉrramkhĩir.

Filemón gaaimua Pablo onee atarr

⁴ Filemón, Ẽwandamag jeeu chirʉm aig mʉchdeu pʉ khĩirju athaawai warag pʉ igwia irig ʉu ajim a chiraajem.

⁵ Mua chadcha irig ʉu ajim aajem, mʉchdeu ũurwai pua thum Ẽwandam iek ʉkha durrum khʉʉnjã daupiinaa maach Por Jesucristo dʉijã ubʉ chitʉm a ũurjeewai.

⁶ Ĩchab mua pʉ kõit Ẽwandamag jeeu chiraajem, cha maachdeu ʉkha nʉm iek deeum khʉʉnag jaaumam dʉi pʉchdeupaijã jãga Jesucristo gaaimuata maachin Ẽwandam dʉi ʉu wenʉrraajẽ a thumaa ajapha khap amkhĩir.

⁷ Pua mag maach Ẽwandam iek ʉkha durrum khʉʉn thum kha khõsi aajem a jaau nʉm gaaimua, mau chirʉm ãba, pua ĩchab mʉ thãar onee api sim. Ʉu nʉm hermano. Puata ʉu maach hermanonaan dʉi o ajapha am khĩir jãsenkha chirʉm gaaimua amjã khĩir onee durrum.

Onésimo kõit Pabloou Filemonag chaigpatarr

⁸ Mag pua thumaam khʉʉn kha khõsi aajeewai, pʉch chog arr Onésimojã agjo warm khʉʉnjo pua daupii aju aai sim. Cristoou ich i jaaumkhĩir mʉ jʉr autarr aawai mua pʉrʉg warre i daupii abá a jaauju aai chirʉm.

⁹ Mamʉ muata ajués pʉrʉg i daupii api chirʉm am ugua, maach numijã agdaujo chikham kha khõsi nʉmjo i kha khõsi amkhĩir, sĩi ikhõrjã khaba pʉrʉg magam ig chirʉm. Mʉ ya jooiraa chirʉm. Mag chirʉm ãba, Cristo iek jaau chitʉm gaaimua preso chirʉm.

¹⁰ Mag chirʉmuata pʉrʉg chaigpa chirʉm Onésimo kõit. Iita chadcha mua mʉch chaaijo wai chirʉm, mʉch mʉg preso chirʉmuata ʉu irig maach peerdʉajem iek ʉkhapi autarr aawai.

¹¹ Warran chadcha Onésimo pʉ chog sĩi pʉ athee phidkhaajem ajim. Mamʉ mag sĩerrta pʉ aigmua dʉr mawi, dʉrrʉʉ pʉ athee tag phidkhaba, sĩi tag ich igpibajujo sĩsijim. Magjieb mamʉ ya iruajã maach denjo Cristo iek ʉkhabaarwai, mʉ mʉg chirʉm aigjã ʉu dʉrrcha irua mʉ oo wai kherʉʉ awia, pʉ atheejã deeu irua phidkhaju mua khaphʉ chirʉm.

¹² Mag deeu pʉ chogkha sĩeimamkhĩir, ũmaai mua pʉ aar i pʉi chirʉm. Mamʉ mag mua pʉch aar i pʉibapäaiwai, mʉchchata pʉch aar barbaimamjo ajapha i wai chirsí pʉch dʉi.

¹³ Mua chadcha mʉch aigmua ogdʉba i wai chiram khõsi chirʉm, mʉg maach peerdʉajem iek jaau chitʉm gaaimua preso chiraawai mʉchdeu nemdam iigwaijã ichdeuta au deebarphʉ amkhĩir. Mua khaphʉ chirʉm ĩchab, pua mʉ oon beem khõsi sim. Mamʉ warphagkham gaaimua pod beeba aawai mua jũrr ichta mʉch dʉi sĩepim khõsi chirajim, mag irua pʉ kõit mʉ athee nem wau simta jũrr pʉchdeuchata wau simjo amkhĩir.

¹⁴ Mamʉ mau mʉch appai agtha pʉ iekjã ũr auba chan mua mag jũrr iita ajués mʉch chogjo wai chiramapha chirʉm, eeu degolp pua mag khõchkhabaju khãijã mua magbaadeju. Magju khãai pʉchdeuchata irig pʉch khĩrau jaaumʉn chadau, mua i mʉch aig wai chiraju.

¹⁵ Jãg Onésimo pʉ aigmua dʉrtarran, jãan Jooirau ich iiu khãijã jãgpijim, deeu nassi pawia ũmaai pʉch aar petaawai deeu pʉch dʉi ich mag i wai chirsimkhĩir.

¹⁶ Mag pʉch aig wai chirsim chan ya tag sĩi pʉ chogpai khaba, ya ĩsin warram khãaijã ajapchata sĩsim. Ajapcharan iin ya maach khod chaardamau, iruajã ĩchab dʉi maach Ẽwandam iek ʉkha khersiewai. Mʉch imeerba muan i jãsene chirʉm. Mamʉ puata mʉ khãyaujã ʉ̃rcha i jãsene aju aai sim. Sĩi pʉch chog aawaipaijã khaba, iruajã maach Por Jesucristo iek ʉkha sĩsiewaita i daupii aju aai sim.

¹⁷ Magua mua pʉrʉg mag chirʉm: Pʉchdeu khĩirjuawai chadcha mʉjã pʉch khapeer khai, magan Onésimo pʉch aar barm edjã mʉchchata pʉch aar barbaimamjo onee i baarpi athá.

¹⁸ Irua pʉ dʉi khaigba awia debpaar khãijã pʉrʉg paraa sim khai, mʉrʉgta jeeubá, mua i kõit phagpʉiju.

¹⁹ Oob khĩirjum. Muata pʉrʉg mʉch juadamaucha, “Mua chadcha phagpʉiju” a phã deepʉi chirʉm mʉg ẽsap gaai. Mamʉ pua khĩir eyaa aju aai sim, debpaar chaar khabam mamʉ mua Cristo iek jaau chitʉm gaaimua pʉchdeujã Cristo iek ũrtarr aawai puan mʉrʉgjã debpaar paar simjota sim. Mamʉ mua magʉmjã igbam.

²⁰ Magau khodam Filemón. Puajã maach Por Jesucristo iek ʉkhaajeewai, Onésimo chig aba sĩi warag i daupii wai chirsimkhĩir, muata pʉrʉg chaigpa chirʉm i kõit. Mag pʉjã ĩchab Cristo den aawai cha mua jaau chirʉmjo abá i dʉi, magbarmua warag mʉchpata mʉ khĩirdam onee apieg.

²¹ Mua khaphʉ chirʉm, pua cha mʉchdeu jaau chirʉmjo aju. Magua mua mʉg ẽsap pʉrʉg phã deepʉi chirʉm. Khaphʉ chirʉm ĩchab, cha mʉchdeu jaau chirʉm khãaijã atcha pua i aairaa aju.

²² Mʉ athee ĩchab didam jʉrwi ajapha khĩir khaug kherbá, mʉch maawai ag ee chiraimaag. Mua pʉrʉg mag chirʉmʉn, jãg ʉu pãachdeu mʉ kõit jeeu durrum gaaimua Ẽwandamau mʉchig pãar oon mapiju khaphʉ chiraawaita mag chirʉm.

Ãbmiecha salud deepʉi narr khʉʉn

²³ Mʉ khapeer Epafras ĩchab Jesucristo iek jaau khitʉm gaaimua mʉig mʉ dʉi cárcel deg kheraajemuajã pʉrʉg salud deepʉi sim.

²⁴ Mag tag ĩchab pʉrʉg salud deepʉi nʉm: Marcoou, Aristarcoou, Demas aajemua, maimua Lucaaujã agjo. Mʉkhʉʉnauta dʉi mʉ ipierr ogdʉba maach peerdʉajem iek jaau durraajem.

²⁵ Magdam jawaag ajim pʉrʉg mʉg ẽsap phã deepʉi chirʉm. Mʉʉn maach Por Jesucristoogta jeeu chiraajem pãar kõit, pãar dʉi ogdʉba ich mag pãar thʉa wai sĩemkhĩir. Ayoo kake, Pablo