Efesios 6 - Wounaan Meu

¹ Chaaina, pãach dennaanau iekhaawai am ipierraa abat; maach Por Cristooujã magta apim khõsi sim pãrag. Pãrau magta am ipierraa nʉmʉn magan chadcha pãar agchata wenʉrrʉm.

^2-3 Ẽwandam iek phã sim gaai jaauwaijã, “Oneenaa ʉu dʉrrcha año khapanaa wenʉrraag, pãach aai jãsenenaa pãach ãdjã jãsene abat” a sim. Tagam nem agjo ichdeu waupi jaau sim ee maata ʉ̃rcha chi ajapcharamʉu chaaina.

⁴ Mamʉ keena, pãach chi dennaanaujã pãach chaain meeukhamkhĩirjo oob am dʉi athuucha amiet; magju khãai warag am wajapha wawí bãaumam dʉi maach Por Cristoou khõsimjo wenʉrramkhĩirta amag khap apibat, ich magta jooinpagkhamamkhĩir.

⁵ Pãar sĩi mʉg jẽb gaai chikhamnaan chogkha wenʉrrʉm khʉʉnjã, pãach pornaanau pãachig nem mag aawai ich Cristoouchata pãachig jaaubarmjo am ipierraa waum khõsita waubat, maimuajã ajapha.

⁶ Mag am ipierraa nem waauwaijã, sĩi pãach aig oopaar aawaipai khaba, am meer awiajã ich agjo. Mamʉ mag nʉm chan sĩi pãach ajapha nem wau nʉm oomkhĩirpai khaba, Cristo chognaankha naawaita ichdeu khõsi simjo mag ajapha nem waubat.

⁷ Sĩi mʉig eegar dich agdaujopai thʉnʉm khʉʉn atheeta nem wau nʉmjo khaba, maach Por Cristo athee wau nʉmjo nem waum khõsita nem waaujeethʉ̃.

⁸ Ya pãrau khaphʉ nʉm, mʉig eegar aawai sĩi chikham chog wa chikham chog khaba arr awiajã, mʉg atag paawai dichdeu nem ajapha waaujerrpierr maach Por Cristooujã maach dʉi ich agjo aju.

⁹ Maimua pãach chi porkha nʉm khʉʉnaujã agjo pãach chognaan dʉi aairaa abat, oob am dakhãkhãujã aba. Khĩir eyaa abat, pãran ĩchab pãach chognaan dʉi ãba thum maach Por Ẽwandam ʉ̃gthar chiraajem jua eegpai nʉm. Jãg Jooi dau naan maachin thum agdaujopai thʉnʉm.

Khan jãg nʉmuata mepeer dajẽk aju aai nʉ

¹⁰ Hermanonaan, ya ãbmiecha paawai muan pãragan, maach Por Ẽwandamau ich juapa theeg deetarr pãach gaai simʉgta ideu pãach ubʉ paapibat a chirʉm.

¹¹ Cristo iek ʉkha nʉm gaaimua Ẽwandamau pãach dʉi nem ajapha waumatarrta khĩir eyaanaa aata por ee wai nʉisit, ich jãg soldaaun juurhi ee werbʉan maawai ich thʉag ich jierrnemta jũapäaijemjo, mag por ee wai nʉmuata ubʉ naawai meperagta ʉdʉʉr dich khũgurpiba aag.

¹² ¿Khan jãgwi mua mag chirʉ́? Mʉg nʉm aig sĩi dichjom khʉʉn dʉita werbʉba naawaima. Maachin sĩi mepeen chi khaigbam edjã eem magwe thʉnʉm dʉita werbʉ nʉm. Makhʉʉnauta mʉg durr ich khaibagau khĩsumjo simjã khaphʉnaa, iek theegnaa amachta ʉ̃rpai thʉnʉm.

¹³ Maguata muan pʉaba pãragan, Ẽwandamau ich jua theeg jierrnemjo deetarrta khajũajo jũabapʉit a chirʉm, meperau khaibag ee dich mapiju ẽkhacheewaijã ʉu peerdʉímʉ peerdʉpʉpʉijii awi ʉu pãach garmuata podpʉiwi ich mag ubʉ nʉisieg.

¹⁴ Muan maguata deeu ũwaai pãragan, ich jãg soldaaunau werbʉan maawai amach khajũapai khu ee wayeunaa ajapha ãi khõorjʉ̃ dʉnʉisiejemjo, chadcha iekha nʉmuata sĩi ajap khĩir khaug nʉmjo abat a chirʉm. Soldaaunau amach thʉag amach thũrr gar jierrnem jũapäaijemjo, nem agchata waubat a chirʉm, meperag pãach chig am ugua.

¹⁵ Soldaaun werbʉan wetaagpamjo, ajaphata khĩir khaug nʉisit, maach peerdʉ auwi maach khõinaa apiejem iek jawaan wetaag.

¹⁶ Mamʉ mag nʉm dʉi ich jãg soldaaunau ich thʉag ich escudota ich na ʉa ahau aajemjo, pãraujã meperau pãach khaibag ee burrpiju ẽkha nʉmpierr warag Cristo iekta thãraucha ʉkhanaat, maagwai par meperau chookhierrau pãach phiphiskham õtdau khĩir phug bee thʉnʉmjo thʉnaawiajã, mag pãachdeu ʉkha durrumuata ʉdʉʉr pãach gaai papiba aag.

¹⁷ Ich jãg soldaaunau ich por thʉag casco jũajemjo, pãraujã Cristoou ʉu pãach peerdʉ autarr khaphʉnaa ag khĩirjugta jũa nʉmjo wai nʉisit, meperag pãach khũgurpiba aag. Magnaa ich Ẽwandam iek ich Ẽwandam Akharau pãachig khaugpitarrta jũrr pãach espaarkha athat, aguata pãach garmua jũrr i dajẽk aag.

¹⁸ Pari thum cha mʉchdeu jaau chirʉmjo dich garmuata podpäaigan, jeeub khaba Ẽwandamagta jeeunaat. Ich magta irig jeeu wenʉrrʉmua ideu ich Ẽwandam Akharagta pãachig jaaupibat, jãga Ẽwandamag jeeuju aai nʉ. Khĩir khaphʉ abat, eeu bʉ̃ʉr abarm gaaimua khãijã Ẽwandamag jeeumapha adukham. Magju khãai pʉaba irigta chaigpamamua jeeunaa ĩchab tagam khʉʉn thum durrpierr Cristo iek ʉkha nʉm khʉʉn kõitjã jeeunaat.

¹⁹ Mʉ kõitjã ĩchab jeeubat, Cristoou maach peerdʉ aaujem iek õrag jaauwaijã khĩirjug khaphʉ ichdeu iekhapim khõsimta mʉrʉg jaaumamkhĩir, maagwai jãga mag warr õrau amach peerdʉju aai nʉmjã khaugba narrta ya ĩsin Cristoou õor peerdʉ aaujem a jaauwaijã ogkhaba iekhaag.

²⁰ Cristoou ich jũrr mʉ chogpʉiwi mʉg maach peerdʉ aaujem iek jaau chirʉm atheeta mʉʉn mʉg amau mʉ preso wai nʉm. Magtarr aawai mʉig cárcel deg chirʉmuajã warag ichta õrag khap amkhĩir ogkhaba jawaagjã mʉ kõit jeeunaat keena.

Ãbmiecharam salud

²¹ Maach khodam maadeu daupiinaa mʉg maach Por Cristo iek jaau nʉm phidag gaai ogdʉba maach juag oo khitaajemuata mʉ mʉg cárcel deg chirʉmjã pãrag jaauwimaju, ajapcharan ich Tiquicoouma. Irua jaauju ĩchab pãrag mʉig mʉ khani jãg chirʉ́.

²² Mag pãrag nem ĩgkhaimamkhĩirta mua i pãar aar pʉi chirʉm, maach mʉig jãga nʉ a jaaubaimam ũrbaawai pãar khĩir onee apieg.

²³ Muan maach Ẽwandam chi Ayau maach Por Jesucristo dʉimua pãar chi hermanonaan thum khõinaata wai naapim khõsi chirʉm. Mag nʉm dʉi ĩchab thãraucha ʉkha naawai pãach eejã thum agdaujo chikham kha khõsi apim khõsita chirʉm.

²⁴ Mamʉ mag pãar appai khaba, ar maach Por Jesucristota ogdʉba thãraucha khõsi aajem khʉʉn thumta Ẽwandamag ʉu wai sĩepim khõsi chirʉm. Magdampai ajim pãrag jaaum ig chirarr. Ayoo keena, Pablo