Efesios 5 - Wounaan Meu

Ẽwandam chaainkha nʉm khʉʉn jãga wenʉrraju aai nʉ

¹ Ich Ẽwandamau ich garmuajã chadcha pãar ich chaain jãsene aajeewai ichdeu pãach dʉi aajemjota abat pãachdeujã pãach khapeen dʉi.

² Ich jãg Cristoou maach khõsi simjo pãraujã agdaujo pãach khapeen kha khõsi abat. Cristoou mag maach khõsi arr aawai maach daupigau pakuls gaai ʉdʉraa ich meerphe thõopijim. Ẽwandamau irua magbarm oowai ʉu sĩejim.

³ Ya pãar Ẽwandam õorkha nʉm khʉʉn chan pod pãach õor khabam dʉijã khapes aju khaba, tagam nem maach inaamjã wauba, chikham nemjã thumaa dich den apim khõsi aju khaba, ni sĩi magʉm iek ig iyʉʉ ajujã khaba nʉm.

⁴ Sĩi iparii dau lokoo wa ihachag khãijã iekhaju khãai, Ẽwandamau pãach dʉi ʉu aajem paar i ajaugta phebat. Ya pãar Ẽwandam den aawai, iek ãkhãraam chan pãrau tag iekhaju khaba nʉm.

⁵ ¿Jãgwi mua mag chirʉ́? Mua mag chirʉmʉn mʉgau: Amach õor khabam dʉi khapes aajem khʉʉn, Ẽwandamau oowai maach inaam nem waaujem khʉʉn, wa chikham denjo paarpaag awi amachdeu nem ig nem ẽkhabaademjã pʉa chʉuu aajem khʉʉnjã pod Cristo Ẽwandam dʉi ãba chi Porkha sim aar oberbaju aawaita mag chirʉm. Ar jãg nʉm khʉʉnaun jãg amachdeu nem wau nʉmʉgta ʉ̃rcha ee thʉnʉm, Ẽwandamagta ee aju khãai. Amach mag nʉm gaaimuata pod i aar oberbam.

⁶ Jãgʉm khʉʉn eem ãbmua khãijã pãach aig beewi pãachig mʉ ichaaur jũrr magʉm gaaimuapai chan Ẽwandamau pãar chig abam a jaaumʉn, magan ichta seukha nʉrrʉm. Magʉm khʉʉnag ʉdʉʉr pãach khũgurpimiet. Amau khaugba nʉm, ante magʉm waum khõchgau ich ipierraa khaba nʉm khʉʉn gaaita Ẽwandam khĩir machag meeuju khabahab.

⁷ Magua jãg i ipierraa khaba i ichaaur nem wau nʉm khʉʉn dʉi chan oob bʉ dʉii amiet.

⁸ Warr pãrau Ẽwandam iek khaugba aawain chadcha pãachjã sĩi khĩchag eemjota wenʉrraajeejim. Pari ĩsin ya pãar maach Por Cristo dʉita khapeerkhanaa i iekjã khaphʉ naawai ararag ee nʉmjota nʉm. Mag naawai chadcha i iek khaphʉm khʉʉnjota agpierraa nʉrrjee abathʉ̃.

⁹ Mag Cristo gaaimua chadcha ararag eeta wenʉrrʉmʉn, õor ajaugta aadeejem; mag nʉm dʉi ĩchab nem agcha waunaa iekhaawaijã chadam iekta iekhaajem.

¹⁰ Magua pãach nem waaupierr maach Por Ẽwandamau oowai i dawagaa aju ayaam nemta wauju ẽkhabat.

¹¹ Cristo khaugbagau sĩi khĩchag eemjo nʉm khʉʉnau maadeu nem igbam nem wau nʉm ee oob dʉi dubmiet; magju khãai warag pãach ipaarmua amau nem wau nʉm chadcha khaigba sim a khap amkhĩir warag meerba jaaubapʉit.

¹² Jãgʉm khʉʉnau meraa nem wau nʉm chan maadeu igjã mapha sim, magʉm iigwai warag maach chigaata sĩewai.

¹³ Pari magba khaigbam khʉʉn daar maadeu nem wau nʉmjã thum ajaphata waauwain õrau amachdeu nem khaigba wau nʉmjã õtdau bʉʉgta oo nʉmjo aajem. Mag sim aig chi pekaujã pod meraa aju khaba sim, õtdaúa thum arar wai sĩejemjo maach wajapha nʉm gaaimua amachdeu nem khaigba wau nʉmjã merag chukhu sĩewai. Mag maadeu ajapha nem wau nʉm gaaimua õrau amach khaigba nʉm khaug auwi Ẽwandamau khõsimjo mag ararag ee wenʉrram khõchgau i jʉrmʉn, chadcha i denkha nʉisiejem.

¹⁴ Pari magaagan am iekhõoin, “Jãg pʉch pekau eepai khãi simjo sim daukhanpabá; chi khechamjo thʉnʉm khʉʉn eemua phiidʉbaad; Cristoouta ich denkha aunaa ich dʉita pʉ wai nʉrraju.”

¹⁵ Maguata muan pãragan agpierraata wenʉrrathʉ̃ a chirʉm, Ẽwandamau khõsimjo. Sĩi jãg nem jaau nʉmjã ũrba wenʉrraju khãai khĩirjugdam paraata aajeethʉ̃.

¹⁶ Ʉuta nem ajapha wauju aai nʉm aiguin agpierr ich Ẽwandamau khõsi simjota abat. Pãrau oo nʉm, ĩs ewag paawai chan ya warag chi ajaugjã chukhuta paaukhamam.

¹⁷ Oob jãg sĩi Ẽwandam khaugbam khʉʉnjo parhoob dau theeg chukhu nem waumiet. Magju khãai khani maach Por Cristoou waupim khõsi sĩ a khĩirjunaa magʉmta wauju ẽkhabat.

¹⁸ Oob nag dowia okhoppha amiet. Jãgʉmuan warag maachig nem parhoobata waupinaa maach okhoopijuuta ẽkhaajem. Magju khãai Ẽwandam Akhaarta pãach gaai phẽsnaa ideu irigta pãachdeu nem waujujã jaaupibat.

¹⁹ Pãach iyʉʉ aawaijã maach Por Cristo iekta onee ig iyʉʉ abat; meukhaar au nʉmuajã thãrauchata i thumeukharbat.

²⁰ Maach Por Jesucristo gaaimuata Ẽwandam chi Ayau ʉu maach iek ũurjeewai nem thumaam paar irigta ʉu ajim abat.

Jãga aju aai nʉ dich khãai ʉ̃rpaim khʉʉn dʉi maimua dich khãai eegpaim khʉʉn dʉijã agjo

²¹ Cristo iek ʉkha naawai irua jaau simjo am khõchgau jũrr dich khapeen agjo ʉkha nʉm khʉʉnaujã dichig nem mag aawai, ʉdʉraa amagta dich khãai ʉ̃rpai apibat.

²² Ʉʉin chi jaainpan, ich jãg maach Por Ẽwandamagta ʉdʉraa pãach khãai ʉ̃rpai api nʉmjo, pãach jaainau pãachig nem mag aawaijã oob pãachta am khãai ʉ̃rpai aju ẽkhamiet.

²³ Pãrau khaphʉ nʉm, mʉg maach chi ʉkha nʉm khʉʉnta Cristo morkha nʉm. Maagwai ichta maach Por anaa maach peerdʉ aaujemʉu. Magua ũrbat: ich jãg Cristota chi ʉkha durrum khʉʉn Porkha simjo, pãar jaainta pãar porou.

²⁴ Magua, ich jãg mʉg maach chi ʉkha nʉm khʉʉn thum Cristoou nem mag aawai i ipierraa aag i jua eegpai nʉmjo, ʉʉin chi jaainpanjã agjo nem thumaam athee pãach jaain ipierraa aag am jua eegpai ʉrrjee abat.

²⁵ Ich jãg Cristooujã ich iek ʉkha phobaadeewai ich iglesiakha nʉisiju khʉʉn daupigau am kõit ichta thõopitarrjo, pãach chi emkhooinaujã pãach ʉʉin daupii abat.

²⁶ Cristoou mag ich thõopitarran, maach peerdʉajem iek ũr nʉm dʉi dich por choopibarmua ajaug paapʉiwi ich atheepaita nem wau wenʉrramkhĩir ajim.

²⁷ Mag ajaug paapʉiwi ich atheepai nem waupi simʉn, deeu ich beem edjã ʉʉi khĩir ajaug khaibagjã chukhu thumaam khʉʉnau khõoigjemjo khitʉmta ich athee awaagau; ajapcharan bʉ̃ʉrjã pekau chukhu, ni deeum khaigbam nem jaauju ayaamjã chukhu, sĩi ajappha khitʉmta ich aarcha awaagma.

²⁸ Ich jãg Cristoou maach khõsi aajemjo ich agjota aju aai nʉm chi jaainaujã pãach ʉʉin dʉi. Jãg chi jayaujã ich mor bʉ̃ʉrjã chig apimapha aajemjo, ich ʉʉijã chig aba daupiita wai nʉrraju aai sim. Chadcha ich ʉʉijã daupii wai sim wounaun ichchata chig apimaphamjo sim, ich ʉʉijã ich morkha simta mag daupii wai sĩewai.

²⁹ ¿Jãgwi mua mag chirʉ́? Maach mʉg nʉm aig ãbmuajã wir aig dichdeupai dich oomapha khaba aajeewaima. Ante warag maadeu thachjã ed eepierr khonaa dich chig apimapha aajem, ich jãg Cristooujã ich mor aawai ich iglesia thʉa wai sĩejemjo.

³⁰ ¿Maagwai maachjã mag irua thʉa wai sĩejem eem khʉʉn khabá, maachjã i morkha naawai? Chadcha i morma.

³¹ Pari mag chi jaai ich ʉʉi dʉi ãbam morkha nʉm a nʉmʉn, Ẽwandam iek phã sim gaai jaauwaijã, “Maguata emkhooirau ich dennaan dʉi sĩejerrjã am phepʉawi ich ʉʉi dʉita ogdʉba sĩsiju” a sim, “warr sĩi amach ap nʉrrjee aajerrta ya magbaadem aigmua sĩi ãbam morkha õor ãbpaimjo wenʉrraag.” (Gn. 2:24)

³² Mua khaphʉ chirʉm, mʉg iek khap aag chadcha maach athee phithur sim. Pari mua mag chi ʉʉijã ich jaai dʉi ãbam morkha nʉm a chirʉmʉn, maach chi iglesiakha nʉm khʉʉnta Cristo morkha nʉm igwiata mag chirʉm.

³³ Pari mag cha mʉchdeu jaau chirʉm pãachdeu thum ajap khaugba awiajã, ichiita ich jãg pãachdeupaijã bʉ̃ʉrjã pãach chig apimapha aajemjo, thumaam khʉʉnau agdaujo pãach ʉʉin daupii abat. Maagwai chi ʉʉinaujã pãach jaain ipierraa nʉmua am okhonaa agjo am daupii abat.