Efesios 4 - Wounaan Meu

Ẽwandam Akhaar gaaimua Cristo morkha nʉm

¹ Keena, maach Por Jesús i jaau chitʉm gaaimua preso chirʉmuata muan pãrag jaau jochkherʉm: chadcha Ẽwandamau thʉ̃rkha auwi i denkha nʉm khʉʉnjota agpierraa nʉrrjee abat a chirʉm.

² Pãachta warm khʉʉn khãaijã chi serbiibacharamjonaa khĩir thũu abat; chikhamnau dich dʉi parhooba aawaijã sĩi khĩu ãwatpʉinaa jũrr agdaujo dich khapeen kha khõsita abat.

³ Ẽwandam Akharagta ideu pãach khĩirjug ãba apiju ẽkhabat, ich mag khõinaa wenʉrrʉmua.

⁴ Maach chi Cristo denkha nʉm khʉʉnan khapan thʉnaab mamʉ, õor ãbpaimkha nʉm Cristo gaaimua, maagwai chi Ẽwandam Akhaarjã ãbpaita sim maach ee sĩejem. Ich agjota ĩchab Ẽwandam aar i dʉi ãba naaimaju khĩirjugjã ãbpaita wai nʉm, mag ich aar awaagta warrjã maach thʉ̃rkha autarr aawai.

⁵ Maach Por Jesucristojã ãbpaita wai nʉm; thumaam khʉʉnau agdaujo ãba maach peerdʉajem iekpaita thãraucha ʉkhawi ãbam thʉ̃r gaaipai por choowi nʉm.

⁶ Ẽwandaman ãbpai ichta thumaam khʉʉn Aaikha sim, ichta thumaam khʉʉn khãaijã ʉ̃rpai sĩerrʉm; iin maach thum chi ʉkha nʉm khʉʉn gaaimuata nem waunaa ichpaita maach thumaam khʉʉn thãar ee sĩejem.

⁷ Mag maach thum õor ãbamjo naab mamʉ, Cristoou ich garmuata ʉu maachig ich jua theeg ichdeu deem aig maachpierr deematarr maadeu wai nʉnʉidʉm, ichdeu deemarrpierr, agua dich khapeen dʉijã ichdeu khõsimjo aag.

⁸ Mag maachpierr Cristoou ich juapá deemaju igwiata David khararrau ichdeu Ẽwandam iek phã pʉarr gaai jaauwai, “Ich iiu phiidʉbarmua mepeer podpʉiwi, i jua ee narr khʉʉnjã obeer auwia, ʉ̃gthar sĩeimaju” ajim; “mammuata mʉig eegar ich õorkha nʉm khʉʉnag ich jua theeg amachpierr jigmaju” a phãjim. (Sal. 68:18)

⁹ ¿Pari jãgwi mag í ʉ̃gthar maju ajĩma? Magtarran warrjã ʉ̃gtharmuata beewi maach mʉig eegarm khʉʉn khãaijã aphʉʉcha meewi deeu ʉ̃gthar ich sĩerr aar maju arr aawai ajim.

¹⁰ Mag ichta ʉ̃gtharmuacha beewi jẽb eegarcha udthurwi deeu ich sĩerr aar matarran, mam sĩeb mamʉ, mʉig eegar durrpierr simta maach wenʉrrʉmpierr maach dʉijã sim. Magua ãbmuajã pod i jamta sĩ aju khaba sim.

¹¹ Mag ich Cristoouta ich jua theeg chi ʉkha nʉm khʉʉnag jigmaju atarr aawai chadcha ichdeuta ãaur khʉʉn ich iek durrpierr aaidʉ jaaujem khʉʉn khapijim, apostolnaan; ãaur khʉʉn sĩi ichdeu iek jaaumamta jũrr warm khʉʉnag chi jaaujem khʉʉn khapijim, profetanaan; ãaur khʉʉn sĩi maach peerdʉajem iek jaaumamua iita õrag amach thãar ee aupi jaaujem khʉʉn khapijim, evangelistanaan; maagwai ãaur khʉʉn ya ich iek ʉkha durrum khʉʉn pekau ee burrm ugua am thʉajem khʉʉn pastornaan khapinaa, ich iek jaau khaug amkhĩir maestronaan khapijim.

¹² Magta ya ich õorkha thʉnʉm khʉʉnag mag amau nem waujujã ich Cristoouta nem khaauga apijim, mag dichdeu khaphʉgpierr dich khapeen dʉi nem wau nʉmua chi ʉkha durrum khʉʉn thum agdaujo i iek gaaita warag thierrpagkhamamkhĩir.

¹³ Mag ya maach i denkha naawai iruan maachigjã ich khĩirjugta paarpapim khõsi sim, ich athee nem waauwaijã ichdeu khõsi simjota waau khaphʉ amkhĩir. Pari mag i khĩirjug paarpaagan, ichiita maach thumaam khʉʉnta agdaujo o ãba maachdeu ʉkha nʉm gaaita wajapcha ubʉnaa ich Ẽwandam Iewaa Cristota maach khapeerkha auju aai nʉm. Magbaawain chadau chadcha maach i dʉi ubʉ nʉm aju aai nʉm.

¹⁴ Mag khai magan ya tag chaain amachig sĩi bʉ̃ʉr mag abaawai parhoobam khʉʉn iek ʉkhakharrso amach khũgurpiejem khʉʉnjo khaba, chikham khũgur aum khõchgau khĩirjug khaug sĩerrjeem khʉʉn beewi Ẽwandam iek chaar khabam maachig jaauchewiajã ʉdʉʉr maadeu dich khũgurpibaju.

¹⁵ Mag ʉdʉraa parhoobam khʉʉnag dich khũgurpiju khãai, warag Cristo iek chaar maachdeu khaugtarr gaaita ubʉ naaju aai nʉm. Pari magaag atheyan dich khapeen kha khõsinaa am dʉi chadam iekpaita ig wenʉrrʉm dʉi Cristota maach Por aawai i khĩirjugta aumamua warag dau thethe paaukhamaju aai nʉm.

¹⁶ Mag Cristota maach Por aawai jũrr maach i iek ʉkha nʉm khʉʉnta i mor eegamjo nʉm. Pãrau khaphʉ nʉm, maach mor gaai nem khĩir ãbpai khaba thʉnʉm. Ich agjota naabahab ĩchab maach chi ʉkha nʉm khʉʉn eejã. Maach thum ãba khaba thʉnaabahab Cristo athee nem wawaag. Mamʉ mag thʉnʉmua maach thumaam khʉʉnta i morkha naawai jũrr iwiir ãbmua nem waauwaijã agdaujo khõsi juag oo nʉmjo aajem. Mag Cristoouta maach thum ich morkha wai sĩewai ichdeuta maach khĩirjugjã bãaupimaajem; mag nʉm dʉi ĩchab thum agdaujo dich khapeen kha khõsinaa thierrpagkhamaajem.

Ideu Ẽwandamagta pãach khĩirjug ajaug paapibat

¹⁷ Magau keena, maach thum ãba maach Por Cristo iekta ʉkha naawai, mua pãrag jaaum ig chirʉmʉn mʉgau: Ya oob tag sĩi Ẽwandam khaugbam khʉʉnjo amiet. Pãrau khaphʉ nʉm jãgʉm khʉʉn khĩirjug chan sĩi maadeujã nem igba,

¹⁸ sĩi warag pod ajapham nem khĩirjubam gaaimua khĩirjugpata jõpa sĩsidʉmjo sĩsidʉm. Amach thãar theeg sĩsidʉm gaaimua Ẽwandam warp naawai amau bʉ̃ʉrjã khaugba nʉm, jãga Ẽwandamau maach onee ich denkha wai sĩejẽ.

¹⁹ Mag Ẽwandam iek ʉkhaag amach thãar theeg nʉm gaaimuata warag nem khaigbam amachdeu waau khaug thʉnʉm gaaipaita thʉnʉisiphʉm. Mag amau nem wau nʉm oowain thum maach inaamjo sĩsidʉmta wauba pʉakhimjã aba, warag magʉmta wauju khĩirju nʉm dʉi ãba khapes ajuuta khĩirju sĩsidʉm.

²⁰ Mamʉ warr pãrau Cristo khaaugwaijã magʉm nemta khaugaag khaba arr aawai pãar chan amjo magta wenʉrraju khaba nʉm.

²¹ I iek jaau nʉm ũurwaijã i igwia chadcharam nem jaau nʉmta khaugtarr aawai,

²² jãg warrgar pãach nem parhoob wau wenʉrraajerr khĩirjug warre isegbapʉit. Jãgʉm khĩirjugan nem khaigbam wau nʉm gaaimua sĩi khajũa memerkhomjota sim; mag sĩewai sĩi ãba nem khaigbam waum khõchgauta dikha thʉnaabahab.

²³ Pãach khĩirjug ideu Ẽwandamagta ajaug paapibat, nem ajaphamta waum khõsi aag.

²⁴ Magnaa mag nem ajapha wauju khĩirjugta chihoojo ogdʉba abat. Magʉm khĩirjugta Ẽwandamau aupi sim, ich denjo khĩirjumkhĩir. Magua mag khĩirjugta aunaa ich Ẽwandamau khõsimjo i atheepai wenʉrrʉmuata pãach ʉuu oopibat, chadcha chadam iekta ʉkha nʉm khʉʉnjo.

²⁵ Mag naawai oob tag dich khapeenag seukhamiet; seukhaju khãai iekhaawaijã chadchata dich khapeenag nem jaaujeet. Maachin mʉg nʉm aiguin thum agdaujo Cristo morkha thʉnaawai maachin thum khod ãbam khʉʉnkha thʉnʉm.

²⁶ Mag naawai khĩir machgau oob pekau waumiet, mag meeukhaawaijã oob khĩir thũa chʉuu amiet,

²⁷ eeu magʉm gaaimua dosãtta warag pãach dʉi ʉ̃rpadukham.

²⁸ Warr nem jĩgkhaajerr khai, ich mag nʉrraju khãai, pʉch juadamaucha phidkhabá; maagwai pʉchdeujã pʉch nemdam ig sim paraanaa agjo ig durrumta pari chukhum khʉʉnagjã deeju ayaa aju.

²⁹ Oob bʉ̃ʉrjã iparii wa ihachkha khãijã iekhamiet; magju khãai iek ajaphampaita iekhabat. Õrau pãach iyʉʉ nʉm ũurwai amach jʉ̃gaagaa aawai warag amachdeu ʉkha nʉm iek gaaita ubʉnaa onee apiju ayaam iekta iekhabat.

³⁰ Nem khaigba wau nʉm gaaimua chan oob Ẽwandam Akhaar okhĩirjuu apimiet. Ich jãg Akhaarta Ẽwandamau pãrag deebajieb, ich iek ʉkhaawai chadcha ich denkha nʉm a khap amkhĩir. Mag i Akhaar wai naawaita mʉg atag mʉig eegar wenʉrrawi ich aarcha phe atham edjã chadcha ich denkham iek ich denkha wai sĩsiju.

³¹ Keena, warre pãach gaaimua barbapʉit jãg pãach khapeenau pãach dʉi bʉ̃ʉr abarm gaaimuajã khĩir okhoo chʉuu aadep aajem khĩirjug, pãach khĩir machag, pãach khõrg, iek khẽgkha iekha nʉm, chikham khĩir iekha nʉm maimua mag tag nem khaigbam nem thumaa pãach gaai thʉnʉm warre isegbapʉit.

³² O ajaphata aajeethʉ̃ pãach khapeen dʉi, agdaujo chikham dau aug khaug paraa. Iwiir ãbam garmua khãijã khaigba aawai, magʉm iekjã tag igba, sĩi khĩir okhoopʉpʉi abat, ich jãg Ẽwandamaujã Cristo gaaimua maach khaibag chugpaapʉiwia ich mag khĩir okhoopʉitarrjo.