Efesios 3 - Wounaan Meu

Judionaan khabam khʉʉnagta Ẽwandamau ich iek jaaupitarr

¹ Keena, mag pãar judionaan khabam khʉʉnpa Ẽwandam chaain khaju aai nʉm a jaau chitʉm gaaimuata mʉʉn mʉg preso chirʉm. Pari mua khaphʉ chirʉm, mʉg mʉ preso chirʉm gaaimua Cristoou jũrr pãar dʉita ajapha aju.

² Ya pãrau khaphʉ aju aai nʉm, Ẽwandam õor dʉi ajaug khitʉm gaaimua pãarjã dau aug khaugwi mʉrʉgta pãar ee ich iek jaaupitarr aawai chadcha ag gaaita chitʉm.

³ Ar warr mʉg ẽsap phãbaadewe pãrag mʉchdeu bʉchkhun jaau chirarrjo, ich Ẽwandamau ich thãar eepai khaphʉ sĩerrjã ichdeuchata mʉrʉg jaautarr aawai mua khaphʉ chirʉm, chadcha pãar judionaan khabam khʉʉnjã irua ich denkha auju aai sim.

⁴ Pãrau ag gaai thʉ̃rmamua khap aju, chadcha mʉrʉgjã mag ichdeupai nem khaphʉ sĩerr jaaujim, jãga mag judionaan khabam khʉʉn atheepa Cristo pʉijĩ.

⁵ Warrgar chan mʉg iek chan ĩsimjo dawaa jaauba aajeejim; maagjerr ĩs ewag pawiata Ẽwandamau Cristo i jaaumkhĩir ichdeucha maar chi apostolnaan jʉr autarr khʉʉnag ich Akharag jaaupibaawai chadcha jaauwiata ʉu khaphʉ nʉm.

⁶ Mag ich iek khaugpimaphamjo wai sĩerr iekhan mʉg ajim: Maach meeun khabam khʉʉnjã mʉg maach peerdʉajem iek ʉkha nʉm gaaimuata maach judionaan dʉi ãba Ẽwandamau peerdʉ auwi, ich Jesucristoou jaautarrjo ʉ̃gtharjã oberpiju. Mag ãbam iek ʉkha nʉm gaaimua maach thumaam khʉʉnauta Cristo kõit ichdeu khõsimjo wau naawai i gaaimua Ẽwandamau nem ajapha aju a simjã chadcha ich magta aju pãar dʉijã.

⁷ Chadcha mʉch khĩraupai chan mʉg Cristoou maach peerdʉ aaujem jaau nʉm phidag auju khaba chirajim. Mag chirarrta Ẽwandam nem thumaam athee ichta ʉ̃rpai sĩerrʉmuata mʉrʉg ich iek jaaupibaawai ʉu ag gaai chitʉm.

⁸ Ajapcharan mʉʉn thum mʉg Ẽwandam iek ʉkha nʉm gaaimua i denkha thʉnʉm eejã mʉchta serbiibacha chirʉm. Mag chirab mamʉ ich Ẽwandamauta pãar maar meeun khabam khʉʉn eejã mʉg maach peerdʉajem iek jaaupitarr aawai mag Cristo gaaimua maach dʉi nem ajapha aajem pooma maadeu chi jaaujujã khaugba aajemjã ʉu jaau chitʉm.

⁹ Ich Jooyau warrgarwe nem thum ompaabarwe nem wauju ichdeu khaphʉ sĩerrjã mʉrʉgta jaaujim, jũrr thumaam khʉʉnag jaaumkhĩir.

¹⁰ Pari mag mʉrʉg jaautarran, mag maach thumaam khʉʉnta Cristo denkha nʉm gaaimua chi jua thierrnaan thum edjã eem khʉʉnau ʉ̃gtharm magwe mag Ẽwandam khĩirjug khaug sim khakhapdo amkhĩir ajim. Chadcha ichdeu nem wau nʉmpierr nem waau khaauga sĩerrʉm.

¹¹ Pari mag maach thum judionaan khabam khʉʉnpa ich denkha phe auju khĩirju wai sĩerr chan nem ĩsim khaba, ni õor khĩirjugjojã khaba, ich Ẽwandamau warrgurwe mag khĩirju wai sĩerr aawaita chadcha mag maach Por Jesucristo pʉibarm gaaimua maach thum ãba ich denkha wai sim.

¹² Maguata ya ĩsin mag Cristo iek ʉkha naawai, i gaaimuata chadcha Ẽwandam bʉ ignaa ich jãg chaain amach dennaan dʉi aajemjo irig jeeuwimʉ jeeujem, mag jeeubaawai maach iek ũrju khaphʉ naawai.

¹³ Maguata muan pãragan mag chirʉm keena: Ich Cristoou pãar judionaan khabam khʉʉnag ich iek jaaumkhĩirta mʉ jʉr autarr aawai ag iek gaaimua mʉg mʉ dau aphʉʉ cárcel deg chirʉm anʉm ũurwaijã oob okhĩirjuu amiet. Magju khãai pãach gaaimua mʉg mʉ dau aug wau chirʉmʉn mʉchdeu pãar khõsinaa Ẽwandamaujã pãar khõsi aawaita mʉg chirʉm a khĩirjunaa warag oneeta abat.

Chi ʉkha nʉm khʉʉn kõit Pabloou jeeutarr

¹⁴ Mag pãar maar meeun khabam khʉʉnpa thumaa maach Aai Ẽwandamau ich chaainkha wai sĩewaita muan phõbkhanaa irigta ʉu ajim aajem,

¹⁵ ajapcharan ar ichdeuta thumaam khʉʉn ʉ̃gthar thʉnʉm magwe ompaatarr aawai irigta Aai icheju aai nʉmʉgma.

¹⁶ Mua pãar kõit irigta jeeu chiraajem, ichdeuta pãar dʉi ajapha aag ichdeu am aig aju aai sĩewai. Maguata muan irig ich Akhaar gaaimuata pãar akhaardamjã warag ich gaaita ubʉ apim khõsinaa,

¹⁷ pãachdeu ʉkha nʉm gaaimua Cristojã pãar thãar eeta sĩepim khõsi chiraajem; irigta pãar kõit jeeu chiraajem, mag Cristo gaaita ubʉ naawai agdaujo dich khapeen kha khõsi ajujã khaphʉnaa,

¹⁸ tagam khʉʉn agjo ʉkha durrum khʉʉn denjo jãga ich Cristoou khũchpaim athee khaba ich mag daupii wai nʉrraagta thumaam khʉʉn khõchkhaajẽ a khap amkhĩir; maimua jãga õor dau aphʉʉ maadeu nem igba khitawiajã thethem khʉʉnjo khõsi aajẽ a khap amkhĩir.

¹⁹ Mua khaphʉ chirʉm, chadcha mag irua maach khõsi sim chan pod maadeu thumaa khaugbam. Pari ichiita pãar kõit jeeu chirʉm, Cristoou maach thumaam khʉʉn khõsi aajem a khap amkhĩir, maagwai ĩchab Ẽwandamta pãach gaai phẽs wai naawai ichdeu pãach dʉi ajapha am ig simjo aju ayaa amkhĩir.

²⁰ Ẽwandam jua theeg sĩerraawai chadcha mag maach ee sim aiguin ich ag jua theegaupai dichdeu jeeu nʉm atcha wa dichdeu khĩirju nʉm atcha khãijã ajapha aajem maach dʉi.

²¹ Magua maach chi ʉkha nʉm khʉʉn thumaam khʉʉnau Jesucristo gaaimua ãba iita mʉg atag pawiajã ich mag tho iekha wenʉrraju aai nʉm.