Efesios 2 - Wounaan Meu

Ẽwandam õor dʉi ajaug khitaawaita maachin ʉu peerdʉajem

¹ Warran pãran pãachdeu nem khaigba waaujerr gaaimua pod Ẽwandam aar oberju khaba naajim, sĩi pãach pekau eepaita narr aawai.

² Pãraun sĩi Ẽwandam khaugbam khʉʉnau nem waaujemta waaujeejim, ar mʉig eegarpain ichta ʉ̃rpai sĩerrʉm khõchagpierr, ajapcharan dosãt ipierrma, ichdeuta õragjã warag Ẽwandamau nem khõchkhabamta waupim khõsi aajem ipierr.

³ Maarjã warran thum ich magta naajim, sĩi dichdeu nem waum khõchagpierr; nem magju abarmʉn parhoobam khĩirjug dich khĩirjug ee bee nʉmta agpierr waaujeejim, warr thaabaawaijã ich mag pekau eeta thaabatarr khʉʉn aawai. Chadcha maach mag wenʉrrarr gaaimua maran sĩi parhooba tagam khʉʉnjo Ẽwandam jua machag ãwatju aai naajim.

⁴ Mamʉ ʉu Ẽwandamau õor thumaam khʉʉn dau aug khaug paraanaa ich garmua õor khõsi khitaawai,

⁵ mag maach khaibag gaaimua aubaju ayaa narrta ich jãg ichdeu deeu Cristo phiriu autarrjo maachjã ich aar auwi ich mag Cristo dʉi ãba wenʉrraju khʉʉn khapijim. Mag Ẽwandam õor dʉi ajaug khitʉm gaaimuata maachin ʉu peerdʉwi nʉm.

⁶ Ya mag Cristo dʉi ãba ich mag wenʉrraju khʉʉnkha naawai chadcha meewi narrta deeu phiriu autarrjo nʉm dʉi ya ʉ̃gthar ich dʉicha ohoodo nʉmjota nʉm.

⁷ Mag Ẽwandamau maachigta nacha Cristo iek ʉkhapiwi ich denkha autarran, ĩs ewag pawiajã jãga chadcha ichdeu maach khõsi sĩ a khap apinaa, mag Cristo denkha nʉm gaaimuata chadcha ichjã maach dʉi ajaug khitʉm khap apieg ajim.

⁸ Pãran mag Ẽwandam ajaug khitʉm gaaimuata ʉu Cristo iek ʉkhawi peerdʉwi nʉm; pari mag nʉm chan sĩi pãach khĩrauta peerdʉju ẽkhatarr gaaimua khaba, ich Ẽwandamau ich garmuata pãar peerdʉ aum khõsi arr aawaita ʉu pãar peerdʉ aujim.

⁹ Ẽwandamau maach peerdʉ au nʉm chan dichdeu nem wau nʉm gaaimua khabam, magba akhiin magʉm gaaimuata peerdʉjim a iekhaju.

¹⁰ Mamʉ warrgarwe Ẽwandamau khĩirju wai sĩerrjo ich athee mag nem ajapha wau wenʉrramkhĩirta Cristo gaaimua maach peerdʉ autarr aawai, maadeun chadcha nem ajaphamta wauju aai nʉm; pari majã dich peerdʉ aumkhĩir khaba, sĩi Ẽwandamau mag khõsi sĩewaita mag wauju aai nʉm.

Cristo gaaimuata maachin ʉu Ẽwandam dʉi dau parii wenʉrrʉm

¹¹ Keena, judionaan khabam khʉʉn, khĩir eyaa abat. Warr pãrau Cristo khaugju naweran, maar meeunau maachta meheu thʉʉ nʉm awi pãar judionaan khabam khʉʉnan sĩi saak oomjota aajeejim, maachjo mag dauchach chukhu nʉm awi. Pari mag nʉmʉn maachjã Ẽwandam dakhĩir pãarjo thãar ãkhãrag sĩi maach inaamjo nʉmta maagjeejim. Mamʉ ĩsin, magʉm gaaimuapai Ẽwandamau maach auba aajem khaphʉ naawai, jãg sĩi Ẽwandam dʉi ajapha aag awi jãg maach mor dauchach nʉm chan bʉ̃ʉrjã maadeu igbata sim.

¹² Chadcha warr chan pãrau Cristo khaugba naajim. Maar judionaan eeta Ẽwandamau mag maach peerdʉajem pʉiju jaautarr aawai mag Cristo gaaimuata ich aar maach auju ayaa nʉmjã maraun khaphʉ naajim. Pari mag nʉm ee pãrau chan bʉ̃ʉrjã magʉm khaugba, ni maar jooin dʉi Ẽwandamau iek deetarrjã khaugba, pãran sĩi deeum meu aawai mag Ẽwandamjã khaugba, ni ichdeu pãach peerdʉ aujujã khaugba sĩi okhoota wenʉrrajim.

¹³ Pari ya ĩs chan magba Cristoou maach thumaam khʉʉn kõit ich bag ãrpitarr gaaimua pãarjã ich denkha wai sĩewai mag pãar okhoo narrta ya ĩsin chad maach thum ãbata Ẽwandamau ich denkha wai sĩejem.

¹⁴ Maguata ĩsin Cristoouta maach khõinaa phe wai sĩejem, chadcha maar meeun pãar meeun dʉi khĩet nʉmta ĩsin ichdeuta maach thum khod ãbamjo abapʉim, sĩi maach jãrr serrkau thuur simjo sĩerrta khʉt sĩewerppʉimjo abaawai.

¹⁵ Mag Cristoou ʉdʉraa ich thõopibarmuata mag Moiseeu ley pʉatarr gaai nem khĩir pogkhe ʉʉrkhapi simjã warre serbiiba apʉijim. Magta warr chan mag chikhamnagjã ooba agdaujo dich cuenta nʉrrjee arrta, õor ãbpaimʉg paapʉiwi warre chi iiunkhapʉijim. Magbarm aig ĩchab ya tag warramjo khaba, maach eepaijã khõinaa nʉisijim.

¹⁶ Mag pakuls gaai ich thõopibarmuata ĩchab mag maach khĩir au wenʉrrʉmjo narrjã Cristoou warre ajaug paapʉiwi Ẽwandam dʉijã khõinaa apinaa õor ãbpaimjo apijim.

¹⁷ Mag Cristo beetarran mag maach khõinaa wenʉrraju thumaam khʉʉnag jawaanta beejim: Ar pãar Ẽwandam khaugbagau i warp narr khʉʉnag jawaan, maimua maar meeun pãar khãai bʉ̃ʉr i khaphʉpai narr khʉʉnagpa jawaanta beejim.

¹⁸ Mag maach thum i iek ʉkha nʉm khʉʉnaun, ich ãbam Ẽwandam Akhaarpaita wai naawai, Cristo gaaimuata ʉu ĩsin judionaan wa judionaan khaba awiajã Ẽwandam chi Aai dʉi khapeerkha wenʉrrʉm.

¹⁹ Mag i dʉi khapeerkha naawai pãar chan ya sĩi chikham durr gaai jooba nʉmjo khaba, ĩsin ya sĩi dich meeun apha ãbam do ee jooba nʉmjota nʉm. Maguata mʉg maach Ẽwandam õorkha thʉnʉm khʉʉnan thum agdaujopai nʉm nem thumaam athee, ya i chaainkha nʉm gaaimua ãba khodkha thʉnaawai.

²⁰ Pãran ĩchab sĩi Ẽwandamau ich athee di ewaag dipá jʉr wai simjota nʉm. Ich Jesuucha ich i jaaumkhĩir jʉr autarr khʉʉn warrgar ĩchab Ẽwandam i jaaujerr khʉʉn dʉi chi dipákha nʉm. Maagwai pãar jũrr chi dipá daígkha naawai makhʉʉn ʉ̃rta chi eu simua bʉrkha arrum. Maagwai ag eegar chi big pomaam chi dihãdkha sim ich Jesucristoou.

²¹ Ajapcharan jãg di eu nʉm aig pa jʉ̃khapʉpʉigmampierr warag ʉ̃gthaag bãau ahaug maajemjota nʉm maachjã. Õrau warag Cristo iek ʉkhamampierr ichdeuta ichdeu khap maach gaaimua mag di eu arrumjo simjã warag nem pom bãau arrum, ich sĩejem dikha awaag.

²² Mag pãar judionaan khabam khʉʉnjã Cristo denkha naawai maach thumaam khʉʉnta ãba Ẽwandam Akhaar sĩejem dikha nʉm.