Efesios 1 - Wounaan Meu

Salud

¹ Mʉʉn Pabloou, Ẽwandamau khõsi sĩerrjo Jesucristooucha ich i jaaumkhĩir jʉr autarr. Muata pãrag mʉg ẽsap phã deepʉi chirʉm, Efeso phobor ee Ẽwandam denkhanaa Jesucristo iek ʉkha nʉm khʉʉnag.

² Pãar kõit maach Aai Ẽwandamag jeeu chiraajem ichdeuta maach Por Jesucristo dʉimua ʉu dʉrrcha pãar eeg oowi pãar khõinaa phe wai naamkhĩir.

Cristo denkha nʉm khʉʉn dʉi Ẽwandamau ajapha aajem

³ Muan maach Por Jesucristo Aaita tho iekhaajem; ajapcharan Ẽwandamma; irigpaita ʉu ajim a chiraajem, chadcha maach dʉi ajapha amkhĩir Cristo pʉitarr paar. Mag maach Cristo denkha naawaita Ẽwandamau ʉ̃gtharmpeen dʉi aajemjo maach dʉi mʉig eegarwejã ich Akhaar gaaimua ajaphata aajem.

⁴ Pari mag maach dʉi ajapha sim chan sĩi eeupemjo khĩirju auwi khaba, warr mʉg jẽb ompaaju nawe Jesucristo gaaimua ich Ẽwandamau ya maach ich denkha auju khĩirju wai sĩerr aawaita maagjem, ich dau na tag kulpjã chukhu sĩi ich atheepaita ichdeu khõsimjo wenʉrramkhĩir. Mag warrgarwe ich garmua maach khõsi arr aawaita

⁵ Jesucristo gaaimua ya maach ich chaainkha aujujã khaphʉ sĩejim, ichdeu maach dʉi am khõsi khĩirju wai sĩerrjo.

⁶ Mag gaaimuata chadcha ich mag Ẽwandam ajaug phenaa i tho iekhaajem, mag ich ajaug sĩerrʉm gaaimua ichdeu ich Iewaa daupii aajemta ʉu maach athee pʉitarr aawai.

⁷ Maach pekau gaaimua Ẽwandam dʉi iekkhõr pom narrta, sĩi khajapham debpaar phag nʉmjo Jesucristoouta maach daupigau ich bagau maach phag athaawai, ʉu Ẽwandamau maach khaibagjã chugpaawi warre magʉm khĩir okhoopʉijim.

⁸ Pari magpaijã khaba, chadcha ichdeu maach khõsi chirʉm khap amkhĩir, maachig ich khĩirjugjã deewi ʉu magʉmjã khaphʉ wenʉrrʉm.

⁹ Ajapcharan ĩchab warr ichdeupai ich thãar ee nem waumaju khaphʉ aajerrta maachig khaphʉ apijim.

¹⁰ Mag ich thãar eepai nem wauju khĩirju wai sĩerran, mʉg atag chadcha ichdeu magju ed paawaita ichdeu khĩirju simjoo aju. Mag edta ich Ẽwandamau õor thum edjã ee nem thʉnʉmpa Cristoog thʉsĩepʉiju, am dʉi jũrr ichdeuta khap amkhĩir.

¹¹ Magta agtha maach thaababa nʉwe Ẽwandamau ya maach ich denkha wai sĩejim, Cristo dʉi khapeerkha nʉisiewai mag nawe ichdeu deeju jaau sĩerrjã ichdeu mag khĩirju wai sĩerrjo chadcha jʉ̃amkhĩir; Ẽwandamaun chadcha ichdeu oowai ajapha aju ayaam nemta wau sĩerrʉm.

¹² Magta maach chi nacha Cristo iek ʉkhatarr khʉʉnjã ich denkha aujim, mag ichdeu maar ich denkha autarr gaaimua pãar maarjo i iek ʉkha nʉm khʉʉnaujã ich Ẽwandam ajaug khitʉmta tho iekhamkhĩir.

¹³ Maguata pãraujã ĩchab chadcha Ẽwandam iek chaar mʉg maach peerdʉajem iek jaau nʉm ũrwi ʉu Cristo iek ʉkhabaawai, Ẽwandamau ag nawe ichdeu deeju jaautarrjo pãragjã ĩchab ich Akhaar deejim. Mag ich Akhaar deetarran, pãarjã chadcha ich denkha wai sim khap amkhĩir ajim.

¹⁴ Mʉʉgwaiwejã ya Cristo gaaimua Ẽwandamau maach ich denkha wai sĩewai mʉg atag ya ichdeu maach auju ed paawaijã warre ich aarcha maach phe auwi ich dʉichata wai sĩsiju. Mag chadcha ichdeu maach ich aar phe auju khap amkhĩirta ich Akhaarjã mag maachig deejim. Mag ich garmua maach dʉi magju a simʉn mʉʉgwaiwe ich ajaug tho iekhamkhĩrau.

Chi ʉkha nʉm khʉʉn kõit Pabloou Ẽwandamag khĩirjug jeeujerr

¹⁵ Maguata, chadcha pãrau pãachdeu maach Por Jesús iek ʉkhatarrta agtha ogdʉba thãraucha ʉkhanaa thum Ẽwandam õorkha thʉnʉm khʉʉnjã daupii aajem khaphʉ chiraawai,

¹⁶ Ẽwandamag jeeuwaijã pãar jãg nʉm paar irig ʉu ajim ab khaba ʉu ajim a chiraajem.

¹⁷ Ʉu pãrau bʉchkhun Ẽwandam khaphʉ naab mamʉ, warag ʉ̃rʉʉchata i khaphʉnaa jãgata Cristo gaaimua pãar athee nem ajapham pom waaujẽ a khap apim khõsi chirʉm. Maguata muan maach Por Jesucristo Ayagta jeeu chiraajem, ajapcharan ich Jooi ʉ̃gthar chiraajemʉgma, pãrag ich khĩirjug deebarmua magʉm khap amkhĩir.

¹⁸ Mua jeeujem ĩchab Ẽwandamag, ichdeuta warag pãar khĩirjug aarthʉgbapʉimjo amkhĩir; magbaawai mag ya ich aarcha phe athaawai ich dʉicha onee wenʉrraju jaau simjã ajapcha khaphʉnaa, mag ich õorkha thʉnʉm khʉʉnan chadcha peerdʉwi naawai mʉigwejã onee naaju aai nʉm a khaphʉ amkhĩir.

¹⁹ Mag nʉm dʉi ĩchab khap apim khõsi chirʉm, jãga mag Ẽwandam thumaam khʉʉn khãaijã ichta jua theeg sĩerrʉmta maach chi ʉkha nʉm khʉʉn dʉi sĩejẽ.

²⁰ Ich mag jua theegau khabajieb Ẽwandamau deeu Cristo phiriu auwi ʉ̃gthar ich juachaar garcha thumaam khʉʉn Porkhamkhĩir juppitarr.

²¹ Mag ich juachaar gar juppinaa ichjo jua theeg apibaawai, ichta reinaan thʉnʉm khãaijã ʉ̃rpainaa nem thumaa mʉg jẽb gaai wa edjã ee khãijã mepeenjom thʉnʉm khãaijã ichta ʉ̃rpai apijim, mʉg atag pawiajã ich mag sĩerramkhĩir.

²² Magta Ẽwandamau nem thʉnʉm thumaa sĩi ich Iewaa Cristoogta thʉsĩepʉijim. Magnaa ichta maach chi ʉkha nʉm khʉʉn Porkhapinaa

²³ maachigta ich Iewaa jũrr, mʉg jẽb gaai ichdeu khõsimjo nem wauju ayaa apijim. Cristoon ich appai simta durrpierr sĩerraawai ãbmuajã jamta i sĩejẽ aju khabam. Mag simta maach chi ʉkha nʉm khʉʉn dʉin ichta chi Porkha sim.