Colosenses 4 - Wounaan Meu

¹ Magua pãar ar chognaan wai nʉm khʉʉn, pãach chognaan dʉi agpierraa abat. Pãran chadcha am pornaanau, mamʉ khĩir eyaa abat: ĩchab ãb thumaam khʉʉn khãaijã ʉ̃rpai sĩerrʉmua pãarjã oo sim ʉ̃gtharmua; ma ĩchab pãar Porkha sim.

² Ẽwandamagta jeeu nʉʉ jeeu nʉʉ abat. Mag jeeu nʉmua ĩchab irig ʉu ajim abat.

³ Maar kõitjã maach Por Ẽwandamag jeeubat keena, warag ich iekta jaauju ayaacha apinaa jãga Cristoou õor peerdʉ aaujẽ a jawaag. Mag Cristoou õor peerdʉ aaujem iek õrau khaugba aajerr jaau chitʉm gaaimuata mʉg mʉ preso chirʉm.

⁴ Maimua sĩi mʉ kõitpaijã jeeubat keena, mua i iek jaauwai ajapha mʉchdeu jaauju aai chirʉmjo warre dawaacha jawaag.

⁵ Ar maach denjo Cristo iek ʉkhaba nʉm khʉʉn dʉi iyʉʉ aawai, wa nem waauwai khãijã, ajapha khĩirjunaata iekhabat. Maach peerdʉ autarr iek jaauju ayaampierr jũrr khaugbam khʉʉnag jaaubat.

⁶ Mag am dʉi iyʉʉ aawaijã am jʉ̃gaagaata iekhabat, warag amag ũrm khõsi ũrmkhĩir. Mamʉ ĩchab amachdeu khaugbam pãachig jeeuwaijã ʉkhaa khaphʉ aag mag pãachdeu jaau nʉmjã ajapha khaphʉ abat.

Ãbmiecharam salud

⁷ Cristo gaaimua maach khodam maachdeu i chig amapha aajemua pãrag jaauwimaju, mʉ mau jãga chirʉ́; ajapcharan Tiquicoouma. Ich mʉg hermanodaman ichig nem jaaubarmjã chadcha ich agpierr wai jẽedʉ khitaajem; magua ĩchab ʉu mʉ dʉi maach Por Cristo athee mʉig phidkha kheraajem.

⁸ Magua mua iita pʉi chirʉm, mʉig maach jãga naajẽ a jaaubaimaawai pãach khĩir onee amkhĩir.

⁹ I dʉi mam ĩchab Onésimo, pãach aram woun agjo maadeu jãsene aajem. Jãjã agjo ichig nem mag abarmʉn ag ipierr wai jẽedʉ khitaajem. Amach numiim khʉʉnau amau pãrag jaauwimaju, jãga durrú mau maach chi ʉkha nʉm khʉʉn.

¹⁰ Mʉ khapeer Aristarco mʉig mʉ dʉi cárcel deg kheraajemuajã pãrag salud aajem; Marcooujã agjo salud aajem, ajapcharan Bernabé i primoouma. Ya Marcos igwi mua pãachig jaaupʉitarr aawai ya pãrau khaphʉ nʉm, pãach aar baarwai ajapha i recibiibat.

¹¹ Maach khodam Jesús ibʉʉr wauwi Justo aajemuajã salud deepʉi sim. Mʉig judionaan chi ʉkha durrum khʉʉn ee mʉkhʉʉn thãrjuppaim khʉʉnauta ʉu mʉ ipierr jaau durrum, Cristota amach thãar ee auwi irigta ʉdʉraa amach Porkhapimkhĩir. Magua amauta ĩchab ʉu mʉ khĩirdam jãsenkha wai naajem.

¹² Mag tag ĩchab pãach aram woun Epafras Jesucristo chogkha phidkha khitʉmuajã pãrag salud deepʉi sim. Ich mag ichdeun pãar kõit Ẽwandamag jeeu khitaajem, pãachdeu ʉkhatarr iek gaai ubʉnaa thumaa ich Ẽwandamau khõsimjota waumkhĩir.

¹³ Mua mʉch daúacha mag pãar kõit jeeu sim oojeewai khaphʉ chirʉm, irua chadcha dʉrrcha pãar khĩirjuajem. Mamʉ ajapcharan pãar appai khaba, Laodicea ee chi ʉkha durrum khʉʉnjã khĩirjunaa ĩchab Ierápolipienjã ich agjo khĩirjuajem.

¹⁴ Mʉig doctor Lucas maadeu i chig apimapha aajemuajã pãrag salud deepʉi sim, maimua Demas anʉmuajã agjo.

¹⁵ Mag tag ĩchab tagam hermanonaan Laodicea nʉm khʉʉnagjã salud deebat. Hermana Ninfaagjã saludaanaa i di aig Ẽwandamag jewaag ãba biirdʉajem khʉʉnagjã salud deebat.

¹⁶ Mʉg ẽsap cha mua pãrag deepʉi chirʉm pãachdeu ya ajapha thʉ̃rbapäaiwai jũrr Laodicea phobor ee agjo ʉkha durrum khʉʉnag deebapʉit, amaujã amach aar ag gaai thʉ̃ramkhĩir. Maagwai am aar pʉitarr jũrr pãach aig deebaicheewai agjo ag gaai thʉ̃rbat.

¹⁷ Arquipoog mʉ imeerba muata irig “Maach Por Cristoou ichig phidag deetarr gaaita ich jãg ogdʉba phidkha chitá” a jaaupʉi chirʉm abat.

¹⁸ Mʉg ẽsap mʉchdeuta pãrag deepʉi chirʉm khap amkhĩir, mʉg ãbmiecharam saluddam mʉchdeuchata mʉch juadamaucha phã deepʉi chirʉm, ajapcharan mʉch jooi Pabloouma. Keena, mʉg mʉ preso chirʉm khĩir eyaanaa mʉ kõit jeeubat. Mʉch garmuajã pãar kõit jeeu chiraajem, Ẽwandamau ʉu pãar eeg oomkhĩir. Magdampai ajim mua pãrag jaaum ig chirarr. Ayoo keena, Pablo