Colosenses 3 - Wounaan Meu

^1-2 Ya pãar Cristo dʉi iiu phiidʉtkhawi nʉmjo naawai chadcha ʉ̃gthar Cristo Ẽwandam juachaar gar chi Porkha sim aar naaimaju khʉʉnjo wenʉrrajuuta ẽkhabat, mʉig eegarm nemta atcha khĩirjuba.

³ Pãran ya nem parhoobam wauju khĩirjug isegtarr khʉʉnau. Magtarr aawai pãran Ẽwandamau ich aar phe auwia Cristo dʉi ãba jooba wenʉrrapiju khʉʉnau.

⁴ Mag Cristo dʉi ãba jooba wenʉrraju khʉʉn aawai ich Cristo beewi ichdeu ich ajaug thumaam khʉʉnag oopibarm ed pãar ichdeu ajaug paa atham khʉʉnta ichdeu ich dʉi ich mag phe wai sĩsiju.

Warram khĩirjug isegpʉiwi khĩirjug iiurta au nʉm

⁵ Magua, nem khaigbam wauju khõchagjã warre pãach gaaimua khecheunaa barbapʉimjo abat. Ni ãbmuajã ich õor khabam dʉi khapes am, Ẽwandamau oowai maach inaam nemjã tag waum, warr ich khõchag aig nem waunaa warag bigaaum khʉʉnta chigaa apiejerrjã oob tag agjo am, ni oob phatkhonagjã wʉrpa am; phatkhon khĩragta wʉrpa nʉmʉn nem parhoobamta ẽwandamkha waunaa agʉg jeeu nʉm dʉi ãba sim.

⁶ Magʉm nem parhooba wau nʉm khʉʉn gaaita Ẽwandamau jua khʉaba deeb khaba deeju, ich ipierraa khaba aawai.

⁷ Warran chadcha pãrau magʉmta waaujeejim;

⁸ mamʉ ĩs ya pãar magʉm athee khaba nʉm. Magua muan pãragan mag chirʉm: pãach khõrg pʉabat; khĩir machagjã isegbapʉit. Chikham khaibag wauju, chikham khĩir khĩir mor chigpai iekha nʉm, iparii iekha nʉm, jãgʉm thum warre isegbapʉit a chirʉm.

^9-10 Warr pãachdeu parhoob nem waaujerrjã ya khajũa sorjo isegpʉiwi jũrr khĩirjug iiurta wai naawai oob chikhamnag seukhamiet. Mag khĩirjug iiur ich Ẽwandamauta deetarr aawai, maach mag khĩirjunaa irua khõsimjo wau nʉm khʉʉnan i khĩir thegmamua warag ajaug pamam dʉi ajapchata i khaphʉ paaukhamam.

¹¹ Pãar mag naawai ni ãbmuajã ich ajaug thoju khaba sim: judioou wa judío khabamua, meheu thʉʉ simua wa thʉʉba simua, chi durrkhʉʉu wa durr chaauramua, agtha chikham chogkha simua wa chikham chog khaba simua, chi khapcha simua wa khaugba simua, ni ãbmuajã maata iwiir ãb ʉ̃rpai sim aju khaba sim. Magʉmta khĩirjuju khãai dichdeu Cristo wai simta nem thum thʉnʉm khãaijã ʉ̃rpai sim khaphʉnaa ichpaita ĩchab thum ich iek ʉkha nʉm khʉʉn ee sĩejemjã khap aju aai nʉm.

¹² Ẽwandamau pãar khõsi sĩewai pãarjã ĩchab ich õor khamkhĩir ichdeuta pãar jʉr aujim. Magua, ich jãg ich garmua pãach jʉr autarrjo agdaujo chikham dau aug khaug paraa aajeethʉ̃, agdaujo o ajapha. Dichta chikham khãai ʉ̃rpai aju ẽkhaba dau maata abat, dich dʉi khaigba aawaijã magʉm igba sĩi warag khĩu jʉmpʉpʉi aa khaphʉ.

¹³ Mag agdaujo ãwaat khaphʉnaa iwiir ãb khãijã bibigag paraa sim khai, agdaujo perdonaawi magʉm iek tag igba warre khĩir okhoobapʉit. Ich jãg maach Por Cristooujã maach perdonaatarrjo, pãachdeujã agjo pãach khapeen perdonaabat.

¹⁴ Pari mag mua jaau chirʉmjo wenʉrraagan, pãach khapeen daupii aju khĩirjugta ʉdʉraa pãach gaai ʉ̃rpapibat. Magta amʉn, pãachjo dʉi ʉkha durrum khʉʉn thum Ẽwandamau oowaijã i dawagaa wenʉrraju, o ãba.

¹⁵ Ĩchab mag nʉm dʉi Cristoogta warag ʉdʉraa pãach khõinaa apibat, mag wenʉrrʉmua Cristo mor gaai õor ãbpaimjo khõinaa wenʉrramkhĩirta warrjã Ẽwandamau pãar ich denkha autarr aawai. Mag Ẽwandamau pãach ich denkha auwi pãach wir aigjã khõinaa api sim paar irig ʉu ajim abat.

¹⁶ Agjo ĩchab Cristoou maach peerdʉ aaujem iek pãachdeu khaugtarrta khĩir okhooba ich mag pãach thãar ee wai nʉisit. Mag iek warag khaugmaag, khĩirjug khaphʉta jũrr agdaujo pãach khapeenag jaaupetat. Mag nʉm dʉi ĩchab wawimamua jũrr agdaujo chikham khĩir onee apibat. Chadcha thãraucha Ẽwandamag ʉu ajim anaa irig meukharau Salmos aunaa deeum meukhaarjã i jʉ̃gaagaamta aubat.

¹⁷ Mamʉ magʉm nem thum pãachdeu jaauwai wa waauwai khãijã, chadcha maach Por Jesús denkha naawai, ichdeu waupim khõsimjo waum khõsita waubat. Magnaa ĩchab ich Jesús gaaimua ich Ẽwandam chi Ayagjã ʉu ajim abat.

Jãga Ẽwandamau khõsimjo aju aai nʉ dich khapeen dʉi

¹⁸ Ʉʉin jaainpan, pãach jaainau pãachig nem mag aawai oob pãachta am khãai ʉ̃rpai aju ẽkhamiet. Pãarjã maach Por Jesús iek ʉkha nʉm khʉʉn aawai pãach jaainagta ʉdʉraa pãach phẽethʉgpiju aai nʉm.

¹⁹ Mamʉ pãach chi jaainaujã mag pãachta am khãai ʉ̃rpai nʉm awi, oob am dʉi pãachdeu am aig amiet; magju khãai warag pãach ʉʉindam jãsehneta abat.

²⁰ Chaaina, pãraujã agjo, pãach dennaanau pãachig nem jaau nʉmpierr am ipierraa ajuuta ẽkhabat; maach Por ʉ̃gthar chirʉmuajã magta ʉuu oojem.

²¹ Mamʉ pãach chi dennaanaujã oob khĩir masi amag meeurrarrau amiet; magta amʉn, eeu warag meeukhawi amachig nem jaau nʉmjã ʉkhamapha adukham.

²² Ar mʉg jẽb gaai sĩi chikham chogkha nʉm khʉʉn, pãach patronnaanau pãachig nem jaau nʉmpierr am ipierraa abat. Mamʉ mag am ipierraa nʉm chan mag sĩi pãach dʉi aairaa amkhĩir pãach oo naawaipai khaba, am meer awiajã ichiita chadcha nem waum khõsi ich magta abat, maach Por Cristo dau na nem khaigba wauju okho.

²³ Mag nem waauwaijã sĩi õor atheepai wau nʉmjo khaba, ich maach Por Cristo atheechata wau nʉmjo pãachdeu nem wau nʉm thum waum khõsita waubat.

²⁴ Pãrau khaphʉ nʉm, pãachdeu magta nem wau nʉm jũrran maach Por Cristoou pãragjã ich dʉi ãba ich durr gayam nem jʉ̃apiju, mag pãach porkha nʉm khʉʉnau nem jaau nʉm waum khõsi wau nʉm aig maach Por chaar ich Cristo atheepata wau naawai.

²⁵ Mamʉ magba ar nem khaigbamta wau nʉm khʉʉnan mag amachdeu nem parhooba aajerr jũrr ich Ẽwandamauta agjo am dʉi ichdeu khap aju. Irig chan iwiir ãbjã warm khʉʉn khãai ajapcharam chukhum, nem khaibag wauba aag.