Colosenses 2 - Wounaan Meu

¹ Mʉch mag chirʉmuata pãrag khap apim khõsi chirʉm, chadcha dʉrrcha Ẽwandamag jeeu chiraajem pãar kõit, Laodicea iglesia eem khʉʉn kõit, maimua khĩircha mʉchdeu ooba aajem khʉʉn kõitpa jeeub khaba jeeu chiraajem.

² Mag Ẽwandamag jeeu nʉm gaaita ogdʉba chiraajemʉn, pãach thãar onee amkhĩrau, ich jãg agdaujo dich khapeen kha khõsi wenʉrrʉmua warag khĩirjug paarpamaawai Ẽwandamau ich appaimua khaphʉ sĩerrta pãachdeujã ajapcha khaugmamkhĩir; ajapcharan pãar maar meeun khabam khʉʉnagjã Cristota ajapcha khap amkhĩirma.

³ Ãba mag Cristo khaphʉ nʉm gaaimuata chadcha ichdeu nem waupim khõsimjã waau khaphʉ waaujem.

⁴ Mua mag chirʉmʉn, pãachig ãbmua khãijã i wajaug aadee iwiir ãbamʉgjã sĩi pãach khũgurpimaaugauta mag chirʉm.

⁵ Chadcha khĩircha chan pãar aar khaba chirab mamʉ, mʉ akharan pãar aar simjo sim. Magua ĩchab mʉ onee chirʉm, mag pãrau nem parhooba wauba sĩi pãachdeu Cristo iek ʉkha nʉm gaaita ubʉ nʉm a ũr chiraawai.

Cristo gaaimua Ẽwandamau iiupi auwi õor iiurkha nʉm

⁶ Magua muan pãragan, ich jãg warrjã maach Por Jesucristoog pãach peerdʉ aumkhĩir i igtarrjo warag i kha ogdʉbata nʉisit a chirʉm.

⁷ Mag i kha ogdʉba aagan, pa jẽb ee ajap khaarkhamaajemjota warag i gaai ubʉ ajuuta ẽkhanaa warrcha pãachig jaautarr iek ogdʉba ʉkha nʉmuata i gaai thierrkhabat. Mamʉ mag nʉmjã nem thumaam paar Ẽwandamagta ʉu ajim abat.

⁸ Khĩir khaphʉ abat keena: ar jãg sĩi mʉg jẽb gayam khĩirjugta chadam iek awi aata õrag jaau nʉrrjeem khʉʉnag oob ʉdʉʉr pãach khũgurpimiet. Jãkhʉʉn chan Cristo iekjã jaauba, sĩi maachjopaim khʉʉn khĩirjug dʉi ar meperau khõsimjo Cristo ichaaur aajem khĩirjugta jaau wenʉrrʉm.

⁹ Mamʉ Ẽwandam khaugaag chan pãrau magʉm khĩirjug igba nʉm, Cristo wounag pawi maach ee pʉitarr gaaimua Ẽwandamau warre ichchata khaphʉ apitarr aawai.

¹⁰ Mag Cristota amau jaau nʉm angelnaanjom wa mepeenjom jua theeg sĩsidʉm khãaijã ichta ʉ̃rpai sim dʉita pãar õor ãbamkha naawai, ich Ẽwandamchata ya pãach dʉi wai nʉm.

¹¹ Ich mag Cristo iekta pãrau ʉkhabaawai ichdeuta Ẽwandam athee pãrag nem waau khaugpijim. Mamʉ mag pãar i dau na ʉu nʉisim chan sĩi maar meeunjo dich khakhua gaai dauchach nʉmua khaba, pãar thãar ajaug paabapʉimuata magpijim, pãachdeu nem khaigbam waaujerrjã tag waupimapha abarmua. Mag Cristoog dich thãar ajaug paapi nʉmta irigan dauchach charau, chadcha Ẽwandam atheepai wenʉrraawai.

¹² Pãach por choopi nʉm ed pãar warre Cristo dʉicha ãbam jẽbdeg aukherbarmjo ajim, ajapcharan mag chi khechamjo nʉisiewai pãachdeu nem khaigbam waaujerr isegpʉiwia tag wauba aag. Magnaa ĩchab pãrau Ẽwandamau ich Cristo phiriu autarr jua theegjã ʉkha naawai warre ich Cristo dʉichata iiu phiidʉtkhabarmjo ajim, ich ag jua theegau ichdeu nem waupim khõsimpai wau wenʉrraag.

¹³ Warran sĩi pãachdeu nem khaigba wau narr gaaimua pãran chadcha sĩi okhoota naajim Ẽwandam na. Mag nʉm dʉi ĩchab ni judionaanau aajemjo pãach ajaug paaju awi pãach khakhua gaai dauchachjujã bʉ̃ʉrjã khĩirjuba aajeejim. Mamʉ mag okhoo narrta ĩs Cristo gaaimua Ẽwandamau pãar khaibag thumaa chugpaapʉiwi ich Cristojo ich mag iiu wenʉrrapiju aai apijim.

¹⁴ Mag pekau gaaimua i dʉi kulp pom narrta warre ichdeu chugpaapʉijim. Magbarm aigta mag Moiseeu phã pʉatarr leíu Ẽwandamag maach khaibag waupi jaau simjo sĩerrjã warre ichpata dʉi pakuls gaai meerpbapʉimjo abaawai warre maach chig aju khaba sĩsijim.

¹⁵ Meperau ich jua theegau õor thum ich athee phe wai sĩerrjã Cristo thumaam khʉʉn dakhĩir pakuls gaai jiir joisim thumaam khʉʉnag oopibarmua Ẽwandamau warre mag chi mepeer podpʉijim, i jua ee narr khʉʉnjã chadcha peerdʉju ayaa amkhĩir obeerkha athamua.

Ʉ̃gthar naaimaju khʉʉnjo wenʉrrajuuta ẽkhabat

¹⁶ Mag leíu maach kulp pom nʉm jaau sĩerr jua eemta ya Cristoou obeer autarr aawai, mag ley igwi ãbmuajã pãraujã maar judionaan denjo aju aai nʉm awi, nem inag khonaa dodojo do nʉm oowi, wa maarjo tagam nem phiesta ed, ed jop nʉm ed wa jua ʉ̃ʉijem ed khãijã ʉʉrkhaba nʉm oowi, jãga aju aai nʉ a jaauju khaba nʉm.

¹⁷ Warrgar Ẽwandamau maar judionaanag mag ʉʉrkhapiejerr chan ich mag kha wenʉrramkhĩir khaba, sĩi Cristo bee nʉm orapai ʉʉrkhamkhĩir ajim. Ajapcharan magʉm kha nʉmua jãga ichdeuta am peerdʉ auju a khap apieg ajim.

¹⁸ Ar jãg amachdeuta ajapcha ʉkha nʉm awi pãachig, “Maar denjo Ẽwandam chognaanagpa jeeuba naawai pãar chan agtha ajapcha khaba nʉm” a iekhaawai, oob am iek asekasmiet. Jãgʉm khʉʉnaun, Ẽwandamau amagta nem inagjã dau daau oopiejeewai amauta pãar khãaijã khapcha nʉm anaa, sĩi amachdeu nem khaphʉmta tho iyʉʉ sĩerrjeem.

¹⁹ Mamʉ mag nʉm chan Cristota chi ʉkha nʉm khʉʉn Porkha sim dʉi khaba nʉmta mag nʉm. Maachigan Cristoouta warag ich iek khaugpiejem, thachdam kho nʉmua chaain dʉrrpamaajemjo. Ich jãg maach padamjã ichdeuta thumaa sõpigkha wai sĩejemjo, maach ich iek ʉkha nʉm khʉʉnjã ichdeuta õor ãbpaimkha wenʉrrapiejem, warrgarwe ichdeu magpiju atarrjo, iwiir ãbmuajã chikham igbam aba.

²⁰ Ya pãrau tag parhoobam khĩirjug õrau jaau nʉm ʉʉrkhaba aag chadcha Cristo dʉi meewi nʉmjo naawai, meperau maach khũguraag ẽkhaajemjo amau maach peerdʉju awi nem waupi jaau nʉmjã ipierraa aag khaba nʉm. Mag nʉmta, ¿khan jãgwi agtha Cristo khaugba wenʉrrʉm khʉʉnjo

²¹ nem parhoobam gaaijã pʉrju khaba, nem parhoobamjã khoju khaba, ni sĩi amau jaaujemjo nem inagjã parhooba dich jua ee pod pʉrju khabamta agtha ʉʉrkha wenʉrraajẽ?

²² Jãgʉm nem sĩi mʉig eegar õor maachjopai thʉnʉm khʉʉnau amach iiupai jaau nʉm khabahab. Magʉm nem sĩi bʉ̃ʉr abarmua chukhu aadeejeewai sĩi magʉm khoojerr gaaimua wa magʉm ʉʉrkhaajerr gaaimuapai chan Ẽwandamau maach aubaju.

²³ Par daúapai oowain, chadcha amau jaau nʉm ʉuumjo sĩsidʉm, Ẽwandam dawagaa amkhĩir nem wau nʉm dʉi dichta thumaam khʉʉn khãaijã serbiibanaa dichdeupaijã dich dau aug khaugpiba jaau naawai. Pari mag nʉm chan pod bʉ̃ʉrjã nem khaigbam wauju khõchag chugpaa aubajuuta mag jaau nʉm.