Colosenses 1 - Wounaan Meu

Salud

^1-2 Mʉʉn Pabloou, ich Ẽwandamau khõsi sĩerrjo ich Jesucristooucha ich i jaaumkhĩir jʉr autarr. Muata mʉg ẽsap phã deepʉi chirʉm, Colosas phobor ee Cristo iekta ogdʉba ʉkha durrum gaaimua Ẽwandam õorkha nʉm khʉʉnag. Mua pãar kõit maach Aai Ẽwandamag jeeu chiraajem, ʉu dʉrrcha pãar eeg oonaa pãar khõinaa phe wai sĩemkhĩir. Maach hermano Timoteo mʉig mʉ dʉi sim; i iek iruajã pãrag salud aajem.

Pabloou chi ʉkha durrum khʉʉn kõit Ẽwandamag jeeujerr

^3-4 Mau marag jaaucheewai mag pãrau Jesucristo iek pãachdeu thãraucha ʉkhatarrta ogdʉba ʉkha nʉm dʉi ĩchab thum Ẽwandam õorkha thʉnʉm khʉʉn dʉijã agdaujo kha khõsi nʉm a ũr naawai, pãar kõit maach oraa nʉmpierr Ẽwandamagta ʉu ajim a durraajem, ajapcharan maach Por Jesucristo Ayagma.

⁵ Marau khaphʉ nʉm, mag chadcha thum agdaujo wir aigjã pãach khapeen daupii nʉmʉn, pãachjã thum Ẽwandamau ich aar auwi ich mag i dʉi nʉisiju khaphʉ nʉm gaaimuata mag nʉm. Warrcha chadcharam iek pãachdeu ũrwi ʉu peerdʉ nʉisierr edwe Ẽwandamau pãach ich dʉi mag phe aujujã khaphʉ ajierram.

⁶ Ich jãg pãachig jaaubaawai pãrau ʉkhatarr iekpaita ĩchab deeum khʉʉn eejã durrpierr aaidʉmam. Mag jaau nʉm ũrwi ʉkhamam khʉʉnjã khapaana paaukhamam dʉi ĩchab õor pooma warr amach khaigba wenʉrraajerr khĩirjug isegwi õor wäjäaunag paaukha thʉnʉm, ich jãg ʉu Ẽwandamau chadcha ich garmua maach khõsi aajem iek jaau nʉm ũrwi pãachdeu ʉkhatarrjo. Pãrau khaphʉ nʉm, mag Ẽwandamau ich garmua maach khõsi aajemʉn chadcharau.

⁷ Ich magta maach khodam Epafras maadeu i iigjemua pãrag jaaujim, pãrag ich mag iek jaau sĩethuurwai. Pãrau khaphʉ nʉm, iruajã ĩchab pãachig Cristo iek jaau nʉm gaaita ogdʉba ich jãg jẽedʉ khitaajem.

⁸ Ich Epafraauta mag Ẽwandam Akharau pãrag pãach ee agdaujo pãach khapeen daupii api simjã mau maar aar jaauchejim.

⁹ Maguata maachdeu mag ũr autarr aigmua warag pʉaba Ẽwandamagta jeeu naajem pãar kõit, ich khĩirjugta pãrag deemkhĩir; maagwai ichdeuta ĩchab ich Ẽwandamau nem waupim khõsimjã thumaa pãachig khaphʉ apimkhĩir.

¹⁰ Irigta pãar kõit jeeujem, chadcha maach Por Cristo denkha nʉm khʉʉnjo pãach nem wau nʉmpierr irua nem khõsimta wau nʉmua dich khapeen dʉi nem ajapha aju ayaamjã waub khaba waumkhĩir; mag nem wau nʉm gaaimua warag ich Ẽwandamjã ajapcha pãachig khap amkhĩir.

¹¹ Agjo jeeujem ĩchab, ich Ẽwandam thumaam khʉʉn khãaijã jua theeg sĩerrʉmʉgta ich jua theeg pãach gaai phẽs deebarmua pãach ich dʉi ubʉ naamkhĩir, maagwai bʉ̃ʉr abarm gaaimua phithurg aadep awiajã magʉmjã juapadam thethe ãwat naamkhĩir.

¹² Maagwai pãrau onee ich Jooi chi Ayagjã ʉu ajim aju. Ichdeuta pãachjã warm khʉʉn agjo ya ʉkha wenʉrrʉm khʉʉn dʉi ãba ich aar auju ayaa apʉinaa pãach ich denkha naawai pãar dʉijã ʉu aju.

¹³ Meperau maach sĩi khĩmie durrag phe arraag ichta maach khãai ʉ̃rpai sĩerrjã, ʉu ich Ẽwandamauta maach peerdʉ auwia jũrr ich Iewaa ichdeu jãsene aajemta maach Porkhapijim,

¹⁴ ich Ẽwandam dʉi maach iekkhõr pom narrjã ichdeuta ich bagau maach pekau chugpaapʉiwia ich denkha autarr aawai.

Cristoou ich thõopibarmua Ẽwandam dʉi khõinaa apitarr

¹⁵ Ẽwandam chan maadeu pod ooba aajem, mamʉ Cristo ich Aai dʉi khĩir ãba sĩerraawai ʉu i gaaimua khaphʉ nʉm jãga sĩerrʉ́ Ẽwandam chi Aaijã. Ichta nem thum ompaaju nawe ich Aai dʉi sĩerr aawai ichta nem thum thʉnʉm Porkha sĩerrʉm.

¹⁶ Nem thum maadeu daúa oonaa pod ooba aajempa mʉg jẽb gaaim maimua ʉ̃gtharm magwe thʉnʉmjã Ẽwandamau i gaaimuata ompaajim: reinaan, maimua edjã eem magwe Ẽwandam chognaanjom; magʉm khʉʉnta amachta ʉ̃rpainaa iek theegnaa jua theeg sĩsidʉm khʉʉnjã ichdeuta thum ompaajim, magʉm khʉʉnagjã ichdeu ig simjo ich ipierraa amkhĩir.

¹⁷ Ich Cristoon mag nem thum mʉg thʉnʉm ompaaju nawe sĩerrʉm; ichdeuta mag nem khĩir pogkhe thʉnʉmjã thum amach sĩsid ajupierr sĩumajim.

¹⁸ Mamʉ magpaijã khaba, ich Cristota iglesia Porou, maagwai jũrr chi iglesia sĩi i morou. Mag ichta warrgarwe sĩerrarrjo, iiu phiidʉju aigjã ichta ĩchab nacha phiidʉjim, magbarm gaaimua nem thum thʉnʉm khãaijã ichta ʉ̃rpainaa ichta ĩchab mag chi phiidʉtkhaju khʉʉn dʉijã ich mag chi Porkha sĩerraag.

¹⁹ Ẽwandamau ich Iewaa Cristota pʉijim, ich Iewaa õor khĩir thegbarm gaaimua ichchata õor ee sĩeichemjo amkhĩir. Mag wounag pawiajã ichiita agtha ich Aai dʉi simjo ich mag Ẽwandamkha sĩerrajim.

²⁰ I gaaimuata ĩchab mʉg durr gaai thum õor thʉnʉmjã amach pekau gaaimua Ẽwandam dʉi iekkhõr wai narrjã ʉ̃gtharm magwe thʉnʉm khʉʉnpa ich dʉi khõinaa naapiju aai apijim. Ĩs mag i dʉi khõinaa nʉmʉn, Cristoou maach peerdʉ awaag ich bag pakuls gaai ãrpitarr gaaimuata mag i dʉi khõinaa nʉm.

²¹ Warr pãrau Ẽwandam khaugba aawain pãran chadcha okhoo naajim, mag pãach khaibag gaaimua i dʉi iekkhõr paar narr aawai.

²² Pari ĩs ya magba, ich garmuata jũrr ich dʉi khõinaa phe wai sim, mag Cristo wounag pawi ʉdʉraa ich thõopitarr gaaimua. Mag pãar ich dʉi khõinaa apitarran, ich atheepai nem wau wenʉrrʉmua bʉ̃ʉrjã pekau chukhu, kulp chukhu ich aar phe awaagau.

²³ Pari mag bʉ̃ʉrjã kulp chukhu ich aar pãach phe aupiegan, ich mag pãachdeu ʉkhatarr iek gaaita ubʉnaa ĩchab pãachdeu maach peerdʉajem iek ʉkhatarr edwe ich dʉi ich mag nʉisijujã khaphʉ nʉisierr khĩirjugta khĩir okhooba wai wenʉrraju aai nʉm. Ich mʉg maach peerdʉajem pãrau ũrtarr iekpaita ĩchab durrpierr jaau nʉm; mʉchdeujã ich ag iekta jaau khitaajem.

Pablo phidag judionaan khabam khʉʉn ee

²⁴ Mag maach peerdʉajem iek jaau chitʉm gaaimuata mʉʉn mʉg dau aphʉʉ preso chirʉm. Mamʉ mʉch mʉg chirʉmjã jũrr pãachta ʉu amkhĩir aawai mag aphʉʉ chirab mamʉ onee chiraajem. Mʉch mʉg wai nʉm gaaimuata, ich jãg Cristoou iglesia ich morkha sim athee ich dau aphʉʉ wai naawai ãwattarrjo, mʉchdeujã agjo i denjo aju ẽkha chiraajem.

²⁵ Mua khaphʉ chirʉm, Ẽwandamau mʉʉta ich iek ʉkha nʉm khʉʉn juag oojemkha wai sim, pãar maar meeun khabam khʉʉnpa ʉu amkhĩir. Mag phidagta ichdeu mʉrʉg deetarr aawai maach peerdʉajem iekta meerba muan thum jaaumaajem;

²⁶ ajapcharan warrgarwe Ẽwandamau ich mag bʉ̃ʉrjã õrag jaauba sĩi ichdeupai khaphʉ wai sĩerrma; magtarr ĩsta ya ich denkha nʉm khʉʉnag khaugpibarm.

²⁷ Magta pãarjã i denkha nʉm khʉʉn aawai maar meeun judionaan khaba awiajã Ẽwandamau pãragjã khaphʉ apibarm, jãga mag Cristo maach thãar ee sĩejemta mʉg atag ʉ̃gthar paaukhawijã oo wai wenʉrraju.

²⁸ Mag Cristota muan sĩi ikhõrjã khaba õrag jaau khitaajem, ich Ẽwandamau mʉchig khĩirjug deetarrdamau am wawimamua; ajapcharan Cristoog sĩi khaibag chukhu ajappha khitheemta irig ich jua eecha phedeegma.

²⁹ Magaag atheeta mʉʉn maach peerdʉajem iek jaau chirʉm, magaagjã ich Cristo jua theeg mʉ gaai simuata mag jaaupi sĩewai.