Apocalipsis 9 - Wounaan Meu

¹ Maimua chadcha chi Ẽwandam chognaan sirju waaur narr eem ãbmua ich trompeta tẽee aadejim. Mag siram cincoom gaai, Ẽwandam chogta edjã eemua phĩdagjo phug beem mua oopʉijim. Magʉg, sĩi jẽbdijo ierr maach dau warp ithurm jaaba wejom ee thʉrrdo sim den chi yabme deepijim ich Ẽwandamau.

² Magbaa mag yabmeeu mag ithurm jaaba wejom eem thʉrrdo weeu athaawai, ag eemua orno pomkham eemjo sĩi ʉ̃gthaag naar phʉissi khõrr jĩubaademua edau khĩir gar thʉa joisiewai, warre edaujã khĩssu aadejim.

³ Mag naar jĩubaadem eemua langosta dap asphitjo sĩsidʉm poooma oberdʉtkhawi durrpierraaa aaidʉjierram. Mag sĩsidʉmua khaawai khierr machag dojũr khierr machagjo apijim chi Ẽwandam chogau.

⁴ Mag langosta dap sĩsidʉmʉg bʉ̃ʉrjã pabʉ chig apiba, pakherjã thʉrrkhichpiba, phũakjã ãrpiba, ni nemjĩirjomjã ãrpiba jaaujim. Ãba amag jaautarran, õor Ẽwandam dauchach amach dag gaai chukhum khʉʉnta khaibag waupi jaaujim.

⁵ Mag amag õor khaibag waupi jaaujieb mamʉ, pod thõo chan thõoju khaba nʉm a jaaujim. Õor thõoju khãai sĩita am gaai khaa nʉmua cinco meses sĩi am gaai mas waupi jaaujim. Mag khaamam khierr machagan dojũriu khaamamjota aajeejim chi machag.

⁶ Mamagkham jaran parii õrau wir aigpai amach thõo ẽkhawiajã pod amach thõobajurau. Thõm khõchaaga aadep awiajã meeg khábata thaabatarrjo aadep ajurau, bʉ̃ʉrjã thõba.

⁷ Mag langosta, õor khĩirkhanaa por gaaijã porsirjoo sĩsidʉm paar sĩsid ajim, phĩr den. Mag sĩsidʉmʉn sĩi cabaai juurhi ee werbʉan arraag wajap khĩir khaug sĩsidʉmjota sĩsid ajim.

⁸ Mag sĩsidʉmʉn ĩchab sĩi ʉʉinjo porbʉ wʉrnaa khierrjã khum khierrjo sĩsid ajim.

⁹ Am mor sĩi jierrjo simua meu sĩsid ajim. Mag sĩsidʉm ũrrphobaadeewai ich jẽbag sĩi juurhi ee werbʉajem carrota werbʉ phobaadeewai cabayou wai khaphig phobaadephʉm iekjo sĩsid ajim.

¹⁰ Mag sĩsidʉmʉn dojũrjota dur gaaijã jur paar sĩsid ajim. Mag sĩsidʉmʉgta õor khaibag waupi jaautarr aawai am khierr machag mag dur gaaita sĩsid ajim, mag khaamamua cinco meses õor gaai machag ãwatpi wai naag.

¹¹ Mag langosta pom durrpierr aaidʉ thʉnʉm por ĩchab ich mag ierr ithurm wejom ee thʉrrdo sim aar chi porkha sim ag mepeerpaiu. Mag mepeer thʉ̃r Abadón aajem hebreonaan meúa. Maagwai griegonaan meúata Apolión aajem. Mag sim aig maach meúan “õor pom khechmie” a simʉu.

¹² Ma, trompeta cincoom sirbarmua nacha õor dau aug wautarr ajim. Mamʉ agtha dau numí sirju waaur naajim.

¹³ Mag khur chadcha chi Ẽwandam chogau warm khʉʉn denjo ich trompeta sirjim. Ma, seim ajim. Maig Ẽwandam khĩirphee phĩr den nasãdjo simta kach jayap jʉjʉrʉʉ sim sĩejim. Mag chi Ẽwandam chogau ich trompeta tẽee abaawai

¹⁴ mag nasãd kach jayap jʉjʉrʉʉ sim eemuata woun iekjo chi Ẽwandam chog mag ich trompeta sir sĩerrag iekha simua, “Ar dojã pooma Eufrates aajem igaau mepeer dau jayap o jʉ̃kha thʉnʉm ẽerkhʉʉibapʉi” a sĩejim.

¹⁵ Magbaawai chadcha mag mepeer dau jayap jʉ̃kha thʉnarr ẽerkhʉʉipʉijim, amach ẽerkhapʉiju ed pabaadeewai. Ich ar maig ajim am ẽerkhapʉiju atarr ora, mag ẽerkhabapäaiwai õor mʉg jẽb gaai jooba durrum khʉʉn jãrrchapaím khechpʉimkhĩir.

¹⁶ Makhʉʉn ẽudee soldaaun cabaai gaai wedurajim, õor khaibag wauju khʉʉn. Mua ũurwai am khapanag doscientos millones anaajim.

¹⁷ Magta mʉrʉg makhʉʉn cabaaijã oopijim. Mag cabaai gaai wenʉrrʉm khʉʉn amach thũrr gar jierrjo sĩsidʉmta õtdau khĩirjo phuu phʉʉrdʉ jũa sĩsid ajim; ãaur khʉʉn den sĩi phãauraa jacintojo sĩsid aawai tagam khʉʉn den azufrejo uashãu khĩirkha sĩsid ajim. Chi cabaai por, león porkha sĩsid ajim. Mag sĩsidʉm i eemua sĩi õtdau khĩirta khĩbcheug ober thʉnʉm dʉi naar jĩubaadephʉm eemua azufrepata jĩerrarrau khajim.

¹⁸ Mag õtdau khĩir naar dʉi azufrepa jĩerrarraukhamua õor poooma peer mʉg jẽb gaai jooba durrum khʉʉn jãrrchapaím odubjim.

¹⁹ Mamʉ am i ee mamagkhamuapai khabajim, mag õor pom khech thʉnarr. Mag sĩsidʉm durin ĩchab sĩi nemkhõrjo por paar sĩsid aawai magʉmuapata ĩchab õor dajẽk wai naajim.

²⁰ Mamʉ mag õor pom odubtarr ee chi iiu nʉisierr khʉʉnau amach daúa mag ootarrjã amachdeu mag nem khaigba waaujerr chan bʉ̃ʉrjã pʉabajierram. Mag khãai warag meperagta Ẽwandamagamjo jeeunaa, sĩi nem parhoob phĩr den, phatkhon den, bronce den, mokdau den maimua pa denpa nem oob waunaa, ni iiujã iiuba sĩsid aawai dʉrdʉrjã aba ni amachig jeeu nʉmjã khaugba sĩsidʉmʉgta warag jeeu nʉisijim.

²¹ Mamʉ magpaijã khabajim. Magphobaademʉn wir aig chikhamanjã amachdeu khecham aig khechnaa, beneujã chikham khʉgnaa, amach õor khabam dʉijã khapesnaa ich mag nem jĩignemjã nʉisijim, amach jua pʉaba. Mag trompeta seim sirbarmua Ẽwandamau mʉg atag õor i agkhaju mʉrʉg oopitarr ajim.