Apocalipsis 8 - Wounaan Meu

Ẽsap khaar sĩerr ãbmiecharam thʉrreutarr

¹ Maimua chi Corderoou ya ãbmiecha sieteem sello thʉrreupʉinaa chi ẽsap eeurjãg athaawai, edjã ee ora jãrrjo sĩi khĩúu joisijim.

² Mag khĩu thʉnʉʉ arr khur mua oowai Ẽwandam chognaanta siete i na dʉnʉnʉid thʉnaajim. Makhʉʉnag siete trompetas deejim, amach pipied ãhãbdo auwi okhar ichdeu jaaumam aig sirmamkhĩir.

³ Mag warm khʉʉnag jigtarr khur deeum Ẽwandam chog beewia, deeum incienso phaajem phĩr den bʉ̃rʉʉ phurii khitʉm jua ee waibeewi, agjo ich ag phaajem nasãd ʉ̃gthaa wau sim khĩirphee dʉnʉʉuchejim. Mag i dʉnʉʉubaicheewai warag irig incienso pom deejim, Ẽwandam chaainau jeeu durrum iek dʉi khajapham nemjo pomaacha waaureunaa mag phĩr den nasãd wau sim gaai phaamkhĩir.

⁴ Mag incienso phaabaadeewai chi naar Ẽwandam chaainau jeeu durrum iek dʉi mag Ẽwandam chog chi phaa sim jua eemua ãba Ẽwandam sim aarta naar jĩubaadejim.

⁵ Maimua mag chi Ẽwandam chogau ichdeu incienso phaajem bʉ̃rʉʉ khitʉm waiberr auwi, jũrr nasãd gaai chi daupaam eemta auwia, ich den ee ipiirnaa mʉg jẽb gaai phopʉijim. Mag phobapäaiwai, pagthʉmta bubuju khabaadem dʉi õor iekjo iyʉʉmjo joisim ee, pagthʉm dau phʉr jẽjẽer khabaademua ʉʉurpa duuibaadejim. Ma ajim ãbmiecha sieteem sello thʉrreupʉi nʉm mʉrʉg oopitarr.

Siete trompetas narr ãhãbdo sirmam ootarr

⁶ Maimuan chad mag Ẽwandam chognaan siete amach pipied trompeta ãhãbdo wai narr khʉʉnau ya siraag paaukhabaadejim.

⁷ Chi nacha sir sĩerrau ich trompeta sirbaadeewai nosegdau dap mokporjo sĩsidʉmta õtkhĩir sĩi bag phuriimjo sĩsidʉm dʉi khʉibaadejim mʉg jẽb ʉ̃r. Magbaawai pabʉ jãrrchapaím khechwi phũakdam phãauraa khekhed arrjã sĩi thumaa phaadubjim.

⁸ Maimua mag nosegdau dap che dichtarr khur mag nacha sirtarr gar sĩerrau agjo ich trompeta sirjim. Mag biek numiim sirbaadeewai sĩi nem pom durrsĩjo simta õtdau khĩirjo ug beewi phũas ee burrjim. Magbaawai jãrrcha atcha phũas bagag pajim.

⁹ Mag phũas eem do bagag pabaadeewai agjo jãrrchapaím ãwarrjã khechdubwi mag phũas ee barco jorrjee arrjã agjo jãrrchapaím warre ãrwi joothũpjierram.

¹⁰ Magbaawai ãbakhaíujã agjo ich trompeta sirjim. Mag ya sirm thãrjupam gaai paawai, edjã eemua phĩdag pooma simta õtdau khĩirjo phug beewi, mʉg jẽb gaai dosĩg khapan dokhum dipa nʉnʉidʉm ʉ̃r burrwi, peer jãrrchapaím dosĩg eem do ãrpʉijim.

¹¹ Ma, phĩdag “Chi Ach” a thʉ̃r sĩejim. Magua ich burrtarrpierr do nʉnʉidʉm thum achag abpäaiwai õor poooma ojim.

¹² Maimua deeum chi Ẽwandam chog agjo aig sĩerrau ĩchab ich trompeta sirjim. Ma, jayapam ajim. Mag sirbarmua mʉg edau ãsdawam jãrrchapaím thõo auwia, edaram ed argjã jãrrchapaím thõo aunaa, phĩdagjã ĩchab jãrrchapaím dau thõokha aujim, amach wʉʉjemjo wʉʉm ugua. Maimua edau kheubaadeewaijã sĩi athuuchata khĩssu aademua da ãspabajojoomjota aadejim.

¹³ Magbaa mua oo nʉʉ aawai Ẽwandam chogta edjã ee ʉapepergmamua iekha jorrajim. I iekhamatarr mʉg ajim: “¡Eh! ¡Aaay, ĩsin chad! Agtha Ẽwandam chognaan thãrjupam khʉʉnau amach trompeta sirju waaur nʉm. Nau jãkhʉʉnau sirphobaadeewai mʉg jẽb gaai jooba durrum khʉʉnan chadcha aphʉʉta durraju” a iekha jorrajim chi Ẽwandam chogau.