Apocalipsis 7 - Wounaan Meu

Israelnaan chi dauchacham khʉʉn

¹ Mag thʉnarr khur mua oo nʉʉ aawai Ẽwandam chognaanta dau jayap mʉg jẽb ʉ̃r dʉnʉnʉihdʉ naajim: ãb dokhẽu gar edau obeerjem gar, ãb dokhierr gar, ãb thoom igar juachaar garm bijãr, maagwai ãb juawe gar, arag dau jayap naajim. Makhʉʉnau bʉ̃ʉrjã phũ dichpiba thʉa wai naajim, ni mʉg jẽb gaaijã phũ weba, phũas ʉ̃rjã weba, ni bʉ̃ʉrjã pabʉdam gaaijã phũ wem ugua.

² Ĩchab deeum Ẽwandam chog edau obeerjem garmua urumjã mua oojim. Magua ich jua ee õor dauchaachjem waidurajim, ich Jooi charau agua õor dauchachamkhĩir deetarr. Ich mag Ẽwandam chogau mag warm khʉʉn jayap mʉg jẽb khaibag waunaa phũasjã khaibag wawaag jua theeg narr khʉʉnag thet khĩesirnaa,

³ “Ẽwandam iek jaau wenʉrraju khʉʉn dag gaai marau agtha ich Ẽwandam dauchach phãkhaba nʉwe chan, oob jʉchag mʉg jẽb, mʉg phũas, ni pabʉjã khaibag waumiet” ajim amag.

⁴ Mua ũurwai mag chi dauchachpʉitarr khʉʉn thum chi khapanag ciento cuarenta y cuatro mil nʉm anaajim, Israel chaain amach thʉ̃rpierr mʉg:

⁵ Judá khodnaan: 12,000 Rubén khodnaan: 12,000 Gad khodnaan: 12,000

⁶ Aser khodnaan: 12,000 Metalí khodnaan: 12,000 Manasés khodnaan: 12,000

⁷ Simeón khodnaan: 12,000 Leví khodnaan: 12,000 Isacar khodnaan: 12,000

⁸ Zabulón khodnaan: 12,000 José khodnaan: 12,000 Benjamín khodnaan: 12,000 Arag ciento cuarenta y cuatro mil naajim mag Ẽwandamau dauchachpitarr khʉʉn.

Õor pom khajũa bau appha jũa narr khʉʉn

⁹ Magtarr khur ũwaai deeu Ẽwandam juupjem porkhau pooma simʉg mua oowai, õor poooma sĩi bʉjãaupaita baurur wejom oojim chi Cordero na. Mag sĩsidʉmʉn thumaa khajũa chi bau appha jũanaa sothark piujoo khitheemta jua panhappha thʉnaajim. Maig thʉnaajim õor phoborpierram khʉʉn, meupierr meu khĩir pogkhe; wajapcharan durrpierram khʉʉnta maiguin ãba podpa thʉnaajim. Mag sĩi khapan maach dau dʉrrkhab warpham magwe phʉʉrdʉ wejom aawai pod ãbmuajã beer aubajim, kharra naajim khai chi khapanag.

¹⁰ Mag thʉnʉm khʉʉnau serereukhamua, “Ar porkhau gaai oo sim gaaimua maimua Cordero gaaimuata maachin ʉu peerdʉ nʉm” a serereu khajierram.

¹¹ Maagwai chi Ẽwandam chognaanjã thum bʉjãaupaita dʉnʉnʉid phʉʉrdʉ wejoojim, mag porkhau bithurg jooin ohood wejom dʉi ĩchab mag sĩi khanjo ich paar sĩsidʉmpa thʉnʉm eugarm magwe. Mag dʉnʉnʉid thʉnʉʉ awi, mag porkhau gaai oo sim khĩirphee phõbkhanaa, i tho iekhamamua irig mag naajim:

¹² “Mʉg atag pawijã ãba maach Ẽwandamta ʉucha chitaju. Iita ãba ooimʉg phenaa tho iekhaju aai nʉm. Ichta ãba khĩirjug khaug sĩerrʉm. Irigpaita ĩchab thumaam khʉʉnaujã eenaa ʉu ajim aju aai nʉm. Ichdeupaita chadcha jua theeg thum auju aai sim. Jãan chadcha ich magta aju aai sim” anaajim amachdeupai.

¹³ Magbaawai mag jooin veinticuatro narr eem ãbmua mʉ aig beewi mʉrʉg, —Ar õor sĩi khajũa bäpphä jũa sĩsidʉm, ¿pua khaphʉ chirʉ́ aichejim, chijã khʉʉn agá maimua jãkhʉʉn jammua beejierrá?

¹⁴ Magbaa mua irig, —Señor, pʉchdeuta khap chirabahab, mua chan khaugba chirʉm a chirajim. Magbaa ichdeu mʉrʉg jaaubaadewi magjim: —Jãkhʉʉnan Ẽwandamau õor okhĩirjug pooma api nʉm jaar ʉu i iek ogdʉba ʉkha durrawia peerdʉtarr khʉʉnaugui ajim. Magua khabahab ajim, jãg am khajũa bäpphä jũa sĩsidʉm, chadcha ich chi Cordero bag ãrtarrauta amach khaibag thum chugpaatarr aawai.

¹⁵ “Magwiata jãg bʉ̃ʉrjã ijeeu khaugba edaram magwe porkhau gaai oo sim khĩirphee i ipierraa irig ich khĩircha jeeu durrumgui” ajim. “Maagwai jãg porkhau gaai oo simuata am thʉa wai sĩeju.

¹⁶ Ya jãgbarm aigmua tag am jãsog ãwatba, ni obichagjã ãwatbam; ed pechagaujã khakhaichag khaba, ni edaúajã am phaabamgui” ajim.

¹⁷ “Jãg porkhau bigaau ohood wejom jãrr ar corderodamjo simuata am thʉa wai sĩejugui” ajim. “Ichdeuta, do parag aar nemchaain do dopien phe arrjemjo, amau nem ig nʉm thumaa deewi ichdeuta am dauchojã jãrpʉpʉi aju” a jaaumajim mʉrʉg mag jooirau. (Sal. 23:1-2; Is. 49:10; Ez. 34:23)