Apocalipsis 6 - Wounaan Meu

Ẽsap khaar sĩsid arr thʉrreu nʉm ootarr

¹ Mag ẽsap pa gaai pʉʉrthʉ sim jeeu auwi, mʉ dakhĩraa mag Corderodamau chi ẽsap nacha khaar sĩerr thʉrreupʉiwi eeureu oobaadejim. Magbarm ee mag sĩi ich paar sĩsidʉm eem ãbmua mʉrʉg, “Pidú, oobahur” a sĩejim.

² Irua mag oobahur abaawai mua oowai, cabaai bäpphä simta aig sĩejim. Mag cabaai ʉ̃r woun sĩerrau ich jua ee choophõ wai sĩejim. Mag simʉg porsir deewi jũapi sĩubaawai, ichdeuta thumaam khʉʉn podpʉiwi, ichta emkhooikha oberjim, ich garmua ich jua jʉmpiba sĩerraag. Ma, mʉg atag paawai ichdeuta mʉig eegarm khʉʉn ich jua jʉmpiba ichta chi porkha sĩsiju. Pari ma chan chi Cordero khaba aawai ich mag chi porkha sĩerrabaju.

³ Maimua chi Corderodamau deeu chi ẽsap auwia mag khaar sĩerr napemjo thʉrreubapäaiwai, mag dau jayap ich paar sĩsidʉm eem ãb phak emkhoijo simua agjo, “Pidú, oobahur” ajim mʉrʉg.

⁴ Mag irua oobahur abaawai deeum cabaai phurii simta dʉnʉʉubaichejim. Mag cabaai phur sim ʉ̃r woun sĩerr jua ee espaar joothʉ sĩuwi jua theega apijim, õor khõinaa thʉnarr meeukhapiwi wir aig chikham khechamkhĩir. Magbaawai durrpierr juurhi theega sĩi werbʉphoo aadejim. Ma ajim sello numiim gayam mʉrʉg oopitarr.

⁵ Maimua sello thãrjupam thʉrreuju mʉrʉg oopijim. Majã arjo chi Corderodamau thʉrreubapäaiwai mag jayap narr ee ãb wounkha simta ich khapan seis wai sĩerrau warm khʉʉn denjo, “Oobahur” ajim mʉrʉg. Magbaawai sĩi cabaai phʉis simta dʉnʉʉubaichejim. Mag gaai woun beetarrau ich jua ee lib chach wai beejim.

⁶ Mag cabaai phʉis sim dʉnʉʉubaicheewai mag jayap ich paar sĩsidʉm eem ãbmua jãdau theega burrju igwi magjim: “Khãai ãb phidkhabarmuata trigo libdam thãrjuppai auju. Mamʉ nemkhau vino dʉi awaag chan phatkhon chukhum” a sĩejim.

⁷ Mag khur sello jayapam thʉrreubaadejim. Maimua Corderodamau mag sello jayapam thʉrreubapäaiwai jũrr mag jĩmiejãu pom sim ũrr jorromjo simuata, “Pidú, oobahur” ajim mʉrʉg.

⁸ Magbaa mua agʉg oowai cabaai uashãu khĩirkha sim gaai ãb wounjo simta mua oojim. Mag wounjo sim thʉ̃r “Chi Meem” a thʉ̃r sĩejim. Mag gar deeum urajim. Ma, i thʉ̃r “Khĩmie Durr” a thʉ̃r naajim. Makhʉʉnag jua theeg deewi mʉg durr peer jãrrchapaím amag jaaujim, esparau õor khechnaa, jãdaúajã khechnaa, ben theeg õor ee burrpiwi agʉmuajã khechnaa, sĩi nem pabʉ eem nem maach khoojemʉgjã õor khechpʉimkhĩir.

⁹ Mag khur chi Corderodamau chi cincoom sello thʉrreubapäaiwai nasãdjo wau sim eegar mua oojim, Ẽwandam iek jaau durrum gaaimua khechpʉimarr khʉʉn.

¹⁰ Makhʉʉnau amach dau aphʉʉ juau khechmarr jũrr Ẽwandamag am dʉi agjo amkhĩir jaau durrumua thet mag naajim: “Ẽwandam, pʉchta thumaam khʉʉn khãai jua theeg ʉ̃rchanaa, pekaujã chukhu, pʉch iekhatarrjã chadcha khitʉm, ¿jãagwaita pua maar bag ãrtarr jũrr õor i agkhawi maar khechtarr khʉʉn dʉi ich agjoo ajuuta jãg sĩma?” anaajim irig.

¹¹ Amau magbaawai amag khajũa bäphä sĩsidʉm phedeewi sĩi warag, “Pãar khodnaanjã pãach khechtarrjo Cristo ipierraa i iek jaau durrum gaaimua khechpʉiwia pãach aig ãba paaukhache nʉm ora, ideu bʉchkhun oo athat” ajim.

¹² Maimua chi Corderodamau jũrr ya seim sello thʉrreubapäaiwai ʉʉur theega duui dichdimamjã mua oojim. Magbaadeewai mʉg edau ãsdawam sĩi put phʉichjo phʉissi aadejim; maagwai jũrr edau chi edaram, ajapcharan edau argma, bagjo phurii aadejim.

¹³ Magbaadee ĩchab edjã ee phĩdag thʉnarrjã, sĩi phũ theeg webaadeewai nemjõ agtha khũguthu khitwe khʉi duubjemjo, mʉg jẽb gaai khʉi thʉnʉisijim.

¹⁴ Magbaadem dʉi ĩchab edaujãjã sĩi ẽsapjo pʉʉrsiirmamua chukkhu aadejim. Magbaa thumaa durrsĩ sĩsidʉmjã amach narr aigmua chawag ereubaadee ĩchab dojãrr morr sĩsidʉmjã ich agjo chawag ĩiudʉjierram.

¹⁵ Mʉg durr gayam reinaanjã mag oobaa, ãaur khʉʉn jẽb degjã ierr paaukhamaawai, ãaur khʉʉn durrbʉ ee mokpor dapagkham eegarjã dubjierram, daumeerwai. Mamʉ makhʉʉn appaijã khabajim. Ich agjo daumerjierram ĩchab, chi daphʉm khʉʉn, soldaaun pornaan, riknaan, chi jua thierrnaan, sĩi chikham chogkha par phidkha sĩsid arr khʉʉnpa; thumaam khʉʉn ich agjoo daumerjierram, jãphierr nʉm iekhau.

¹⁶ Mag daumer nʉmua durrsĩigta wounaanagamjo chaigpanaa, “Jãg porkhau gaai oo simʉg maar oom ugua, maar ʉ̃r dʉrbagkhawi pãach eegar maar meer athat” anaajim.

¹⁷ “¡Maar meer athat! Maar gaaita Cordero khĩir machag meeuju ed barbaichem. Jãg sim, ¿khaíu i jua jʉmbarju?” anaajim, i okgau.