Apocalipsis 5 - Wounaan Meu

Corderooupaita ẽsap khaar sĩsid arrjã thʉrreuju a jaautarr

¹ Mag jãrrcha khu juupjem sim gaai woun oo sĩerrau, ajapcharan ich Ẽwandamauma, ich juachaar gar pa gaai ẽsap pʉʉrthʉ sim wai simjã mua oojim. Mag ẽsap, jãgarjã phãnaa eugarm magwe phãnaa, thʉ̃rmajupierrpai khibjʉ̃rjo simua khaar sĩsid ajim. Magʉm siete naajim mag ẽsap pʉʉrthʉ sim gaai.

² Mua mag oo atham dʉi ĩchab ich Ẽwandam chog ãb nem jua theeg simua iek khẽgkha, “¿Chijãguata magan mʉig mʉg ẽsap khaar sĩsidʉm thʉrreupʉinaa mʉg ẽsap eeureu auju aai sĩ?” a sĩejim.

³ Mamʉ mam ʉ̃gthar, ni mʉg jẽb gaai, ni mʉg jẽb eegarjã õor ãbjã chukhu ajim, mag ẽsap pʉʉrthʉ sim eeureunaa ag gaai thʉ̃raag. Ni sĩi agʉg eerpaju khʉʉnpaijã chukhu ajim.

⁴ Mamʉ mag ẽsap eeurjãgnaa ag gaai thʉ̃rju ayaam woun ni ãbjã chukhu ni sĩi agʉg eerpajupaijã chukhu abarm mʉchdeu oobaawai, jãga ag gaai phã sim khap abarju awi, mua pod ãwatba warag mʉ bĩebaadejim.

⁵ Mag mʉ ich dakhĩir bĩe chirʉʉ paawai mag jooin veinticuatro narr eem ãbmua mʉ aig beewi mʉrʉg, “Oob tag bĩem, ar sĩebahab” ajim, “David khararr ag chaain ewagam khʉʉn bi eem Chaai leonjo jua theeg sĩerrʉm. Jãguata ya ichdeu nem thum thʉnʉm podpʉitarr aawai ichdeuta jãg ẽsap khaar sĩsidʉmjã thʉrreupʉinaa eeurjãg ooju aai sĩebahab” ajim.

⁶ Mʉchig magbaa mua oo nʉʉ aawai, chadcha mag sĩi khanjo dau jayap ich paar sĩsidʉm bigaau jooin ohood wejom jãrr, ar corderodamjo ʉdʉraa ich thõopiwia deeu iiutarrta oothẽu kherajim; ajapcharan ich Jesuma. Amau i thõo naawai pa gaai meerphetarr agtha merag chukhu sĩejim. Mag khitʉmʉn sĩi kach khapan sietenaa dau khapanjã agjo siete phuphup sĩejim. Makhʉʉn dau khapanag siete nʉmua chi Corderoou Ẽwandam Akhaar gaaimua nem thum khaphʉnaa durrpierr oo phe wai sĩejemta jaau sim.

⁷ Mag chadcha mag corderodamjo khitʉmua mawi, mag porkhau gaai jup simua juachaar gar ẽsap pʉʉrthʉ sim wai sĩerr jũrr i jua eem jeeu auwimajim.

⁸ Mag Corderodamau amach dakhĩir mag ẽsap pa gaai pʉʉrthʉ sim jeeu athaimam oobaawai mag sĩi khanjo ich paar sĩsidʉmua agjo aig jooin veinticuatro narr dʉimua sĩi i khĩirphee thʉkhokhood aphobaadejim. Makhʉʉn jooinau amachpierr arpa wai naajim, maimua jarrdam phĩr den phurii khitheemjã agjo amachpierr wai naajim. Mag jarr ee incienso ipir wai sĩsid ajim. Ma, Ẽwandam chaainkha nʉm khʉʉnau irig jeeu nʉm khʉʉn iek aajem, mag jarr ee ipir sĩsidʉm.

⁹ Makhʉʉn jooin mag thʉkhokhood thʉnʉmua chi Cordero thumeukharmamua meukhaar iiurta au naajim. Amau meukhaar au narr mʉg ajim: “Pʉchdeupaita ãba jãg ẽsap jua ee auwi chi khaar sĩsidʉmjã thʉrreu werbaju aai sim, pʉchta thumaam khʉʉn kõit ʉdʉraa pʉch thõopitarr aawai. Pʉch thõo nʉm aig bag ãrtarrauta pua õor durrpierram khʉʉn amach meupierr Ẽwandam athee perkha aujim.

¹⁰ Makhʉʉnta pua Ẽwandam na phadnaan khapiwia ĩchab chi pornaan khapiju. Magbaawai mʉg durr jũrr amachdeuta khap nʉisiju” a thumeukharmajim ich khĩircha.

¹¹ Maimua mua oowai, mag porkhau bigaau mag khanjo ich paar sĩsidʉm dʉi jooin ohood wejom eugar, Ẽwandam chognaan pooma sĩi sereu phʉʉrdʉ wejoojim. Mag thʉnʉmʉn chi khapanag millones y millones thʉnarr aawai, khapaana sĩi maach dau warpta pos pʉʉrthʉ, pod maadeu chi beerjujã khaugba thʉnaajim.

¹² Mag thʉnʉm khʉʉnau thet meukhaar au nʉmua mag naajim: “Jãg Corderodam õor gaaimua ʉdʉraa ich thõopitarrauta jua theeg thʉnʉm thum auwia nem ajapham thʉnʉmjã thum auju aai sim. Ãba ichpaita thumaam khʉʉn khãaijã nem khĩirjug khaugnaa juapa theegjã ichdeupaita auju aai sim. Magnaa irig eenaa, i ooimʉgjã tho iekhanaa, irigpaita thumaam khʉʉnau jeeuju aai nʉm” a thumeukhar majierram.

¹³ Ẽwandam chognaanau mag meukhaar au dichdimaawai, ĩchab thumaa ich Ẽwandamau nem wautarr edjã ee thʉnʉm khʉʉnau, mʉg jẽb gayam khʉʉnau, khechwia ya jẽb ee nʉm khʉʉnau, maimua nem thum phũas ee thʉnʉm khʉʉnaupa ĩchab o ãba meukharau ʉ̃ʉrbabapʉimjã mua ũrjim. Mag amau ʉ̃ʉrbapʉitarr meukhaar mʉg ajim: “Ar porkhau gaai Jooi jup simʉg maimua Corderodamagjã agjo ãba pãragpaita mʉg atag paawaijã ich mag thumaam khʉʉnau jeeunaa ee aju aai nʉm” ajierram. “Pãar wajaugpaita thumaam khʉʉnau tho iekhaju aai nʉm. Magnaa, ‘Pãachta mʉg atag pawiajã thumaam khʉʉn khãaijã ich mag jua theeg nʉm’ aju aai nʉm” ahaug majierram meukharaupai.

¹⁴ Magbaawai mag khanjo ich paar sĩsidʉm khʉʉnau ĩchab amach paarmua o ãba, “Jãan chadcha ich magau” aajeejim. Makhʉʉnau magbarm dʉi ĩchab mag jooin veinticuatro narr khʉʉnaujã deeu jĩepor phõbkhanaa am wajaug tho iekhajierram amag jeeumamua.