Apocalipsis 4 - Wounaan Meu

Ʉ̃gthar Aai i jeeu nʉm ootarr

¹ Mag mʉrʉg thumaa jaau dichtarr khur mua oowai, edjãata puertdijo weeudʉ wejom mua oobaadejim. Mag eemua nacha mag mʉchdeu trompeta jẽbag sim iek ũrtarr ag odijo simuata mʉrʉg, “Mau ʉ̃gthar pidú, mʉg atag nem thumaa obeberg maju mua pʉrʉg oopikhim” a sĩejim.

² Magbarm ee ich Ẽwandam Akharauta mʉ ʉ̃gthar athaadeewai ich Ẽwandam juupjemta nem porkhau pooma sim ooimajim. Ag gaai woun ãb jup sĩejim.

³ Mag porkhau gaai jup sĩerr woun sĩi mokdaudam jaspe aajemjo bʉ̃ʉnaa cornalinajo phuphuphumjo sĩejim. Mag porkhau pom sim bigaau ĩchab pirm phãauraanaa dau bʉ̃ʉʉ esmeraldajo simta jʉ̃a wejoojim.

⁴ Mag porkhau pom sim bigaau deeum ich agjo porkhau chaaindam daii khitheem khapan veinticuatro ohood phʉʉrdʉ wejomjã mua oojim. Maig ĩchab jooin khajũa wajappha bäpphä jũanaa porsirjã phĩr den jũa sĩsid ajim. Makhʉʉn jooin chi khapanagjã veinticuatro narr aawai makhʉʉn porkhau mag veinticuatro narr gaai ich agpierr ohood wejoojim.

⁵ Mag porkhau warm khʉʉn jãrrcha sim aarmua pagthʉm dau phʉr jẽjẽer khabaadem dʉi ĩchab phiphis khabaademua sĩi iyʉʉmjo aadep sĩejim. Mag porkhau pom sim khĩirphee õtdau siete paakhanaa dʉnʉnʉid thʉnaajim. Makhʉʉn ich Ẽwandam Akhaar ajim.

⁶ Ich ag porkhau na ĩchab phũasjo simta sĩi dau bʉ̃ʉʉ simjã sĩejim. Mag porkhau pom sim bigaau jãrrcha sĩi khanjo sĩsidʉmta khĩir gar maimua eugarm magwe dau khapan phuphup sĩsidʉm jayap naajim. Mag sĩsidʉmʉn iiu sĩsid ajim.

⁷ Chi nacha sĩerr leonjo sĩejim; mag ẽudeem, phak emkhoidamjo sĩejim; mag garm wounkha sĩejim; maimua ẽudeecharam, jayapam, sĩi jĩmiejãu pom simta ũrr jorromjo sĩejim.

⁸ Mag sĩsidʉmʉn amach jayapwe sĩi nem ich khapan agdaujo seis wai sĩsid ajim, amachpierr. Ierr jãgarm magwe dau phuphupnaa ʉ̃rjã sĩi dau khapan phuphup sĩsid ajim. Amach makhʉʉnau bʉ̃ʉrjã ijeeuba edaram magwe Ẽwandam tho iekhamamua, “Ẽwandam, pʉjo bʉ̃ʉrjã pekau chukhum khʉʉn chan ooba aajem” anaajim. “Pʉchta thumaam khʉʉn Por anaa thumaam khʉʉn khãaijã chi jua thierriu. Pʉchta warrgarwejã ich mag sĩerranaa mʉg atagjã ich mag sĩerraju” a tho iekhamajierram.

⁹ Mag sĩi ich khapan sĩsidʉmua maach Ẽwandam ichta ich mag thõojã khaugba mag ich porkhau gaai oo simʉg jeeu nʉmua, ʉu ajim anaa i tho iekha naajim.

¹⁰ Mag i tho iekhakhakhampierr mag jooin veinticuatro ohood wejom khʉʉnau i jup sim khĩirphee, “Pʉchta chadcha chi jua thierrau” anaa amach porsir phĩr den jũa narr jua ee auwia irig ʉanaa phõbkhakha aajeejim, mag ichta thõjã thõba warrgarwe ich mag iiu sĩerrʉmʉg jeeuwai.

¹¹ Mag thʉkhookhanaa meukharauta irig, “Pʉʉta maar Por Ẽwandamau; pʉʉta chadcha chi jua thierr aawai pʉ khĩragta thumaam khʉʉnau eenaa tho iekhaju aai nʉm” anaajim. “Pʉchdeu nem thum ompaam khõsi ompaawiata chadcha nem thum thʉnʉm” a thumeukhar majierram.