Apocalipsis 3 - Wounaan Meu

5. Sardis phobor eem pastorrag iek jaaupʉitarr

¹ Sardis phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar Ẽwandam Akhaar ich gaai wai sĩenaa phĩdagjã siete wai sĩejemuata pʉrʉg ich imeerba mʉg iek jaaupʉipijim. Magtarr aawai chamʉ́ pʉ atheem iek pʉrʉg jaaupitarrau: I iek pʉʉn chadcha thʉ̃rphoo sim aajem, Ẽwandam i jewaag. Mamʉ mag simʉn pʉʉn pʉch pekau eepai sĩi chi thõmjo simta jãg sim anaabá.

² Ichdeu pʉ mag sim oo sĩewai pʉrʉg “Khĩir ubʉ abá” a sim; “maimua ar ʉkha durrum anʉmta kha thũu khitheem khʉʉnjã khĩir onee apibá” a sim. Magbamʉn jãkhʉʉnjã warag eeg pawia khechju anaabá. I iek irua oowai pua nem wau sim Ẽwandamau oowaijã ʉu khaba sim aajem.

³ Ar nacha pʉchdeu ũrwia ʉkhatarr iekta khĩirjunaa, pʉchdeu khaigba arr Ẽwandamag chugpaapi jeeunaa, deeu i dʉi ubʉ abá. I iek pua magbaju atheen, nem jĩgkhaajem khʉʉn sĩi degolp nem jĩgkhaimaajemjo, õor barbajojoo sĩerr ee degolp pʉ aar barwi pʉ gaai mas deeju aajem.

⁴ Mag naab mamʉ jãig Sardiim iglesia ee ʉu agtha nʉm aajem, ãaur khʉʉn ʉdʉʉr pekaúg amach ʉ̃rpapiba durrum khʉʉn. Makhʉʉnta khajũa bäphä jũanaa i dʉi wenʉrraju anaabá, am amachdeu ich ipierr wajapha arr gaaimua chadcha mag wenʉrraju aai naawai.

⁵ Ar ogkhaba ʉu magʉm thum ãwatpʉi nʉm khʉʉnagan irua khajũa bäphämta jũapiju aajem. I iek magʉm khʉʉn thʉ̃r chan irua ich aar auju khʉʉn thʉ̃r phãajem ag ẽsap gaaimua borraapʉibam aajem. Magju khãai warre irua ich Aai dakhĩir maimua ich chognaan dakhĩirjã, “Chamʉ khʉʉnan mʉ deneu” a jaauju aajem.

⁶ Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim.

6. Filadelfia phobor eem pastorrag iek jaaupʉitarr

⁷ Filadelfia phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Cristo iekhau, ar ichta bʉ̃ʉrjã pekau chukhunaa seu chukhu khitʉm iek. Ichdeuta warr rey David khararr yabmejã wai chirʉm aajem. Iruata mag yabmeeu puertdi weeu sĩubarm chan ni ãbmuajã pod phãar aubam aajem; wa iruata warag khãijã phãar sĩubarm chan ãbmuajã pod weeu aubam aajem. Ich mag sĩerrʉmuata pʉrʉg ich iek jaaupʉipitarr aawai pʉrʉg jaaukhim:

⁸ I iek pua nem wau simjã irua thumaa khaphʉ chirʉm aajem. Irua khaphʉ chirʉm aajem, chadcha pʉ chan magcha nem jua theeg khaba khitʉm; mamʉ magʉm ãba, pua i ipierraa khitaajem aajem. Pua ãsie i igwi, “Mua chan tag i iek ʉkhabamjã” aba, ich mag ogdʉba ʉkha khitʉm aajem. Pʉch mag khitʉm gaaimua irua pʉ na puertdi weeu wai chirʉm aajem, ich iek jaauju ayaa amkhĩir. Mag puertdi chan ni ãbmuajã pod phãar aubam aajem.

⁹ Ar dosãt igarnaa judionaanjã khaba nʉmta nem seunem amach iiupain amta judionaan aawai Ẽwandam chaainau a nʉrrjee aajem khʉʉnag, irua ajués pʉ khĩirpheeta jĩepor phõbkhapiju aajem, ichdeu chadcha pʉ khõsi chirʉm amag khap amkhĩir.

¹⁰ Pʉchdeu irua jaautarr ipierraanaa bʉ̃ʉrjã jua ʉ̃yaajã khaugba khitaajeewai irua pʉ thʉa wai chitaju aajem. Ichdeuta mag pʉ thʉa wai chirʉm chan mʉg jẽb gaaim khʉʉn thum Ẽwandamau chachwi okhĩirjug pooma thʉnʉm jaarjã pʉ warm khʉʉnjo khabaju anaabá, ichdeuta pʉ thʉa wai sĩewai.

¹¹ Iin jopcha beeju aajem. Pʉchdeu i iek ʉkhatarr ich jãg ʉkha chirʉmjo, ich jãg wajapha ʉkhapi sim, pʉchig nem deeju arr jũrr chikhamnagta deem ugua.

¹² Ar ogkhaba ʉu magʉm thum ãwatpʉi nʉm khʉʉnan irua ich Aai Ẽwandam iglesia ee dibʉ jãrramjo chi thierrnaanag paapʉiwi ich mag bʉ̃ʉrjã isegaajã khaugba wenʉrrapiju aajem. Ichdeuta am gaai Ẽwandam thʉ̃rjã phãnaa i sĩejem phobor thʉ̃rjã phã sĩuju aajem. Mag phobor thʉ̃r Jerusalenau, Ẽwandam sĩejem aarmua beeju phobor. Ĩchab am gaai irua ich thʉ̃r iiurjã phã sĩuju aajem.

¹³ Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim.

7. Laodicea phobor eem pastorrag iek jaaupʉitarr

¹⁴ Laodicea phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ar chadam iekpaita iekha sĩerrʉm iekhau. Ichdeun ich daúa oonaa ich jʉ̃gʉucha ũrtarrjã ich agjoota jaaujem. I gaaimuata warrjã Ẽwandamau nem thum ompaa aujim. Mag sĩerrʉmuata pʉrʉg ich imeerba jaaupʉipitarr aawai pʉrʉg jaaukhim:

¹⁵ I iek pua nem wau simjã thumaa irua khaphʉ chirʉm aajem. Irua khaphʉ chirʉm aajem, pʉ jãga sĩ: Pʉ chan nem pechagjã khaba ni nem khukhunagjã khábata sim anaabá. Ajapcharan puan ʉkhabaaderrau ʉkhaba aadepta sim aajem. Jãgbanaa pʉ warag khukhuna khãijã sĩekhiin, i iek ʉucha akham aajem; wa magbam khai nem pechag khãijã akhiin, ʉucha sĩekham anʉm ĩchab.

¹⁶ Mamʉ i iek pʉch jãg khukhuna khaba ni nem pechagjã khaba sĩi pedchuchuupai sim gaaimua, pʉ irua doba sĩi deeu choipʉiju aajem.

¹⁷ Pʉchdeupain pua, “Mʉʉn phatkhon paraamʉu; phatkhon pom wai chiraawai deeum nem atheejã augcheba chitʉm” aajem. Mamʉ pʉch kha onegjã chukhunaa pʉch dau aug sim chan pua khaugba, ni sĩi pʉch maadeu igmap dau khĩsumjonaa mor kharramjo simjã pua pʉch khaugba sim anaabá. Mag simta pʉ jãg iekha sim aajem.

¹⁸ Pʉde irua jaaupʉitarr iek ũrbarí, pʉrʉg jaaukhim: Pʉ chadcha phatkhon pom paraa am khõs chirʉm khai, phĩr õt ee bʉ̃ʉunaa ya chi wajaug appai deeu jãppi simta ich jua gaai per aupi sim. Mag khai chadcha pʉ phatkhon paraa chitaju aajem. Jãg mor kharraa nʉrram ugua, i jua gaaita khajũa bäpphä bʉ̃ʉrjã memerkhog chukhum per auwi jũabá a sim. Maimua daujã wajapha nem oog atheejã ichdeu benhe wajapham wai simta per athá a sim.

¹⁹ Irua ichdeu õor kha khõsim khʉʉnagan meeurrau sĩunaa ĩchab wawijã wawiejem aajem. Magua puajã pʉch khaibag iseg jeeuwia khĩirdam ubʉ Ẽwandamta jʉrbamʉn, i iek pʉ gaai mas aju aajem.

²⁰ Iin maach thãar bʉkhʉrr chiraajem aajem, weeu aunaa ichig dubbá amkhĩir. Ãbmua khãijã weeu auwi irig dubbaad akhiin, iin ierrcha dubju chirʉm aajem, i dʉi khapeerkhaag.

²¹ Ar nem phithurm awiajã ogdʉba ʉu amachdeuta i denjo nem thum podpʉi nʉm khʉʉnagan, irua ich jup chirʉm gaai dʉi ãba ich bigaau juppiju aajem, ich dʉi ãba iek theeg nʉisimkhĩir, ich jãg ichdeujã nem thum podtarr jũrr ĩchab ich Ayau ich dʉi ãba iek theeg apitarrjo.

²² Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim.