Apocalipsis 21 - Wounaan Meu

Edjã iiur durr iiur dʉi

¹ Magtarr khur nacharam edaujã mʉg durr dʉi narr Ẽwandamau thum chi iiurig paapʉitarr aawai edjã iiurta durr iiur dʉi mua oojim. Magtarr aawai ya phũasjã chukhu ajim.

² Mʉch daúachata mua oojim, bʉ̃ʉrjã pekau chukhum khʉʉn phobor, Jerusalén chi iiur, ʉ̃gthar Ẽwandam sim aarmua eeg urum. Mag urumʉn ya ʉʉi wajap chihoowi ich jaai dʉi jua pʉraagpamjo, sĩi thum chi khĩir khaugamta urajim.

³ Magbarm ee ʉ̃gtharmua nem theeg õor iekjo, “Ĩsin chadau Ẽwandaman õor ee dau daauta nʉrrʉmgui” ajim, “am kha ogdʉba ich mag sĩerraag. Am i phoborkha nʉisiewai jũrr ichta chadcha am Ẽwandamkha sĩsiju.

⁴ Ichdeuta thumaa wajapha am dauchojã jãrpʉpʉi aju. Mam chan tag õor meebam, õor dauhi paraajã abam. Tag chikham ʉapeperjã aba, gaai machagjã tag khaugbajugui” ajim, “ya warr nem thʉnarr thum isegpʉiwi thum chi iiur apha thʉnaawai.”

⁵ Magbaawai chi khu juupjem gaai oo sĩerrau, “Muata nem thʉnʉm thum chi iiurig paapäaijem” a iekhajim. Mag iekhapʉiwia, jũrr mʉrʉgta, —Cha mua iekhabarm iek thumaa phã athá. Jãan chadcharam iek aawai pãrau ag gaai ʉkhaju aai nʉmgui ajim.

⁶ Magtarr khur deeu mʉrʉg, —Ya nem thumaa aaipa sĩsimgui ajim. Mʉchpaita nacharam ẽsapdau Ajonaa chi ãbmiecharam Zetajo chitʉm; mʉchta nem thum ompaaju nawe chirajim, mʉg durr owiajã mʉchin ich mag chirsijugui ajim. Chi obisi nʉm khʉʉnag mua sĩi ich jãg par õor iiupiejem do khumdʉ ober sim eem dopiju.

⁷ Ar ogkhaba amach garmua podpʉi nʉm khʉʉnaun, mʉ juagam nem thʉnʉm thum amachdeuta auju. Mʉchta am Ẽwandamkha chirsiewai jũrr amach mʉ chaainkha nʉisijugui ajim.

⁸ Mamʉ mʉ iek jawaag khuwʉʉm khʉʉn, mʉ iek ʉkhaba aajem khʉʉn, mua khõchkhabam nem waaujem khʉʉn, juau õor thõojem khʉʉn, dich õor khabam dʉi khapes aajem khʉʉn, benkhʉʉn, parhooba juau nem wautarragta mʉrʉgamjo jeeujem khʉʉn, maimua thum õor seu paraam khʉʉn, magʉm khʉʉnan thum thʉrrdo õtdau azufre dʉi waaureu uu wejom eeta mua barkhʉʉipʉijugui ajim. Mamta biek numiimua paawai thõo chaarcha thõ nʉmʉugui a iekhajim.

Jerusalén chi iiur

⁹ Maimua Ẽwandam chognaan siete narr khʉʉnau amach pipied agjo jarr siete wai narr ee ãbmiecha agua õor khaibag wauju waiberr khʉʉn eem ãb beewi mʉrʉg, —Mau pidú, mua pʉrʉg oopikhimgui ajim, Cordero ʉʉi paju.

¹⁰ Maimua Ẽwandam Akharau mag mʉrʉg oopipigmamua chadcha durrsĩ pooma ʉ̃gthaa sim gaai mʉ athaadejim, chi Ẽwandam chogau. Mag arrwi phobor pooma sim mʉrʉg oopijim, ʉ̃gtharm phobor Jerusalén anʉm. Phobor pom mag simta ʉ̃gthar ich Ẽwandam sim aarmua eeg uraawai, sĩi arar urajim.

¹¹ Ag bʉ araragan, sĩi ooihmʉ mokdau wajaphamjota khitajim, mokdau jaspe aajemjo, dau bʉ̃ʉ vidriojo.

¹² Mag simʉn ʉ̃gthaa thuur phʉʉrdʉ sĩejim. Mag thuur phʉʉrdʉ simta puertdi khapan doce sĩejim. Makhʉʉn puertdi khapanagpierr Ẽwandam chognaanjã agpierr ãhãbdo dʉnʉnʉid ajim, chi thʉanaan. Mag dʉi ĩchab warrgar jooi Israel khararr chaain doce narr khʉʉn thʉ̃rjã mag puertdipierr phãkha sĩsid ajim.

¹³ Ed obeerjem gar puertdi thãrjup wai sĩejim; ed burrjem gar agjo thãrjup, margajãrm bi garjã thãrjup, maimua baggajãrm bi garjã agjo puertdi thãrjup sĩejim.

¹⁴ Mag phobor igaau thuur phʉʉrdʉ simʉn, mokdau por dapag doce nʉm gaaita khaarkha thʉnaajim. Mag mok por nʉmpierr ĩchab Corderoou ich i jaaumkhĩir doce jʉr autarr khʉʉn thʉ̃rjã gaai phãkha sĩsid ajim.

¹⁵ Maagwai chi mag mʉ dʉi iekha sĩerrau padam phĩr den jua ee wai sĩejim, agua chi phobor chach phʉʉrdʉpʉiwia, thum chi puertdi mag sĩsid arrjã chachkhapʉinaa chi phobor igaau thuur phʉʉrdʉ sĩerrjã chachpäaig.

¹⁶ Mag phoboron sĩi thum jã agdaujoo iwiir duraajã khaba, chi jã pheeugjã chi jã durag dʉi ãbata sĩejim. Maimua chadcha chi phobor chachbaadejim. Mag chach oowai, chi jã durag, chi jã ʉ̃gthaag maimua chi jã pheeugjã thum agdaujo ich mag dos mil doscientos kilómetros sĩejim.

¹⁷ Maimua jũrr chi phobor igaau thuur phʉʉrdʉ simjã chachbaadejim. Majã chachpʉinaa oowai, sesenta y cinco metros sĩejim, chi parrg appai. Mag irua chach sĩerr, sĩi maach ich mʉig jẽb gayam khʉʉn chach ajim.

¹⁸ Chi phobor igaau thuur phʉʉrdʉ sĩerr mokdau jaspe anʉm denta wau sĩejim, maagwai chi phobor phĩr chaar den ajim. Mag phĩr chaar den aawaita sĩi vidrio memerkhog chukhumjota sĩejim.

¹⁹ Chi phobor igaau thuur phʉʉrdʉ sim bʉ gaai ĩchab mokdau khĩirpierram den ooihmʉ wau sĩsid ajim. Nacharam jaspe den ajim; numiim, zafiro den; thãrjupam, ágata den; jayapam, esmeralda den;

²⁰ cincoom, ónice den; seim, cornalina den; sieteem crisólito den; ochoom, berilo den; nueveem, topacio den, diesam, crisoprasa den; onceem, jacinto den; maimua doceem, amatista den ajim.

²¹ Chi puertdi doce narrjã ĩchab perlas denta waukha sĩsid ajim. Mag chi puertdi khapanagjã chi perlas khapanagpierr narr aawai puertdipierr perla khĩir ãbpaimua wau sĩsid ajim. Maagwai mag phobor eem kaaijã chi wajapcharamjã ĩchab phĩr chaar den aawai sĩi vidriojo dau bʉ̃ʉmjota khitajim.

²² Mag phobor ee mua bʉ̃ʉrjã Ẽwandamag jeeujem di oobajim, ich maach Por Ẽwandam thumaam khʉʉn khãaijã jua theeg ʉ̃rpai sĩerrʉmpaita Ẽwandamag jeeujem di anaa ĩchab ichpaita chi Cordero aawai.

²³ Ich Ẽwandamaupaita ich mor gaaimua arar wʉʉ jẽer wai sĩewai mag phobor chan mʉg ãsdawam edaujã chukhu ni edaram edaujã chukhu sim. I lamparaan ĩchab chi Corderodampaiu.

²⁴ Mag sĩewai ĩchab phobor durrpierr thʉnʉmjã sĩi mag phobor arar wʉʉ jẽer thʉnʉm bʉʉgta wenʉrraju anaabá. Maagwai ĩchab mʉg jẽb gayam reinaanaujã mag phoborta tho iyʉʉ aju aajem.

²⁵ Mag phobor eem puertdi chan phãraajã khaugba ich mag sĩerraju aajem. Mag nʉm dʉi ĩchab edau khewaajã khaugba sĩerraawai, edau khĩejã chukhu aju anaabá.

²⁶ Phobor durrpierram khʉʉnauta mag phobor igwia, “Keena, jãgjom phobor chan chukhum” a iekhanaa, woun eugarmjo wajapha i ig iyʉʉ aju anʉm.

²⁷ Mag phobor ee chan ĩchab bʉ̃ʉrjã maach inaam nem chan dubbam. Nem maach dawag khabam waaujem khʉʉnjã dubba, ni sĩi chikham khũguurjem khʉʉnjã pod dubbam. Ãba chi dubju khʉʉnan, Cordero ẽsap gaai thʉ̃r phãkha thʉnʉm khʉʉnpaita dubwi ich mag i dʉi iiu wenʉrraju aajem.