Apocalipsis 20 - Wounaan Meu

Mil años

¹ Maimua Ẽwandam chogta ʉ̃gtharmua eeg urum mua oojim. Magua ich jua ee jẽbdi ierr nem pom thʉrrdojo sim eem yabme waidurajim, caden pom sim dʉi.

² Mag beewia, mag nem pom õoirjo sim pʉr athaichejim. Mag õoirjo simta warrgarwe “nemkhõr” a thʉ̃ʉrjem; ich arpai ĩchab mepeer a thʉ̃rnaa Satanás a thʉ̃ʉrjem. Mag pʉr auwi mil años sĩi ibʉʉr sĩujim.

³ Mag ibʉʉrnaa mag ierr jẽbdijo simta thʉrrdojo wejom ee barpʉiwi wajapha phãar sĩujim, mag mil años pa nʉm ora tag ich mag durrpierr õor khũgur nʉrram ugua. Maimua mag mil años dichdimaawaita deeu khũchpaim athee ẽerpʉiju ajim.

⁴ Maimua khu juupjem khapan thʉnʉmjã mua oojim. Ag gaai ohood aphobaadejim, amach garmua warm khʉʉn khaibag waumkhĩir wa am kõit khãijã iekhamkhĩir ich Jooirau iek theeg apitarr khʉʉn. Ĩchab maig naajim, Jesucristoou Ẽwandam iek jaautarr ʉkhawia jũrr amach paarmua jaau durrum gaaimua chikhamnau o thʉrrphe khechtarr khʉʉn akhaar. Makhʉʉnta ĩchab mag phũas eemua khum chi jojothorjo sim oberchetarragjã jeeuba ni amach dag gaai wa jua gaai khãijã i thʉ̃r phãpiba arr khʉʉnau. Makhʉʉnta deeu iiu nʉisiwi Cristo dʉi ãba mil años chi pornaankha nʉisijim.

⁵ Ma nacha iiu phiidʉtkha nʉm ajim. Mamʉ warm khʉʉn ar Ẽwandam iek ʉkhaba khechmarr khʉʉn chan tag iiuba, ich mag nʉisiwi, mag mil años dichdimaawaita ũwaai deeu iiu nʉisijim.

⁶ Mag nacha õor iiu phiidʉtkha nʉm ee dʉi phiidʉtkhabarm khʉʉnan, chadcha oneeta ajurau. Mag iiu nʉisim chan jũrr warm khʉʉn phiriutkha auwi khĩmie durr barkhʉʉi nʉm edjã am chig abaju. Mag khĩmie durr barpʉi nʉmta, maach meetarrta deeu meeju a jaau simʉu. Magbarmʉn mag warm khʉʉn khĩmie durr wet thʉnʉm daar, Ẽwandam atheeta phadnaankhanaa Cristo atheejã phadnaankha wenʉrrʉmua ich Cristo dʉi ãba mil años chi pornaankha nʉisiju.

Õtdau uu wejom ee mepeer barbapʉim ootarr

⁷ Mag amachta chi pornaankha nʉm ee mil años dichdimaawaita mag mepeer Satanás ibʉʉr wai narrjã deeu ẽerpʉiju aajem.

⁸ Mag ich ẽerbapäaiwaita, durrpierr õor khũgur nʉrrʉmua, Gog durram khʉʉn dʉi Magog durram khʉʉnpa ãbam aig biirdʉ auju anaabá, mag biirdʉnaa Ẽwandam igar nʉm khʉʉn dʉi werbʉag. Mag chi werbʉju anʉm khʉʉnan, khapaana sĩi phũas igaau mosdau thʉnʉmjota thʉnaajim, chi khapanag.

⁹ Makhʉʉnta mag ãba biirdʉnaa ereuwi, sĩi Ẽwandam chaain irua ʉ̃rcha jãsenecha aajem phobor dʉi phʉʉr thuur auwimajierram. Mamʉ amau mag phʉʉr thuur atham ee, werbʉbamjo arrta, Ẽwandamau ʉ̃gtharmua õtdau khĩirta noseg daujo khʉipiwi sĩi warre phaa khechpʉijim.

¹⁰ Magbaawai ĩchab chi mepeer mag õor khũgur sĩerrjã jũrr warm khʉʉn numí mag khum chi jojothorjo sĩerr dʉi ãbakhai chi seukha nem jaaumie dʉi narr aar barpʉijim, thʉrrdo ee õtdau khĩirta azufre dʉi waaureu uu wejom ee, mʉg atag pawiajã ich mag õtkhierr machgau dau aphʉʉ idawaa wenʉrramkhĩir.

Khu juupjem pom bäpphä sim khĩirphee warre dich khĩircha jaauju

¹¹ Maimua mua oojim ĩchab, khu juupjem pooma bäpphä sim; ag gaai chi woun oo sĩerrjã mua oojim. Mag khu juupjem gaai oo sim oowi, mʉg durr edaujã dʉi sĩi degolp chukkhu aphobaadejim. Tag oojã ooba, ich mag nʉisijim.

^12-13 Õor nawe khechmarr khʉʉnjã Ẽwandam khĩirphee bʉjãaupai dʉnʉnʉid thʉnʉm mua oojim, mʉg jẽb gaai aawai chi thierrnaan arr khʉʉnpa. Mag ich khĩirphee õor phʉʉrbaadem dʉi, aig libro thʉnarr gaai eeureutkha oopijim. Mag eeureutkha oopiwiata mag libro thʉnarr gaai phã sĩsid arrjo thumaa mʉg jẽb gaai aawai amachdeu nem waumatarrpierr am dau aphʉʉ aju jaaumajim. Pari magaagan, khech nʉm khʉʉn akhaar naajem aarmuajã thumaa Ẽwandam dakhĩir oberchejierram, phũas ee khãijã okhoowi khechtarr khʉʉnpa. Mag thum ãbam aig nʉisiewaita, chadcha am dʉi Ẽwandamau amachdeu nem waumaajerrpierr ajim. Mamʉ deeum libro sĩejim ĩchab; mag gaaita thʉnʉm, õor ich mag iiu wenʉrraju khʉʉn thʉ̃r.

^14-15 Mag ẽsap õor iiu wenʉrraju jaau sim gaai thʉ̃r oberba abarm khʉʉnan, mag thʉrrdo õtdaujo uu wejom eeta barkhʉʉipʉijim, ajapcharan khĩmie durrma. Mag barkhʉʉi nʉmta, mʉg jẽb gaai meewi deeu ũwaai mee nʉm aajem. Maigta ĩchab õor denjo maach dajẽgpiejerrjã tag dajẽgba aadeju, ichpa chi khaigbam khʉʉn dʉi mag thʉrrdo õtdaujo wejom ee barbapäaiwai.