Apocalipsis 2 - Wounaan Meu

Asia durr phobor siete narr ee iglesiapierr iek jaaupʉitarr 1. Efeso phobor eem pastorrag iek jaaupʉitarr

¹ Efeso phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ich chi iglesia siete nʉmpierr nʉrranaa ich juachaar garmua pãar chi pastornaan siete nʉmjã burrpiba wai sĩejemuata pʉrʉg ich imeerba mʉg ẽsap phã deepʉipijim. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau:

² I iek pua nem wau sim thumaa irua khaphʉ chirʉm aajem. Irua khaphʉ chirʉm aajem, pʉ phidag chadcha nem theeg sim, mamʉ pua magʉmjã igba ich mag jua jeeuba phidkha khitaajem. Pʉch khapeenau nem khaigba waauwaijã pua sĩi khĩuu ãwatba aajemjã irua khapphʉ chirʉm aajem. Ar amach iiupai amta Ẽwandamau ich i jaaumkhĩir jʉr aujim aajem khʉʉn seu pʉr awaagjã am dʉi jãau nʉmjo par iekhaupai juapá chach oowia chadcha am seunemeg pʉr autarrjã irua khaphʉ chirʉm aajem.

³ I iek pʉ chadcha i gaaimua phithur khitaajem aajem. Mamʉ magʉmjã pʉ khĩir bʉ̃ʉ aa khaugba ni khajewaajã khaugba phidkha khitaajem aajem.

⁴ Pʉ mag khitab mamʉ, i iek irua warr pʉ pʉch sĩerrjo ooba chirʉm aajem. ¿Khan jãgwi pua jãg warramjocha i khõchkhaba sĩ? a sim ichdeu.

⁵ Magua irua pʉrʉg, khĩir eyaa abá a sim; i iek warr pʉ jãg khaba sĩejim aajem. Ãsie ewag pʉch khaibag khĩirjuwia iseg jeeubá, warr pʉchdeu i khõsi aajerrjo i khõsi aag. Mamʉ pua magbamʉn, pʉ aar mawia i iek irua warre pʉ iglesia lámpara sorjo isegpʉiju aajem, tag igba aag.

⁶ Mamʉ jãg irua Nicolás igar nʉm khʉʉnau nem jaau wenʉrrʉm ichdeujã khõchkhaba simjo puajã am igar khaba sĩewai ʉu sim aajem. Pua jãg sim aig i iek ichjã pʉ igar chirʉm aajem.

⁷ Magnaa ichdeupai, “Ar chi jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag nem jaau sim ũrbat” a sim. Ar phithurg au wenʉrrawiajã ich mag i khõsi wenʉrrʉm khʉʉnan ʉ̃gthar ich Ẽwandam dʉicha wenʉrraju aajem. Makhʉʉnag irua Ẽwandam nemjĩir gayam nemjõ jõpiju aajem, õor ich mag iiu wenʉrrapiejem nemjõ.

2. Esmirna phobor eem pastorrag iek jaaupʉitarr

⁸ Esmirna phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan ich chi Nacharam anaa chi Ãbmiecharam aajemuata pʉrʉg ich imeerba mʉg ẽsap phã deepʉipijim; ajapcharan ar meewi deeu iiu phiidʉtarrauma. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau:

⁹ I iek pua nem wau sim thum khaphʉnaa, pʉ wajappha i gaaimua phithurg au khitaajemjã irua khaphʉ chirʉm aajem. I iek irua khaphʉ chirʉm aajem, pʉʉn chadcha dau aphʉʉ khitʉm. Mamʉ ʉ̃gtharin pʉʉn nem wajapham paraam aajem. Ar amach iiupain amta judionaan aawai Ẽwandam chaainau aajem khʉʉnau pʉ eugar parhooba iekhaajemjã ĩchab irua khaphʉ chirʉm aajem. Mamʉ pʉrʉg am iek asekaspiba sim. Jãkhʉʉnan sĩi dosãt igar naawaita jãg thʉnʉm anaabá.

¹⁰ I iek pʉch dau aphʉʉ ajujã oob ogkham aajem. Chadcha pãar Ẽwandam dʉi ubʉ nʉm khap aag awi pãar eem ãaur khʉʉn dosãtau cárcel degjã dubpʉimaju anaabá. Maagwai tagam khʉʉn ẽudeejã ẽkhawi dʉrrcha phithurg aupiju aajem. Pari magʉmjã igba ich dʉita ich mag ubʉ naapi sim. Mag wenʉrrʉmʉn, ʉ̃gthar pawiajã ich mag pãar i dʉi nʉisiju aajem.

¹¹ Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ogkhaba ʉu magʉm thum ãwatpʉi nʉm khʉʉnan, warm khʉʉn khĩmie durr wet thʉnʉm daar, Ẽwandamau jũrr ich aarta phe auju aajem.

3. Pérgamo phobor eem pastorrag iek jaaupʉitarr

¹² Pérgamo phobor eem pastor: Maach Por Jesucristoouta ich imeerba jaaupitarr aawai muata pʉrʉgjã mʉg ẽsap phã chirʉm. Mamʉ chi iekhan mag ich i ee espaar khẽu mii khitʉm phõpá garm magwe dee khitʉm wai sĩejemuata pʉrʉg ich imeerba mʉg ẽsap gaai mʉg jaaupʉipijim. Magtarr aawai pʉrʉg jaaukhim, chamʉ́ pʉ atheem iek pʉrʉg jaaupitarrau:

¹³ I iek pua nem waaujem thumaa irua khaphʉ chirʉm aajem. Pʉ sim phobor dosãt phobor anaabá. Mamʉ irua khaphʉ chirʉm aajem, magʉm ãba pua ich kha ogdʉba khitʉm. Irua khaphʉ chirʉm aajem, ar Antipas khararrau ich daúacha oowia ich iek jaau khitʉm athee chi dosãt igar thʉnarr khʉʉnau i thõo nʉm jaarjã, pua ãsie pʉchdeu ich iek ʉkhatarrjã isegba chadcha ĩsjã agtha ich mag ich kha ogdʉba khitʉm.

¹⁴ Mamʉ magʉm ãba, i iek pʉ khaigba simjã irua oo chirʉm aajem. Maguata pua Balaam igar nʉm khʉʉnagjã iekhaba sĩi oo wai sim anaabá. Ich jãg Balamau ajim anaabá, deeum woun Balac aajerrag israelnaanag nem khaigba waupi jaaujerr. Ich jãgua ajim anaabá, ar amach jua wautarrta ẽwandamkha wai nʉmʉg jewaag ag khĩirphee nemchaain thorrphe wai narr nemek modjã khopi jaaunaa ĩchab parhooba dich õor khabam dʉijã khapes aju aai nʉm a jaautarr. Pua mag khaphʉ simta mag Balaam igar nʉm khʉʉnag bʉ̃ʉrjã iekhaba sim aajem.

¹⁵ Mamʉ i iek mag appaijã khaba, pʉch iglesia ee Nicolaitanaan igar nʉm khʉʉnjã jʉrwerppʉiba, pua sĩi oo wai sim anaabá. Nicolaitanaanau nem jaau nʉm chan irua khõchkhaba chitʉm aajem.

¹⁶ Magua irua pʉrʉg, “Ãsie ewag pʉch khaibag khĩirjuwia Ẽwandamag iseg jeeubá” a sim. Magbaju atheen, pʉ aar mawia ich i eem esparaupai warag pãach dʉipata werbʉimaju jaau sim.

¹⁷ Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim. Ar ogkhaba ʉu magʉm thum ãwatbapʉimʉg, ʉ̃gthar pawiajã mʉg jẽb gaaim nem khoojem khĩir khabamta khopinaa mokdaudam bäphä khitʉm gaai thʉ̃r iiur phã khitʉmjã ichdeucha deeju aajem. Mag thʉ̃r chan bigaaum khʉʉnau khaugba, ãba chi athamuapaita khaphʉ aju aajem.

4. Tiatira phobor eem pastorrag iek jaaupʉitarr

¹⁸ Tiatira phobor eem pastor: Maach Por Jesucristoouta ich imeerba jaaupitarr aawai muata pʉrʉg mʉg ẽsap phã chirʉm. Mamʉ chi iekhan Ẽwandam Iewaa ar dau sĩi õtdau uu thʉnʉmjonaa bʉjã sĩi broncejo phuunaa bʉpá theeg sĩerrʉmuata pʉrʉg mʉg iek jaaupʉipijim. Magtarr aawai chamʉ́ pʉ atheem iek jaaupitarrau:

¹⁹ I iek irua khaphʉ chirʉm aajem pua nem wau sim. I iek pua õor kha khõsinaa pʉchdeu ich iek ʉkhatarrjã chadcha isegba ogdʉba ʉkha sim aajem. Pua nem waauwaijã khĩir thũu waaujem aajem, waumaphamjã aba. Maimua i iek ĩs pua warram khãaijã ʉ̃rcha nem wau sim aajem, maimuajã wajapcha.

²⁰ Mamʉ par pʉ mag sim ãba, pʉ jaauju paraa sim aajem: Pua ʉdʉraata Jezabelag i chaain khũgurpi sim aajem. ¿Jãgwi? Ichdeupai iita Ẽwandam i jaaumie awi ʉdʉraa dich õor khabam dʉijã khapes aju aai nʉm a jaaupinaa ĩchab Ẽwandam chaar khabamʉg jewaag nemek mod wai narrjã khopi jaau simjã bʉ̃ʉrjã irig iekhaba ʉdʉraa mag jaaupiewaima.

²¹ Í jãg simʉn irua sĩi oo chirʉm aajem, chi Jezabelau jãg nem khaigba wau sim thumaa ãsie ewag khĩirjuwia magʉm khaibag ichig chugpaapi jeeumkhĩir. Mamʉ magʉmta jeeujojoopaijã khaba, ni jãg sĩi emkhooin parhoobam dʉi sĩerrʉmjã ich jua pʉaba, ich agtha sĩerrʉm anʉm.

²² Ũrbá, mua pʉrʉg jaaukhim: Jooirau jaauwai ich jãg ʉrrʉm gaaimua warre wajap i dau aug waupiju aajem; maimua ar irua nem jaau sim igarnaa i dʉi khapes arr khʉʉnjã amach khaibag iseg jeeuwia ich igar theerbabamʉn, ĩchab irua amjã wajap dau aug auwi am okhĩirjug pooma ich agjo apiju aajem.

²³ I chaainjã warre khechpʉiju anaabá. Mag oobaawaita thum iglesia nʉnʉidʉm eem khʉʉnau khakhapdo aju anaabá, ichdeuta chadcha õor thumaam khʉʉn thãar khaphʉnaa am khĩirjugjã khaphʉ chitʉm. I iek õrau khaphʉ aju aajem ĩchab, amachdeu nem waumarrpierr ichdeuta am dʉijã amachdeu aajerrjo aju.

²⁴ Mamʉ i iek pãar ar dosãt iekta õrau amachdeupain chadcharam iek awi agʉg ee thʉnarr khʉʉn igar bʉ̃ʉrjã wetba arr khʉʉnag chan irua tag atcha nem waupi jaaubam aajem.

²⁵ Mamʉ ichiita ich deeu mʉg jẽb gaai pãach awaan bee nʉm ora, pãachdeu ich iek ũrwia ʉkhatarran warag ogdʉba ich jãg ʉkhapi sim.

²⁶ Ar ewag wetba warag amachdeuta magʉm thum ãwatpʉiwi ichdeu nem jaau simpai wau wenʉrrʉm khʉʉnag irua ich jãg ich Ayau ichjã iek theeg apitarrjo amjã iek theeg apiju aajem, ich dʉi ãba mʉg durr gaai õor thum thʉnʉm porkhamkhĩir.

²⁷ Mag amachta chi pornaankha nʉisiewai, amauta mʉg jẽb gayam khʉʉn dʉi nem jua theeg amach garmuata thũr thorrbar sĩubarmjo dajẽk wai nʉisiju anaabá.

²⁸ I iek ar chi mag nʉm khʉʉnag irua ĩchab amag edpherr garm phĩdagjã deeju aajem; ajapcharan ichpaita am denkhapi auju anaabá.

²⁹ Magnaa ichdeupai, “Ar jʉ̃g ʉ̃rʉʉ nʉm khʉʉnau Ẽwandam Akharau mʉkhʉʉn iglesiaag jaau sim ũrbat” a sim.