Apocalipsis 18 - Wounaan Meu

Babilonia eegar patarr

¹ Magtarr khur mua oo nʉʉ aawai Ẽwandam chog dewamta ʉ̃gtharmua beem oojim. Mag simʉn ĩchab chi jua thierr aawai nem iek theeg sĩejim. Mag pierrwai jẽben sĩita araraa aadejim, i mor gaaimua.

² Magua thet ähäagmamua mag sĩejim: “¡Ya Babilonia phoboron eegar pajim! Ĩsin ya sĩi pabʉ ee sĩerrjeem khʉʉn diiu; mepeen khaigbam khĩirpierr naajem di anaa pabʉ eem nem maach khoojem khʉʉn diigta pabaadebahab” a sĩejim.

³ “Warran iin chadcha jãg ich parhooba deeum gaaijã pʉrpʉr sĩerrarr gaaimua durrpierram khʉʉnta nag denjo thumaa khech wai sim dʉi ichig paa wai sĩejim. Reinaanagjã amach ʉʉi dʉímjo ich dʉita khapes apiwi, nem jua paraam khʉʉnagjã sĩi mag ag ee nem parhooba amachdeu khõchagpierr nem waupi sim gaaimua warag phatkhon paraam khʉʉnag paapʉijim. Mamʉ ich paarmua maagjerrta ĩsin jũrr ichta eegar pabaadem” a jaaumajim.

⁴ Mag chi Ẽwandam chog iekha obaadem ee, deeu ʉ̃gtharmua woun iekjo, “Pãar mʉ chaainkha nʉm khʉʉn, jãg phobor eemua oberwi chawag ereubaadet” ajim. “Magbamʉn pãachpa dʉi amau pekau wau nʉm ee burrwi paai oberbaadeewai, pãachpata phithurg ee mawi dau aug wauju.

⁵ Jãg phoboron sĩi pekau pooma simgui” ajim. “I pekau pomagan sĩi ʉ̃gthaa edjã ee sĩmii wejomjo sim. Maagwai jãg nem khaigbam parhooba ichdeu waum aig wau sim gaaimua, mua i gaai jua khʉaba deejugui” ajim ich Ẽwandamau.

⁶ Magnaa jũrr ich chognaanagta, “Ichdeu chikham dʉi aajerrjo abat” ajim, “jũrr i dʉi. Ichdeu nem khaigba waaujerr ʉ̃r jũrr ag khãai atcha biek numí i gaai deebat. Ichdeu chikhamnag dopiejerr khãaijã jũrr athuucha nem achag waaureu deebat.

⁷ Jãg ichdeupai ich thowi parhooba ichdeu khõchagpierr aajerr paar, ich agjo i gaai mas waunaa i dau aug waupibat” ajim. “Iruan ichdeupai ich igwi, ‘Mʉʉn mʉiguin rey ʉʉijota ʉm, mʉ chan khoopaa ʉʉi khabam; mʉg ʉrrʉm chan mʉ chan bʉ̃ʉrjã dau aphʉʉ ʉrrabaju’ a iekhaajem.

⁸ Mamʉ mua mag chirʉmgui” ajim ich Ẽwandamau: “Ich jãg ʉrrʉm paar i ed beeju paar sim. Mag ed, khãai ãbpaim ee i gaai mas aju. Mua i gaai nem khaigbam khĩir pogkhe chachmamua, õor pom opiwia, jãdau theegjã burrpijugui” ajim. “Mʉch pãar Por chi jua thierrauchata mag i dau aphʉʉ api chiraawai, wajap i dauhi ãrpiwi, ãbmiecha paawai chi phoborjã thum sĩi orpʉijugui” ajim ich Ẽwandamaucha.

⁹ Mag phobor orbapäaiwai, reinaan ag ee amach ʉʉin dʉímjo khapes awi parhooba amachdeu ampierr arr khʉʉnau ʉapeperkhamua, i athee bĩeju anaabá, chi naar appai ʉ̃gthaa edjã ee jĩu thʉnʉm oowia.

¹⁰ Mag oowia degolp amach gaaijã agjo aju khĩirjuwi, aigjã beeba, warp amach nʉm aarpaimua, “¡Eh! ¡Aay, Babilonia! Phobor poomanaa chi jua thierr arrta ĩs chad pʉ chan at oobam. Sĩi seukhabarmjo abarm ee pʉ gayan Ẽwandamau masta deebarmgui” aju jũrram khʉʉnau.

¹¹ Ĩchab nem jua paraam khʉʉnaujã amach daúa phobor magbarm oobaawai, bĩe nʉmua ʉapeper aju anʉm, amachdeu oowai ya tag amach nem per auju khʉʉn chukhu aphobaadem khĩirjuwia.

¹² Jãgbaawai, nem inag pom waibeewiajã, “¿Khaíu per athaju? Mʉig per aaujeejim: phĩr, phatkhon, mokdau parhẽpagkham, perlas; put wajapham lino den seda den dʉi sĩi phuriinaa khichphe khĩirkha sĩsidʉm; pa thũpham khĩirpierr; marfil den nem wau sĩsidʉm, pa wajapham den, jierr den, cobre den maimua mármol den nem wau sĩsidʉm.”

¹³ Maimua amach wir aigpai, “¿Khaíu athajugui?” aju, “thũpag pom phebee nʉm, canelajom, incienso, mirra, jʉ̃gdee; vino, nemkhau, arin, trigo; nemchaain daphʉm nem uajem, cabaai, oveja, carro, maimua par phidkhamkhĩir õor per nʉmjã, ¿khaíuta jãgʉm nem thum awaagáwa?” aju, amach odegpai.

¹⁴ Mag nʉmua chi phoborogta wounagamjo, “Nemjõ sĩphamjo pua ʉ̃rcha pii aajerr ya ĩs chan tag chukhu aademgui” aju. “Pʉ nem ooimʉ sĩsid arrjã thum phatkhonpa ĩsin ya pua okhoom iekchata okhoobapʉim. Jãgbarm chan pua tag oog khabamgui” aju, mag chi phobor uu thʉnʉmʉgta.

¹⁵ Maimua jũrr nem jua paraam khʉʉn magʉm thum per nʉmua mag phobor gaaimua warag phatkhon paraamʉg patarr khʉʉnaujã amachdeu mag oobaawai, ĩchab amach gaaijã agjo aju khĩirjuwia, aigjã beeba, warp amach nʉm aarpaimuata bĩenaa ʉapeperkhamua,

¹⁶ “¡Eh! ¡Aay, phobor pooma eegar pajim!” aju. “Pʉʉn chadcha phobor ooimʉganaa, sĩi ʉʉi khajũa wajapham lino den jũanaa, khĩirpierr chi phurjã jũanaa, khichphe khĩirjã jũa simjota sĩejim. Mag jũanaa chihoo phĩr den, perlas, maimua mokdau parhẽpagkhampa jũa simjo sĩerrta,

¹⁷ jopcha sĩi seukha nʉmjo arr ee phatkhon pooma okhoobarmgui” aju. Magbaawai agjo barco eem capitannaan, marinernaan maimua thum ar dojãrr jorrjeemuata phatkhon khĩirdamjo oojem khʉʉnjã thum warppai nʉisiju anaabá.

¹⁸ Mam warppaimua mag phobor uurdʉ thʉnʉm naar edjã ee phʉis jĩu thʉnʉm oowia, thet ähäakhamua, “¿Jamta deeum phobor ich mʉgjokham maadeu oog agá?” aju anʉm.

¹⁹ Magnaa chadcha amach gaai masi nʉm õrag oomkhĩir, amach por ee jẽb phopʉinaa ʉapeperkham dʉi bĩe nʉmua, “¡Eh! ¡Aay, phobor pooma khitarr! Maar thum phũas ee barco paraam khʉʉn, pʉ gaaimuata chadcha maar riknaanag paaukhajimgui” aju. “Magtarrta jopcha arr ee pʉʉn warreta eegar pabaademgui” aju.

²⁰ Mamʉ warm khʉʉn mag bĩephoo thʉnʉm daar, ʉ̃gtharm magwe onee abat. Onee abat ĩchab Ẽwandam chaain, Ẽwandam i jaaumien, maimua ich i jaaumkhĩir ichdeucha jʉr autarr khʉʉnjã agjo onee abat. Ẽwandamau Babiloniapien dʉi jãgbarmua, jũrr pãarta irua dau ee aug khaugwi am gaaita mas dee sim khabahab, amachdeu pãach dʉi aajerrjo.

²¹ Magbaawai ãb Ẽwandam chog ĩchab nem jua theega simua, mok por pooma sim phũas ee barpʉinaa magjim: “Babilonia, phobor pomaam, pʉʉn cha mua mok barbapʉimjota buudimamgui” ajim.

²² “Jãgbarm chan mʉg atag pawiajã, pʉ kaaijã ee chan bʉ̃ʉrjã tag arpa sir nʉm iek ũrba, karris iekjã ũrba, ni trompeta iekjã ũrbam. Nem inag wau nʉm gaai phidkha nʉm khʉʉnjã chukhu, ni mok bã nʉm iek jʉjʉrrkhamjã tag ũrbamgui” ajim.

²³ “Pʉʉta jãgbarm chan mʉg atag pawiajã pʉ ee õtdaudam phuu dʉnʉmjã ooba, ni õor jua pʉʉrwai onee serereu aajerr iekjã ũrbam. Pʉ eem nem jua paraam khʉʉnan, chadcha mʉg durr gaai chi jua thierrnaan ajim. Maimua pʉchdeujã pua durrpierram khʉʉn sĩi khũgur wai sĩejim, pʉchdeu nem khaigba wau simta õrau khaugbam gaaimua. Pari mag sĩerrta, ya pʉʉn chadchata eegar pabaademgui” ajim.

²⁴ Magta chadcha Babilonia phobor eegar paju. Mamʉ mag i eegar pajuun, ag eeta Ẽwandam chaain bag ãrtarr pooma thʉnʉm gaaimuau. Aigta thʉnʉm: Ẽwandam i jaaumien dʉi thum i chaain bag ãrmatarr, maimua thum ar i gaaimua durrpierr chikhamnau juau thõopʉimarr khʉʉn bagjã agjo.