Apocalipsis 17 - Wounaan Meu

Chi durpathierrmie khaibag wauju jaautarr

¹ Magbaawai Ẽwandam chognaan mag jarr panhapha siete narr eem ãb beewi mʉrʉg, —Pidú mua pʉrʉg oopikhimgui ajim, chi durpathierrmie ar dojã nem pooma bau wejom ʉ̃r oo sim khaibag wauju.

² Magnaa mʉrʉg, Mʉg durr gayam reinaanau thumaam khʉʉnau ich ag ʉʉipaita wai khãijierramgui ajim. Maagwai tagam khʉʉn agjo mʉg jẽb gayam khʉʉnjã sĩi mag parhooba saak ʉʉi bag che simjo sĩerr gaaimua ichig paa wai simgui ajim.

³ Makhʉʉn thum oopieg chi Ẽwandam Akharau mʉ khãaipi atham ee, chi Ẽwandam chog mag mʉrʉg pidú a sĩerraupai jũrr mʉ warp õor chukag ee athaadejim. Mam pabaimaawai, ʉʉita sĩi mepeer pom phurii sim ʉ̃r oo sim mʉrʉg oopijim. Mepeer pom mag phur simʉn sĩi por khapan ãbam mor gaaipai siete nenernaa kach khapanjã diez wai sĩejim. Mag sim moron, sĩi ẽsapdau parhoobaaa Ẽwandam igwia iekha phã sĩsidʉmuata enter mor ipir sĩejim. Mag sim ʉ̃rta mag ʉʉi chi durpathierrmie oo sĩejim.

⁴ Ĩchab chi ʉʉijã mag simʉn, sĩi khajũa wajappha phuriimjonaa khichphe khĩirkha simta jũa sĩejim. Mag ʉ̃r ĩchab phĩrjã jũanaa, mokdau ooihmʉ nem parhẽpagkham dʉi perlas anʉmpa jũanaa, ĩchab jarrdam phĩr denkha khitʉm ee sĩi mag emkhooin dʉi ich parhooba sĩerrta khajapham nemjo inagjã chukhu ippir joi wai oo sĩejim.

⁵ I dag gaai oowai i thʉ̃r anʉmta maadeu wajappai khaugba sĩi, “Babilonia ichta phobor pomaacharam, thum chi durpathierrmie ãd anaa nem khaigbam thum mʉg jẽb gaai thʉnʉm ag ãd” a phã sĩejim.

⁶ Ya mag mʉchdeu oobaawai mua khaug athajim, sĩi Jesús iek ʉkha durrum khʉʉn pom khechbapäaiwai bag pom ãrbarm oowiata onegau sĩi don ʉʉijo oo sim.

⁷ Mag oowia mua khĩirju chirʉʉ paawai chi Ẽwandam chogau mʉrʉg, —¿Khanthee atcha khĩirju sĩma? ajim. Mua pʉrʉg jaaubajup ajim, chijã agá jãg ʉʉi, maimua khai agá ĩchab ar chi mepeer por khapan sietenaa kach khapanjã diez wai simua ich ʉ̃r chi ʉʉi juppi warrum.

⁸ Maimua chadcha mʉrʉg jaaumamua magjim: —Jãg meperan warran mʉg jẽb gaai nʉrrajim; mamʉ meewi ya tag ooba aajem. Pari mʉg atag Ẽwandamau ierr thʉrrdojo sim eemua ʉdʉraa oberpibaawai deeu nʉrraichejugui ajim. Magbaawai ar ich mag iiu wenʉrraju khʉʉn thʉ̃r phãkhamaajem ẽsap gaai warr mʉg jẽb ompaaju nawe phãba awi ag gaai thʉ̃r chukhu nʉm khʉʉn wajap dauderraa ajugui ajim, mag meetarrta deeu nʉrraichem oowi. Mag deeu iiu nʉrraichejup mamʉ, ich Ẽwandamauta warre i jua khẽgkhapʉijugui ajim, ich mag okhoom iek okhoomkhĩir.

⁹ Maimua mʉrʉg, —Wajapha ũrbá, mua pʉrʉg jaaukhimgui ajim chi Ẽwandam chogau: Jãg ãbam mor gaaipai por khapan siete nʉm pua oo sim, jã chi ʉʉi oo sim eegar durrsĩ khapanag siete nʉmta jaau simgui ajim.

¹⁰ Jãg por siete nener sim ĩchab reinaan siete narrta jaau sim. Mag reinaan siete narr eem cinco ya eegar pawia ãbpaimuata agtha ich durr jʉ̃a simgui ajim. Maagwai ãbakhai agtha reikhaju waaur sim. Mamʉ mag ãbmiecha reikhaju waaur sim reikhawijã, khũchpai mag sĩewi, warm khʉʉnjo eegar pajugui ajim.

¹¹ Mamʉ ãb simgui ajim ochoom reikhaju. Maan ar chaig mua pʉrʉg mepeer phurii sim mʉg jẽb gaai sĩerrta thõwi chukhu aadem a chirarraugui ajim. Ichpai mag reinaan siete pʉrʉg jaau chirʉm eemkha sim. Ya mag biek numí ichpai reikhabarm aigmuan chadau warre thõm iekcha thõjugui a jaaumajim mʉrʉg.

¹² Maimua mag jajawagmamua, —Mag chi mepeer kach khapan diez jʉjʉr sĩerrau ĩchab chi kach khapanagpierr agjo reinaan diez nʉmta jaau simgui a jaaumajim mʉrʉg chi Ẽwandam chogau. Makhʉʉnau agtha bʉ̃ʉrjã gobernaaba nʉm. Mamʉ Ẽwandamau amag mag chi mepeer phũas eemua oberchetarr dʉi iek theeg apijugui ajim, sĩi khũchpaim athee.

¹³ Makhʉʉn reinaan diez ãba ibepwi, mag mepeer phũas eemua oberchetarragta amach jua theeg thumaa deewi, warag amach garmuata Cordero dʉi werbʉjugui ajim.

¹⁴ Mamʉ chi Corderoou ich garmuata amach thum podpʉiju, ichta mʉg durr gaai chi thierrnaan thum thʉnʉm khʉʉn Por anaa reinaan Rey aawai. I dʉi thʉnʉm khʉʉnan, ich Ẽwandamaucha jʉr auwi amachdeu ʉkhatarr iek thãraucha ʉkha wenʉrrʉm khʉʉnau.

¹⁵ Maimua deeu mʉrʉg magjim, chi Ẽwandam chogau: —Ar pua jãg chi durpathierrmie oo sim eegar dojãjo nem pooma bau wejom oo sim chan, dojã chaar khabam. Jãan õor khapanagta jãg thʉnʉmgui ajim, durrpierram khʉʉn amach meupierr meu khĩir pogkhe.

¹⁶ Maagwai ar phũas eemua mepeer pom sim oberchetarr gaai kachjo khapan jʉjʉr diez thʉnʉmjã, i kach chaar khaba, jãkhʉʉnan reinaan i dʉi ãba mʉg durr gobernaaju khʉʉnaugui ajim. Ich jãkhʉʉnaupai jãg chi ʉʉi chi durpathierrmie oomaug aphobaademua i khaibag wawaag i ẽudeejã ẽkhaju. Maimua i jua eem nemjã khechthʉgwi, ich ap barpʉawi, i dijã orpʉijugui ajim.

¹⁷ Amau mag nʉmʉn, ich Ẽwandamau juau amag magpi sĩewaita mag amachdeu ampierr thʉnaajugui a jaaumajim. Magnaa, Maguata amau amach reinaan appai iekhawi, chi mepeer mag phũas eemua oberchetarragta amach iek theeg thum deejugui ajim, Ẽwandamau ichdeu jaautarrjo ober nʉm ora.

¹⁸ Ĩchab ar pua ʉʉi oo simjã jã chan ʉʉi chaar khabam. Jãan ar phobor ãbpai nem pom simuata mʉg jẽb gaai reinaanag thumaa ichdeuta nem khap jajaau aajem ag phoborougui ajim. Magta chi Ẽwandam chogau ichdeu oopimatarr thumaa mʉrʉg jaaumajim.