Apocalipsis 16 - Wounaan Meu

Ẽwandam khĩir machag jarr eem choopʉimam ootarr

¹ Maimua mua ũurwai mag Aai i jeeujem deg naar jĩu wejom eemuata mag Ẽwandam chognaan siete narr khʉʉnag nem theeg woun iekjo, “Ereubaadewi jãg mʉ khĩir machag jarr siete nʉm ee dojo jojoid thʉnʉm, jẽb ʉ̃r chookhʉʉibamit” ajim ich Ẽwandamaucha.

² Magbaawai chadcha ãbmua petawi ich jarr ee wai sĩerr mʉg jẽb ʉ̃r choopʉijim. Mag choobapäaiwai thum mag mepeer khum chi jojothorjo sim phũas eemua oberchetarr khĩirkha wau simʉg jeeunaa i dauchachjã wai narr khʉʉn gaai ben burrjim. Mag benen mor gaai sĩi phĩedaujo oberdʉtkhabaademta machaaga sĩejim. Mag simuan waragta õor ãrmaajeejim.

³ Maimua jũrr ẽudeemua ich jarr eem phũas ee choobapäaiwai sĩi phũas thumaa bagag pajim. Mag phũas eem do, sĩi õor meem bagjota sĩsijim. Mag bagag pabaademua ag ee nem thʉnarr thumaa khechdubjim.

⁴ Mag khur thãrjupam urum, agjo Ẽwandam chog. Maguajã warm khʉʉn denjo ich jarr eem choopʉijim. Mamʉ magua jũrr dosĩg dʉi jẽb eegarmua do khumdʉ nʉnʉidʉm ʉ̃rta choobapäaiwai, napem denjo ĩchab do thumaa bagag paapʉijim.

⁵ Magnaa mag dosĩgpierr do ãrpi sĩerraupai iekhamamua, “Ẽwandam, pʉchta bʉ̃ʉrjã pekau chukhu khitʉm; pʉchta warrgarwejã ich mag khitaawai ĩsjã ich agtha sĩerrʉmgui” a sĩejim. “Pʉchdeu am dʉi chachbarm aig, pua am dʉi nem agchata abarmgui” ajim, “amachdeu nem waumarrpierr.

⁶ Amau pʉ chaain bag ãrwi pʉ i jaaumien bagjã ãrjierram. Magtarr aawai ĩs pua jũrr amag bagchata dopibaademgui” ajim. “Jũrr amau pʉrʉg ich agjo jãgta apim khõsi naabajieb amach dʉi” a iekhamajim.

⁷ Magbaawai ĩchab ierr incienso phaajem nasãdjo wau sim aarmuata agjo Ẽwandam chogau, “Eera, jãan chadaugui” ajim. “Maar Por Ẽwandam, pʉchta thumaam khʉʉn khãai chi jua thierr; puan chadcha khĩirjug khaphʉnaa am gaai agchata abarmgui” ajim, “bʉ̃ʉrjã khaigba aba.” Ma biek thãrjupam Ẽwandam khĩir machag chootarr ajim.

⁸ Mag khur deeu chi Ẽwandam chog jarrdam dʉi beewi jũrr mʉg edau ãsdawam khĩir ʉ̃rʉʉ choopʉijim. Mag choobarm ya biek jayapam ajim. Mag edau khĩir ʉ̃r choobapäaiwai warag edau pechaaga aademua sĩi ed pechgau õor gaai mas ajim.

⁹ Mamʉ mag edaúa phaa thʉnʉʉuwi, sĩi phausumjo sĩsidʉmjã amach khaibag ãsie ewag khĩirjuwi Ẽwandamagjã chugpaapi jeeuba, ni sĩi i tho iekhajojoopaijã khabajierram. Magju khãai sĩi warag irig parhoobaa amachdeu iekham aig iekha thʉnʉʉujierram; majã ichdeuta magʉm khaibag burrpibaju akhiinjã jua theeg simʉgta mag iekhajierram.

¹⁰ Mag khur Ẽwandam chog cincoom beewi, ĩchab ichdeu jarrdam wai nʉrrarr eem mag phũas eemua mepeer oberchetarr juupjem porkhau ʉ̃r choopʉijim. Mag choobapäaiwai irua durr jʉ̃a sĩerrpierr thumaa khĩchag ee joisijim. Magbaawai õor i igar nʉm khʉʉnan gaai machgauta sĩi amach meukhĩirpaijã thetthe khabaadep aajeejim.

¹¹ Mamʉ mamagkhamjã amachdeu nem khaigba wau nʉm chan pʉajojoopaijã khaba aajeejim. Magju khãai chãddauta mor gaai sĩi phĩedaujo dau dap sĩsidʉm machgau, Ẽwandam ʉ̃gthar chiraajem dʉita khujʉrmjo warag parhoobaa irig iekha thʉnʉʉujierram.

¹² Mag khur Ẽwandam chog seim beewi, ich jarr eem dojã Eufrates aajem ʉ̃r agjo choopʉijim. Mag choobapäaiwai dojã pom simta sĩi jʉʉubaadejim, edau obeerjem garmua reinaan wedurarr khʉʉn dʉrbagkha dichamkhĩir.

¹³ Maimua mua oowai, mag nacha mepeer õoirjo sĩerr i eemua jʉcheumiejo sim oberwi, ãbakhai khum chi jojothorjo sĩerr i eemuajã oberwi, maimua ãbakhai chi seukha nem ĩgkhamie kach numpai cordero denjo jʉjʉr sĩerr ag i eemuajã agjo jʉcheumiejoo khitʉm oberjim.

¹⁴ Mag jʉcheumiejo sĩsid arr, chi mepeer akhaar ajim. Makhʉʉnaun ĩchab ag na õrau nem ooba aajempa wau wenʉrrajim. Mag wenʉrrʉmʉn mʉg jẽb gaai reinaan sĩsidʉm khʉʉn dʉi iekta dee wenʉrrajim, thumaa ãba biirdʉnaa Ẽwandam ichta thumaam khʉʉn khãaijã chi jua thierr dʉi amach werbʉju edam athee khĩir khaugaag.

¹⁵ Mag nʉm ee maach Por Jesucristooucha, “Keena, khĩir khaphʉ nʉisit; õor chikham nem jĩgkha nʉrraajemjo mʉʉn sĩi õor beebajojoo sĩerr ee degolp barchejugui” ajim. “Mag mʉ pierrwai onee aju khʉʉnan, ar daukhananaa pekaúgta bʉ̃ʉrjã amach ʉ̃rpapiba nʉm khʉʉnau. Mag nʉm aiguin aman, khajũa bäphä memerkhog chukhu jũa nʉmjota thʉnʉm. Maagwai mag ed õrau dich mor kharr ooba aawai chigaajã abajugui” ajim ichdeucha.

¹⁶ Maimua chadcha mag jʉcheumiejo sĩsid arr khʉʉnau amachdeu mʉg atag ajujo mʉ dakhĩraa wetwi mʉg jẽb gaaim reinaan ãbam aig biirdʉ aujierram werbʉag. Mag am biirdʉ narr aig hebreonaan meúa Armagedón a thʉ̃ʉrjem. Ich maigta chadcha werbʉ nʉmua Ẽwandam dʉi juapá chachju anaabá.

¹⁷ Mag khur ãbmiecha sietemua paawai, agjo deeum Ẽwandam chogau ich jarr eem sĩi ich jãg ʉ̃gthaa edjã eepai wepʉijim. Mag irua webapäaiwai, mag ʉ̃gthar Aai i jeeujem degam Santuario aarmuata nem theeg, “Ĩsin chad ya thum aaipa sĩsimgui” ajim.

¹⁸ Mag irua ya aaipabaadem abaawai, pagthʉmta dau phʉrphʉr abarmʉn jẽbʉ ahau khabaadem dʉi, sĩi iyʉʉmjo joisimua ʉʉur theegajã duui dichjim. Mag ʉʉur theeg duui dichjujo chan mʉg jẽb ompaatarr aigmua ewag pawiajã duuiba aajem.

¹⁹ Magbaademua phobor pom sim Babilonia anʉm eegarta waa sĩi jẽb thorrdʉkhʉr aademua, phoboron warreta perás thãrjup obeerpʉijim, jẽb thorrdʉbaademua. Magbaadem dʉi ĩchab deeum durrjã phobor eem di khapaana sĩi pogueu pʉamajim. Magbaawaita Ẽwandamau Babilonia phobor gaaita ʉ̃rcha jua khẽgkhapʉijim, ich pekau waaujerr khĩir okhooba wai sĩerr gaaimua.

²⁰ Mag ʉʉur theeg duuitarrau phũas ee morr phʉʉr ʉid arrjã, sĩi warag ierr paaukhabaadeewai, durrsĩ nʉnʉid arrjã ĩchab warag jẽb ee ierr paaukhabaadejim.

²¹ Magbaawai ĩchab edjã eemua sĩi noseg dau dap mokdaujo che thʉnʉisijim. Chi noseg dau chʉgag ochenta libras sĩsid ajim. Ẽwandamau mag noseg chepiwi wajappha amach dau aug waubarm oowi, õrau warag Ẽwandam thʉ̃rcha thʉ̃rnaa, parhoobaaa amachdeu iekham aig iekha thʉnʉʉujierram. Ma ajim Ẽwandam chogau ãbmiecha ich jarr eem Ẽwandam khĩir machag choobapʉim mua ootarr. Mamʉ mag mua oojim a chirʉmʉn, maan mʉg atagjã thum cha mʉchdeu jaau chirʉmjo ajuuta mʉrʉg mʉch daúacha oopimajim.