Apocalipsis 15 - Wounaan Meu

Ẽwandam chognaan siete ãbmiecha õor khaibag wauju jawaan beetarr khʉʉn

¹ Maimua deeu edaujã ee ijaaur maach dauderraa ompa joisijim. Ma, mʉg ajim: Ẽwandam chognaanta siete edjã eemua oberdʉtkhachejim. Makhʉʉnauta ãbmiecha wajappha õor dau aug waupiju khʉʉn ajim. Magbarm dʉi ĩchab ya mag amau nem thumaamua mag chach dichdimaawai Ẽwandam khĩir machagjã ich maigpai meeuju ajim.

² Mag khur mua oojim ĩchab, phũasta sĩi vidrio denjo sim igaau Ẽwandamau amachig sirmkhĩir arpa deetarr dʉi ag panhapha õor dʉnʉnʉid thʉnʉm. Makhʉʉn mag mepeer khum chi jojothorjo sim phũas eemua oberchetarragjã jeeuba, ni i khĩirkha wau simʉgjã jeeuba, ni i thʉ̃r ni i dauchachjã ʉdʉraa amach gaai phãpiba arr gaaimua mag mepeer amach garmua podtarr khʉʉn ajim.

³ Makhʉʉnau Corderota thumeukhar naajim. Mag meukhaar warrgar Ẽwandam chog Moisés khararrau phãtarr ajim. Mag amau meukhaar au narr mʉg ajim: “Ẽwandam, pʉʉn maar Porou. Pʉchta thumaam khʉʉn khãai chi jua thierrau. Pua nem wautarr thum chadcha wajaphanaa ooimʉ sim. Pua nem waaujemjo chan ni ãbmua podbam. Durr thum mʉg wejom ee pʉchta thumaam khʉʉn Reikha sĩerrʉm. Pʉ iekhan chadcharam iekhau; maimuajã puan chad nem agchata waaujem.

⁴ Señor, ¿khaíuta mʉg thʉnʉm aig pʉ ogkhabaju abarí? ¿Khaíuta bʉ̃ʉrjã pʉrʉg jeeubaju khai? Pʉch appaita bʉ̃ʉrjã pekau chukhu khitaawai durrpierram khʉʉnau beewi ãba pʉrʉgta jeeuju. Ya pua thumaam khʉʉnag jaaubarm, chijã khʉʉnta pua pʉch aar phe auju khʉʉn agá, maimua chijã khʉʉnta pua barkhʉʉiju khʉʉn agá” a aumajierram, meukharau.

⁵ Maimua mag thʉnarr khur mua oowai, ʉ̃gthar Aai i jeeujem degam Santuariota Ẽwandamau israelnaan dʉi iek deetarr iek ãkhaajem aar dawaa weeu dʉnaajim.

⁶ Mammuata makhʉʉn Ẽwandam chognaan siete khajapham nemjo amachdeu agua õor khaibag wauju jua panhapha oberchejierram. Makhʉʉnau put lino anʉm denta bʉ̃ʉrjã memerkhog chukkhu sĩi phugphugamjo sĩsidʉmta jũanaa, ichkhaarjã dakha phĩr den ãi jʉ̃ajem phurii khitʉmua ãi jʉ̃ sĩsid ajim.

⁷ Mag am oberdʉtkhabaicheewai nacha mag nemchaainjo ich paar sĩsidʉm jayap narr eem ãbmua amag amachpierr jarrdam phĩr den ãhãbdo deemajim. Makhʉʉn jarrdampierr maach Ẽwandam ichta warrgarjã ich mag sĩerrawi mʉg atagjã ich mag sĩerraju ag khĩir machgauta khajapham do denjo ipir sĩsid ajim. Mag sĩsidʉm chookhʉʉibaadeewaita ichdeu chachmampierr nem khĩir pogkhe obermaju.

⁸ Mag jarr amachpierr ãhãbdo jigbapäaiwai Ẽwandam chi wajaug sĩerrʉmua ich iiu mag Santuario ee naar khĩ joppijim. Mag Aai i jeeujem deg chi Ẽwandam chognaan siete narr khʉʉnau amachpierr nem khĩir pogkhe chachmamua, thum obeerpʉibam aig chan pod ni ãbjã dubju khaba aajeejim.