Apocalipsis 14 - Wounaan Meu

144,000 meukhaar au narr khʉʉn

¹ Magtarr khur mua oo nʉʉ aawai ich Jooi chi Cordero chaarta durrsĩ Sión anʉm gaai oodʉnʉm mua oojim; ajapcharan ich Jesuma. I dʉi õor khapan ciento cuarenta y cuatro mil naajim. Mag Cordero dʉi nʉm khʉʉnan ĩchab thumaam khʉʉnau i thʉ̃rta i Aai thʉ̃r dʉi amach dag gaai phãkhanaa ag panhappha sĩsid ajim.

² Maimuata edjã ee sĩi õor iekjo simta mamʉ salt pom jurur wejom iekjo mua ũrbaadejim. Mag simʉn ĩchab nem jẽbag pagthʉm pʉʉrbabaadem iekjonaa õor khapan arpa sir nʉm iekjo thʉnaajim.

³ Mag thʉnʉmʉn mag Ẽwandam juupjem porkhau sim bigaau ĩchab jooinpa ohood wejom dʉi mag dau jayap nemchaainjo ich paar sĩsidʉm bigaau phʉʉrdʉ meukhaar iiur au nʉm khʉʉn iekta mag thʉnaajim. Mag amau meukhaar au narr chan ãbmuajã pod khaugbajim, am denjo awaag. Ãba mʉg jẽb gaai jooba durrarr khʉʉn eem mag ciento cuarenta y cuatro mil peerdʉtkhatarr khʉʉnaupaita am denjo aau khaugjierram.

⁴ Makhʉʉn chan mʉg jẽb gaai aawaijã, jãg deeum ʉʉin dʉi khapes apiba jaaujemjo, ãba Ẽwandamagpaita ee aajerr khʉʉnau. Amauta chadcha Cordero nʉnʉʉukhampierr dʉi i bʉ ogdʉba wenʉrrajim. Amachta mag Ẽwandam athee maimua Cordero atheejã am chognaankha wenʉrraju aai naajim, chadcha mag atheeta warm khʉʉn eemua Ẽwandamau am peerdʉ autarr aawai.

⁵ Am mag seukha nʉrrjeejã khaba arr khʉʉn aawai bʉ̃ʉrjã am eugar jaauju khʉʉnjã chukhu ajim.

Ẽwandam chognaan thãrjupam khʉʉnau iek jaauthurtarr

⁶ Maimua mua deeum Ẽwandam chog edjã ee ũrr jorrom oo athajim. Magua mʉg jẽb gaai naajem khʉʉn athee Ẽwandamau ich mag maach iiupi wai nʉrraju iekta jaau jorrajim, durrpierr õor nʉnʉidʉm ee amach meupierr.

⁷ Mag irua jaau jorrarr iek mʉg ajim: “Ẽwandam dau na nem khaigbam wauju okho abat. Mag khãai irig jeeunaa iita tho iekhabat. Ya ĩsta irua õor ich aar phe auju wa phe auba warag isegju khãijã amach khĩircha jaauju ed pabaichem. Mʉg edjãjã ompaawi mʉg jẽbjã ompaatarragta jeeubathʉ̃. Ichdeuta ĩchab phũasjã ompaawi jẽb eemua do khumdʉ ober sĩsidʉmjã ompaajim” a jaau jorrajim, ũrr jorromua. Ma nacharamua iek jaau dichtarr ajim.

⁸ Mag ẽudee deeum Ẽwandam chog agjo ähäag urajim. Magua, Babilonia phoboron ya eegar pabaademta jaau jorrajim. “Ya eegar pajim” a sĩejim, “ar ich denjo durrpierram khʉʉnag parhoob pekau waupiejerr phobor.”

⁹ Makhʉʉn ẽudee ya thãrjupam agjo dewam Ẽwandam chog ũrr jorromua magmajim: “Ar jãg phũas eemua mepeer oberchetarragjã jeeunaa sĩi i khĩirkha wau simʉgjã jeeuwi ʉdʉraa amach dag gaai wa jua gaai khãijã i dauchach phãpitarr khʉʉnan

¹⁰ ichiita Ẽwandam khĩir machag sĩi maach thõojem benenjo simta ãwatab khaba ãwatjugui” ajim. “I khĩir machag mag simta am gaai meubapäaiwai Cordero dakhĩir maimua pekau chukhu ʉ̃gthar nʉm khʉʉn dakhĩirjã õtdau azufre dʉi waaureu wejom eeta jẽerjugui” a sĩejim, “ich mag dau aphʉʉ ag ee õt khierr jẽmer wenʉrramkhĩir.

¹¹ Mag am õt khierr jẽmer nʉm naar jĩu wejom chan chugpaajã khaugba, ich mag sĩerrʉm iekhau. Mag õtdau ee nʉm khʉʉn chan bʉ̃ʉrjã gaai nakha aa khaugba, ich mag edaram magwe machag jẽmer wenʉrrajugui” ajim, “amachdeu mag meperagta Ẽwandamagamjo jeeunaa ĩchab sĩi i khĩirkha wau sĩerragjã jeeunaa ʉdʉraa amach gaai i dauchach phãpitarr kõit.”

¹² Magam uguata ar Ẽwandam denkhanaa irua nem jaau sim ipierraanaa ĩchab Jesús bʉjã ogdʉba wenʉrrʉm khʉʉnan warag ubʉta ʉkha wenʉrraju aai nʉm. Ma ajim Ẽwandam chog thãrjupamua jaau dichtarr.

¹³ Maimua mua ũurwai ʉ̃gtharmuata woun iekjo mʉrʉg, “Cha mua pʉchig jawaagpam phãbá” a sĩejim. Mag irua phãpi sĩerr iek mʉg ajim: —Ĩsmua atagta chadcha ʉuhcha ajugui ajim, ar maach Por Jesús iek thãraucha ʉkha durrumua mee nʉm khʉʉn. Magbaawai Ẽwandam Akharaujã, —Jãan chadcha ich magau a sĩejim. Mʉg jẽb gaai aawai chadcha phithurg aaujerrjã par khaba aju aawai khĩir meeu nʉisijugui ajim, Ẽwandam athee amachdeu nem wajapha waaujerr jũrr.

Ẽwandam chognaanau õor pom ʉʉrppʉiju oopitarr

¹⁴ Magtarr khur deeu oo nʉʉ aawai jʉʉnthumieta edjã ee bau wejoojim. Mag bau wejom ʉ̃r woun ãb Emkhooi Iewaa Jesujoo simta oo sĩejim. Magua porsir phĩr den jũanaa ich jua ee hoz anʉm wai sĩejim, thuthuijo dee simta sĩi jũurthʉ sim.

¹⁵ Maig ĩchab deeum agjo Ẽwandam chog Aai i jeeujem degmua oberchewi mag jʉʉnthumie bau wejom ʉ̃r oo sĩerrag magchejim: “Ya nemjĩir phur wejoowai eeuju aai thʉnʉm. Ar pʉch jua ee thuthui wai simua thʉrrphewi eeubá” ajim, mʉg jẽb gayam khʉʉn khechpʉiju ora pabaadem jaauwi.

¹⁶ Magbaawai chadcha mag jʉʉnthumie bau wejom ʉ̃r oo sĩerrau ich thuthuíu mʉg jẽb ʉ̃r ʉʉrphebarmua waa nemjĩir dau thumaa eeu aujim.

¹⁷ Mag khur deeum Ẽwandam chog oberjim mag Aai i jeeujem di ʉ̃gthar sim eemua. Maguajã agjo ich jua ee mag thuthui hoz anʉm wai sĩejim.

¹⁸ Mag ẽudee agjo deeum oberchejim, ierr nasãdjo sim aarmua. Maguan ĩchab sĩi iekhabarmuapai mʉg durr thum uurdʉpi jaaubaawai, õtdaúapai mʉg durr thum opäaig nem jua theeg sĩejim. Magua mag ãbakhai jua ee thuthui wai sĩerrag thet khĩesir magjim: “Jẽb gaai uvado nʉnʉidʉm een ya sĩi waau ʉidʉm, jãg pʉch jua ee thuthui wai simua chi ierr thʉrrkha aupet. Ya waau thʉnaabahab” ajim, õor warre ʉʉrppʉiju jaauwi.

¹⁹ Magbaawai chadcha mag thuthui jua ee wai sĩerrau mʉg durr ʉ̃r ʉʉrphe, waa uvado nʉnʉid arr eem thumaa thʉrrkha aunaa chi cho piirjʉʉujem ee barkhʉʉipʉijim chi cho piirjʉumkhĩir. Mag chi cho piirjʉumkhĩir a simʉn, maan wajapcharan Ẽwandamau õor gaai jua khʉaba ich khĩir machag meeujuuta jaau sim.

²⁰ Magta phobor igaau arrnaa chi cho piirjʉupʉijim. Mag piirjʉubaadee, ag eemua chi cho sĩi dosĩgjo phur jĩubaademua, warpham magwe trescientos kilómetros sĩi bag phur ũur joisijim. Mag dojo ũur wejom naug ee cabaai dʉnʉʉupi ootarr akhiin, i opierrjo sĩejim, chi naug. Mag dojo ũur wejom a simʉn, õor khech nʉm jaar bag pom ãrjuuta jaau sim.