Apocalipsis 13 - Wounaan Meu

¹ Makhʉʉn dʉi werbʉagta mag chi õoirjo simua sĩi phũas igaau nʉ dʉnʉisijim. Maimua mua oowai mepeer pom sĩi ãbam gaaipai por khapan siete nenernaa kach khapanjã diez jʉjʉr simta phũas eemua mʉ dakhĩraa oberchejim. Mag phak kachjo jʉjʉr sĩsidʉmpierr porsir jũakhanaa ĩchab mag por khapan nener sĩsidʉm gaaijã Ẽwandam igwi parhoobata phã sĩsid ajim.

Mepeer numí sĩi khanjo sĩsid arr

² Mag mepeer phũas eemua oberbaichem mua ootarr, sĩi khum chi jojothorjo sĩejim. Mamʉ mag simta jũrr chi bʉ, jos bʉkhanaa, i i, león ikha sĩejim. Mag simʉg mag ãbakhai sĩi õoirjo sĩerrau ich jua theeg deebaawai ichjo iek theeg apijim.

³ Mag chi mepeer phũas eemua oberchetarr por, dau ãb sĩi nem pom thoop thʉnaajim, ya agua pod iiubajujo. Mamʉ mag thʉnarr, ãbakhai mag phũas igaau õoirjo sĩerrau irig ich jua theeg thum deetarr aawai ichdeupai ich por monaaupʉijim. Mag monaaubaadem oowi dauderraa nʉm iekhau thumaam khʉʉnau irigta ee aphobaadejim.

⁴ Magphobaademua warag mag õoirjo simʉgta Ẽwandamagamjo jeeujierram, mag ãbakhai phũas eemua oberchetarrag ich jua theeg deetarr jũrr. Mamʉ mag khumjo simʉgjã ĩchab Ẽwandamagamjo jeeumamua, “¿Khaita magan jãg mepeerjo jua theegnaa emkhooikha sĩ, i dʉi jãwaag?” a iekhamajierram.

⁵ Mag khumjo jojothor sim do eemua oberchetarrag ĩchab nem iek khaug iekhapinaa Ẽwandam igwiajã parhooba iek ãkhãraam ichdeu iekham aig iekhaju aai sim a jaaujim, chi õoirjo sĩerrau. Mamʉ mag i iek theeg apitarran, año thãrjup awi jãrrpaim atheepaita Ẽwandamau i magpijim.

⁶ Magbaa chadcha mag õoirjo sĩerrau ichig jaautarrjo parhooba iekhanaa, Aai i jeeujem di igwijã parhooba iekha, ya ʉ̃gthar oberwi durrum igwiajã parhoobam iekta iekha thʉnʉʉujim.

⁷ Magʉg ĩchab Ẽwandam iek ʉkhawi i chaainkha durrum khʉʉn dʉi werbʉmkhĩirjã jua theega apijim, mag werbʉwi ich garmua am podpʉimkhĩir. Magʉg ĩchab ichta ʉ̃rpai iek theeg apijim mʉg durr gaai õor thumaam khʉʉn dʉi. Magbaawai durrpierram khʉʉn dʉi ichta ʉ̃rpai sĩsijim, thumaam khʉʉn khãaijã.

⁸ Mag mepeer khumjo jojothor simʉgta mʉg atag paawai Ẽwandamagamjo jeeuju, ar thum Corderodam ʉdʉraa maach kõit ich thõopitarrau warr mʉg jẽb ompaabarwe ich ẽsap gaai am thʉ̃r phãkha auba arr khʉʉnau. Makhʉʉnta mag mepeer igar naaju aawai makhʉʉnauta maach chi Ẽwandam iek ʉkha nʉm khʉʉn dau aug wauju.

⁹ Magua jʉ̃g ʉ̃rʉʉ nʉm khai wajapha ũrbat:

¹⁰ “Preso maag thaabatarr khai, chadcha preso pʉr auju. Thuthuíu thõog thaabatarr khai, chadcha thuthuíu thõju.” Pari mag nʉmʉn, thum Ẽwandam iek ʉkha nʉm gaaimuau. Maguata Ẽwandam chaainan, amach mag phithurg auju khap, sĩi amachdeu ʉkhatarr iek gaaita warag ubʉ ʉkha wenʉrraju aai nʉm.

¹¹ Magtarr khur deeum mepeer jẽb eemua ober urum mua oojim. Ma jũrr corderojo kach numí wai sĩejim. Mag sim iekhaawain sĩi õoir iekjo simta jãgaamjo sĩejim.

¹² Mag simua ĩchab ãbakhai phũas eemua oberchetarr jua theeg thumaa ich gaai wai sĩejim. Maguata ich dakhĩir ich iekhau mʉg jẽb gayam khʉʉn thumaam khʉʉnag mag phũas eemua por pom thoop sim oberchetarragta Ẽwandamagamjo jeeupibaawaijã, chadcha i ipierraa jeeu naajim.

¹³ Mag jua theeg simua aawai ĩchab õrau ag na nem wau nʉm ooba aajempa waumamua edjã eemua õtdau khĩirta noseg che thʉnʉmjo apijim, thumaam khʉʉn dakhĩir.

¹⁴ Mag mepeer por pom thoop sim phũas eemua oberchetarr dakhĩir mag nacha õoirjo sĩerrau warm mepeer corderojo sĩerrag õor dauderraa nem waupijim, mag nem wau simua õor khũgur aumamkhĩir. Mag õor khũgur auwi chi corderojo sĩerrau warm mepeer ich khapeer khĩirkha waupijim; ajapcharan mag sĩi por pom thuthuíu thoop simjo sĩerrta deeu monaautarr khĩirma.

¹⁵ Maimua jũrr mag corderojo sĩerrag chi õoirjo sĩerrau ich juapá deewi mag khum jojothorjo sim khĩirkha wau sĩerr iiu aupijim. Mag nem inag den mepeer khĩirkha wau sĩerrta iiu auwi iek ober sĩsiewai thumaam khʉʉnau ichigta Ẽwandamagamjo jeeuba nʉm khʉʉnan khechpi jaaujim.

¹⁶ Mamʉ magpaijã khabajim. Mag ich khĩirkha wau sĩerr iiupi athaawai thumaam khʉʉnag ich dauchachta jua gaai wa dag gaai khãijã phãkhapi jaaujim. Chaaindam bʉ̃rʉʉmdam gaai, ya dʉrrcharam khʉʉn gaai, phatkhon paraam khʉʉn gaai, dau aphʉʉm khʉʉn gaai, sĩi chikham chogkha sĩsidʉm khʉʉn gaai, chikham chog khaba amach khõchagpierr nʉrrjeem khʉʉn gaaijã, thumaa mag dauchachta ʉdʉraa amach gaai phãkhapi jaaujim.

¹⁷ Mamʉ ar mag amach gaai mag mepeer dauchachjã chukhu ni i numerojã chukhu nʉm khʉʉnau chan pod amach garmua nem perjujã khaba, ni dich nem ig nʉmjã per auju khabam a jaaujim chi meperau.

¹⁸ Mʉg mua jaau chirʉm khaug awaagan dʉrrchata khĩirjug paraa aju aai sim. Chi mag khĩirjug khaphʉ simua khaug athá, magan mag mepeer dauchach khan número agá. Wajapcharan mag numeroon ĩchab woun mʉg atag sĩeju deneu. Chi número, 666 khabahab.