Apocalipsis 12 - Wounaan Meu

Õoirjo simua ʉʉi ẽudee ẽkhatarr

¹ Maimua edaujã ee ijaaur oberjim, Ẽwandamau ich jua theeg oomkhĩir pʉitarr. Mag ijaaur obertarr mʉg ajim: Ʉʉirauta sĩi ãsdawam edauta khajũajo jũanaa jũrr edaram edau arg gaai oo dʉnʉm edjã eemua oberchejim. Ich mag ʉʉirau porsir jũa sim gaai phĩdag sĩi docen ãb phuphup sĩejim.

² Mag khitʉmʉn jõor khitarr aawai agäa agäa khitajim, ya chaai awaag bi machgau.

³ Mag ʉʉi oberchetarr khur deeum ijaaur edjã ee oberjim. Mag ijaaur jũrr mʉg ajim: Õoirjo nem pooma sĩi phurii simta ãbam gaaipai por khapan siete nener simpierr porsir panhappha sĩejim. Mag simʉn ĩchab kach khapanjã jʉjʉrʉr diez wai sĩejim, phak kachjo sĩsidʉm.

⁴ Mag simua dur phis a thũaphebaraau warre edjã eem phĩdagjã jãrrchapaím mʉg durr ʉ̃r thũphãau sĩujim. Magwi mag ʉʉi chaai awaag bi machkha sĩerr khĩirphee nʉ sĩsijim, ich dakhĩir athaawai ag bʉrre chi chaaidam khopʉyaag.

⁵ Magua mag nʉ sim ee, mag machkha thʉnarr aawai, mag ʉʉirau chaai chi emkhooidam oojim. Mamʉ mag atham bʉrre ãbmua chi chaaidam jiirbaadewi Ẽwandam ich porkhau gaai oo sim aar wai dʉnaaimajim, ʉdʉʉr khopiba. Mag chaairauta jooipa sĩsiewai nem iek theeg jũrr durr mʉg wejom thumaa ichdeuta jʉ̃a sĩsiju a jaaujim mʉrʉg.

⁶ Magbaawai chi ãd jũrr sĩi jãhog wai naamkhĩir Ẽwandamau i athee nem thum khĩir khaug wai sĩerr aawai warp õor chukag ee mawi mamta año thãrjup awi jãrr sĩeimajim.

⁷ Maimua magtarr khur edjã ee juurhi phiidʉjim. Ʉ̃gtharm Ẽwandam chog Miguel anʉmta tagam ich khapeen agjo Ẽwandam chognaan dʉimua jũrr mag mepeer õoirjo simta sĩi por khapan sim dʉi werbʉ naajim. Mag õoirjo sim igar nʉm khʉʉnjã agjo khapan thʉnaajim.

⁸ Mamʉ chi angelnaanau amach garmua chi mepeer podbapäaiwai chi mepeer warre ich khapeen dʉi ʉ̃gtharmua jʉr werppʉijim.

⁹ Magta chadcha chi mepeer mag õoirjo sim ich khapeen ich igar thʉnarr khʉʉn dʉi ãba ʉ̃gtharmua mʉg jẽb gaai barkhʉʉipʉijim. Ich mag mepeerpaita warrgarwe nemkhõr gaai thʉ̃rnaa ĩchab Satanás a thʉ̃ʉrjem, durrpierr õor thumaam khʉʉn khũgurmie, ajapcharan dosãtma.

¹⁰ Magbaawai angelnaanta sereubaadem mua ũrjim. Mag sereubaademua mag naajim: “Ĩsta ya õor peerdʉju ed pabaichem. Mʉg durr gayam jua theeg thum jũrr maach Ẽwandam deneu. Maach Por Cristo ichdeucha jʉr autarrjã warag atcha iek theegta sĩsim. ¿Khan jãgwi? Edaram magwe maach hermanonaan eugar Ẽwandamag seukha nem ĩgkha nʉrraajerr ʉ̃gtharmua isegbapäaiwaima.

¹¹ Maimua jẽb gaaijã maach khodamnaanau amach garmuata mag mepeer podbapʉim, corderodamjo ʉdʉraa ich thõopitarr iekta ʉkhawia ag bagauta Ẽwandamag amach khaibag ʉpi nʉmua. Mag nʉm dʉi ĩchab amach dau aphʉʉ khechjujã igba, warag ogkhaba i iekta jaau durrarr gaaimuapata chadcha amach garmua i podpʉijierram.

¹² Magbarm gaaimua edaujãjã wounaanjo onee abat. Maimua pãach chi ag ee thʉnʉm khʉʉnjã thumaa onee abathʉ̃. Mamʉ ¡eh, apdurr, pãar jẽb gaai jooba durrum khʉʉn dʉi phũas ee jooba durrum khʉʉnjã agjo! Ya ich ũjãrr barapäaiwai meperan ĩsin meeukhata sĩsim thumaam khʉʉn dʉi. Irua ya khaphʉ sim, mʉigmua jopcha ya tag ichdeu ampierr abaju” a serereu khajierram.

¹³ Ya mag chi meperau ich mʉg jẽb gaai barapʉim oobaawai khĩir machgau jũrr mag ʉʉi chaai emkhooi ootarr ẽudeeta ẽkhabaadejim.

¹⁴ Mamʉ magbaawai ĩchab mag ʉʉirag nem ich dapag jĩmiejãu ichjo sĩsidʉm deejim, mag nemkhõr anʉm aigmua warre warp ũrramkhĩir. Mag ich paarpabaadeewai chi nemkhõrig ich chig apimaaugau warp ũrrbaadejim, õor barbag chʉʉi sĩeimaag, mamta año thãrjup awi jãrr sĩi i jãhog wai naaju arr aawai.

¹⁵ Magbaawai chi nemkhõriu waa doota soo abarmʉn, ich i eemua nem pom dosĩgjo bau jĩerrau joisijim, magbarmua dokhierr chʉug pogbar joisiewai ag ee chi ʉʉi khẽu khuurbʉ thõmkhĩir.

¹⁶ Mamʉ magbaawai ĩchab jẽbeujã ʉʉi khaigpermjo khaigperjim, mag nemkhõriu ich i eem doou dojã pom ompaa autarr sĩi eeg bereu athaawai.

¹⁷ Magbaawai chará chi mepeer mag õoirjo sĩerr warag chi ʉʉi dʉita meeukha sĩsiwi, jũrr chi chaain ewagam khʉʉn gaaita jua machag deeju awi, warag am dʉi werbʉan petajim. Mag chi chaain ewagam khʉʉn anʉmʉn, ar Ẽwandamau nem jaau sim thum ipierraanaa Jesucristoou chadcharam iek jaautarrjã ʉkhawi agtha ogdʉba ich mag ʉkha wenʉrrʉm khʉʉnau.