Apocalipsis 11 - Wounaan Meu

Ẽwandamau õor numí ich i jaaumkhĩir pʉitarr

¹ Maimua ãbmua padam duraa khitʉm mʉrʉg deejim. Mag deewi, —Jãgua chachbamí ajim; Aai i jeeujem di, ag ee nemchaain khechnaa phaa nʉmua Ẽwandamag jeeujem nasãd, maimua ag ee Aai i jeeu nʉm khʉʉnjã agjo chi khapanag beerbapʉi ajim mʉrʉg.

² Mamʉ ar daau gajãrcha õor biirdʉajem weu wejom chan oob chacham ajim, jã sĩi bʉ̃ʉrjã ʉkhaba aajem khʉʉn atheem aawai. Makhʉʉnauta año thãrjup awi jãrr Ẽwandam phobor dʉi sĩi amachdeu ampierr ajugui ajim.

³ Pari mamag khabaadeewai Ẽwandamau ĩchab ich i jaauju khʉʉn numí pʉijugui ajim, año thãrjup awi jãrr makhʉʉnauta sʉrkhaajem khajũa jũanaa irua amachig nem jaaubarm jũrr õrag jaaumkhĩir.

⁴ Chi Ẽwandam chogau jaauwai ich mʉkhʉʉnta jooi Zacarías khararrau olivo bʉ numí jaaunaa ĩchab lámpara ausĩiujemjã numí jaautarrau. Ajapcharan makhʉʉn numiim khʉʉnauta ajap õor dau aug wau nʉm jaar maach Ẽwandam thumaam khʉʉn Porkha sĩerrʉm iek jaauju khʉʉnau.

⁵ Makhʉʉnta ãbmua khãijã khaibag wauju ẽkhaju atheen, sĩi amach i eemua õtdaujo uu jẽjẽer khabaademua warre amach dʉi mag nʉm khʉʉn sĩi phaa khechpʉiju anaabá.

⁶ Makhʉʉnaun año thãrjup awi jãrr amachdeu Ẽwandam i jaau wenʉrrʉm ee bʉ̃ʉrjã noseg chepiba aagjã nem jua theeg naaju aajem. Do bagag paapʉimaagjã jua theegnaa ĩchab õor dau aug wawaagjã amachdeu am aig aju anaabá.

⁷ Maimua mag año thãrjup awi jãrr Ẽwandam iek jaau wenʉrrʉʉ awi, thum jaau aaipabaadee, mag ierr ithurm wejom ee thʉrrdo sim eemua mepeer sĩi jãgaamjo sim oberchewi, am dʉi werbʉchewi, ich garmuata am podpʉiwia am khechpʉiju.

⁸ Mag khechpʉiwi, thumaam khʉʉnag ich jua oomkhĩir, maach Por Jesucristo meerphe thõotarr ag phoborjã weug ee amach numwe sĩi eudʉtkha sĩuju. Mag phobor Jerusalenta ich khaibag gaaimua jũrr Sodoma a thʉ̃rnaa ĩchab Egipto gaai thʉ̃r sim, makhʉʉnjã ich agjo khaibag athee thʉ̃rphoo sĩerrjee arr aawai.

⁹ Mag khechpʉiwi khãai thãrjup awi jãrr sĩi kaaijã ee eudʉtkha sĩuju, õor phoborpierram khʉʉn amach meupierr meu khĩir pogkhe bee thʉnʉm khʉʉnag oomkhĩir. Mamʉ iwiir ãbam khʉʉnau mag oowi bepam iigwaijã chi khechtarrau ʉdʉʉr beppibaju.

¹⁰ Makhʉʉn numí mag Ẽwandam iek jaau wenʉrrʉm khʉʉn mag mepeer sĩi khanjo simua khechbapʉim abaawai, õor durrpierram khʉʉnta onee ajurau, Ẽwandam i jaau durrum gaaimua amach khajap sĩuba aajerr khʉʉnta ya khechbapäaiwai. Mag onegau jũrr agdaujo chikhamnag regalojã ʉahʉanaa phiestajã wauju.

¹¹ Mamʉ am mamagkham ee, mag khãai thãrjup awi jãrrnaa, deeu Ẽwandamau am akhaardam am gaai phãarthʉ sĩubaawai amach numwe deeu phiidʉtkhaju anaabá. Mag khechpʉiwia khãai thãrjup awi jãrr narrta deeu Ẽwandamau phiriutkha atham oobaawai chi oo nʉm khʉʉn wajappha jãphierrju aajem.

¹² Mag chi Ẽwandam i jaau wenʉrrarr khʉʉn deeu iiu phiidʉtkha nʉisiewai ʉ̃gtharmuata õor iekjo amag, “Mau ʉ̃gthar pidut” aju. Magbaawai chadcha edjã baug ee ʉ̃gthaa paaukhabaadeju. Mag am ʉ̃gthar paaukhabaadem am oomaphanaa am kha ukhur aajerr khʉʉnaujã oopʉiju.

¹³ Am mag ʉ̃gthar paaukhabaadem ee ʉʉur theega duuibaademua phobor eem dijã di khapan sĩi dʉrbagkhaju. Mag di chʉabagkhabarmua õor siete mil warre khechju. Magbaawai mag ʉʉurʉu khechba ʉu iiu nʉisim khʉʉnau ĩchab jãphierr durrumua Ẽwandam ʉ̃gthar kheraajem tho iekha nʉmua irig, “Ẽwandam, pʉchta chadcha emkhooirau; pʉjom chan ni ãbjã chukhum” ajurau, jãphierr nʉm iekhau.

¹⁴ Ma, trompeta seim sirtarr õor dau aug wauju jaau sim ajim, biek thãrjup waaur narr eem ya biek numiim. —Mamʉ agtha chacham ãb waaur sim ajim, thãrjupam. Ma nau jopcha oopijugui ajim mʉrʉg.

Ãbmiecharam trompeta sirtarr

¹⁵ Mag dau ãb waaur sim atarr aawai chadcha ĩchab deeum Ẽwandam chogau chi ãbmiecharam ich trompeta sirjim. Ma, sieteem ajim, ãbmiecharam. Mag sirbaadeewai ʉ̃gthar sĩi õor iekjo sereubaademua mag naajim: “Mʉg durran thumaa maach Por Ẽwandamaujã jʉ̃anaa, ichdeucha jʉr auwi maach Porkhapitarr dʉimuata jʉ̃aju aai nʉm. Mag, maach Ẽwandamauta mʉg durr gaai thum ichta ich mag chi Porkha sĩsiju” anaajim. (Éx. 15:18; Dn. 7:14,27)

¹⁶ Magbaawai ĩchab Ẽwandam khĩirphee mag jooin veinticuatro amach porkhaupierr ohood wejorr khʉʉnaujã eeg phõbkha jẽkhʉt dagau dʉrkhanaa irig jeeumamua mag naajim:

¹⁷ “Ẽwandam, pʉʉta maar Por thumaam khʉʉn khãaijã chi jua thierr aawai pʉrʉgta ʉu ajim anʉm. Ãba pʉchta warrgarwejã ich mag chitanaa ĩsjã ich agtha iiu chitʉm. Ĩs pua pʉch jua theeg thum auwi mʉg durr chadcha pʉchdeuta ya jʉ̃a chirsim.

¹⁸ Durrpierram khʉʉnta pʉ dʉin meeukha thʉnʉm; mamʉ ya pua am gaai pʉch khĩir machag meeuju ed pachejim. Ĩsin chad pua nawe khechtarr khʉʉn khĩircha jaaumamua amachdeu nem waaujerrjo pʉchdeujã am dʉi aju. Ĩsta ĩchab pʉch chogkhanaa pʉch i jaaumien dʉijã wajaphanaa pʉch chaainkha nʉm khʉʉn dʉijã wajapha aju edau, thethem khʉʉn wa sĩi parhoobam khʉʉn awijã ar pʉchig ee aajerr khʉʉn dʉi. Mamʉ ĩchab ĩsta pua ar mʉg jẽb gaai nem ãr nʉm khʉʉnjã opʉiju edau” anaajim, irig ee nʉmua.

¹⁹ Amau mag Ẽwandamag jeeuphobaadem ee mua oowai Ẽwandamag jeeujem diita weeudʉ joisijim, ʉ̃gthar. Mag weeudʉbaadem ee ierr mag warrgarwe ich chaain dʉi iek deetarr ãkhaajem baaudiita dawaa aadejim. Mag chi Ẽwandam di weeudʉbaadeewai, pagthʉmdau phʉr jẽjẽer khabaadem dʉi õor iekjo sereu joisimua, pagthʉm theega wʉwia ʉʉur theegjã duuibaadem dʉi noseg dau dap sĩi mokdaujo sĩsidʉmta che thʉnʉisijim.